Génesis 13
13
Abrame' cu jun páaycunticubáa ti' Lot
1Le ca j jóok Abram tu lu'umil Egipto yéetel u yatan yéetel xan tuláacal ba'ax yaan ti'e', j suunaj tu lu'umil Néguev. Lot u paal u yíidzine' j bin tu yéetelo'ob, 2Abrame' sen ayikal ca'achi, yaan oro ti', plata yéetel ya'abcach u yaalak. 3Suunaj Néguev jujun p'íitil tac ca j kucho'ob tu caajil Betel; líikbal te'elo' ca j bin te tu'ux yáax je'ele' le yaan tu beelil Betel yéetel Hai. 4Leti' le cúuchil tu'ux tu yáax beetaj le jun p'éel u multuunil kultaj. Te túuno' tu ch'a'a chi'itaj u kaaba' Yuumtzil.
5Sen ayikal xan ca'ach Lot, bey je'el bix Abram u sucu'un u taatae', yaan ca'ach ya'abcach u j tamano'ob, u wacaxo'ob, yaan xan ya'ab u palitzilo'ob; 6ba'ale' le cúuchil tu'ux yano'ob ca'acho' ma' chuca'an ba'al u jaanto'ob le p'enquech ba'alche'obo'. Ma' tu páajtal u pa'ate' cajtalo'obi', 7tumen le máaxo'ob canantico'ob u yaalako'ob Abrame' mantadz cu ba'atelo'ob yéetel le máaxo'ob canantico'ob ca'ach u yaalako'ob Lot. U láak ba'ale' ti'ili' caja'ano'ob ca'ach te'elo' le j cananeob bey le j ferezeobo'. 8Tu yo'olal lelo', jun p'éel kiine' Abrame' tu ya'alaj ti' Lot: Teech tin wéetele' láaktzilo'on, tu yo'olal lelo' ma' utz ca yanac ba'ateltáanbal ichilo'oni' mix ichil c aj meyajo'ob. 9Je'el tuláacal le lu'um u ti'al ca a yéeyej. Beet utz a jun páaycunticabáa ti' teen. Wa ca bin j xamane' tene' quin bin j noojol, wa ca bin j noojole' tene' quin bin j xaman.
10Tu pactaj túun Lot tuláacal u táax lu'umil u yáalcab ja'il Jordán, ca tu yilaj tac tu chan caajil Zoar, le táax lu'umo' yaan ca'ach ya'abcach ja'i' bey jun p'éel u cúuchil paakale'. Chica'an ti' Egipto (Le cúuchila' bey ca'ach ma'ili' xu'ulsa'ac tumen Yuumtzil u noj caajilo'ob Sodoma yéetel Gomorra). 11Lot túune' tu yéeyaj tuláacal u táax lu'umil Jordán, ca j bin tu lakin le cúuchil tu'ux yano'ob ca'acho'. Bey úuchic u jun páaycunticuba'ob Abram yéetel lot. 12Abrame' j p'áat Canaán, Lote' j bin cajtal tu caajilo'ob le táax lu'umo', naadz ti' u noj caajil Sodoma, 13tu'ux tuláacal le wíinico'obo' sen kasa'antaco'ob, cu beetico'ob talam kebano'ob tu táan Yuumtzil.
14Cu dzo'ocol u bin Lote' Yuumtzile' tu ya'alaj ti' Abram: Te j cúuchil tu'ux yanecho' pact ma'alob le j xamano', le j noojolo', le j lakino' bey le j chikino'; 15teen bíin in dzáa teech tuláacal le lu'um ca wilico', yaan a ti'altic yéetel u ti'al a ch'i'ibalo'ob, u ti'al ja'abo'ob mina'an u xuul. 16Tene' yaan in beetic u ya'abtalo'ob je'el bix ya'abil u p'úuyul sa'am lu'ume'. Bey je'el bix ma' tu páajtal u xo'ocol u p'úuyul sa'am lu'ume', mix xan bíin páatac u xo'ocol a ch'i'ibalo'ob. 17¡Líiken, áalcabt u chowaquil yéetel u cóochil le lu'um quin in dzáa techa'!
18Bey túuno' Abrame' tu jobaj u cajtalile' ca j bin cajtal tu káaxil u béequilo'ob jun túul máac cu kaaba'intic Mamre, naadz ti' u nojoch caajil Hebrón. Te'elo' tu beetaj jun p'éel u multuunil kultaj ti' u tzicbe'enil Yuumtzil.
Texto Maya © Sociedades Bíblicas Unidas, 1992