Luka 4
4
Ka̱ta̱nyrang a̱ me Yesu
(Matta 4:1-11; Markut 1:12-13)
1Yesu a̱ brek nyyai Urdun ka na̱ shyi bu Tswa Ka̱za, Tswa Ka̱za ji i bu nat ba̱ nu ka̱yit; 2ka̱ yemi na̱ sin yya nom nswak naai, a̱gwam a̱ka̱tuk tswa nu a̱ ku me. Sa̱rei ka̱yat nom iya Yesu na̱ ya kyangya ba, se nom iya na bun tyak na̱ si hok cihywat.
3A̱gwam a̱ka̱tuk tswa nu a̱ hywa da̱ nu, “Ki a yet Ka̱won Ka̱za, a tyyi kpang ji i brak tyyi kyangya.”
4Yesu a̱ ku brak i, a̱ hywa, “Ba̱ryat Ka̱za a̱ hywa ‘Ba bu kyangya ba̱diyin a̱yin na̱ ni ya a̱n kaat ba.’ ”
5A̱gwam a̱ka̱tuk tswa nu a̱ nat ba̱ nu tazwa dihwan, ka̱baram ba̱cincong na̱ ku tyyei sa̱rei a̱tityok ka̱sa na, 6-7a̱ hywa da̱ nu, “A ryi a̱tityok ani bu shii nna na, sa̱rei nzuk ba yin dyi da̱ na. A̱yin nu n ma̱n dyi dama ku ryi ni, nu n ni ku ryi sa̱rei. Ki a ta̱kwut n sook ntong, n ni na̱ ryi da̱ na.”
8Yesu a̱ bo hywa, “Ba̱ryat Ka̱za a̱ hywa, ‘A̱gwam Ka̱za nu ba̱diyin a ni ku yya sujada i bu ku yya dikwwa.’ ”
9A̱gwam a̱ka̱tuk tswa nu a̱ bo nat ba̱ nu Urushalima a̱ sseng ba̱ nu tazwa a̱tatai hasumiya bat Ka̱za nu, a̱ hywa di Yesu, “Ki ka̱ryong a̱mi a yet Ka̱won Ka̱za, hruk nyyai kyi si kpa ka̱byen. 10Rot ba̱ryat Ka̱za a̱ hywa, ‘Ka̱za a̱ ni tyyi ba̱pfong Ka̱za nka a̱ na̱ cam.’ 11A̱ bo hywa, ‘Ba ni na̱ pyyem di mbvak mba na a̱ breng, ho kpang bu hwak a̱nyan-a̱byen nwan na.’ ”
12Yesu a̱ hywa da̱ nu, “Ba̱ryat Ka̱za a̱ hywa, ‘Ku yet a me Ka̱za A̱gwam nwan ba.’ ”
13A̱gwam a̱ka̱tuk tswa nu a̱ bu tyak ku me na sa̱rei, a̱ yen drok a̱ ku wwon, se a̱ bo bu shya ka̱ram ka̱yaan.
Yesu a̱ nwa pfong ka̱yat Galili
(Matta 4:12-17; Markut 1:14-15)
14Yesu a̱ brek a̱ ba Galili, cet nTswa Ka̱za ku shyi ba̱ nu. Nkhang nu na i tyak a̱pfo ba̱nyet ba a̱ yin shyi i ka̱byen Galili ka ni sa̱rei. 15Na̱ nwai a̱ ba̱ zzek a a̱bat a̱duwa na, ba̱nyet ba̱gingang a̱ ku dyep.
Ba rak Yesu Nazarat
(Matta 13:53-58; Markut 6:1-6)
16Yesu a̱ nat Nazarat, ka̱rek ka ba yin ku go ni. Ka̱tuk A̱sa̱ba̱t ka a̱ wo krang a̱ ba, ka̱tuk pfwi ba̱nyet Yahuda ka. Na̱ nwa ka̱yat bat a̱duwa ka ka̱sak ka na̱ nan yya ni, a̱ ta̱za a̱ ni twang ba̱ryat Ka̱za. 17Ba ku neyak kpa Ishaya a̱ntyok tyyei ba̱ryat Ka̱za. Na̱ yrang a̱ si shya ka̱bvwa ka ban hywa ni,
18“Tswa A̱gwam Ka̱za shyi ba̱ nzuk
Rot a̱ n tssa n tyyei ba̱nyet dizot Ka̱sham Ba̱ryat ka.
A̱ n tom n tyyei ba̱nyet ba a̱ shyi a jaru ni ka̱sak ka ban ba̱ kaai a̱ wwon ni,
N bo n tyyei ba̱nyet a̱tutwan ka̱sak ka a̱ssi mba na nin yrang ni.
N bo n san ba̱nyet ba ba zzap a̱ tyei ni n kaai n wwon.
19N tyyei ka̱sak ka ka̱ram ka Ka̱za ka nin san ba̱nyet nka ba ni a̱ yya.”
20Na̱ kup kpa na a̱ brek a̱ wrak a̱ntyok cam bat a̱duwa nu, a̱ brek a̱ si swrang. Sa̱rei ba̱nyet ba a̱ shyi ka̱yat bat ka ni a̱ brak a̱ssi a̱ ku krok i. 21Wwon na̱ si hywa da̱ mba, “To, ka̱pfun ba̱ryat bani yi pfong ni a̱ ba ba̱cicrak ka̱sak ka ba yin ba̱ ryat a̱ sak ni.”
22Sa̱rei mba ba ku dyep, a̱ yya ka̱hat bu ba̱ryat ba a̱ wwut ka̱nu nu ni, hat ba hywa, “A̱tuba a̱ni a̱mi a̱ yet ka̱won Yusufu ka baa?”
