Luka 14
14
Yesu a̱ creng a̱ntyok mwei nkap ka̱tuk A̱sa̱ba̱t
1Ka̱tuk A̱sa̱ba̱t ka̱yaan Yesu na̱ nat ya kyangya ka̱ryi a̱tuba a̱yring ka̱yat ba̱cecet ba̱nyet Farisa ba, ba̱nyet ba ku cam. 2A̱ntyok a̱yaan na̱ shyi ka̱ yemi, a̱tak nu na bu mbvak a na mwei. 3Yesu a̱ zzim ba̱malam Truwang ba bu ba̱nyet Farisa na, a̱ hywa, “Truwang njit wwon ba creng a̱yin ka̱tuk A̱sa̱ba̱t, ki zi wwon ba?”
4Ba swat ba̱ nyong a̱ rak krang a. Yesu a̱ kwwat a̱ntyok a̱ywu a̱ ku creng a̱ ku tun na̱ nat. 5A̱ si ba̱ zzim a̱ hywa, “A̱nyan a̱mi ki ka̱won nu ko bvon nu kpa ka̱yat rijiya ka̱tuk A̱sa̱ba̱t na̱ rak tun na bu ka̱tuk iyaa?”
6Sa̱rei mba ba bvwo kyang a ba ni ku brak i ni ba.
Kyang a myim ba̱nyet a̱ yya ka̱rek dihywa ni
7Na̱ bu ryi ba̱nyet ba ba yei ka̱rek ya kyangya ka ni koyan na̱ nyyai a̱ bu tssa a̱tsatsak ka̱rek swrang, Yesu a̱ hywa da̱ mba 8“Ki ba na̱ yei ka̱rek dihywa nyreng, ryok si tssa a̱tsatsak ka̱rek swrang u ba si yen swrang a a̱kpam ka̱rek swrang u, ho a̱yanyet u a̱ na̱ ran ni a̱ ma̱ bu ba, 9wwon a̱ntyok dihywa nu a̱ nyyai a̱ bu hywa da̱ nwan, ‘Drok i wwon a̱ntyen a̱ni ka̱rek iya’; ba na̱ tyyi nsum a̱ si brek nat a a̱kpam ka̱rek swrang u. 10Ma ki a nyyai nat ka̱rek dihywa ka a si swrang a a̱kpam ka̱rek u, a̱ntyok dihywa nu a̱ si nyyai a̱ bu hywa da̱ nwan, ‘A̱ntyok, ba i swrang kyi!’ A ryi ba̱nyet ba a̱ swat ba̱ nwan ni ba na̱ ryi shii ba̱t. 11A̱yin nu a̱ yet diccu nu ni, ba ni ku ywwai; a̱yin nu a̱ ma̱n ya ywwai ni, ba ni ku yrek.”
12A̱ brak a̱ hywa da̱ a̱tuba nu a̱ yei dihywa ji ni, “Ka a ni yei ba̱nyet ya kyangya a̱gbang nwan, ryok yei bu ba̱rywai nwan ba, a ryok yei bu ba̱wumbeyang nwan ba, ko ba̱nyet byyi zwa, rot mba meyang ba ma̱ ni na̱ yei a̱ ga si na̱ tan. 13Ma a yei ba̱nyet dizot, bu ba̱nyet ta̱ruk nkap, bu ba̱nyet a̱tutwan, 14A ni shya hok ansham, rot mba ba byyi ryen na ba nin na̱ tan ni ba. Se ka̱tuk ka ba̱tsatsak ba̱nyet ba nin ta̱za ni a si shya zang nwan ji di Ka̱za.”
A̱gba̱dang dihywa
(Matta 22:1-10)
15A̱yanyet ka̱yat ba̱nyet ka a̱ shyi ka̱rek ya kyangya ka ni a̱ bu hok a̱mi a̱ hywa di Yesu, “A̱ntyok ka̱nu-a̱tan a̱mi a̱yin nu a̱ ni ya kyangya i Dityok Ka̱za ti ni e?”
