Luk 6
6
Jésu yé kual ca wolé go jurgum
(Matié 12:1–8; Mark 2:23–28)
1Wolé go jurgum Jésu hal duro yagé go kiji. Anjama gai poi koni go kiji, ké gongel kobegé ca loié. 2Parisié ga pena yégé wa: Keng lé henga ga so guana ba nar ca lo duro wolé go jurgum na cawa ga? 3Jésu jogu yégé wa: Keng dduginya henga ga Dabid kang kalang gai ba lé kiddin ga kurang ba légé ’eno ga? 4Ddi andong duro kulu go Kumu koi, ddi ai wo go ké ba bi Kumu sandega kalin, ddi di, ddi bigé kalang gai bu’, na wo go so guana ba nar kalang doi, ama na ca ga tibé Kumu mera. 5Jésu jogu yégé com: Kema Kurondi na wolé go jurgum Bagulondi.
Kema go kobi sayu
(Matié 12:9–14; Mark 3:1–6)
6Wolé go jurgum go ddang, Jésu andong duro kulu go yaué go Juib kogé, ddi osum gelegé. Kema pena wo kené, kobi go barua sayu. 7Ga gelé so go Kumu koi dang ga Parisié, ké nyim cindegé ca solé Jésu keddo ca kondia da bi labia duro wolé go jurgum ga? Cawa ké dar ca ka da wai kual go kembei. 8Ama Jésu sol ’eremé gogé. Ddi yei kema go kobi sayu lé wa: Ji sa dang, ’er tumu kalang kua mam. Kema lé sai, ddi ’eré tumoigé. 9Kardené Jésu yégé wa: ’Enung ’engergenga keng dé: So guana ddana lo henga ga ddari duro wolé go jurgum laba, ca na la isinwa ga? Ca na minyu kema laba, ké deddu kema ga? 10Ddi solgé mam, ddi yei kema lé wa: Tara kobin, ddi tari, kobi lé wai labia. 11Ama ké belé mainyé bbani ’eno, ké main gusugé ca ka da lang Jésu wa ga?
Jésu par pajerong gai ga moac ca sua
(Matié 10:1–4; Mark 3:13–19)
12A duro wolé lé na, Jésu nai ca kubung ca olé, ddi ol Kumu dang soindo bera ti do keddebor. 13Kiddin ga kiddin ba wol na, ddi tega anjama gai gusi, ddi par moac ca sua, ddi tégé pajerong ga gié. 14Simon (go ddi ba tei Piér bu’), dang kermi André, dang Jak, dang Jâ, dang Pilip, dang Bartélemy. 15Dang Matié, dang Tomas, dang Jak go Alpé kurondi, dang Simon go ké ba tei kié go kambé. 16Dang Judas go Jak kurondi, dang Judas Iskariot go aié Jésu gangeldi.
Jésu gel kalang ga yaué combu, ddi bigé kalang ga hoamya labia bu’
(Matié 4:23–25)
17Jésu gesingu dugo ca kubung lé kang nagé. Jésu ’eré duro dal kang anjama gai ga combi. Kalang combu a ca gesong ga Judé mam, dang Jorsalem, dang gulong go gemdong go kebu kurai go Tir dang Sidon, ké yau gusi. 18Ké ’erga ca jo kual goi bua, ca kondia bigé kalang gagé ga hoamya labia bu’. Kalang ga habé ga isini ba gelgé cindegé na, ké wai labia bu’. 19Kalang mam dar ca ka cilei, cawa dono wa andang a gusi ca bogé labia mam.
Gusu mowa dang bagen
(Matié 5:1–12)
20Jésu ai cindi sol anjama gai, ddi yégé wa:
Keng ga wo duro nyagé na, keng danga gusu mowa,
Cawa Leu do Kumu toi na togeng,
21Keng ga dang kurang cakcak kua na, keng dang gusu mowa,
Cawa keng da aidong.
Keng ga wa ’elé cakcak kua na, keng danga gusu mowa,
Cawa keng da asu.
22Kalang ga nia kaingeng bua, ké ddogeng cong bua, ké nyangdigeng bua, ké dorgeng kel bu’ ca Kema Kurondi na, keng danga gusu mowa. 23Kiddin ga henga la waigeng na, dda gusugeng muageng bua, tegageng péré bu’, cawa boié go gumu wa amegeng a dang ni. Cawa moinderégé lang ga cogelé kebu go Kumu koia main kain bu’.
24Ama na bagen ca keng ga lainyong, cawa keng wai boié dogeng ’enda.
25Bagen ca keng ga ba aidong cakcak kua, cawa kurang da legeng.
Bagen ca keng ga wa asé cakcak kua, cawa keng da wai homé dang ’elé.
26Keng ga kalang mam nia wa pedegeng na, bagen dogeng, cawa moinderégé lang ga cogelé kebu go Kumu koi ga poia main kain bu’.
