Joon 4
4
Yesu nɛ Samaria dim pu'a la yɛla
1Yesu daa ti baŋ ye Farisii dim wʋm ya ye, on Yesu sʋʋd nidib Wina'am ku'om gaad Joon. 2Amaa Yesu nya'andɔlib la daa sʋʋdi ba ku'om, ka ka' Yesu mɛŋa. 3On wʋm ban yɛt si'el la, o daa yi Juda sʋ'ʋlimin keŋ Galile sʋ'ʋlimin.
4Li daa anɛ tilas ye o dɔlli yi Samaria sʋ'ʋlim; 5ka o keŋ paae Samaria teŋ si'a ka ba buon ye Sikar, linɛ kpi'e pɔkanɛ ka Jakob da tis o biig Josef la. 6Ka Jakob bulig bɛɛ anina, ka Yesu paae ani ka gɛɛnlis mɔr o ka o zin'in bulig la zug, ka li an nintaŋ tisʋʋs.
7Ka Samaria dim pu'a sɔ' kena ye o wik ku'om. Ka Yesu yɛl o ye, “Tisim ku'om ka m nu.” 8(Bɔzugɔ o nya'andɔlib la gaadnɛ tempʋʋgin ye ba da' diib na.)
9Ka pu'a la lɛbisi bu'os o ye, “Bɔ ka fʋn onɛ an Jew nid, sɔsid man onɛ an Samaria dim pu'a ye, m tisif ku'om.” (Bɔzugɔ Jew dim nɛ Samaria dim nɛ'ɛsidnɛ taaba.)
10Ka Yesu yɛl o ye, “Fʋ ya'a mi' Wina'am piini an si'el, ka lɛm mi' onɛ yɛtif ye tisim ku'om la, fʋ naan sɔsin o ka o tisi nɛf vʋm ku'om.”
11Ka pu'a la lɛbisi yɛl ye, “M Zugsɔba, fʋ pʋ mɔr lɔbidiŋ ye fʋ wikɛ, ka bulig la mɛ zulim. Yaanɛ ka fʋ na paam vʋm ku'okaŋa? 12Fʋ gat tinam yaab Jakob onɛ tis tinam bulig la, ka mɛ nu bulig la ku'om nɛ o biis nɛ o bʋnkɔnbid laa?”
13Ka Yesu lɛbisi yɛl o ye, “Onɛ wʋsa nu bulkaŋa ku'om la, ku'onuud na lɛm gban'e o. 14Amaa onɛ wʋsa na nu ku'okanɛ ka m na tis o la, ku'onuud kʋ maligim gban'e on sɔba. Amaa ku'okanɛ ka m na tis o la na ti nwɛnɛ bulig on sɔb pʋʋgin, ka li na buli tis o nyɔvʋr kanɛ ka' naarɛ.”
15Ka pu'a la lɛbisi yɛl o ye, “M Zugsɔba, tisim ku'okan ka m nu, ka ku'onuud kʋ lɛm gban'e ma, ka m kʋ lɛn kɛn kpɛla na wikid ku'om.”
16Ka Yesu yɛl o ye, “Kem buoli fʋ sid na.”
17Ka pu'a la lɛbisi yɛl o ye, “M pʋ mɔr sida.” Ka Yesu yɛl o ye, “Fʋ pian' yɛlsida, fʋn yɛl ye fʋ ka' sid la. 18Fʋ kulnɛ sidib anu nwa'. Ka onɛ ka fʋ bɛ nɛ o nannanna la ka' fʋ sida. Li anɛ yɛlmɛŋir ka fʋ yɛl.”
19Ka pu'a la yɛl Yesu ye, “M Zugsɔba, m baŋ ka fʋ anɛ Wina'am nɔdi'es. 20Ti yaanam da pʋ'ʋsid Wina'am zuokaŋa zug. Ka yanam Jew dim yɛt ye, li sʋ'ʋm ka ti pʋ'ʋs Wina'am nɛ Jerusalem.”
21Ka Yesu yɛl o ye, “Pu'aa, siakim m ye, saŋa kenna, ka ya kʋ pʋ'ʋs zuokaŋa zug bɛɛ Jerusalem pʋʋgini tisidi ti Ba' Wina'am ya'asɛ. 22Yanam pʋ'ʋsidnɛ tisid bʋnkanɛ ka ya zi'. Tinam pʋ'ʋsidnɛ tisid bʋnkanɛ ka ti mi', bɔzugɔ faangir la yitnɛ Jew dim san'an na. 23Amaa saŋa kenna, ka li paae ya, ka banɛ pʋ'ʋsid amɛŋa tisidi ti Ba' Wina'am la na pʋ'ʋs nɛ siig nɛ yɛlmɛŋir. Ti Ba' Wina'am bɔɔdnɛ banɛ pʋ'ʋsid pʋ'ʋskan la buudi. 24Wina'am anɛ siig, Ka li sʋ'ʋm ye banɛ pʋ'ʋsid o la pʋ'ʋsim o nɛ siig nɛ yɛlmɛŋir.”
25Ka pu'a la lɛbisi yɛl o ye, “M mi' ye Mazaya, onɛ ka Wina'am gaŋ la kenna, onɛ ka ba buon ye Kristo la. O ya'a ti kena, o na pa'ali ti si'el wʋsa.”
26Ka Yesu yɛl o ye, “Man onɛ pian'adi tisidif la, an on sɔb.”
