Luk 24
24
Yesu kum vʋ'ʋgir la yɛla
(Mat 28:1-10; Mak 16:1-8; Jon 20:1-10)
1Ka Alasid daar linɛ an bakuai la pin'ilʋg daar la, bɛkɛung asuba, ka ba isigi keŋ yaʋgʋn la ka mɔri ba bʋnnyubisa linɛ ka ba ti'eb la. 2Ban paae la ba nyɛ ka kugir la biligi dig lɔsi'a sa ka bas yaʋg la, 3ka ba kpɛn' pʋʋgini gɔs ka pʋ nyɛ Zugsɔb Yesu niŋgbiŋ la. 4Ka lin paki ba ka ba nan zi'e bʋra la, ba nyɛnɛ ka nidib ayi' zi'e kpi'e ba ka yɛ fuud ka li nyɛɛn hali. 5Ka dabiem gban'e pu'ab la hali, ka ba zaŋi ba zuti kpa' teŋ. Ka dap la bu'osi ba ye, “Bɔ ka ya ieed onɛ vʋe la banɛ kpi la zin'iginɛ? 6O ka' kpɛla. O vʋ'ʋg kumin. Tɛnri on daa nam bɛ Galile ka yɛli ya si'em la ye, 7‘Ba na gban'e Ninsaal Biig la tis tʋʋmbɛ'ɛd dim, ka ba kpa' o dapuudir zug, ka li daba atan' daar la, o na vʋ'ʋg kumin.’”
8Ka ba tiɛn o pian'ʋk la, 9ka naan yaʋgʋn la lɛbidi kun ka yɛl o nya'andɔlib pii nɛ yinne la nɛ nimbanɛ kpɛlim la wʋsa linɛ niŋ la.
10Li da anɛ Mɛɛri Magdalen nɛ Joanna nɛ Jemes ma Mɛɛri nɛ pu'a sieba da yɛl tʋmtʋmnib la nɛ'ɛŋa. 11Ka ba tɛn'ɛs ye pu'ab la yɛli ba si'el la anɛ pian'ayaalis ka pʋ siakɛ. 12Ka Pita duoe zɔɔ keŋ yaʋgʋn la kunni gɔsi nyɛ kasiŋ la ma'aa, ka lɛbi kuli tɛn'ɛsid linɛ niŋ la yɛla.
Nya'andɔlib ayi' banɛ daa keŋ Emaus teŋin la yɛla
(Mak 16:12-13)
13Daakan la ka Yesu nidib ayi' daa ken teŋ kan ka li yʋ'ʋr buon Emaus la. Li anɛ wʋʋ maila ayɔpɔi nɛ Jerusalem. 14Ka ba pian'ad nɛ taaba bʋn linɛ wʋsa maal la. 15Ka ban nam kpɛm pian'ad ka sɔnsidi li yɛla la, ka Yesu mɛŋ li'eli ba, ka ba la'am ken. 16Ka li ligili ba ya'am, ka ba pʋ baŋ oo.
17Ka o bu'osi ba ye, “Bɔ sɔnsig ka ya sɔnsid nɛ taaba?”
Ka ba zi'e baanlimm nɛ sʋnsa'aŋ. 18Ka nid yinne onɛ yʋ'ʋri buon Kleopas la bu'os o ye, “Fʋn gʋllim an saanne kɛn Jerusalem na, ka pʋ baŋ bʋn linɛ maal dabisa nwa' la bɛɛ?”
19Ka o bu'osi ba ye, “Bɔɔ maalɛ?”
Ka ba yɛl o ye, “Li anɛ Yesu onɛ yi Nazaret na la, onɛ daa an Wina'am nɔdi'es la, ka tʋm tʋʋmnyalima, ka pian'ad nɛ paŋ, Wina'am nɛ nidib san'an la yɛla. 20Ka ti maanmaannib kpɛɛmnam nɛ na'anam daa kɛ ka ba kad o saria, ka kʋʋs ye asɛɛ ba kpa' o tabil dapuudir zugʋ kʋ o. 21Ka ti daa mɔr pʋtɛn'ɛr ye onɛ na faaɛn Israel dim la. Amaa li anɛ daba atan' zina, ka yɛl kaŋa nwa' maal. 22Ka pu'a sieba banɛ bɛɛ ti san'an la, kɛ ka ti lidig hali. Ba isigi keŋ yaʋgʋn la, 23ka pʋ nyɛ niŋgbiŋ laa, ka lɛb na yɛl ye, ba nyɛ maliaknam banɛ yɛli ba ye, o vʋ'ʋgya. 24Ka ti ninsieba mɛ keŋ yaʋgʋn la, ka nyɛ ka li anɛ wʋʋ pu'ab la yɛl si'em la. Ka ba mɛ pʋ nyɛ oo.”
25Ka Yesu yɛli ba ye, “Zɔn nɛ ya'am pɔɔdim dima, bɔ ka ya pʋ niŋ Wina'am nɔdi'esidib la da yɛl si'el la wʋsa yadda? 26Li pʋ nar ye Kristo namis nɛ yɛlbama nwa' wʋsa, ka naan yʋ'ʋn dii o na'am laa?” 27Ka o pin'ili pa'annɛ ba o mɛŋ yɛla, wʋʋ Moses nɛ Wina'am nɔdi'esidib wʋsa da sɔb Wina'am gbauŋ pʋʋgin si'em la.
