မဿဲ 21
21
ယေရုရှလင်ဗြို့ဟှို ဝမ်တော်မူဟှူကြောန်း
(မာကု ၁၁.၁–၁၁; လုကာ ၁၉.၂၈–၄၀; ယောဟန် ၁၂.၁၂–၁၉)
1ယေရှုန တဗဲ့တော်လေဟှာ ယေရုရှလင်ဗြို့နားဟှို ရော့‑က်လာဘီးဟှာ သံလွင်တောန်ခေရင်းမာရှိဟှူ ဗက်ဖာဂေဝါဟှို ရော့‑က်ဂေ့လေဟှယ်။ ယေရှုဟှာ တဗဲ့တော်နှေ့ယော့‑က်ဟှို စေလွှတ်ဘီး 2“နန်းနို့ရှေ့မာရှိဟှူ ဝါဟှိုသွားဂေ့။ အယ်ဘီးဟှာ ခယ်ဟှားဟှူ မြည်းမနတူးဒူး သူ့ဘေးမာရှိဟှူ မြည်းသားဂန်းဟှားဟှို နန်းနို့ရှစ်ရှင်းတွိလေ့မယ်။ ကြိုးဟှိုဖြေဘီး ငါ့နားဟှို ယူလာဂေ့ပါ။ 3အယ်ဘီးဟှာ ယော့‑က်ယော့‑က်ဟှ နန်းနို့လေဟှို တခုခု မေးမယ် ဆိုဟှာ ‘သခင်ဘုရား#၂၁.၃ သခင်ဘုရား၊ အယ်မျိုးမှုဘဲနေဟှာ သူးနို့ရဲ့ဇရှင်။ လိုရှိဟှယ်’ ဆိုဘီး ပ္လန်ပြောဂေ့ပါ။ အယ်ဆိုဟှာ မြည်းဟှို ရှစ်ရှင်းပေးလိုက်လေ့မယ်” ဆိုဘီး မှာလိုက်လေဟှယ်။
4ပရောဖက် ဟောပြောဟှားဟှူ ကြောန်းရာလေဟှာ ပ္လဲ့ဇောင်လာဇာဟှ
5“ဇိအုန်ဗြို့ဟှို ပြောပါ။
ကေ့ရှုပါ။ နန့်ရဲ့ မန်းဂီးဟှာ နန့်နားဟှို ကြွလာတော်မူဘီ!
သူဟှာ နူးညံ့ဟှယ်။ အယ်ဘီးဟှာ မြည်းဟှို စီးတော်မူလေဟှယ်။
အယ်ဘီးဟှာ မြည်းသားဂန်းဟှို စီးတော်မူလေဟှယ်” ဆိုဘီး ဖြစ်လာလေဟှယ်။
6အယ်ကြောန့် တဗဲ့တော်လေဟှ ထွပ်ဟှားဘီးဟှာ ယေရှုမိန့်မှာဟှူတိုင်း လောက်ဆောန်ဂေ့လေဟှယ်။ 7သူးနို့လေဟှာ မြည်းမန မြည်းသားဂန်းဟှို ယူလာဘီးဟှာ ယေရှုထိုင်တော်မူဟှို့တွပ် သူးနို့လေရဲ့ ဝတ်လေဟှို တန်ဂေ့လေဟှယ်။ 8ကီးမားဟှူ လူအောက်ဂီးဟှာ သူးနို့ဝတ်လေဟှို လမ်းမာ ခန်းဟှားဂေ့လေဟှယ်။ တချို့ဟှ သစ်ပန်ဟှ သစ်ခတ်လေဟှို ခွတ်ဘီးဟှာ လမ်းမာ ခန်းဂေ့လေဟှယ်။ 9ယေရှုရဲ့ ရှေ့န နော့‑က်မာ လိုက်လာဂေ့ဟှူ လူအောက်ဂီးဟှ “ဒါဝိဒ်ရဲ့ သားတော် ဟောရှဏ္ဏဖြစ်ပါစေ! ဘုရားသခင်ရဲ့ နာမန ကြွလာဟှူ သခင်ဟှာ မင်္ဂလာရှိပါစေ! ဗြင့်ဆောင်းဟှူ နေရာမာ ဟောရှဏ္ဏဖြစ်စေပါ!” ဆိုဘီး ကြွေးကြော်ဂေ့လေဟှယ်။
