Luka 24
24
Ta̱za Yesu i dibyyi
(Matta 28:1-10; Markut 16:1-8; Yohana 20:1-10)
1Ka̱tuk Ladi a̱ wo krang a̱ ba, ba̱nyring ba a̱ nat ba̱ta̱ntson i dibyyi ti bu turare ji ba jyi a̱ sak ni. 2Ba si shya ba jik kpang ji a̱ sak a̱zigak a̱ wwon ka̱nu ryak ka. 3Ba seyak a̱ nwa ka̱yat ka a̱ si shya rwam A̱gwam Yesu na ba. 4Ba sseng a̱ shyi a̱huhwa taka̱i nkyang ani, bu ka̱baram ba ryi ba̱nyet ba̱ mba ba̱hwa ba sseng gak mba, ba̱tro mba ba ba sai ba̱kinkyai. 5Ba̱nyring ba a̱ hok ka̱wun a̱ ta̱gbok ka̱byen. Ba̱nyet iya a̱ hywa da̱ mba, “A̱nzan a̱ ya ba cat a̱cet a̱yin ka̱yat nkom? 6Nde, a̱n shyi ba, a̱ ta̱za. Yi yring kyang a na̱ yin ya tyyei nyyai Galili ka ni. 7A̱ yin hywa, ‘Dolet a̱mi ba wrak Ka̱won A̱neywu mbvak ba̱ka̱tuk ba̱nyet ba ka̱ teyang tazwa ka̱teyang, ka̱tuk nom a̱mba̱tat ka bo ta̱za.’ ”
8Ba̱nyring iya a̱ si yring ba̱ryat nu ba, 9a̱ brek nyyai dibyyi ti a̱ bu tyyei ba̱pfong swak ba̱ a̱yring ba bu kpikpit a sa̱rei ba̱ryat bani. 10Ba̱nyring ba a̱mi a̱ yet Maryamu Magadaliya, bu Yuwana, bu Maryamu a̱naa Yakubu, bu kpikpit ba̱nyring a yin shyi ba̱ mba ni. Mba a̱mi a̱ yin bu tyyei ba̱pfong ba nkyang ani. 11Mba meyang ba san ba̱ryat ba̱nyring ba a̱n yya a̱kpam mba. 12Ma Bitut a̱ ta̱za a̱ pyyem ncyi a̱ naat i ryak a, a̱ si ta̱kwut a̱ cyang ka̱yat ka a̱ ryi ba̱tro ba ba yin gat a̱n ku nyat ni ba ba̱ gut a̱ sak a̱za̱gbang a̱yring. Na̱ brek a̱ ba ka̱ryi a̱ yya ka̱hat ba̱gingang bu kyang a na̱ si ryi ni.
Yesu a̱ mon bu ba̱pfong ba̱hwa a̱zi ryen Imayat
(Markut 16:12-13)
13Bu ka̱tuk iya ba̱yanyet ba̱yaan ka̱yat ba̱pfong Yesu ba ba̱ mba ba̱hwa ba sook ryen na a̱ naat ka̱nkrang ka̱yaan ban yei Imayat. Nyyai Urushalima nat Imayat yet kilometer swak ba̱ a̱yring. 14Ba cong a̱ tsaai nkhang tazwa sa̱rei nkyang ka yya ni. 15Ka̱ram ka ban shyi ba̱ryat ba ni Yesu a̱ ba a̱ cong ba̱ mba. 16Ma a̱ssi mba na a̱ maai a̱ ku ryi a̱ bvwong ba. 17Yesu a̱ hywa da̱ mba, “A̱nzan yi mu shya ryat bu ba̱nyin ba̱hwa a̱zi ryen?”
Ba tyet a̱ sseng, ndya mba na i byyan. 18A̱tuba a̱yring mba ba ku yei Kiliyobat a̱ hywa da̱ nu, “Ba̱ nwan mu yet a̱yecen nu Urushalima ka n cyi nkyang a nwai a̱zi nom ani ni e?”
