Luka 5
5
Yesu a̱ yei na̱won pfong ka̱tsitsrang nu na
(Matta 4:18-22; Markut 1:16-20)
1Ka̱tuk ka̱yaan Yesu na̱ sseng ka̱nu dudung ba̱shekwot Janisarata, ba̱nyet ba̱gingang a̱ tung a̱ ku krang a̱ pfong ba̱ryat Ka̱za da̱ nu. 2Na̱ neyak a̱ssi a̱n dyi ba̱kpongo ba̱ mba ba̱hwa, ba̱nyet pyyem hwon ba ba kwak a̱ si sak mbeyang zi hywot a̱ wwon a̱ nat a̱ shyi i tssu ba̱riryek mba ba. 3Yesu a̱ nwa a̱ swrang ka̱yat kpongo a̱yring. Kpongo nu a̱ yin yet a̱nying Siman. Yesu a̱ ku naai na̱ shek kpongo nu a̱ nwa mi ba̱cincong ka̱yat ba̱shekwot ka. A̱ swrang ka̱ yemi a̱ zzek ba̱nyet ba.
4Na̱ bu tyak a̱ hywa di Siman. “Shek kpongo nu ba̱cincong naat i i kei ti yi krok ba̱riryek ba i kwwat hwon ji.”
5Siman a̱ hywa, “Malam, zi sswa ka̱bvung n tyak ka̱tuk ka zi pyyem kyang ba. Ma n bo ni ta ba̱riryek ba da̱ni di an hywa ni.” 6Ba ta ba̱riryek ba a̱ si pyyem hwon ji ba̱gingang, ba̱riryek ba a̱ cat tsseng. 7Ba yei ba̱kpondang ba a kpongo a̱yring u ba ba a̱ ba̱ brang kwwat a. Ba nyyai ba bu kwak a̱ tyei a̱ hywaai ba̱kpongo ba ba̱ mba ba̱hwa, har ba̱kpongo ba a̱ cat ta̱yut. 8Siman Bitut a̱ bu ryi a̱mi a̱ kpa ka̱byen a̱ta̱ssi Yesu, a̱ hywa, “Drok n wwon A̱ntyok Ka̱ryi, rot n yet a̱ntyok a̱ka̱tukyya.”
9Bitut bu ba̱nyet ba a̱ yin shyi ba̱nu ni a̱ yya ka̱hat bu a̱duniya hwon nu ba pyyem ni. 10A̱mi ma ba̱nyet Yakubu bu Yohana ba̱hwai Zabadi ba, ba ma̱ yin shyi bu Bitut i pyyem hwon ji. Yesu a̱ hywa di Siman, “Ryok hok ka̱wun ba. Nnaanini a ni nwa pyyem ba̱nyet.”
11Ba kwwat ba̱kpongo ba a̱ ba mi a̱zi gyep, a̱ wwon kozan kyang a̱ drok a̱ tssup Yesu.
Yesu a̱ creng a̱ntyok gbap
(Matta 8:1-4; Markut 1:40-45)
12Ka̱tuk ka̱yaan Yesu na̱ shyi i ka̱nkrang ka̱yaan, a̱ntyok gbap na̱n shyi, gbap a ku tyak rwam nu na. Ka̱ram ka na̱ bun ku ryi ni a̱ nyyai a̱ bu kpa a̱ta̱ssi nu ka a̱ ku naai a̱ hywa, “Malam, ki a shim n creng, n ni creng.”
13Yesu a̱ neyak bvak nu na a̱n ku byram a̱ hywa, “Da̱ creng, ho n shim a creng.” Bu ka̱baram gbap a i brik i rwam nu na. 14Yesu a̱ ku tyyei di na̱ ryok tyyei a̱yin ba; wwon a̱ hywa, “Nat si ya tyyei di gado Ka̱za nu, i si yya ba̱hyum ba Musa na̱ yin hywa ba wrak ni, ba yet shaida di koyan ka̱sak ka ba na̱ creng ni.”
15Nkhang Yesu na i si wu nwa naat ansham, ba̱nyet ba̱gingang a̱ tyong a̱ cong da̱ nu a̱ pfong zzek nu na, na̱ bo ba̱ creng nhywu mba na. 16Ma kozan ka̱ram Yesu a̱ ri drok ba̱diyin a̱ nat yya a̱duwa ka̱bvwa ka̱yaan.
Yesu a̱ creng a̱ntyok ta̱ruk nkap
(Matta 9:1-8; Markut 2:1-12)
17Ka̱tuk ka̱yaan Yesu na̱ shyi i zzek, ba̱nyet Ba̱farisa ba̱yaan bu ba̱malam Truwang a̱ shyi ka̱ yemi. Ba yin nyyai i na̱nkrang ba̱gingang i ka̱byen Galili, bu Yahudiya bu ka̱nkrang Urushalima. Cet A̱gwam Tazwa ku shyi bu Yesu na̱ ga maai creng ba̱nyet nhywu ba. 18Ba̱ntyok ba̱yaan a̱ nyyai a̱ cwok a̱ntyok a̱yaan a̱ yin ta̱ruk nkap. Ba yin ku cot an kyang kwai, a̱ kwan zwang ba ba̱ nu ka̱ryi ka a̱ bu myyi a̱ta̱ssi Yesu. 19Rot ka̱tswa ba̱nyet ka, ba shya ryen nwa ba̱ nu ba. Ba wrak bat a ba̱ nu a̱ si ta̱kyak dibvong tazwa a̱kup ka, a̱ kyrek ba̱ nu a̱katyyi ba̱nyet ka a a̱ngbrak nu nu na̱ si myyi a̱ta̱ssi Yesu ka. 20Yesu na̱ bu ryi ku ryi ndya mba na, na̱ hywa da̱ a̱ntyok hywu nu, “A̱rywai nzuk, ba kaai a̱ka̱tukyya nwan nu wwon.”
