'Olic 16
16
O Miti'eray a Pitolon
O nito^to'an ni Tafiti a 'olic.
1Kawasaw, nanay dipoten kako,
nawhani o miti'eray kako i Tisowanan.
2Pasowal kako to Tapang, <<O Tapang ako Kiso,
o tatapangan no sakalmed ako Kiso,>> han ako.
3Wata: ko nika tadamaan no so'linay a finawlan no Tapang.
O pikapot ako i cangraan ko sakakaay a lipahak ako.
4Nikawrira, oya mihaklongay a tamdaw to romaroma a kawakawas i,
o sakararid nangra a mapades.
Caay ko mamikihatiya kako to pisalisin nangra,
caay ko mamita'ong kako to kawakawas nangra.
5 Tapangaw, Kiso ko tadadafong ako, Kiso ko tatapangan to sakalmed ako,
Kiso ko mipa'adingay to mipaflian Iso i takowanan.
6Mapalilam Iso kako to mifakciwan Iso a makapahay a sra,
tadamakapah konini a pala.
7Mipahmek kako to Tapang, nawhani mipasifana' Cingra i takowanan,
o dadaya i, mipalal ko nga'ayay a faloco' ako i takowanan a papina'on.
8Mararid a mahapinang ako ko nika ira no Tapang i ka'ayaw ako,
ira Cingra i tatihi ako saka, caay ko mamangiyangi kako.
9Orasaka, mahmek ko faloco' ako, malipahak ko 'adingo ako,
marihaday a tanektek ko tireng ako,
10nawhani caay ko fafalahen Iso kako i kaitiraan no mapatayay,
caay ko mamihayda Kiso to nika patay no so'linay ko faloco' a matayalay Iso.
11O pahapinangay Kiso i takowanan to sakaci'orip a lalan.
Ano i ka'ayaw Iso kako i, tadalipahak kako,
ano i tatihi Iso kako i, ira ko mida'ocay a sakalmed ako.
© The Bible Society in Taiwan, 2019