16Yesu a̱ hywa da̱ nu, “A̱yanyet a̱ yin byyi a̱gba̱dang dihywa a̱ yei ba̱nyet ba̱gingang. 17Ka̱ram nwa dihywa ka ka bu yya, na̱ tom ba̱kwwa nu ba ba si tyyei ba̱nyet ba di kozan nkyang a̱ tyyi. 18Ba̱nyet ba ba yei ni a̱ nwa ya trip ba̱yayring. A̱tuba a̱yring a̱ hywa da̱ a̱kwwa nu, ‘N san ka̱byen, n yen cat nat n si ka̱ cyang. Ki a shim, a n wwon.’ 19A̱yanyet a̱ hywa, ‘N san nyak ba̱ nji swak, n yen naat n si za̱ myyek. Ki a shim, a n wwon.’ 20A̱yanyet a̱ hywa da̱ nu, ‘N bvwa a̱mbyring; rot a̱mi n ni maai n ba ba.’ 21A̱kwwa nu a̱ brek a̱ si tyyei a̱ntyok ka̱ryi nu. A̱ntyok ka̱ryi nu a̱ hok diryen ba̱t. A̱ hywa da̱ a̱kwwa nu, ‘Ta̱za ahwa i tssup na̱ta̱ryen na bu ba̱ga̱sat na̱ta̱ryen ba i yei ba̱nyet dizot, bu ba̱nyet ta̱ruk nkap, bu ba̱nyet a̱tutwan.’ 22A̱kwwa nu a̱ brek a̱ bu tyyei a̱ntyok ka̱ryi nu, a̱ hywa ‘A̱ntyok ka̱ryi, ba̱nyet ba a̱ ba, ma na̱rek swrang a̱ ri shyi.’ 23A̱ntyok ka̱ryi nu a̱ hywa, ‘Bu nat i sook na̱ta̱ryen na nta̱mak bu ka̱ma ka̱nkrang ka i yei ba̱nyet ba ba ba ka̱ryi nzuk ka a̱ ga tyyi a̱n hywat bu ba̱nyet. 24N ya tyyei: ko a̱tuba a̱yring ka̱yat ba̱nyet ka n yei ka̱tsitsrang ka ni a̱ ni tyyi kyangya ka̱nu ka̱ryi kani ba.’ ”
Wahala yet a̱ntyok tssup Yesu
(Matta 10:37-38)
25Ba̱nyet ba̱gingang a̱ ta̱za a̱ tssup Yesu, na̱ naat. Na̱ brak a̱ hywa da̱ mba, 26“Ba koyan nu a̱ ba da̱ nzuk ni a̱mi a̱ ni maai yet ka̱won pfong nzuk ba, seko a̱ rak a̱tyyi nu, ba̱ a̱naa nu, ba̱ a̱mbyring nu, bu na̱won nu, bu ba̱wumbeyang nu, nta̱mak bu diccu nu. 27A̱yin nu a̱ maai sook ka̱teyang nu a̱n tssup ni ba a̱ ni maai yet ka̱won pfong nzuk ba. 28Ka̱ a̱yin a̱ cat nwa nok ka̱ryi, se na̱ yen swrang a̱ cyang krum ji na̱ byyi ni a̱ ryi ki a̱ ni maai tyak pfong a. 29Ka̱ a̱ rak, a̱ ni nok dinok ti a̱n sak kpit a̱ kaai a̱ wwon, koyan a̱ swrap a̱ ryi kyang a na̱ yya ni, a̱ ku mai 30a̱ hywa, ‘Cyang a̱yin a̱ni a̱ nwa dinok, ti si ku kaat.’ 31Ka̱ a̱gwam a̱ naat zwang ba̱ a̱gwam a̱yaan, a̱ byyi ba̱nyet nzwang ncyi kop swak, a̱ naat zwang ji ba̱ a̱gwam u a̱ byyi ba̱nyet zwang ncyi kop nswak hwa ni, dolet na̱ yen swrang a̱ hwa ansham a̱ ryi ka̱ ni maai zwang ji ba̱ a̱tuba a̱ywu. 32Ki a̱ ryi na̱ ni maai ba, na̱ yen tom wakilai ba ahwa ba si naai a̱gwam a̱yring u ba ryok zwang ji. 33A̱mi meyang a̱yin a̱n maai yet ka̱won pfong nzuk ba, seko a̱ kaai kozan kyang a na̱ byyi ni a̱ wwon.”
Ntwak sang kpungtun
(Matta 5:13; Markut 9:50)
34Yesu a̱ bo hywa da̱ mba, “Ntwak yet, ma ki byyi sham nna na wruk, ryen n shyi na bo yet ntwak ba. 35Di na bo byyi ka̱rek tyyi i keyak ko ban yya taki ba, seko ba na̱ weyang. A̱yin nu a̱ byyi a̱pfo ni na̱ hok ansham.”
© 2011, Wycliffe Bible Translators, Inc. All rights reserved.