Luka 20
20
Ba zzim ka̱bvwa ka Yesu na̱n shya cet nu na ni
(Matta 21:23-27; Markut 11:27-33)
1Ka̱tuk ka̱yaan Yesu na̱ shyi i bat Ka̱za na, a̱ bo yya wa'azi Ka̱sham Ba̱ryat, ba̱cecet ba̱gado Ka̱za bu ba̱malam Truwang ba, nta̱mak ba̱nekwo ba̱yaan a̱ nyyai a̱ ba, 2a̱ bu hywa di Yesu, “Za tyyei ka̱bvwa ka an shya cet yya nkyang ani ni. A̱nyan a̱ na̱ ryi taka̱i cet iya?”
3Yesu a̱ hywa da̱ mba, “Nzuk meyang n ma̱ ni ya zzim. Yi n tyyei, 4ke Yohana na̱ yin shya cet yya baptisma nu na? A̱ yin shya di Ka̱za ki ba̱nyet?”
5Ba nwa a̱cecet bu mba-mba a̱ hywa, “To, a̱nzan zi ni hywa? Ki zi hywa da̱ a̱ yin shya di Ka̱za, na̱ hywa, ‘To, a̱nzan a̱n byyi yi yin dak ku hok a?’ 6Ma ki zi ma̱n hywa da̱ a̱ yin shya di ba̱nyet, ba̱nyet ka̱tung bani a̱ ni za mang di kpang, rot ba shim Yohana a̱ yin yet a̱ntyok tyyei ba̱ryat Ka̱za.” 7Rot a̱mi ba hywa da̱ nu, “Zi bvwo ka̱rek ka na̱ yin nyyai ni ba.”
8Na̱ ma̱n hywa da̱ mba, “Nzuk meyang n ma̱ ni ya tyyei ka̱rek ka n ni n shya cet yya nkyang ani ni ba.”
Ba̱nyet yya haya ka̱byen a̱lemu
(Matta 21:33-46; Markut 12:1-12)
9Yesu a̱ ba̱ tyyei nkhang nzaan a̱ hywa, “A̱yanyet a̱ yin tssup na̱kon a̱lemu, a̱ drok ka̱ryi ka a̱ si da̱de ka̱bvwa ka̱yaan a̱ tyyi na̱kon a̱lemu na i haya. 10Ka̱ram kpyei a̱lemu ka ka bu yya, na̱ tom a̱kwwa a̱yring nu na̱ bu san zang nu ji. Ba̱nyet haya ba a̱ bu pyyem a̱kwwa a̱ywu a̱ tsot a̱ ku tun mbvak-nkwot. 11Na̱ bo tom a̱kwwa a̱yaan, ba̱nyet haya ba a̱ bo si ku pyyem a̱ tsot a̱ ku tyyi nsum a̱ ku tun mbvak nkwot. 12Na̱ bo tom a̱kwwa a̱mba̱tat u, ba bo si ku tsot a̱ ni bvwa a̱ ku nyying. 13A̱ntyok byyi ka̱byen nu a̱ swrang a̱ hwa a̱ hywa, ‘To, a̱nzan n ni yya? N ni tom ka̱won nzuk ka n cat i; shim ba si ka̱ ryi shii!’ 14Ba̱nyet haya ba ba bu ka̱ ryi, a̱ hywa, ‘Ka̱won a̱ntyok byyi ka̱byen ka a̱ yemi a̱ bai. Zi ni ka̱ hywat, wwon nkyang nu na i yet njiit.’ 15Ba ka̱ pyyem a̱ wruk i i ka̱byen a̱lemu ka a̱ ka̱ hywat.”
Yesu a̱ ba̱ zzim, “Yi hwa da̱ a̱nzan a̱ntyok ka̱byen nu na̱ ni yya ba̱nyet haya ba mi? 16A̱ ni ba a̱ bu ba̱ hywaai a̱ brak ka̱byen ka a̱ wrak ba̱yanyet.”