21Ba̱nyet Ba̱farisa ba bu ba̱malam Truwang ba a̱ nwa ya zzim, a̱ hywa, “A̱nyan a̱ byyai Ka̱za ka ni? Ban bu Ka̱za ba̱diyin a̱nyan a̱n shyi a̱ maai kaai a̱ka̱tukyya a̱ wwon?”
22Yesu a̱ ryi ka̱sak ka ba ya zzim ka̱yat mpfwa mba ka ni, a̱ hywa da̱ mba, “A̱nzan a̱ ya ba da̱ a̱huhwa a̱ni? 23A̱nzan a̱ yet a̱hyom: ba hywa da̱ a̱yin, ‘Ba na̱ kaai a̱ka̱tukyya nwan nu wwon,’ ki ba hywa da̱ nu, ‘Ta̱za i cong’? 24Ma n cat n ya tyyei a̱mi ka̱sak ka nzuk Ka̱won A̱neywu n byyi cet cii a̱ka̱tukyya i ka̱sa ka ni.” Wwon a̱ si brek a̱ hywa da̱ a̱ntyok ta̱ruk nkap u, “N hywa da̱ nwan, ta̱za i sook kyang kwai nwan na n nat ka̱ryi.”
25Bu ka̱baram a̱ntyok a̱ywu a̱ ta̱za a̱ gut kyang kwai nu na a̱ta̱ssi mba, a̱ brak a̱ rot a̱ nat ka̱ryi, a̱ dyep Ka̱za. 26Sa̱rei mba koyan a̱ ma pyyem bu ka̱nu rot ka̱wun, a̱ dyep Ka̱za, a̱ ryat, “Kai! Zi ryi kyang ka̱hat ka̱pfun!”
Yesu a̱ yei Lawi
(Matta 9:9-13; Markut 2:13-17)
27Na̱ bu tyak a̱ drok ka̱ yemi, a̱ cong a̱ si shya a̱ntyok ssang diga̱ndu a̱yaan ba ku yei Lawi. A̱ yin ku shya na̱ swat ka̱rek ssang diga̱ndu ka. Yesu a̱ hywa da̱ nu, “N tssup.” 28Na̱ drok a̱ wwon kozan kyang a̱ wwon a̱ tssup Yesu.
29Lawi a̱ wan Yesu kyangya ba̱gingang a̱gbang nu ka, a̱ yei ba̱nyet ba̱gingang, ba̱nyet ssang diga̱ndu bu ba̱nyet ba̱yaan, ba ba bu ya dina na. Ba bu swrang a̱ krang tebur ji ba̱ mba. 30Ba̱nyet Farisa bu ba̱malam Truwang ba a̱ nwa kop a̱dyying di na̱won pfong Yesu, “A̱nzan a̱n byyi yin za kyangya bu ba̱nyet ssang diga̱ndu bu ba̱nyet a̱ka̱tukyya ba?”
31Yesu a̱ hywa da̱ mba, “Ba̱nyet nhywu a̱mi a̱ cat a̱ntyok dikan, ba̱nyet sang nhywu a̱ cat a̱ntyok dikan ba. 32Nzuk n ba di ba̱zizrak ba̱nyet ba, n ba yei ba̱nyet a̱ka̱tukyya ba brak a̱ wwon a̱ka̱tukyya mba nu.”
Ba̱ryat a̱zumi
(Matta 9:14-17; Markut 2:18-22)
33Ba hywa da̱ nu, “Na̱won pfong Yohana na a̱ yya a̱zumi bu a̱duwa, a̱mi meyang na̱nying ba̱nyet Farisa na, ma na̱nwaan na a̱ ya a̱ bo sswa.”
34Yesu a̱ hywa da̱ mba, “Yi hwa yi ni tyyi ba̱rywai a̱ntyok yya nyreng ba ba swat zong, a̱ntyok nyreng u na̱ ri shyi ba̱ mba a? 35Ma ka̱ram a̱ ri bai ba ni yen drok ba̱ a̱ntyok nyreng u, dolet ba̱rywai nu ba a̱ yen za a̱zumi ka̱ram iya.”
36A̱ bo ba̱ ta gan, a̱ hywa, “A̱yin a̱n shyi a̱ ni hwaat a̱hwai a̱tro nu a̱n jyi a̱kukwo a̱tro ba. Ki a̱ yya a̱mi, se na̱ wa nbrang bu sam a̱ryen a̱tro nu, ka̱zwwan a̱tro a̱hwai ka a̱ ni ryi ba̱cicrak ba̱ a̱ryen nu ba. 37A̱mi brak, a̱yin a̱n shyi a̱ ni sook a̱hwai ba̱shekwot a̱nap a̱ tyyi a a̱gugwak dong ba; ki a̱ yya a̱mi, a̱gugwak dong u a̱ ni ta̱kyak, ba̱shekwot a̱nap ba a̱ tyong a̱ weyang. 38Ma dolet ba tyyi a̱hwai ba̱shekwot a̱nap a a̱hwai dong. 39Ba a̱yin nu a̱ ni sswa a̱ryen ba̱shekwot a̱nap a̱ bo cat a̱hwai ni ba, rot a̱ ni hywa, ‘A̱ryen nu a̱ ran.’ ”
© 2011, Wycliffe Bible Translators, Inc. All rights reserved.