10ယေရှုဟှာ ယေရုရှလင်ဗြို့ထဲဟှို ဝမ်လာဟှူ ခီမာ တဗြို့လောင်းဟှာ အောက်အောက်သဲသဲ ဖြစ်ဟှားဂေ့ဟှယ်။ လူလေဟှ “အယ်သူဟှ ဖယ်သူနူး” ဆိုဘီး မေးဂေ့လေဟှယ်။
11လူအောက်ဂီးဟှ “အယ်သူဟှာ ဂါလိလဲပြည် နာဇရက်ဗြို့ဟှ ပရောဖက် ယေရှုဖြစ်ဟှယ်” ဆိုဘီး ဖြေဂေ့လေဟှယ်။
ဗိမာန်တော်ဟှို ကြွတော်မူဟှူကြောန်း
(မာကု ၁၁.၁၅–၁၉; လုကာ ၁၉.၄၅–၄၈; ယောဟန် ၂.၁၃–၂၂)
12ယေရှုဟှာ ဗိမာန်တော်ဟှိုဝမ်ဘီး အယ်နေရာမာ ရောန်းဝယ်နေဟှူ လူလေဟှို နှန်ထုတော်မူလေဟှယ်။ ကိုယ်တော်ဟှာ ကပ်လဲမားလေရဲ့ ဗွဲလေန ချိုးငှတ်ရောန်းမားလေရဲ့ ထိုင်ခေါင်လေဟှိုလည်း မှော့‑က်ပစ်လေဟှယ်။ 13အယ်ဘီးဟှာ ကိုယ်တော်ဟှ “‘ငါ့အီတော်ဟှို ဆုတောန်းဟှူ အီတော် ဆိုဘီး ခေါ်ဝေါ်ဂေ့လေ့မယ်’ ဆိုဘီးဟှာ ကျမ်းစာမာ ရေးဟှားဟှယ်။ အယ်ဘေမဲ့ နန်းနို့လေဟှာ အီတော်ဟှို မ္လလေတွပ် ခိုအောန်းဟှူ နေရာ ဖြစ်စေဂေ့ဘီ!” ဆိုဘီး မိန့်တော်မူလေဟှယ်။
14ဗိမာန်တော်ထဲမာ မျစ်ကန်းလေန ခေသန်ဘဲဟှူ သူလေဟှာ ကိုယ်တော်နားဟှို လာဂေ့ဟှူကြောန့် ကိုယ်တော်ဟှလည်း သူးနို့ဟှို ကျန်းမာစေတော်မူလေဟှယ်။ 15ယဇ်ပုရောဟိတ်ဂီးလေန ကျမ်းပြုဆရာလေဟှာ ကိုယ်တော်ပြုဟှူ အံ့ဩဘွယ်မှုရာလေဟှို ဗြင်ဟှားဘီး သားဂန်းဟှားလေဟှလည်း “ဒါဝိဒ်ရဲ့သားတော် ဟောရှဏ္ဏဖြစ်ပါစေ!” ဆိုဘီး ဗိမာန်တော်ထဲမာ ကြွေးကြော်ဂေ့ဟှူ ခီမာ သူးနို့ဟှာ စိဆိုးဂေ့လေဟှယ်။ 16အယ်ကြောန့် သူးနို့ဟှ “အယ်သားဂန်းဟှားလေ ကြွေးကြော်နေဂေ့ဇာဟှို ကြားဘဲ့လော” ဆိုဘီး ကိုယ်တော့်ဟှို မေးလျှော့‑က်ဂေ့လေဟှယ်။
ယေရှုဟှ “ငါကြားဟှယ်။ ‘သားဂန်းဟှားလေန နို့စို့ဟှားလေရဲ့ နှောက်ထဲဟှ ချီးမွမ်းဇာဟှို ပြင်ဆင်တော်မူဘီ’ ဆိုဘီး ရေးဟှားဟှူ ကျမ်းစာဟှို နန်းနို့ဖတ်ဖူးဂေ့ဟှလော” ဆိုဘီး မိန့်တော်မူလေဟှယ်။