19Yesu a̱ ba̱ zzim a̱ hywa, “A̱nzan nkyang?”
Ba hywa, “Nkyang a shya Yesu a̱ntyok Nazarat ni. A̱ yin yet a̱ntyok tyyei ba̱ryat Ka̱za. A̱ta̱ssi Ka̱za bu ba̱nyet na̱ byyi cet ka̱yat ba̱ryat bu nkyang a na̱ yya ni. 20Ba̱cecet ba̱gado Ka̱za njit ba bu ba̱gwam ba a̱ ku pyyem a̱ wrak ba hywat, ba si ku ka̱teyang. 21To, nu a̱mi zin byyi rya da̱ ni san ba̱nyet Isreila ba a̱ wwon. Kyang yaan ku si bun hat ba̱nyet ba. Nom ntat naani nyyai ban ku hywat. 22To, ba̱nyring ba̱yaan ba a̱ shyi ba̱ njit ni ba bu za tyyei kyang ka̱hat. Ba bu shyek ba̱ a̱ta̱ntson a̱ nat i ryak a, 23ma a̱ si ryi kom a ba. Ba brek a̱ bu hywa di ba ryi ba̱pfong Ka̱za ba ba̱ tyyei da̱ a̱n shyi a̱cet. 24Ba̱nyet ba̱yaan ka̱yat njit a ma̱ nat i ryak a a̱ si shya kozan kyang ba̱cicrak bu kyang a ba̱nyring ba ba ryat i, di ba ryi kom nu na ba.”
25Yesu a̱ hywa da̱ mba, “Yi sak a̱za̱ncyi nyin na ke? Yi hweyak a̱pfo nyin na, sa̱rei ba̱ryat ba ba̱nyet tyyei ba̱ryat Ka̱za ba ba yin dyat ni a̱ ya kaat san naa? 26N ni nye ku yet dolet se Kristi nu a̱ yen sswa ka̱bvung a̱ si wa bvwa a̱n nwa dityok nu ti e?” 27Yesu a̱ si ba̱ tyyei sa̱rei kyang a ba̱ryat Ka̱za ba ba ryat a̱za̱ nu ni, nyyai ka̱yat a̱kpa ka Musa na̱ yin jem ni nta̱mak bu sa̱rei ba̱nyet tyyei ba̱ryat Ka̱za ba.
28Ba bu si tat shishrek bu ka̱nkrang ka ba yin naat ni, Yesu a̱ yya da̱ni da̱ a̱ cat seyak ni, 29ba ku yei a̱ brek i, a̱ hywa da̱ nu, “A ryi nom a ku tyak ka̱bvwa kanka a̱ kwak ka̱tuk, se a tsswa ba̱ njit.” Na̱ seyak a̱ nwa ba̱ mba. 30Ba si swrang a̱ ni ya kyangya, na̱ sook burodi na, wwon a̱ yya a̱duwa nu, a̱ sam a̱ ba̱ jyet. 31A̱ssi mba na a̱ si tat ba ku ryi a̱ bvwong, na̱ brik a̱ ba̱ wwon. 32Ba hywa di ba̱yaan, “Cyang, ndya njit a bu hwwi di rong ni ka̱ram ka na̱ bun dyat ba̱ njit a̱zi ryen ka ni a̱ za tyyei nkyang a ba̱ryat Ka̱za ba ba hywa ni.”
33Ba ta̱za gaan a̱ brek a̱ nat Urushalima, a̱ si shya ba̱pfong swak ba̱ a̱yring ba i ka̱rek ka ba tung bu kpikpit a ni. 34Ba̱pfong swak ba̱ a̱yring ba a̱ hywa da̱ mba, “Ku yet ka̱ryong a̱mi A̱gwam njit u Yesu a̱ ta̱za. Siman a̱ ku ryi.”