Ba̱nyet ba a̱ ku pfong ni a̱ hywa, “Ko ba̱cincong! Ku ndyi ami ba!”
17Yesu a̱ ba̱ cyang a̱ hywa, “To, a̱nzan ba̱ryat Ka̱za ba ba ryat?
‘Kpang ji ba̱nyet dinok ba rak i,
nji a̱mi ba si sak zi yet ka̱gwut ka.’
18A̱yin nu a̱ kpa a̱za̱ kpang iya ni, a̱ ni ya cwrya a̱n yya ba̱ a̱cwwang. Ki kpang ji ma̱n ku kpa, i ni ku ruk n yya mpyyi.”
Ba̱ryat trang diga̱ndu
(Matta 22:15-22; Markut 12:13-17)
19Ba̱malam Truwang ba bu ba̱cecet ba̱gado Ka̱za ba a̱ cat pyyem Yesu bu ka̱ram iya, rot ba bvwo mba a̱mi na̱ yin dyat a̱ ba̱ kwot i; ma ba pfong ka̱wun ba̱nyet ka. 20Ba tot a̱ shya ka̱ram. Ba tan ba̱yanyet zang ba ba a̱ bu tssem Yesu a̱ yya di a̱kpak a̱ssi ban yya ni; ba ba̱ tom ba si tssem Yesu di zzim a̱ ga shya kyang a ba nin ku pyyem a̱ tyyi mbvak ba̱nyet breng ka̱byen ka ni. 21Ba̱nyet iya a̱ nyyai a̱ bu hywa di Yesu, “Malam, zi bvwo kyang a a ryat bu zzek ni ku yet ka̱ryong. A tyong a̱ssi a̱yin ba, seko a tyyei kyang a Ka̱za ka cat a̱yin a̱ yya ni. 22Za tyyei, ku myim zi trang diga̱ndu njit di A̱gwam Rom a, ki zi ryok?”
23Yesu a̱ bvwo ba ku tssem a̱mi, a̱ hywa da̱ mba, 24“Yi ba di krum ji ban trang diga̱ndu ti ni.” A̱ ba̱ zzim, “A̱nyan a̱ byyi diyrek ti ni, a̱nyan a̱ bo byyi diccu ti ni?”
Ba hywa da̱ nu, “A̱gwam Rom a̱mi.”
25Yesu a̱ hywa da̱ mba, “Yi wrak A̱gwam Rom kyang a yet nying A̱gwam Rom ni, i wrak Ka̱za kyang a yet nying Ka̱za ni.”
26Ba ryin hywak ku pyyem i ba̱ryat ba na̱ ryat ka̱yat ba̱nyet ka ni, a̱ ma pyyem bu na̱nu mba a̱ yya ka̱hat rot kyang a na̱ ryat ni.
Ba̱ryat drok a̱yabyen
(Matta 22:23-33; Markut 12:18-27)
27Ba̱nyet Sadusi yaan i ba di Yesu. (Mba a̱mi a̱ yin ton di ka̱ a̱yin a̱ kwu a̱ bo byyi sso zaan ba.) Ba bu ku zzim a̱ hywa, 28“Malam, Musa a̱ yin jem a̱ hywa, ‘Ka̱ a̱yin a̱ kwu a̱ wwon a̱mbyring nu ba ka̱n shya ka̱won ba, a̱wumba nu a̱ sak a̱mbyring u a̱ ga nku shya byik.’ 29To, ba̱yanyet a̱ yin shyi a̱tiyring a a̱tyyi mba nu. A̱yekwo mba nu sa̱rei a̱ bvwa a̱mbyring, a̱ kwu ba ka̱n shya ka̱won ba. 30A̱shishyi nu nu a̱ sak a̱mbyring u a̱ ma̱n kwu, ba shya ka̱won ba. 31A̱tuba nu a̱ ku tssup ni a̱ ma̱n sak a̱mbyring u. Sa̱rei ba̱wumbeyang ba ba̱ mba a̱tiyring a̱ saai a̱mbyring u a̱ kwi, di ba shya ka̱won ba. 32A̱mbyring u a̱ si ma̱ bu kwu. 33To, ka̱tuk ka ba̱nyet ba ba nin ta̱za a̱yabyen ka ni, a̱nyan ka̱yat mba a̱ ni byyi a̱mbyring u? Na̱ nu a̱ ka̱n nyreng koyan ka̱yat mba a̱tiyring ka.”
