Luk 21
21
Pʋkɔɔnr piini la yɛla
(Mak 12:41-44)
1Ka o gɔdigi gɔs ka nyɛ kpan'am dim la mɔri ba piini sʋʋd Pʋ'ʋsim Yir ligidi daka ni la, 2ka nyɛ pʋkɔɔnr nɔŋdaan ka o kena niŋ kɔnba ayi'. 3Ka o ye, “Asida ka m yɛti ya ye, pʋkɔɔnr nɔŋdaan nwa' niŋ ligidi bɛdegʋ gaad nidib la wʋsa. 4Bama la yis nɛ ba kpan'am linɛ an bɛdegʋ la kena niŋ. Amaa on onɛ an nɔŋdaan la nɔknɛ o zan'a-zan'a tis ka kɛ zaalim.”
Wina'am Pʋ'ʋsim Yir la san'auŋ yɛla
(Mat 24:1-2; Mak 13:1-2)
5Ka sieba pian' ban nɔk kugsʋma maal Pʋ'ʋsim Yir la ka li vɛnl hali, la'an nɛ piini linɛ ka ba tisid la yɛla. 6Ka Yesu yɛli ba ye, “Dabisir kenna ka bʋn banɛ ka ya nyɛt la, baa kugir yinne kʋ kpɛlimmi li tiraan zuginɛɛ. Ba na lɔbi ba wʋsa bas teŋin.”
Daamʋg nɛ namisʋg la yɛla
(Mat 24:3-14; Mak 13:3-13)
7Ka ba bu'os ye, “Pa'anna, saŋkan ka lina ye li niŋɛ? Ka lin ti ye li niŋ saŋa si'a la, zanbin bɔɔ na ti pa'alɛ?”
8Ka Yesu yɛl ye, “Gu'usimi ka da kɛ ka ba ma' ya ka ya yidigɛ; ka nidib bɛdegʋ na ti nɔki m yʋ'ʋri kena yɛt ye, ‘Manɛ la,’ bɛɛ yɛt ye, ‘Saŋa la li'el ya.’ Da dɔlli nimbamanam taaba. 9Ka ya ya'a ti wʋm tanp nɛ zaba yɛla, yanam da zɔti dabiem, ka li anɛ ye nɛ'ɛnam wʋsa niŋ yiiga, amaa naar la lɛɛ kʋ kpɛn dɔlli lii.”
10Ka yɛli ba ye, “Tɛɛns na zabid nɛ taaba, ka na'ab sʋ'ʋlim zabid nɛ na'ab sʋ'ʋlim mɛn, 11ka tɛɛns na mi'im hali ka kɔ'ɔm na lu zin'is bɛdegʋ ka wibɛ'ɛdnam linɛ lɔmisid nidib la na bɛ, ka ya na nyɛ bʋnnyalima linɛ mɔr dabiem saazug.
12“Ka nɛ'ɛŋanamɛ ti ye li niŋ la, ba na gban'e ya namisi ya mɔri ya keŋ la'asʋg dɔɔdin nɛ sanreganamin, ka mɔri ya kɛn na'anam nɛ gɔmenanam tuon man yʋ'ʋr zug. 13Saŋa kan ka ya yʋ'ʋn na nyɛ suori pian' m yɛla. 14Li ya'a ti an ala, yanam gban'aminɛ ya mɛŋ ka da kɛ ka yanamɛ na lɛbis si'em la paki yaa. 15Ka m na tisi ya pian'ad nɛ ya'am linɛ ka ya dataas la kʋ nyaŋi lɛbisi ya, bɛɛ ki'isi yaa. 16Ya saamnam nɛ manam nɛ ya ba'abiis nɛ ya teŋin dim nɛ ya zuanam na gban'e ya tis kpi'euŋ dim ka ba na kʋʋ ya sieba, 17ka nidib wʋsa na kisi ya mam yɛla. 18Ka ya zuobʋg baa yinne kʋ bɔdigɛ. 19Ka ya mɔdigir la zug ka ya na faaɛn ya nyɔvʋr.
