लुका 20
20
येसुइ अधीकार्की बारेरी ङ्योत्पल
(मत्ती २१:२३-२७; मर्कुस् ११:२७-३३)
1तीरेत् येसु पर्मेस्वर्त तेन्बे दीम्री म्हीमात लोप्जेत्टीबतेङ् ज्यबे सम्तर् स्येत्जेत्टीबे बेलोरी ङ्हच्छ्यङ् लम्बुमा ओसेम् धर्म लोप्पोन्मातेङ् अगुवामा बक्च्य खज्यी। 2ओसेम्, “ङ्यीमात स्येतो, एचे खजु अधीकारचे चु लक्मा स्य्हेङ्ब? एत चु अधीकार् खल्चे पीन्ज्यी?” बी थेङ्त ङ्योत्ज्यी।
3येसुचे थेङ्यीमात, “ङएनो एङ्यीमात तम् गी ङ्योत्प। ङत स्येतो, 4युहन्नचे बप्तीस्मा पीन्बे अधीकार् पर्मेस्वर् ग्यम्से यङ्ज्यी वुइ म्ही ग्यम्से?” बी सुङ्ज्यी 5ओसेम् थेङ्यीमा र्हङ्न्हङ्रीनो तम् पङ्ब तीप्ज्यी, “पर्मेस्वर् ग्यम्से पङ्गे पङ्स्यीम्, ‘एङ्यीमाचे तले युहन्नत बीस्वास् अस्य्हेङ्बल?’ बी थेचे ङ्योत्स्ये तज्यी। 6तर ङ्य्हङ्माचे म्ही ग्यम्से पङ्गे पङ्स्यीम् जम्म म्हीमाचे ङ्य्हङ्मात युङ्बचे प्रुङ्ज्यीम् सेत्स्ये मुब। तलेपङ्सम् म्हीमाचे युहन्नत अगम्बक्त बी बीस्वास् स्य्हेङ्ब मुबल।” 7होत्तज्यीम् थेङ्यीमाचे येसुत पङ्ज्यी, “युहन्नचे हुजु अधीकार् खनचे यङ्ज्यी बी ङ्यीमाचे स्येःबल अरे।” 8ओसेम् येसुचे थेङ्यीमात सुङ्ज्यी, “होलेपङ्सम् ङचे चु लक्मा खजु अधीकार् ग्यम्से स्य्हेङ्बल बी एङ्यीमात ङएनो अस्येत्।”
अङ्गुर्की म्रङ् पीमा स्य्हेङ्बे म्हीमा
(मत्ती २१:३३-४६; मर्कुस् १२:१-१२)
9हुजु लीप्चे येसुचे म्हीमात चु अर्त सुङ्ज्यी, “म्ही गीचे म्रङ्री अङ्गुर् सुःज्यीम् पीमारी पीन्ज्यी। ओसेम् थे य्हक्को बर्सइ लागीरी ल्हो-ल्हो य्हुल्री य्हर्ज्यी। 10अङ्गुर् मीन्बे बेलो तब बीसेम् अङ्गुर्की न्याबोचे योक्पो गीत थेइ बो कीन्बरी अङ्गुर्की पीमा स्य्हेङ्बलमाज पीत्ज्यी। तर पीमा स्य्हेङ्बलमाचे योक्पोत तोज्यीम् थेन्-थेन् दोःपीत्ज्यी। 11होत्तज्यीम् न्याबोचे ल्हो-ल्हो योक्पो गीत पीत्ज्यी। तर थेङ्यीमाचे हुजु योक्पोतेएनो दोक्ज्यीम् पेत्न लज्यीम् थेन्-थेन् दोःपीत्ज्यी। 12ओसेम् न्याबोचे हुजु ङ्य्हीकी लीक्यम् ल्हो-ल्हो योक्पो गीत पीत्ज्यी। थेङ्यीमाचे हुजुतेएनो न्हेप्पो स्य्हेङ्ज्यीम् अङ्गुर्की म्रङ् ग्यम्से तेत्लाज्यी।