28Ka ban daa ti li'el teŋ kan ka ba wa'ae la, o daa maal wʋʋ o bɔɔd ye o gaadnɛ. 29Ka ba sɔs o ye, “Dɔlli ti keŋ gbɛn, bɔzugɔ zaam ma'anɛ ka yʋ'ʋŋ bɔɔd sɔb.” Ka o siak, ka dɔlli ba.
30Ka ban daa zin'in ye ba di la, o daa zaŋ bodobodo pʋ'ʋs Wina'am bareka, ka gbin'esi tisi ba. 31Ka ba ya'am yʋ'ʋn nie, ka ba baŋ on an sɔ'. Ka o kpɛm mɛlimi ba tuon. 32Ka ba bu'os taaba ye, “On pa'a pian'ad nɛ ti ka tu'asid linɛ bɛ Wina'am gbauŋ la suorin la, li pʋ niŋi ti sʋnya malisim hali?”
33Ka ba duoe saŋkan la lɛb Jerusalem nyɛɛ o nya'andɔlib pii nɛ yinne nɛ banɛ bɛɛ ba san'an la, ka ba pʋn la'as taaba sa, 34ka yɛt ye, “Amɛŋa, Zugsɔb la vʋ'ʋgya, ka nie o mɛŋi pa'al Simon.” 35Ka ba nidib ayi' la mɛ tu'asi ba bʋn linɛ maal suorin la nɛ on gbin'es bodobodo la si'em, ka ba baŋ o la.
Yesu nie o mɛŋ o nya'andɔlib san'an la yɛla
(Mat 28:16-20; Mak 16:14-18; Jon 20:19-23; Tʋm 1:6-8)
36Ka ban nam bɛ anina pian'ad nɛ'ɛŋa la, ka Yesu mɛŋ zi'eni ba sʋʋgin ka yɛli ba ye, “Sumalisim bɛ nɛ ya!”
37Ka ba yirig hali ka li lidigi ba ka ba tɛn'ɛs ye, ba nyɛnɛ silinsiiug. 38Ka o yɛli ba ye, “Bɔ ka li paki ya ka ya mɔri bi'esʋg pʋtɛnda ya sʋnya ni? 39Gɔsimini m nu'us nɛ m nɔbpansimpana, ka baŋ ye manɛ la. Si'isiminimɛ gɔsi, silinsiiug mɔr niŋgbiŋ nɛ kɔnba wʋʋ yanamɛ nyɛɛm ka m an si'em laa?”
40Ka on pian' nɛ'ɛŋa naae la ka nɔk o nu'us nɛ o nɔbpansimpana pa'ali ba. 41Ka ban nam bi'esid bʋnnyalima linɛ ka ba nyɛ ka li lidigi ba ka mɛ ma'ae ba sʋnya la zug, ka o bu'osi ba ye, “Ya mɔr si'eli na dii?” 42Ka ba zaŋ ziiŋdʋgida tis o, 43ka o nɔki lii ɔnbi ba nini ni.
44Ka o yɛli ba ye, “Pian'abama nwa' aan m pian'ʋk ka m daa pian' tisi ya mam daa nam bɛ nɛ ya la ye, lin wʋsa sɔbi m yɛla ka bɛ Moses wada gbana ni nɛ Wina'am nɔdi'esidib gbana ni nɛ yʋʋma gbana ni la niŋ sida.”
45Ka o kɛ ka ba pʋtɛnda yɔ'ɔg ye ba baŋ linɛ bɛ Wina'am gbauŋʋn la gbin. 46O yɛli ba ye, “Ala ka li sɔb ye, Kristo la na namis ka daba atan' daar ka o vʋ'ʋg kumin. 47Ka ye o yʋ'ʋrin ka mɔɔnmɔɔnib na pin'il Jerusalem mɔɔli tis buudi wʋsa ye ba tiakim ka Wina'am na yisi ba tʋʋmbɛ'ɛdi bas. 48Ya nyɛ nɛ'ɛnam wʋsa ka na dii li kasɛt. 49M na tʋmi m Ba' zi'el nɔɔr sɔ' yɛla la tisi ya, amaa bɛɛi tempʋʋgin la ti paae saŋa kan ka ya na pɛ'ɛl nɛ onɛ bɛ saazug la paŋ.”
Yesu kpɛn' arezana ni la yɛla
(Mak 16:19-20; Tʋm 1:9-11)
50Ka o dɔlli ba laligi paae wʋʋ Betani, ka ʋk o nu'us agɔla ka niŋi ba bareka. 51Ka on niŋidi ba bareka la ka kpɛn dʋt arezana ni ka basi ba. 52Ka ba pʋ'ʋs o ka lɛb Jerusalem nɛ sumalisim bɛdegʋ, 53ka kpɛm bɛ Wina'am Pʋ'ʋsim Yin la daar wʋsa tisid Wina'am bareka pʋ'ʋsim.
© 2023, Ghana Institute of Linguistics, Literacy and Bible Translation