17အယ်ဘီးန ယေရှုဟှာ သူးနို့ဟှို ထားရစ်ဘီး ဗြို့ထဲဟှထွပ်ဟှားဟှယ်။ ဗေသနိဝါဟှို ကြွားဟှားဘီး အယ်နေရာမာ တညဉ့်တဲခိုတော်မူလေဟှယ်။
သဖန်းဗန်ဟှို ကီတော်မူဟှူကြောန်း
(မာကု ၁၁.၁၂–၁၄,၂၀–၂၄)
18ယေရှုဟှာ မိုးလန်းစောစောဂီး ဗြို့ဟှို ပ္လန်ကြွလာဟှူ ခီမာ ဗိုက်ဆာတော်မူလေဟှယ်။ 19ကိုယ်တော်ဟှာ လမ်းဘေးမာ သဖန်းဗန်တဗန်ဟှို ဗြင်ဘီး အယ်ပန်နားဟှို ကြွတော်မူလေဟှယ်။ အယ်ဘေမဲ့ ပန်ထပ်မာ ဝပ်လေဟှိုဘဲ့ တွိဟှူကြောန့် ကိုယ်တော်ဟှ “နန်ဟှာ ခုခီဟှနေစဘီး ကာလစဉ်ဆစ် လောင်းဝ သီးသီးစေန!” ဆိုဘီး အယ်ပန်ဟှို မိန့်တော်မူလေဟှယ်။ အယ်မူခီမာ သဖန်းဗန်ဟှာ တခါဒဲ သွိခြော့‑က်ဟှားလေဟှယ်။
20တဗဲ့တော်လေဟှာ အယ်မူဇာဟှို ဗြင်ဘီးဟှာ အံ့ဩဂေ့လေဟှယ်။ သူးနို့ဟှ “သဖန်းဗန်ဟှာ ဖယ်မူမျိုးဖြစ်ဟှူကြောန့် တခါဒဲ သွိခြော့‑က်ဟှားရနူး” ဆိုဘီး သူးနို့ရှင်းရှင်း မေးဂေ့လေဟှယ်။
21 #
မ ၁၇.၂၀; ၁ ကော ၁၃.၂ ယေရှုဟှ “ငါ မှန်တိုင်းပြောမယ်၊ နန်းနို့လေဟှာ သံသယမှေ့ဘဲန ယောင်ကြည်မယ် ဆိုဟှာ သဖန်းဗန်ဟှို ငါပြုဟှူမျိုး နန်းနို့ပြုနိုင်ဘီး အယ်ထတ်မက အယ်တောန်ဟှို ‘အယ်နေရာဟှနေရွေ့ဘီး ပန်လယ်ထဲဟှို က္လစေ’ ဆိုဘီး ပြောမယ် ဆိုဟှာ ပြောဟှူတိုင်း ဖြစ်လေ့မယ်။ 22နန်းနို့လေ ယောင်ကြည်မယ် ဆိုဟှာ တောန်းလျှော့‑က်ဟှူမျှဟှို ရဂေ့လေ့မယ်” ဆိုဘီး မိန့်တော်မူလေဟှယ်။
ယေရှုရဲ့ အခွမ့်အာဏာ
(မာကု ၁၁.၂၇–၃၃; လုကာ ၂၀.၁–၈)
23ယေရှုဟှာ ဗိမာန်တော်ဟှို ပ္လန်ကြွလာဘီး သွန်သန်နေခီမာ ယဇ်ပုရောဟိတ်ဂီးလေန ဘာသာရေးခေါန်းဆောန်လေဟှ ကိုယ်တော်နားဟှို လာဂေ့ဘီး “ကိုယ်တော်ဟှာ အယ်မူဇာလေဟှို ဖယ်သူ့ရဲ့ ခွမ့်အာဏာန ပြုလောက်ပါနူး အယ်အခွမ့်အာဏာဟှို ဖယ်သူပေးအပ်နူး” ဆိုဘီး မေးလျှော့‑က်လေဟှယ်။