35Ba̱nyet ba̱hwa iya a̱ si kok ka̱sak ka ban cong ba̱ nu ni, bu ka̱sak ka ban ku ryi a̱ bvwong ka̱ram ka na̱n sam burodi na ni.
Ba̱pfong ba a̱ ryi Yesu
(Matta 28:16-20; Markut 16:14-18; Yohana 20:19-23; Npfong 1:6-8)
36Ka̱ram ka ban shyi i ba̱ kok ba̱ryat bani ni Yesu a̱ nyyai bu ka̱baram a̱ si sseng ka̱yat mba, a̱ hywa, “Sa̱la̱ma nyin.”
37Ka̱wun a̱ ba̱ pyyem, ban yei a̱ninyet a̱mi. 38Na̱ hywa da̱ mba, “A̱nzan a̱n byyi ndya nyin na na kyyai a̱mi? A̱nzan a̱ ya ba di taka̱i sang ka̱ryong ani? 39Yi cyang mbvak nzuk a ba̱ a̱tak nzuk a i gi bvwo nzuk a̱mi. Yi n bam i hok i gi bvwo, rot a̱ninyet a̱ byyi rwam bu nkup ba, ka̱sak ka yin dyi n byyi ni.”
40Na̱ ryat a̱mi a̱ ba̱ tyyei mbvak nu na ba̱ a̱tak nu na. 41Ba tyyi ba̱kinkyai bu ba̱gwai a ndya mba na, a̱ yya ka̱hat a̱ ryin kyang a ba ni yya ni. Na̱ hywa da̱ mba, “Yi shyi bu kyangya kyi e?” 42Ba ku ryi dikum nhwon ba wan, 43na̱ san a̱ ya a a̱ssi mba.
44A̱wwon a̱ si hywa da̱ mba, “Nkyang ani a̱mi n yi ya tyyei nyyai n ri shyi ba̱ nyin. Kozan kyang ba jem ka̱yat ba̱ryat ka Musa bu ba̱nyet tyyei ba̱ryat Ka̱za mbrang bu Zabura ni, dolet se ba ba ba̱cicrak.”
45A̱ si ba̱ yrang ndya mba na ba ga bvwo ba̱ryat Ka̱za ba. 46A̱ hywa da̱ mba, “Kyang a ba yin jem ni nkpa yet dolet se Kristi nu a̱ yen sswa ka̱bvung a̱ bo ta̱za nyyai a̱yabyen ka̱tuk nom tat. 47A̱wwon diyrek nu ba sook a̱n yya wa'azi tyak ka̱sa ka, a̱ sook nyyai Urushalima a̱ hywa, ‘Yi tuba wwon a̱ka̱tukyya nyin nu, Ka̱za a̱ ga bring a̱shishikyya nyin nu.’ 48Nyin yi yet shaida nkyang jini sa̱rei. 49Nzuk meyang n ma̱ ni ya tom di kyang a A̱tyyi nu na̱ ka̱n dop a̱wwon a̱ ni ya ryi ni. Ma dolet yi yen tot i ka̱nkrang ka se ka̱ram ka yin shya cet na nyyai Tazwa ni.”
Ba nat bu Yesu Tazwa
(Markut 16:19-20; Npfong 1:9-11)
50Na̱ si wruk ba̱ mba i ka̱nkrang ka a̱ nat di Baitanya ni. A̱ si yrek mbvak nu na a̱ ba̱ pfwa nda. 51Ka̱ram ka na̱n shyi i ba̱ pfwa nda na ni ba ku sook a̱ ba̱ wwon a̱ naat ba̱ nu Tazwa. 52Mba meyang ba ku kok ntong, wwon a̱ brek a̱ ba Urushalima bu ba̱gwai ba̱t. 53Kozan ka̱ram ba shyi ka̱yat bat Ka̱za a̱ ka̱ dyep.
© 2011, Wycliffe Bible Translators, Inc. All rights reserved.