यूहन्ना 21
21
स्याहप्च्यी तिहनगी येशूला थोङग्यो
1ओ़ह तिङले येहपाराङ गालील साने़की तिबेरियास छो पोहला स्याहप्च्यीया़गी येशूला थोङसीन। 2सिमोन-पत्रुस, दिदुमस माएँगी थोमा, गालीलगी काना माएँ क्याहसाकी नथानेल, जब्दियागी पुह ङ्यी़, ओहले येशूकी लेहमेन स्याहप्च्यी ङ्यी़ ङ्याम्बुराङ जोम्दी येहकें। 3ओहले सिमोन-पत्रुसगी रो़हया़ला मासीन, “ङाहनी ङ्याह ज़ुङ डोएँ!” लेहमेनया़गी मासीन, “ङ्यिहॱआङ राहङ ङ्याम्बुराङ डोएँ” ओहले खुङया़ काहल्दी छ्यु-टुहला स्य़ूहसीन, यिहॱनाङ खुङया़गी नुहप काहङला ङ्याह च्यिॱआङ ज़ुङ मा़हखु।#लूक ५:५
4ङाटु नाहम लाहङज्ये पेहकेमु येशू छोगी सुहरला ज़्याङदी ज़्य़ूक्यो येहकें। यिहॱनाङ स्याहप्च्यीया़गी येशूॱराङ यिहन म़ेदी ङोह स्य़े मा़हखु। 5ओहले येशूगी खुङया़ला सुङ नाङसीन, “ए नो़हया़, ख्यागी ङ्याह ज़ुङ खू़बानी?” ओहले खुङया़गी मासीन, “अहँ, ङ्याह च्यी़ॱआङ ज़ुङ मा़हखु लाह!” 6ओहले येशूगी खुङला सुङ नाङसीन, “छ्यु-टुहगी योबा ङो़ले ङ्याहटा क्याहप्तोङ, ओहले ख्यागी च्य़ेह सिहन्ज्ये येह।” ओहले खुङगी ङ्याहटा क्याहप्सीन, ओहले ङ्याहटाला ङ्याह माहङबु छ्यिती खुङगी ङ्याहटा टिहॱराङ मा़हखु।#लूक ५:६ 7दि थोङदी येशूगी चेवा जे नाङग्योकी स्याहप्च्यीगी पत्रुसला मासीन, “मिहरो चो़वो गा यिहन्गे दुबा!” “मिहरो चो़वोॱराङ यिहङगें दुबा!” माएँ थे़दी सिमोन-पत्रुसगी राहङगी फि ङो़गी काप्च्या क्येपाला टिल्सीन, च्यिबेमाना खोगी काप्च्या माहकेहम्बा येहकें, ओहले खो छोला फिर छ्योङसीन। 8लेहमेन स्याहप्च्यीया़ छ्यु-टुहला तेहती ङ्याहगी काहङग्योगी ङ्याहटा टिहकेनॱराङ छो सुहरला ओहङसीन। खुङ छो सुहरले माहङबु था़-रिहङबु म़ेहबा येहकें ओ़हठीॱराङ मिटर क्याह च्यी़जे था़-रिहङबु येहकें।
9ओहले छोगी सुहरला लेप्केमु खुङगी मेहगी मेहस्या थो़ला ङ्याह दाङ खुरा थोङसीन। 10ओहले येशूगी खुङया़ला सुङ नाङसीन, “ख्याया़गी ज़ुङग्यो ङ्याह सिपाज्यी ख्येर-स्यो!” 11ओहले सिमोन-पत्रुस छ्यु-टुह जा़दी छ्यिम्बु-छ्यिम्बु ङ्याहगी काहङग्यो ङ्याहटाला टिहती साला ख्योङसीन। ओ़ह ङ्याहटाला छ्यिम्बु-छ्यिम्बु ङ्याह खाल तिहन दाङ च्यू़सुम छ्यिक्यो दुबा। ओहजे माहङा ङ्याह छ्यितीॱआङ ङ्याहटा माहराहल। 12ओहले येशूगी खुङया़ला सुङ नाङसीन, “ओहङदी जारा साह स्यो।” ओहजेला का़हन्दी स्याहप्च्यी च्यी़गीॱआङ “राहङ सु यिहम्बा लाह?” म़ेदी टी़ह मा़हखु, च्यिबेमाना खुङगी “मिहरोनी चो़वोॱराङ यिहम्बा दु” म़ेदी ङोह स्य़े सिहन्दी येहकें। 13ओहले येशू फेप्ती खुरा खुङया़ला नाङसीन ओहले ओ़हठीॱराङ जेती ङ्याहॱआङ नाङसीन।
14येशू टोहङदी येहपाराङ सोम्बो ज़्याङ फान्ज्यो स्याहप्च्यीया़साला फेप नाङग्योदी दि लेहमा सुम्बा यिहन्गे।
येशू दाङ पत्रुस
15खुङया़गी साह सिहन फान्ज्यो येशूगी सिमोन-पत्रुसला सुङ नाङसीन, “ए यूहन्नाकी पुह सिमोन, च्यि ख्येगी ङाहला लेहमेनया़गी म़ेदी माहङबु चेवा पेहकें ले?” ओहले पत्रुसगी मासीन, “लाहसो ला़ह चो़वो, ङाह राहङला चेवा पेहकें म़ेदीनी राहङला थुयी़राङ येह।” येशूगी खोला सुङ नाङसीन, “ङाहती ल़ूह पी़हरुया़ला साहज्ये तेर।”