Kederé ’yo ca kalang ga tebena
(Matié 5:38–48; 7:12)
27Ama ’enung yegenga keng ga wa jo kual guang, dda kederegeng ’ya kageng ga tebena, ga jégenageng ké ga wa kainyegeng. 28Ga segeng busu ca ké ga wa bbesegeng, ga ulageng ca ké ga wa logeng nyagé. 29Kema nia sombu mongjein ga pena na, beli kané bu’. Kema nia boddu badigé gain ga gumu na, ddai ddi ’ya ga wusin bu’. 30Kema goni goni goa olin henga na, ji bi, kema nia ai henga gain na, ji ’yogé dang ’eno. 31Ji lang kalang main ji ba darang ca kandia lang nain kain rés bu’.
32Kederegeng nia ’ya ké ga kederégé ba ’yegeng mera na, boié gogeng wa ando ga? Cawa kalang ga isindong kederégé ’ya ké ga kederégé ba ’yégé. 33Keng nia lé ddarua danga ké ga ba logeng ddarua mera na, boié gogeng wa andi ga? Kalang ga isindong kau la main kain bu’. 34Keng nia bu obé gusu kalang ga jogé bogeng obé lé dang mera na, boié gogeng wa andi ga? Kalang ga isindong kau biga kamdigé ga isindong obé ca kandia jiga bigé obé lé dang kain rés bu’. 35Na main kain ’eno, dda kederegeng ’ya kageng ga tebena, ga lagé ddarua, ga ubagé henga ama keng ’eremé ca jogé ’yogé dang ’eno, keng da wai boié go nain, keng da belé Kumu go dang go do wal karndi bu’, cawa ddi lo olum danga kalang ga basé lo désé, dang ga isindong bu’. 36Ga lagé kalang olum main Baigeng ba lang olum kain.
Ddo keng kaidé kual ca kalang ca kamdegeng ’eno
(Matié 7:1–5)
37Keng kaidé kual ca kalang ’eno, Kumu go kaidé kual caigeng ’eno bu’, ga sogeng kual ca kalang ’eno, Kumu go sogeng kual caigeng ’eno bu’, ga buraga kalang, Kumu da burogeng bu’. 38Ga bigé kalang henga, Kumu da begeng henga bu’, ka gesegeng duro ’engo do gesé do ddari, ka gegedda, to da papsong jorgogeng. Kumu da gesu kalin doi a gusugeng main go keng ba gesang gusu kalang kain bu’.
39Jésu yégé kual go kera com: Kema go bibé bbal golé mengai go bibé ’eno, cawa ké ca’ ka aserong duro ’umbung ’eno ga? 40Go tobié bbal ddo go gelei ’eno, ama kiddin ga go tobié goni goni kua nia ka gelé goi na, ddia belé mainya go gelei kain.
41Ji sol haddemé ga henyé a ti kerminya cawa ga? Ji sela sia go gumu a tindin ’eno ga? 42Mena ma ji yé kermin wa: Kermeng, ddang aiein haddemé a tindin cong, ji sela sia go gumu a tindin ’eno ga? Go babé, ji aia sia a tindin cong jua ma, kardené ddi sai sol kiddin ddar bbal ca aiei kermin haddemé a tindi dé.
Sia kang wo goi
(Matié 7:16–20; 12:33–35)
43Sia go ddari na, go wo wo go isini ’eno, sia go isini kau go wo wo go ddari ’eno bu’. 44Sia goni goni kau ké solia gusu wo goi. Ké ar tuagiyong wo gua a ca dasi ’eno. Ké ar sur wo gua a ca dalinkuin ’eno. 45Kema go ddari na, ddi durga henga ga ddari ga a duro ddaindi. Kema go isini kau ddi durga henga ga isini ga a duro ddaindi bu’. Cawa kema kebi ya kual go ba won wo duro ddaindi.
Kuluyong sua
(Matié 7:24–27)
46Keng teng Bagulong, Bagulong, ama keng la henga ga ’enung ba yegeng ’enoa cawa ga? 47Kema goni goni go ba ’erga gusung go ba jé kual guang ma, ddi lé cainé na, ’enung da gelgeng kema go ba genang nai. 48Ddi gené mainya kema go ba boi kulu goi, ddi pai umbung ca kubung ddigé, ddi debé kulu guiang goi kené. Kiddin ga kang ga kurai ba biong papsong bé to kulu lé kau, kulu lé tusong ’eno, cawa ddi boii ddar. 49Ama kema goni goni kau goa jé kual guang, ama ddi la cainé ’eno na, ddi mainya kema go ba boii kulu goi ca gesong kalin basé paié umbung debé kulu guiang goi kené ’eno kain, kiddin ga kang ga kurai ba biong papsong bé to kulu lé, kulu lé tusong, toasang goia nain bbani ’eno.
© Alliance biblique universelle (United Bible Societies) 1978.