24ယေရှုဟှ “နန်းနို့လေဟှို မေးခွန်းတခု ငါမေးအူးမယ်။ အယ်မေးခွန်းဟှို နန်းနို့ဖြေမယ် ဆိုဟှာ အယ်မူဇာလေဟှို ဖယ်သူ့ခွမ့်အာဏာန ငါလောက်ဟှယ် ဆိုဇာဟှို ငါပြောမယ်။ 25ယောဟန်ရဲ့ ဗတ္တိဇံဟှ ဖယ်နေရာဟှနေ ဖြစ်လာဟှယ်နူး ကောန်းဂန်ဟှနေ ဖြစ်လာဇာလော အယ်မျိုးမှုဘဲနေဟှာ လူလေဟှနေ ဖြစ်လာဇာလော” ဆိုဘီး မေးတော်မူလေဟှယ်။
သူးနို့လေဟှာ “နို့လေဖြားမျိုးပြောရမယ်နူး ‘ဘုရားသခင်ဟှနေ ဖြစ်လာဟှယ်’ ဆိုဘီး နို့လေဖြေလိုက်မယ် ဆိုဟှာ နန်းနို့ဟှာ ဖြားဖြစ်ကြောန့် ‘ယောဟန်ဟှို ယောင်ကြည်ဂေ့ဘဲနေရနူး’ ဆိုဘီး သူဟှ နို့လေဟှို မေးလေ့မယ်။ 26အယ်ဘေမဲ့ ‘လူလေဟှနေ ဖြစ်လာဟှယ်’ ဆိုဘီး နို့လေဖြေလိုက်မယ် ဆိုဟှာလူလေ အားလောင်းဂူဟှာ ယောဟန်ဟှို ပရောဖက်တပါးဖြစ်ဟှယ် ဆိုဘီး ယောင်ကြည်ဂေ့ဟှိကြောန့် လူလေဟှိုလည်း ကြော့‑က်ရဟှယ်” ဆိုဘီး သူးနို့ရှင်းရှင်း ဆွေးနွေးဂေ့လေဟှယ်။ 27အယ်ကြောန့် သူးနို့ဟှ ယေရှုဟှို “ကျွန်တော်ဟှားလေ သိဂေ့ဟှ” ဆိုဘီး ပ္လန်လျှော့‑က်ဂေ့လေဟှယ်။
အယ်န ယေရှုဟှ “ငါပြုဟှူအယ်မူဇာလေဟှို ဖယ်သူ့ခွမ့်အာဏာန ပြုဟှယ်ဆိုဇာဟှိုလည်း ငါပြောဟှ” ဆိုဘီး မိန့်တော်မူလေဟှယ်။
သားနှေ့ယော့‑က်ရဲ့ ပေါင်ဥပမာကြောန်း
28“နန်းနို့လေ ဖယ်မျိုးထန်မှတ်ဂေ့နူး လူတယော့‑က်မာ သားနှေ့ယော့‑က်ရှိလေဟှယ်။ သူဟှာ သားဂီးနားဟှို သွားဘီးဟှာ ‘ငါ့သား၊ အယ်နေ့ စဗျစ်ခြံဟှို သွားဘီးဟှာ အလောက်လောက်ပါ’ ဆိုဘီး ပြောလေဟှယ်။ 29သားဂီးဟှ ‘ကျွန်တော်သွားနိုဟှ’ ဆိုဘီး ပ္လန်ဖြေလေဟှယ်။ အယ်ဘေမဲ့ သူ့ရဲ့စိဟှာ ပ္လောန်းလဲဘီးဟှာ ခြံထဲဟှို သွားလေဟှယ်။ 30အယ်န ဖဟှ သားငယ်နားဟှို သွားဘီး အယ်မူမျိုးဘဲ့ ပြောလေဟှယ်။ အယ်သားဟှ ‘သွားပါမယ်၊ သခင်’ ဆိုဘီး ပြောဘေမဲ့လည်း သွားဘဲန နေလေဟှယ်။ 31အယ်သား နှေ့ယော့‑က်မာ ဖယ်သူဟှ သူ့ဖရဲ့ လိုဟှို လောက်ဆောန်ဟှယ်နူး” ဆိုဘီး မေးတော်မူလေဟှယ်။
သူးနို့လေဟှ “သားဂီး” ဆိုဘီး ဖြေဂေ့လေဟှယ်။