Yesu tu'as Jerusalem san'auŋ la yɛla
(Mat 24:15-21; Mak 13:14-19)
20“Ya ya'a ti nyɛ ka soogianam giligid Jerusalem, yanam baŋim ka li san'auŋ li'el ya. 21Kɛlli ka banɛ bɛ Juda teŋin zɔɔ dʋ zuoya, ka kɛ ka banɛ bɛ tempʋʋgin la widig ka bas tempʋʋg la, ka banɛ bɛ teŋ la teŋkpɛmis da kena kpɛn'ɛɛ. 22Ka nɛ'ɛŋa an tʋʋmbɛ'ɛd namisʋg dabisir la, ye li kɛ ka linɛ da sɔb Wina'am gbauŋʋn la niŋ sida. 23Woo! Li na tɔi tis pu'a banɛ mɔr pʋʋs nɛ banɛ mɔr bilies saŋkan la. Namistita'ar na paae teŋ kan la ni ka Wina'am sʋnf na pɛlig nɛ nimbama. 24Ka ba na zaŋ zaba sʋ'ʋsi kʋʋ ba, ka buudbanɛ ka' Jew dim na gban'e ba wʋʋ sanrega dim nɛ mɔri keŋ tɛɛns wʋsa ni ka san'am Jerusalem yɔri-yɔri hali ka ba saŋa nyaan ti paae.
Ninsaal Biig la ken la na yɛla
(Mat 24:29-31; Mak 13:24-27)
25“Nyalima na bɛ winnigin nɛ nwadigin nɛ nwadbibisin. Dunia ni, teŋgbana na nyɛ yɛlpakir ka li lidigi ba, atɛuk nɛ ku'opilaa na lɛ'ɛd hali ka maan tʋkpiidʋg la zug. 26Dabiem na kɛ ka nidib lidigi ga'aŋ ban na ti nyɛ yɛlbanɛ maan dunia ni la. Bɔzugɔ, Wina'am na ti dam ka mi'im bʋn linɛ wʋsa mɔr kpi'euŋ saazug. 27Saŋkan la ka ba na nyɛ ka Ninsaal Biig la kenna nɛ saŋgbana, nɛ o paŋ tita'ar nɛ na'am pipilim. 28Ka nɛ'ɛnam ya'a ti pin'ili naamid, duom zi'en, ka gɔdigi gɔs agɔl; ka ya yɔlisim la pʋ lalla.”
Tiis siiliŋ
(Mat 24:32-35; Mak 13:28-31)
29Ka Yesu yɛli ba siiliŋ ye, “Gɔsimi kekaŋ nɛ tiis wʋsa. 30Ya ya'a ti nyɛ ka ba busid vanpɔla ya mi' ye sigir li'el ya. 31Ala mɛn ya ya'a ti nyɛ nɛ'ɛnam wʋsa ya na baŋ ye Wina'am na'am la pɔnri.
32“Asida ka m yɛti ya ye, zʋmaʋŋ kaŋa nwa' nidib kʋ gaadɛ, asɛɛ nɛ'ɛnam wʋsa niŋ. 33Saazug nɛ dunia na gaad, amaa man pian'ad la kʋ maligim gaadɛ.
Mɛŋ gu'usig la yɛla
34“Gu'usimi ka ya'a ka' alaa, ya ya'am na pɛ'ɛl nɛ di'ema nɛ danuur nɛ si'elnam linɛ paki ya yɛla, ka daakan la libigi ya 35wʋʋ baŋi gban'ad si'el si'em la. Ala mɛn li na ti libig nimbanɛ bɛ dunia ni la wʋsa. 36Gu'usimi ka sɔsidi Wina'am saŋa wʋsa, ka linɛ na kɛ ka ya nyɛ paŋ kanɛ ka ya na ti nyaŋi yi yɛlbama nwa' ni, ka mɛ nyaŋi zi'en Ninsaal Biig la tuon.”
37Ka daar mɛkama ka o pa'annɛ ba Wina'am Pʋ'ʋsim Yin, ka zaam ɛɛnti ma'ae ka o keŋ gbɛn zuokanɛ ka ba buon ye Olif zuor la zug. 38Ka bɛkɛung asuba ka nidib wʋsa la'asid o san'an Wina'am Pʋ'ʋsim Yin la kɛlisid o pian'ad.
© 2023, Ghana Institute of Linguistics, Literacy and Bible Translation