13 “हुजु लीप्चे अङ्गुर्की म्रङ्की न्याबोचे र्हङ्की सेम्न्हङ् चोले म्हेन्ज्यी, ‘ङ ता लस्ये? देरेम् ङ ङइ खोबे जत पीत्प। थेङ्यीमाचे देमेन्नो थेतमी स्य्हेस स्य्हेङ्स्ये मुब।’ 14तर पीमा स्य्हेङ्बलमाचे न्याबोइ जत म्रङ्ब बीसेम् थेङ्यीमान्हङ् गीचे गीत पङ्ज्यी, ‘क्युजुम् न्याबोइ ज य्हीन्ब। थेत सेत्लागे ओसेम् थेइ अङ्गुर्की म्रङ् ङ्य्हङ्माल तनलइ।’ 15होत्तज्यीम् थेङ्यीमाचे थेत अङ्गुर्की म्रङ् ग्यम्से फीर्च्योर् बोर्ज्यीम् सेत्लाज्यी।”
येसुचे ङ्योत्जेत्ज्यी, “देरेम् अङ्गुर्की म्रङ्की न्याबोचे हुजु पीमा स्य्हेङ्बलमात ता स्य्हेङ्ल? 16ङ एङ्यीमात पङ्ब, थे खज्यीम् थेङ्यीमात सेत्लाज्यीम् हुजु अङ्गुर्की म्रङ् ल्हो-ल्होमात पीन्स्ये मुब।”
म्हीमाचे चु थ्येःज्यीम् पङ्ज्यी, “चोतेब खेमेएनो अतखइ!” 17ओसेम् येसुचे थेङ्यीमात स्हीःज्यीम् सुङ्ज्यी, “होलेपङ्सम् धर्म छ्येःरी चोले ब्रीबल ता य्हीन्ब?
‘दीम् स्य्हेङ्बे कर्मीमाचे लक् अत
पङ्ज्यीम् ख्लाबे युङ्ब,
स्हुर् युङ्ब तखज्यी।’ #
भजन्सङ्ग्रह ११८:२२
18 “हुजु युङ्बइ जोरी तइबलमा जम्मनो छर्छुर्ले थीस्ये मुब। ओसेम् हुजु युङ्ब खलइ जोरी तइज्यी हुजु म्ही छ्यक्-छ्यीक् तस्ये मुब।”
तीरो फाबे बारेरी ङ्योत्पल
(मत्ती २२:१५-२२; मर्कुस् १२:१३-१७)
19धर्म लोप्पोन्मातेङ् ङ्हच्छ्यङ् लम्बुमाचे येसुत हुजु बेलोरीनो चुङ्ब छ्येज्यी। तलेपङ्सम् थेङ्चे हुजु अर्त थेङ्यीमाकी बीरुद्दरी सुङ्बल बी थेङ्यीमाचे स्येःबल मुबल। तर थेङ्यीमा म्हीमातेङ् लोङ्ब मुबल। 20होत्तज्यीम् थेङ्यीमाचे येसुत चुङ्बे मौक च्याबरी र्हङ्चे र्हङ्त ज्यब ङोन्ब म्हइबे म्हीमात येसुज पीत्ज्यी। येसुचे न्होङ्बे तम् थोल्ज्यी पङ्सम् थेङ्की तम्रीनो फसइतीज्यीम् थेङ्यीमाचे रोमी सर्कार्की यारी सोप्तीब म्हइब मुबल। 21हुजु म्हीमाचे येसुत ङ्योत्ज्यी, “लोप्पोन्, ङ्यीमाचे स्येःब, थेङ्चे तबे तम्कीनो सुङ्बतेङ् लोप्जेत्प। ओसेम् थेङ्चे म्हीमाइ ली स्हीःज्यीम् फ्रोइ असुङ्। तर थेङ्चे पर्मेस्वर्की देमेन्की ग्यम् ङोन्जेत्प। 