အယ်ကြောန့် ယေရှုဟှ “ငါ မှန်တိုင်းပြောမယ်၊ အခွန်ကော့‑က်မားလေန ကောန်းဘဲဟှူ မီးမလေဟှာ နန်းနို့ထတ်ဦးဘီး ကောန်းဂန်နိုင်ငံတော်ဟှို ဝမ်ဂေ့လေဟှယ်။ 32#လု ၃.၁၂; ၇.၂၉,၃၀ဖြားဖြစ်ကြောန့်နူးဆိုဟှာ ဗတ္တိဇံဆရာ ယောဟန်ဟှာ ဖြောန့်မတ်ဟှူ လမ်းအားဖြင့် နန်းနို့လေနားဟှို လာဘီး မှန်ဟှူလမ်းဟှို ပြဟှူလည်းဘဲ့ နန်းနို့လေဟှာ သူ့ဟှို ယောင်ကြည်ဂေ့ဟှ။ အယ်ဘေမဲ့ ခွန်ကော့‑က်မားလေန ကောန်းဘဲဟှူ မီးမလေဟှာ ယောင်ကြည်ဂေ့လေဟှယ်။ အယ်မူဇာလေဟှို ဗြင်ရဟှူ ခီမာလည်းဘဲ့ နန်းနို့လေဟှာ ယောင်ကြည်ဟှို့တွပ် စိပ္လောန်းလဲဂေ့ဟှ။”
စဗျစ်ခြံစောန့်မားလေရဲ့ ပေါင်ဥပမာကြောန်း
(မာကု ၁၂.၁–၁၂; လုကာ ၂၀.၉–၁၉)
33ယေရှုဟှ “တခြားပေါင်ဥပမာတခုဟှို နားထောင်ဂေ့။ စဗျစ်ခြံဟှို စိုက်ပျိုးဟှူ မ္လေဇရှင်တယော့‑က် ရှိလေဟှယ်။ သူဟှာ ခြံစည်းရိုးဟှို ကာဘီး စဗျစ်သီးနယ်ဟှို့တွပ် တွမ်းဟှို တူးလေဟှယ်။ အယ်ဘီးဟှာ မျှော်စင်တခုဟှိုလည်း ဆော့‑က်လေဟှယ်။ အယ်ဘီးမှ သူဟှာ စဗျစ်ခြံဟှို ခြံလောက်မားလေဟှို ငှားဘီးဟှာ ခရီးထွပ်ဟှားလေဟှယ်။ 34စဗျစ်သီးပေါ်ခီ ရော့‑က်ဟှူ ခီမာ စဗျစ်သီးယူဟှို့တွပ် သူ့စေခံလေဟှို ခြံလောက်မားလေနားဟှို စေလွှတ်လေဟှယ်။ 35ခြံလောက်မားလေဟှာ အယ်သူရဲ့ စေခံလေဟှို ဖမ်းဘီးဟှာ တယော့‑က်ဟှို ရိုက်၊ တယော့‑က်ဟှို သတ်ဘီး တယော့‑က်ဟှို က္လော့‑က်ခဲန ပစ်လေဟှယ်။ 36နော့‑က်ထပ်ခါ ခြံဇရှင်ဟှ ရင်ဟှထပ်များဟှူ စေခံလေဟှို လွှတ်လိုက်ဟှယ်။ ခြံလောက်မားလေဟှာ အယ်မူတိုင်းဘဲ့ လောက်ဂေ့လေဟှယ်။ 37ခြံဇရှင်ဟှ ‘အယ်သူလေဟှာ ငါ့သားဟှို လေးစားဂေ့လေ့မယ်’ ဆိုဘီး နော့‑က်ဆောင်းမာ သူ့သားဟှို စေလွှတ်လေဟှယ်။ 38အယ်ဘေမဲ့ ခြံလောက်မားလေဟှာ ဇရှင်ရဲ့သားဟှို ဗြင်ဟှူ ခီမာ ‘အယ်သူဟှာ ဇရှင်ရဲ့သားဖြစ်ဟှယ်။ လာဂေ့။ သူ့ဟှိုသတ်ဘီး သူ့ရဲ့အောက်စာဟှို ယူဂေ့ဇို့!’ ဆိုဘီး သူးနို့ရှင်းရှင်းပြောဂေ့လေဟှယ်။ 39အယ်ကြောန့် သူးနို့ဟှာ စဗျစ်ခြံဇရှင်ရဲ့ သားဟှို ဖမ်းဘီး ခြံပ္လန်ဟှို ဆွဲထုဘီးဟှာ သတ်ဂေ့လေဟှယ်။