27Ka ban sɔnsi naae la, ka o nya'andɔlib la kena, ka li lidigi ba, on sɔnsid nɛ pu'a la, amaa ka sɔ' pʋ bu'os pu'a la ye, “Bɔ ka fʋ bɔɔda?” Bɛɛ bu'os Yesu ye, “Bɔ ka fʋn nɛ pu'a la sɔnsida?”
28Ka pu'a la bas o yʋʋr la, ka keŋ tempʋʋgin la yɛl nidib la ye, 29“Kemi na gɔs dau kanɛ yɛl man zugin yɛla wʋsa. Onɛ pa'ati an Kristo la bɛɛ?” 30Ka ba yi tempʋʋgin la kɛɛn o san'an na.
31Saŋkan la ka o nya'andɔlib la sɔs o ye, “Pa'anna, dim diib.”
32Ka o yɛli ba ye, “M mɔr diibi na di, amaa ya zi'.”
33Ka o nya'andɔlib la yɛl taaba ye, “Sɔ' mɔr diib na tis o bɛɛ?”
34Ka Yesu yɛli ba ye, “M diib anɛ ye m tʋm onɛ tʋmi m la na bɔɔdim naae. 35Ya pʋ yɛt ye, ‘Li kpɛlim nwadis anaasi ka ki bunib saŋa paae?’ Gɔsimi, m yɛti ya ye, gɔdigimi ya nindaasi gɔs pɔɔd la. Ba sid pɛlignɛ gur bunib. 36Onɛ bʋn di'ednɛ yɔɔd, ka vaad zʋʋd la ka li nwɛnɛ nimbanɛ niŋ yadda kpɛn'ɛd nyɔvʋr linɛ ka' naarin si'em la. Bɔzugɔ onɛ bʋd nɛ onɛ bʋn na la'asi nyɛ sumalisim. 37Ala ka pian'ʋk la niŋ amɛŋa ye, ‘Yinne bʋd nɛ. Ka yinne mɛ bʋn.’ 38M tʋmi ya nɛ ye ya keŋ bʋn dinɛ ka ya pʋ kuaa. Sieba daa kua. Amaa yanam di'enɛ tʋʋma la nyɔɔd.”
39Samaria dim bɛdegʋ banɛ bɛ teŋ kan la pʋʋgin daa niŋ Yesu yadda, pu'a la yɛl si'el la zug, ye, “O yɛl man zugin yɛla wʋsa.” 40Ka Samaria dim la kɛɛn o san'an na la, ba sɔs o ye, o bɛ nɛ ba. Ka o kpɛlimmi ba san'an daba ayi'.
41Nidib bɛdegʋ daa niŋ o yadda ya'as, o yɛlʋg la zug, 42ka yɛl pu'a la ye, “Di lɛn ka' fʋn yɛl si'el la zug ka ti niŋ o yadda. Amaa tinam mɛŋ-mɛŋ wʋm o yɛlʋg la, ka baŋ ye dau kaŋa sid anɛ dunia la faangid.”
Yesu ti'eb na'ayikpɛɛm biig
43Yesu daa bɛ Samaria daba ayi' ka tɔɔm anina keŋ Galile; 44#Mat 13:57; Mak 6:4; Luk 4:24 ka Yesu mɛŋ da yɛl ye, “Wina'am nɔdi'es kʋ nyɛ na'asi o mɛŋ teŋinnɛ.” 45Ka on paae Galile la ba di'e o sʋ'ʋŋa, ban nyɛ on tʋm si'el Jerusalem teŋin Kum Maliak Gaadʋg malʋŋʋn la, bɔzugɔ ban mɛ daa keŋ.
Yesu ti'eb gɔmena kpɛɛm biig
(Mat 8:5-6; Luk 7:1-2)
46Ka o paae Kana linɛ bɛ Galile sʋ'ʋlimin; zin'ikanɛ ka o daa tiak ku'om ka li lieb daam la. Ka Kapeenum teŋin ka gɔmena kpɛɛm yinne bɛɛ ani ka o biig bɛn'ɛd. 47Ka on wʋm ye Yesu naam Juda n kɛn Galile na la, o keŋ bɛlim o ye o kena ti'eb o biig la ka o bɔɔdi kum.
48Ka Yesu yɛl o ye, “Ya ya'a pʋ nyɛ zanbina nɛ bʋnnyalimaa, ya kʋ niŋ m yaddaa.”
49Ka na'ayikpɛɛm la yɛl o ye, “M Zugsɔba, kem tɔ'ɔtɔ na ka biig la nam pʋ kpii.”
50Ka Yesu yɛl o ye, “Kem, ka fʋ biig la na paam laafi.”
Ka dau la niŋ pian'ʋk kanɛ ka Yesu pian' tis o la yadda ka keŋ. 51Ka on gban'e suori kun la, ka tʋmtʋmnib tʋ'ʋs o ka yɛl o ye, “Fʋ biig la tiligya.” 52Ka o bu'osi ba saŋkanɛ ka o biig la ban'as la pin'ili sɔn'oe. Ka ba lɛbis ye, “Su'os nintaŋ winkɔɔr saŋa ka o nintʋʋlim la bas o.”
53Ka o ba' la baŋ ye li anɛ saŋa kan ka Yesu sa yɛl o ye, “Fʋ biig la na paam laafi la.” Ka on nɛ o yidim wʋsa niŋ Yesu yadda. 54Nɛ'ɛŋa da an Yesu tʋʋmnyalima linɛ paas ayi' ka o da tʋm on da yi Juda keŋ Galile la.
© 2023, Ghana Institute of Linguistics, Literacy and Bible Translation