22देरेम् ङ्यीमात सुङ्जेतो, ङ्य्हङ्की नीयम् अनुसार् रोम्की ग्यल्बो कैसर्त तीरो फाब तब वुइ अत?” 23तर येसुचे थेङ्यीमाकी कपटी सेम् खेम्ज्यीम् थेङ्यीमात सुङ्ज्यी, 24“ङत म्हुइकी टङ गी ङोनो, हुजुरी खलइ लीःतेङ् मीन् ब्रीबल मुब?” थेङ्यीमाचे, “रोम्की ग्यल्बो कैसरल” बी पङ्ज्यी। 25ओसेम् येसुचे, “होलेपङ्सम् कैसरल कैसर्तनो पीनो। ओसेम् पर्मेस्वर्ल पर्मेस्वर्तनो पीनो” बी सुङ्ज्यी। 26थेङ्यीमाचे म्हीमाइ ङ्होन्सङ् थेङ्त तइ तम्रीएनो फसइतीज्यीम् चुङ्ब अखम्। होत्तज्यीम् थेङ्यीमा थेङ्की जोहप्री तेःङेन् तज्यीम् कुटीले टीज्यी।
पुनरुत्थान्की बारेरी ङ्योत्पल
(मत्ती २२:२३-३३; मर्कुस् १२:१८-२७)
27हुजु लीप्चे सदुकीमा येसुज खज्यी। थेङ्यीमाचे स्यीज्यीम् लीक्यम् पुनरुत्थान् अत बी बीस्वास् स्य्हेङ्ब मुबल। 28ओसेम् थेङ्त ङ्योत्ज्यी, “लोप्पोन्, मोसाचे ङ्य्हङ्मात ब्रीज्यीम् पीन्बे नीयम्री, ‘खल्ल पङ्लेनो अज्योचे भ्या स्य्हेङ्ज्यीम् कोलमा अतननो स्यीज्यी पङ्सम् थेइ अलेचे अज्योइ लागीरी कोलमा#२०:२८ कोलमा- चु कोलमा पङ्बलमी अलेचे चङ्त भ्या स्य्हेङ्ज्यीम् न्हबे ङोन्ग्यम्की कोल य्हीन्ब। हुजु कोल ग्यम्से न्हबलमा अज्योइ खलक् तब। तखइ बी चङ्त भ्या स्य्हेङ्थोब’ बी ब्रीबल मुब।#ब्यबस्था २५:५-६ 29ग्ला गीरी अज्यो-अलेमा थेत् ङ्यीस् मुबल। अज्यो ग्रेन्चे भ्या स्य्हेङ्ज्यी। तर कोल अतननो थे स्यीज्यी। 30होत्तज्यीम् अले मइलचे अज्यो स्यीबे चङ्त भ्या स्य्हेङ्ज्यी। तर थेलेएनो कोलमा अतननो स्यीज्यी। 31हुजु लीप्चे अले सइलतेएनो होलेनो तज्यी। होलेनो थेत् ङ्यीस्चेनो भ्या स्य्हेङ्ज्यी। तर कोलमा अतननो थेत् ङ्यीस्नो स्यीज्यी। 32ज्युःरी हुजु अमकोलएनो स्यीज्यी। 33देरेम् ङ्यीमात सुङ्जेतो स्यीज्यीम् लीक्यम् पुनरुत्थान् तबे बेलोरी हुजु अमकोल खलइ म्रीङ् तब? तलेपङ्सम् हुजु अमकोलतेङ् थेत् ङ्यीस्चेनो भ्या स्य्हेङ्बल मुबल।”
