लूका 17
17
जनातोर
1फेर ईशु आपलो चेलामन ले बल्लो, “ऐ होऊक सके कि हुन गोठमन जोन पाप चो कारन आय, ऐये दे मान्तर हाय, हुन माने उपरे जेचो कारन हुनमन ऐऊ आय! 2जोन ऐ नानीमन थानले कोनी गोटक के ठोकरना खुआऊ आय, हुनचो काजे ऐ अच्छा होती कि जता चो पाट हुनचो टोडरा ने लटकाया जाति, आउर हुन समुन्द ने डालुन दिया जातो। 3ताक ने राहा; अगर तुचो भाई अपराध करो तेबे हुनके खिज, आउर अगर पचताओ तेबे हुनके छमा कर। 4अगर दिनभर ने हुन सात हार तुचो अपराध करो आउर सातो हार तुचो लगे फेर ऐऊन बोलो, ‘मय पसतायें से,’ तो हुनके छमा कर।”
तुमचो बिश्वास कितरो बड़े आय?
5तेबे पठालोबितामन परबु ले बल्ला, “आमचो बिश्वास बड़ली।” 6परबु बल्लो, “अगर तुमके राई चो दाना चो बराबर बले बिश्वास होती, तेबे तुमी ऐ सहतूत चो रूक ले बोलतास कि चेर ले उकनी होऊन भाती समुन्द ने गाड़ी हो, तेबे हुन तुमचो मानती।
अच्छा दास
7“तुमचो थानले असन कोन आय, जेचो दास नांगर फान्दतो नाहले मेंडामन चराते रओ, आउर जिदलदाय हुन बेड़ा ले ऐओ, तेबे हुनचो ले बोलो, ‘तुरते ऐऊन भाती भात खाऊक बस’? 8आउर ऐ नी बोलो, ‘मोचो भात तिआर कर, आउर जिदलदाय तक मय खाये पियें दें तेबे तक करांड बान्दुन भाती मोचो सेवा कर; ऐचो पाचे तुय बले खा आउर पिव’? 9काय हुन-हुन दास चो अहसान माने दे कि हुन हुनी ची काम करलो जेचो हुकुम दिया जाऊ रये? 10असन रीति ले तुमी बले जिदलदाय हुन सपाय काममन के करून चुका जेचो हुकुम तुमके दिया जाऊ रये, तेबे बोला, ‘आमी ठग दास आंव; कि जोन आमके करतोर रये आमी मात्र हुनी करलु से।’”
गोटक कोढ़ी चो आभार
11असन होली कि हुन यरूशलेम बाटे जाते-जाते सामरिया आउर गलील चो मंजी ले होऊन भाती जाते रलो। 12आउर कोनी गाँव ने ओलतो बेरा हुनके दस कोढ़ी मिरला। 13हुनमन लापी उबा होऊन भाती जोर ले बल्ला, “हे ईशु, हे मालिक, आमचो उपरे दया कर!” 14हुन हुनमन के दकुन भाती बल्लो, “जाहा, आउर आपन खुद के याजकमन के दकाहा।” आउर जाते ची जाते हुनमन शुद्ध होऊन गेला। 15तेबे हुनमन थानले गोटक ऐ दकुन भाती कि मय चेंगा होऊन गेले से, जोर ले माहापुरू चो बड़ाई करते फिरलो; 16आउर ईशु चो पाँयमन थाने पाटा पडुन घसरुन भाती हुनचो धन्यबाद करूक मुरयालो; आउर हुन सामरी रये। 17ऐ थाने ईशु बल्लो, “काय दस झान शुद्ध नी होला, तो फेर हुन नव झान काहां आसोत? 18काय ऐ परदेशीया के छांडुन कोनी आउर कोनी नी निकरला, जोन माहापुरू चो बड़ाई करता?” 19तेबे हुन हुनचो ले बल्लो, “उठून भाती जा; तुचो बिश्वास तुके चेंगा करलो से।”
माहापुरू चो राज चो उजागर होतोर
20जिदलदाय फरीसीमन हुनचो ले पचारला कि माहापुरू चो राज केबे ऐये दे, तेबे हुन हुनमन के जबाप दिलो, “माहापुरू चो राज उजागर रूप ने नी ऐये। 21आउर लोग ऐ नी बोल दे, ‘दका, ऐथा आसे, नाहले हुता आसे।’ कसनबल्लोने दका, माहापुरू चो राज तुमचो मंजी ने आसे।” 22आउर हुन चेलामन ले बल्लो, “हुन दिनमन ऐये दे, जोन थाने तुमी माने चो बेटा चो दिनमन थानले गोटक दिन के दकुक चाहा से, आउर नी दकुक सका से। 23लोग तुमचो ले बोल दे, ‘दका, हुता आसे!’ नाहले ‘दका, ऐथा आसे!’ मान्तर तुमी जाते नी जाहा आउर ना हुनमन चो पाटे हुआ। 24कसनबल्लोने जसन बिजली बादरी चो गोटक छोर ले बरून भाती बादरी चो दुसर छोर तक बरू आय, असने ची माने चो बेटा बले आपलो दिन ने उजागर होये दे। 25मान्तर पयले जरूरी आय कि हुन दुख उठाओ, आउर ऐ जुग चो लोग हुनके नीच ठेबा ओत। 26जसन नूह चो दिनमन ने होऊ रये, असने ची माने चो बेटा चो दिनमन ने बले होये दे। 27जोन दिन ले नूह जाहाज ने नी चेगु रये, हुन दिन तक लोग खाते-पिव ते रवत, आउर हुनमन ने बिहा होते रये। तेबे जल परलय ऐऊन भाती हुन सपाय के नष्ट करली। 28आउर जसन लूत चो दिनमन ने होऊ रली कि लोग खाते-पिव ते; लेन-देन करते, रूक जगाते आउर घर बनाते रवत; 29मान्तर जोन दिने लूत सदोम ले निकरलो, हुन दिने आईग आउर गन्धक बादरी ले बरसली आउर सपाय के नष्ट करून दिली। 30माने चो बेटा चो उजागर होतो दिन ने बले असने ची होये दे।
31“हुन दिने जोन छानी उपरे रओ आउर हुनचो समान घर ने रओ, हुन हुनके आनुक लाय नी उतरो; आउर असने ची जोन बेड़ा ने रओ हुन पाटकुती नी बाहड़ो। 32लूत चो बायले के सुरता संगाहा! 33जोन कोनी आपलो जीव बचाऊक चाहा ओ हुन हुनके नी बचाए आउर जोन कोनी नी बचाए हुन हुनके जीव संगाये दे। 34मय तुमचो ले बलें सें, हुनी राती दुय झान माने गोटक खटिया थाने सो दे; गोटक धरून निया जाये दे आउर दुसर के छांडुन दिया जाये दे। 35दुय झान बायले लेकी गोटक संगे जता रूचते रदे, गोटक धरून निया जाये दे आउर दुसर छांडुन दिया जाये दे। 36दुय झान बेड़ा थाने हो दे, गोटक धरा जाये दे आउर दुसर के छांडुन दिया जाये दे।” 37ऐ सुनुन हुनमन हुनचो ले पचारला, “हे परबु ऐ काहां होये दे?” हुन हुनमन ले बल्लो, “जाहा मोड़ी आसे, हुता गिदाहा रूंड़ा हो दे।”
Halbi Bible by The Love Fellowship is licensed under Creative Commons Attribution-ShareAlike 4.0 License.