Matyôos 3
3
Tūndā Pɔ̄ mí Zwáŋ mɛɗuu-ɓot
(Mák 1.1-8; Lók 3.1-18; Zwâ 1.19-28)
1Tí itɛ́m ɓīnɛ́ɛ̌ŋ ɛ́, Zwáŋ mɛɗuu-ɓot ɛ ɓúzī túula ɓɛ̌ sɔ̄sā sī ɗí ɓɛ̌ Yuɗé nɛ ɛlɛ́ɛ́ ɛ́kɛ́l ɛ mí Zɛɛ̄mb. 2Ɛ tītyāā tūnd ɗêk: «Lūmkāná mikɔŋ nɛ ɛɓyôo, nɛ dɔ nāá, Də́ə́ mí Zɛɛ̄mb í í kúnɔɔ!» 3Í tí tɔɔ̄p mí Zwáŋ ték Izaí mgbɛ́sel mitɔɔ̄p mí Zɛɛ̄mb ā lilüii tɛ́m ā lilɛ́ɛ nāá:
«Jwōnd mót ī tí ɛdós ɓɛ̌ sɔ̄sā sī.
Í lɛ̄ɛ̄ nāá: “Kwombɛlká zyē mí Ɗâ.
Ɓī syēs mímbɔ̄ŋ!”»
4Zwáŋ ā ɓiɓwât kānd ɓā sâ wɛ́ nɛ mi mi tīt ɓɛ́ jōō nāá, samó ɔ̂, nɛ kandǎ kōt lyēmblā tí kuū. Ā ɗiɗɛ ɓaákhata nɛ mɛgbɔ̄k nɛ mɛdo. 5Ɓot ō khandǎ Yotósalɛm nɛ ɓot ō Yuɗé nɛ ɓot ō mwɔ̄ŋ Yuuɗɛ́n ɓyɛ̂ɛs ɛkpɛ́nj ɓɛ ɗá mí Zwâŋ. 6Ɓɛ̄ mīmyám mísɛ̄m myɔ̄ɔ̄. Phúla ték ɛ́, Zwáŋ ɛ ɗúú ɓɛ́ tí sǒmb Yuuɗɛ̂n.
7Zwáŋ ɛ́ ɓɛɛ nák ɛ́, thūnd Ófatizyɛ́ŋ nɛ Osadüsyɛ́ŋ#3.7 Osadüsyɛ̂ŋ: Yīl kúl Óyúɗɛn süēnɛ̄l ɛ́pas ɛ mímúŋ ɓâk., ɓɛ́ ɛ̌ zī ɗuǎ ɓɛ yɛ̄. Ɛ ɓúzī jí nɛ nɔ̄ɔ̄ nāá: «jüākká mɛ isá ɓɛ̄ ígúukaa ɓîk. Zɛ̄ lɛ̄ɛ̄ ɓén nāá, í ɗyaāŋ ɓí ɗí nɛ khul ɛkámb ɛ́ɓūk ɛ̄ mí Zɛɛ̄mb ɗí lí í kúnɔɔ lîk ê? 8Sākāná phɛ̄ tyaa isīsɛ̄ɛ̄ ī lyākɛ̄l nāá, ɓí í lúm míkɔŋ nɛ ɛɓyóó ê. 9Ɓyá a dā gú ɛ́swômbla nāá: “Zí chīlā mí Áɓilam.” Gūká nāá, Zɛ̌mb ɛ nɛ khul ɛlinj mɛ́kɔ̄k mák ɓwán ō mí Áɓilam! 10Zyóŋ nyī mú ɛ́nyeetɛ̄ tí ɛsuk ɛ̄ lē. Lē yɛ̂ɛs ɗí ta gúm tyâa phuūm ékɛ́, ɓá á cyúkɛl yɛ̂, ɓɛ̄ gús yɛ́ twóó ɗû. 11Myam mí ɗuu ɓɛ́n nɛ mɛɗyūū tí ɛlyákɛl nāá, ɓí í lúm míkɔŋ nɛ mɛɓyôo. Sá gwát í nāá, í nɛ mot tí ɛzye phûs kɔŋ nyaām. Nyɛ, ɛ nɛ khul ɛ tháŋ mɛ̂. Ma a ɓɛ̄ tí tɛ̄lā ɗí nāá, mi nɛ khul ɛtii míkɔɔ̄l mī ísapát ɓyɛ̄ ê. Nyɛ, á á ɗuu ɓén nɛ Áchāāchǎnj Sisímb nɛ ɗû. 12Ɛ nɛ pyapa yɛ̄ tí mɛɓɔ́ tí nāá, á á ɓɛ́s pāká phǔm nɛ ikōt. Á á nwɔŋ phúm ɛ māk tí tâŋ. Ɛ nwɔ́ŋ íkōt ɛ́, ɛ gbā ɓyɛ́ tí ɗú ɛ̄ ɗí ta ɗím lîk.»
Zwáŋ ɛ́ ɛ́ ɗuu Yésus
(Mák 1.9-11; Lók 3.21-22)
13Yésus ɛ ɓú kɛ̄ tyáá ɓɛ̌ Galilé ɛ tɔ̄ ɓɛ̌ sǒmb Yuuɗɛ́n tí nāá, Zwáŋ á á kɛ̄ ɗuu ɛ̂. 14Zwáŋ thɔ́ wā ɓyen, nyɛ nɛ Yésus nāá: «Í myam ɗí tí ɛje nāá, u ɗúu mɛ, á wɔ ú kā ɓākā zyě ɓɛ yám tí nāá, myam mɛ zí i ɗuu ɔ́ náǎŋ nā?» 15Yésus nɛ Zwáŋ nāá: «Ɓyēt nāá, ī sɛ́ɛ ɗyaāŋ ɛ́chāak, nɛ dɔ nāá, í je nāá, nī lwóndɛl isá ī ɗí ɛ́dalá sɔ̂kphɔɔ̄mb mí Zɛɛ̄mb ɓík ɓyɛ̂ɛs.» Zwáŋ ɛ ɓúzī kam. 16Ɛ ɗúú ɛ̂. Ɗɛ Yésus dá gbɔ́m tí mɛɗyūū phúla nduān ékɛ́, jwóó i ɓúzī ɗii, nyɛ thɔ́ ɓɛɛ́ Sisímb mí Zɛɛ̄mb tí ɛsul ī nɔ́ŋlā nɛ ɛpep, i zí ɓakɔɔ ɛ́ tí nôl. 17Jwōnd ī ɓúzī gbɔ́m ɓɛ̌ jwôo ī lɛ̄ɛ̄ nāá: «Nɔ́k ɛ́, ɛ mwán mí ɗí tí ɓū kpɛl ɔ̂. Lyém wám wɛ̂ɛsa ú nɛ nɛ̄.»
© 2023, CABTAL amp © 2023, COCELMPU