34Yesu a̱ hywa da̱ mba, “Ba̱ntyok bu ba̱nyring i ka̱sa ka ni a̱ yya nyreng, 35ma i zamani cong bai a, ba̱ntyok bu ba̱nyring ba a̱ shya drok nyyai a̱yabyen ka ni a̱ byyi ba̱ryat nyreng ba. 36Di ba̱pfong Ka̱za ni, ba byyi dikwu ba. Ba yet na̱won Ka̱za, rot ba ka̱n kwi a̱ bo shai sso zaan. 37Kuma Musa a̱ yin tyyei ba̱zizrak di ba̱nyet ba a̱ ka̱n kwi ni a̱ bo ni shai sso. Ka̱bvwa ka ban jem ba̱ryat ndong ba a̱ yin za ka̱hwwong ka ni, ba tyyei ka̱sak ka A̱gwam Ka̱za na̱n yet Ka̱za Ibrahim, a̱ bo yet Ka̱za Ishaku, a̱ bo yet Ka̱za Yakubu ka ni. 38Ku tyyei ka̱sak ka na̱n yet Ka̱za ba̱nyet ka a̱ yet a̱cet ni ba nkom ba, rot ba̱nyet sa̱rei ka̱bvwa nu a̱ yet a̱cet.”
39Ba̱malam Truwang ba̱yaan a̱ yrek na̱wan mba na a̱ hywa, “A hywa ansham, Malam!” 40Rot ba yin maai a̱ bo ku zzim kyang yaan ba.
Ba̱ryat Kristi
(Matta 22:41-46; Markut 12:35-37)
41Yesu a̱ hywa da̱ mba, “Ba cong ni a̱n hywa di Kristi nu a̱ ni nyyai an sot Dawuda? 42Rot Dawuda diccu nu ma a̱ yin hywa, ka̱yat kpa Zabura,
‘A̱gwam Ka̱za a̱ hywa da̱ A̱gwam nzuk:
Swrang kyi bvuk yak nzuk ka,
43se n da ba̱ra̱ndwan nwan n tyyi ka̱ntai tak nwan ka.’
44Ki Dawuda a̱ yin ku yei a̱gwam nu, na̱ bo cong ni a̱n yet ka̱mbvon Dawuda ka?”
Yesu a̱ kam ba̱malam Truwang ba
(Matta 23:1-36; Markut 12:38-40)
45Ka̱ram ka ba̱nyet ba sa̱rei ban krok a̱pfo a̱n ku pfong ni, Yesu a̱ hywa di na̱won pfong nu na, 46“Yi ta̱rwam bu ba̱malam Truwang bani, mba a̱ na cat kat bu ba̱cecet ba̱tro mba, ba̱nyet ba ta̱gbok a̱ ba̱ byei ka̱yat tunga. Mba a̱ tssa na̱bvwa sswak ba̱cecet ba̱nyet ka̱yat a̱bat a̱duwa, bu a̱tsatsak na̱bvwa sswak i na̱bvwa dihywa. 47Mba a̱mi a̱ bvuk ba̱nyring sang ba̱ntyok a̱ ssang na̱sa mba na. Se cat yya a̱jinjing a̱duwa ba ga ba̱ ryi a̱ bring nkyang a ba yya ni. Ka̱bvung ka ba ni sswa ni a̱ tai ryi ba.”
© 2011, Wycliffe Bible Translators, Inc. All rights reserved.