40“အယ်မျိုးဆိုဟှာ စဗျစ်ခြံဇရှင် ရော့‑က်လာဟှူ ခီမာ ခြံလောက်မားလေဟှို ဖယ်မျိုးလောက်လေ့မယ်နူး” ဆိုဘီး မေးတော်မူလေဟှယ်။
41သူးနို့ဟှ “စဗျစ်ခြံဇရှင်ဟှာ အယ်လူဆိုးလေဟှို သေသတ်ပါလေ့မယ်။ အယ်ဘီးဟှာ ခြံဟှိုလည်း စဗျစ်သီး သီးဟှူ ခီမာ ခြံဇရှင်ဟှို ပေးဟှူခြံလောက်မားလေဟှိုဘဲ့ ငှားပါလေ့မယ်” ဆိုဘီး ဖြေဂေ့လေဟှယ်။
42ယေရှုဟှ “ကျမ်းစာဟှို နန်းနို့လေ ဖတ်ဖူးဟှလော၊
“‘တိုက်ဆော့‑က်မားလေ ဖယ်ဟှားဟှူ က္လော့‑က်ဟှာ
တိုက်ရဲ့ ထိဖျားဟှို ရော့‑က်လေဟှယ်။
အယ်မှုဟှာ ဘုရားသခင်အားဖြင့် ဖြစ်လာဘီး၊
နို့လေရဲ့ မျစ်စိရှေ့မာလည်း အံ့ဩဘွယ်ရာဖြစ်ဟှယ်!’
43“အယ်ကြောန့် နန်းနို့လေဟှို ငါပြောမယ်။ ဘုရားသခင်ရဲ့ နိုင်ငံတော်ဟှို နန်းနို့လေဟှနေဘီး ရောက်သီးဘီးဟှာ နိုင်ငံတော်ရဲ့ အသီးဟှို သီးမယ့်လူမျိုးလေဟှို ပေးလေ့မယ်။” ဆိုဘီး မိန့်တော်မူလေဟှယ်။ 44#၂၁.၄၄ တချို့ မူရင်းလတ်ရေးမူလေမာ ခန်းငယ် ၄၄ ဟှို၊ ယော့‑က်ယော့‑က်ဟှ အယ်က္လော့‑က်ထတ်ဟှို က္လမယ် ဆိုဟှာ အယ်သူဟှာ က္လိုးပဲ့ကြေမွဟှားလေ့မယ်၊ ယော့‑က်ယော့‑က်ထတ်ဟှို အယ်က္လော့‑က်က္လမယ် ဆိုဟှာလည်း အယ်သူဟှာ ညစ်ညစ်ကြေလေ့မယ်၊ ဆိုဘီး ထပ်ပေါန်းထဲ့ဟှားဟှယ် (ရှု လု ၂၀.၁၈)။
45ယေရှုရဲ့ ပေါင်ဥပမာစကားဟှို ယဇ်ပုရောဟိတ်ဂီးလေန ဖာရိရှဲလေ ကြားဟှူ ခီမာ သူးနို့လေကြောန်းဟှို မိန့်တော်မူဟှယ် ဆိုဇာဟှို သိဂေ့လေဟှယ်။ 46ယေရှုဟှို ဖမ်းဟှို့ ကြိုးစားဂေ့လေဟှယ်။ အယ်ဘေမဲ့ လူအောက်ဂီးဟှ ကိုယ်တော့်ဟှို ပရောဖက်ဖြစ်ဟှယ် ဆိုဘီး ထန်မှတ်ဂေ့ကြောန့် သူးနို့ဟှာ လူလေဟှို ကြော့‑က်ဂေ့ဟှယ်။
The New Testament in Dawei Language © The Word for the World International and The Dawei Bible Translation Committee, 2024.