16ओहले येशूगी पत्रुसला येहपाराङ टी़ह नाङसीन, “ए यूहन्नागी पुह सिमोन, च्यि ख्ये ङाहला चेवा पेहकें ले?” ओहले पत्रुसगी येशूला मासीन, “लाहसो लाह चो़वो, ङाह राहङला चेवा पेहकें म़ेदी राहङला थुयी़ येह।” येशूगी खोला सुङ नाङसीन, “ङाहती ल़ूहया़ला चारा पेहतोङ।”
17ओहले येशूगी पत्रुसला येहपाराङॱआङ टी़ह नाङसीन, “ए यूहन्नाकी पुह सिमोन, च्यि ख्ये ङाहला चेवा पेहकें?” ओहले पत्रुस ज्यिबुराङ सेम नाहमु काहल्सीन, च्यिबेमाना येशूगी खोला “च्यि ख्ये ङाहला चेवा पेहकें?” सुङदी लेहमा सुम टी़ह नाङसीन। ओहले खोगी येशूला मासीन, “चो़वो, राहङगी थाम्ज्यीराङ ङोह ख्येन नाङगे। ङाह राहङला चेवा पेहकें म़ेदी राहङला थुयी़ येह।” येशूगी खोला सुङ नाङसीन, “ङाहती ल़ूहया़ला साहज्ये तेर।
18 तेहम्बाराङ ङाह ख्येला माएँ, ख्ये स्यारा येहकेंमु राहङगी कारा राहङगीराङ च्यिङगो येहकें, ओहले का़हला सेम थेप्कें ओ़हलाराङ डोउ येहकें। यिहॱनाङ केहपु काहल फान्ज्यो ख्येगी राहङगी लाहक्पा क्याङज्ये येह, ओहले लेहमेन मिहगी ख्येला कारा च्यिङ तेर्च्ये येह, ओहले ख्येला सेम मेहथेप्केन ग्या़ला ख्येर्च्ये येह।” 19(किन्ज्योगी छेन थोम्बु ज़ोज्येला पत्रुस काह-ठि पेहती स्यि कोहच्ये येह माएँ ताम येशूगी सुङ नाङगेराङ येहकें।) ओ़ह तिङले येशूगी पत्रुसला सुङ नाङसीन, “ख्ये ङाहगी तिङदा तिङ स्यो।”
येशूगी चेवा जे नाङग्योकी स्याहप्च्यी
20पत्रुसगी क्याहप लो़हदी ताएँमु येशूगी चेवा जे नाङग्योकी स्याहप्च्यीला तिङदा तिङ ओहङ तेहक्यो थोङसीन। ओ़ह स्याहप्च्यीगीराङ तिङस्यो डेन छ्येकेमु येशूगी प्राहङगोला ज्यार्ती, “चो़वो, राहङला ज़ुङदी तेर्के मिह सु यिहम्बा लाह?” म़ेदी टी़हक्यो येहकें।#यूह १३:२५ 21खोला थोङदी पत्रुसगी येशूला मासीन, “चो़वो, खोती च्यि ओहङगे ले लाह?” 22येशूगी पत्रुसला सुङ नाङसीन, “ङाह माहयोहङ थु खो थार्तेराङ तेहच्यु माएँ ङाहती सेम्बा येहॱनाङ ख्येला च्यि च्योल्दो ले? ख्येदी ङाहला तिङ ङ्यादी स्यो!”
23ओ़ह सोङबे ओ़ह स्याहप्च्यी मिहस्यीएँ माएँ ताम आदा-नो़ह दाङ आज्यी-नुहमुया़की पाहरक्यीला फेल्सीन। येशूगी खो मिहस्यीएँ म़ेदी सुङ माहनाङबा येहकें, यिहॱनाङ “ङाह माहयोहङ थु खो सोम्बोराङ लिहच्यु माएँदी ङाहती सेम्बा येहॱनाङ ख्येला च्यि च्योल्दो ले?” म़ेदी सुङ नाङग्यो येहकें।
24ओ़ह स्याहप्च्यीगीराङ दि थाम्ज्यी थोङदी पाङबु तेर्केॱराङ येह, ओहले खोगीराङ दि तामया़ प्रुहसीन। खोगी पाङबु तेहम्बा यिहन म़ेदी ङ्यिहला क्यी़ह येह।
25येशूगी लेहमेन छ्या़लेया़ॱआङ माहङबुराङ जे नाङसीन। ओ़ह छ्या़लेया़ थाम्ज्यीराङ रे़ह-रे़ह पेहती प्रुहज्ये येहना, ङाहला दि ल़ेहमु ने़उ दु, येशूगी तेहन्दाला प्रुहक्योगी छ्य़ेया़ जाम्बुलीङॱलाङ स्योङज्ये म़ेहबा येहकें।
© 2023 (Active), Wycliffe Bible Translators, Inc. All rights reserved.