23Yesu a̱ hywa da̱ mba, “N bvwo yi nin ta gan jini da̱ a̱bvok a̱ yen bvok diccu nu, i bu hywa, ‘Yya kyi i ka̱nkrang nwan ka nkyang a zi hok da̱ a yya ka̱yaa Ka̱fa̱rna̱hum ka ni ra.’ ” 24A̱ bo hywa da̱ mba, “Koyan a̱ bvwo, a̱ntyok tyyei ba̱ryat Ka̱za a̱ byyi shok i ka̱nkrang nu ba. 25Yi hok ansham: ba̱kpotyok ba̱nyring a̱ yin shii ka̱tswa i ka̱byen Isreila ka̱ram ka Iliya na̱ yin shyi ni, ka̱ram iya za sseng yya a̱rya a̱tat bu kpikpit, ba yya zong sa̱rei ka̱byen ka. 26Ma di ba tom Iliya di ko a̱neyring mba ba, se a̱kpotyok a̱mbyring a̱yring ka̱yat Zarifat i ka̱byen Saida. 27Ka̱ram Elisha brak ba̱nyet gbap a̱ yin shii ka̱tswa i ka̱byen Isreila, ma ba creng a̱neyring mba ba se Na'aman nyyai i ka̱byen Siriya.”
28Ka̱ram ka ba̱nyet ba a̱ shyi i bat a̱duwa na ni ban hok ni a̱ yya diryen ba̱t. 29Ba ku kwak a̱ nat i i ditom tsok ti ba yin nok ka̱nkrang mba ka ni a̱ cat ku yrik a̱ ta a a̱gbrang u. 30Ma na̱ cong a̱katyyi ka̱tswa ba̱nyet ka a̱ si nat a̱ ba̱ wwon.
A̱ntyok byyi a̱ka̱tuk tswa
(Markut 1:21-28)
31Yesu a̱ bo nat Ka̱fa̱rna̱hum, ka̱nkrang ka̱yaan ka̱yat ka̱byen Galili, a̱ si nwa zzek ba̱nyet ba ka̱tuk A̱sa̱ba̱t ka. 32Ba yya ka̱hat ba̱gingang bu zzek nu na, rot ba̱ryat nu ba a̱ yin byyi cet. 33A̱yanyet a̱ ma̱n shyi ka̱yat bat a̱duwa ka a̱ shyi ba̱ a̱ka̱tuk tswa. Na̱ yrek diwan nu ti ba̱ tazwa, a̱ hywa, 34“Woyooi! A̱nzan a cat ba̱ njit, Yesu A̱ntyok Nazarat? A ba i gi za hywaai o? N na̱ bvwo sa̱rei, a yet A̱ntyok tyyei ba̱ryat Ka̱za.”
35Yesu a̱ kam a̱ka̱tuk tswa nu a̱ hywa, “Tyyi nyong i wruk i wwon a̱ntyok a̱ywu.” A̱ka̱tuk tswa nu a̱ ku sook a̱ mak ka̱byen a̱ta̱ssi mba ka a̱ wruk a̱ ku wwon da̱ a̱ ku bvwa ba.
36Ka̱hat i ba̱ pyyem ba̱sa̱rei mba, ba nwa ya zzim, “A̱nzan ba̱ryat a̱ bo swat ni? Bu di cet ba̱ryat ka̱nu nu bu cet na̱n tssap a̱ka̱tuk tswa ba wwut.” 37Nkhang Yesu i nat kozan ka̱rek i ka̱byen ka.
Yesu a̱ creng ba̱nyet ba̱gingang
(Matta 8:14-17; Markut 1:29-34)
38Yesu a̱ wruk i bat a̱duwa na a̱ seyak a̱ nwa gbang Siman, a̱ si shya a̱kwo a̱ra̱mbyring Siman nu na̱ byyi ba̱soza ba̱gingang, ba ku naai na̱ ku brang. 39Yesu a̱ nwa a̱ si sseng beyang a̱ngbrak ka a̱kwo Siman nu na̱ myyi ni, a̱ kam ba̱soza ba ba wruk a̱ ku wwon, na̱ ta̱za ba ahwa a̱ ba̱ cat kyangya.
40Nom ku bu kpa, ba̱nyet ba a̱ nat a̱ si ba bu ba̱kpondang mba ba a̱ shyi bu nhywu ba̱ a̱nzitaka̱i ka̱rek Yesu. Na̱ bu ba̱ saai mbvak a̱ ba̱ creng sa̱rei mba. 41A̱ka̱tuk tswa a̱ wwut di ba̱yanyet ba̱gingang a̱ ryat ba̱ tazwa a̱ yya, “Nwan a̱mi yet Ka̱won Ka̱za ka.” Ma na̱ za̱ kam di zi tyyi nyong, rot a̱ka̱tuk tswa nu a̱ yin bvwo da̱ nu a̱ yet Kristi nu.
Yesu a̱ yya wa'azi ka̱yat a̱bat a̱duwa
(Markut 1:35-39)
42Ka̱ntson a̱ wo tat Yesu a̱ wruk i ka̱nkrang ka a̱ nat ka̱rek ka̱yaan a̱ si shyi ba̱diyin. Ba̱nyet ba a̱ nwa ku cat. Ba si ku shya, a̱ cat na̱ bo shek ba. 43Ma na̱ hywa da̱ mba, “Dolet n nwai kpikpit na̱nkrang a n ba̱ zzek Ka̱sham Ba̱ryat Dityok Ka̱za ti, rot nkpa a̱mi Ka̱za ka ni n tom.”
44A̱ nwai a̱bat a̱duwa na sa̱rei ka̱byen ba̱nyet Yahuda ka a̱ yya wa'azi.
© 2011, Wycliffe Bible Translators, Inc. All rights reserved.