34येसुचे थेङ्यीमात सुङ्ज्यी, “भ्यामी चु जम्बुलीङ्की म्हीमाचेकीनो स्य्हेङ्ब ओसेम् स्य्हेङ्पीन्ब। 35तर स्यीज्यीम् लीक्यम् पुनरुत्थान् तबरी जेःबलमाचे हुजु बेलोरी भ्या अस्य्हेङ् ओसेम् स्य्हेङ्अपीन्। 36थेङ्यीमा खेमेएनो अस्यी। तलेपङ्सम् थेङ्यीमा स्वर्गदुत्मा र्हङ्ब तब। थेङ्यीमा स्यीज्यीम् लीक्यम् पुनरुत्थान् तबल तज्यीम् पर्मेस्वर्की कोलमा तब। 37परम्प्रभुचे लुम्टीबे जीङ्न्हङ्चे मोसात, ‘ङ अब्रहाम्की पर्मेस्वर्, इसहाक्की पर्मेस्वर् ओसेम् याकुब्की पर्मेस्वर् य्हीन्ब’#प्रस्थान् ३:१-६ बी सुङ्बल थ्येःज्यीम् मोसाचे ब्रीबल मुबल। स्यीज्यीम् लीक्यम् पुनरुत्थान् तब बी चुजेएनो ङोन्बल मुब। 38थेङ् स्यीबलमाकी पर्मेस्वर् अय्हीन्। तर सोम्बोमाकी पर्मेस्वर् य्हीन्ब। तलेपङ्सम् थेङ्की लागीरी जम्मनो सोम्बो मुब।” 39डेत्-डेत् धर्म लोप्पोन्माचे, “लोप्पोन्, र्हङ्चे तबे फ्रोइनो सुङ्ज्यी।” बी पङ्ज्यी। 40हुजु लीप्चे खल्चेएनो येसुत तइ तम्एनो ङ्योत्प अखम्।
ख्रीस्ट् खलइ ज
(मत्ती २२:४१-४६; मर्कुस् १२:३५-३७)
41येसुचे म्हीमात ङयोत्जेत्ज्यी, “थेङ्यीमाचे मुक्ती न्हङ्बे ख्रीस्ट्त खले दाउद्की ज य्हीन्ब बी पङ्ब? 42-43तलेपङ्सम् दाउद्चे र्हङ्चेनो ब्रीबे भजन्सङ्ग्रहरी चोले ब्रीबल मुब;
परम्प्रभुचे ङइ प्रभुत सुङ्ज्यी,
‘ङचे एइ सत्तुर्मात एइ कङ् थीङ् दुङ्री अथेन्गदे ए ङइ केत् या पट्टीचे टीउ।’ #भजन्सङ्ग्रह ११०:१
44 “दाउद्चे मुक्ती न्हङ्बे ख्रीस्ट्त ‘प्रभु’ पङ्ब पङ्सम् थे खले दाउद्की ज तब?”
धर्म लोप्पोन्माकी बीरुद्दरी चेतावनी
(मत्ती २३:१-३६; मर्कुस् १२:३८-४०)
45जम्म म्हीमाचे ङ्येन्टीबे बेलोरी येसुचे थेङ्की डबमात सुङ्ज्यी, 46“धर्म लोप्पोन्मा ग्यम्से होसीयार् तउ। थेङ्यीमा म्हीमाचे च्याखइ बी र्हीङ्ब र्हीङ्बे येन् येन्ज्यीम् कोर्बरी तङ्ब। ओसेम् थेङ्यीमा बजार्री ब्रबे बेलोरी स्य्हेस स्य्हेङ्ज्यीम् लस्सो पङ्खइ म्हेन्ब। ओसेम् डोन् चबे ग्लातेङ् यहुदीमा र्हुब् तबे दीम्मारी स्य्हेस यङ्बे ग्लारी टीब म्हइब। 47थेङ्यीमाचे र्हेम्बो स्यीबे अमकोलमाइ दीम्नम् ब्येन्ब। ओसेम् ङोन्बे लागीरी प्रार्थना र्हीङ्नले स्य्हेङ्ब। थेङ्यीमाचेमी य्हक्को अज्यबे सजाय यङ्स्ये मुब।”
© 2025 by Mother Tongue Translators Society, Nepal Bible Society
and Wycliffe Bible Translators, Inc.