लूका 23
23
पिलातुसना मुने येसु
(मत्ति २७:१-२; ११—१४; मर १५:१-५; युह १८:२८-३८)
1असके पजा यहुदि लोकुरा हजोर सभाते उदितोरक सबोय लोकुरक तेदितुरक अनि येसुन राज्यपाल पिलातुसना हेरे ओतुरक। 2“आपुनतुन मसिहा राजाल इन्दिला वेहचुन माक रोमि देशता हजोर राजान टाक्स हेमाट इदाम वेहच मावा देशता लोकुरकुन बहके कियानपा माक हुळतोम” इन्जोर सबोय लोकुरक येसुनिगा दोष लावेकियाला लाकतुरक। 3अनि पिलातुस येसुन पुच्चेमातुर, “निमा यहुदि लोकुरा राजाल आन्दि?” अनि येसु पिलातुसिन इतुर, “निमाय इन्दिला आतोन नना ओरेय आन्दान।”
4अनि पिलातुस मुक्य याजक लोकुरकुन अनि येसुन पयस ततोरक लोकुरा भीळतुन, “नना येनिगा बोदे दोष कल्योन” इन्जोर इतुर। 5मति लोकुरा भीळ पकाय असा वने जोरलावेकिसुन, “येर ते गलील प्रदेशताल सबोय यहुदि प्रदेशवनाह अनि इगावनाह परमेस्वरना उपदेश वेहचोरिंग लोकुरकुन भळके किसोर मन्तोर” इन्जोर इन्दिला लाकतुरक।
6अनि पिलातुस लोकुरा भीळ वेहाना केन्जुन येसुन पुच्चेमातुर, “बांग येर मानेय गलीलि जिल्हातोर आन्दुर बहे?” 7अनि, येसु हेरोदेस राजाल राज किन्तोर ओद जिल्हातोर आन्दुर इन्जोर पिलातुस पुतुर असके अद बेरा येरुसलेम सहेरतिगाय मतोर हेरोदेस राजाना हेरे पिलातुस येसुन लोहचितुर।
हेरोदेसना मुने येसु
8अनि हेरोदेस राजाल येसुन हुळसुन पकाय गिरदा आतुर, बाक्याकि ओना चमत्कारकना बारेते ओर केन्ज मतोर इन्जोर ओर येसुन पकाय दियाताल हुळाना इच्चा किस मन्तोर; अनि ओर येसु बाताले चमत्कारिनुंग कियाना हुळिलाय आशा इरस मन्दुर। 9अनि हेरोदेस राजाल येसुन पकाय सवाल पुच्चेमासोरिंग मन्दुर, मति येसु हेरोदेस राजान बाताले जवाब हेवोर आतुर। 10असके मुक्या याजक लोकुरक अनि मूसाना नियमतु करिहवालोरक पकाय होंगदे आसुन येसुनिगा दोष लावे किन्दुरक। 11असके हेरोदेस राजाल आपुनोरक सेय्निक लोकुरासंग येसुन अपमान अनि मजाक किसुन उन्दि पकाय चमके मायाना बन्डितुन करिहचितुर अनि पिलातुसना हेरे असा मलस लोहचितुर। 12अनि इदेना मुने पिलातुस अनि हेरोदेस वरोरवरोना दुश्मन मतोरक, मति अदे दियाताल ओरक इवुरास गोतियाह बनेमातुरक।
पिलातुसनिकेडाल येसुन हव्काना दन्ड
(मत्ति २७:१५-२६; मर १५:६-१५; युह १८:३९—१९:१६)
13अनि पिलातुस मुक्य याजक लोकुरकुन अनि यहुदि लोकुरा मुक्याह अनि लोकुरकुन केयितुर, 14अनि पिलातुस ओरकुन इतुर, “लोकुरकुन बहकेकिन्तोर इदाम इन्जुन येर मानेयतुन निमाट नावा हेरे ततोरिट अनि नना मिया मुने ओनिगा दोष पळकतान मति निमाट ओनिगा लावेकितोरिट बोदे दोष येसुनिगा कल्योनेय; अनि हेरोदेस राजाल वने येसुनिगा दोष कल्योर। 15इन्जोर ओर राजाल येसुन असा वने मावा हेरे लोहचितुर; अनि येर हव्काना दन्ड हियान साटि बोदे गलति केवोर इन्जोर स्पष्ट मन्ता। 16इन्जोर नना ओन सोटाते हिस चुटे किसिन्तोना” इदाम इतुर।
17(पिलातुस पसहा हनुम दिया लोकुरकुन साटि वरोर कयदिन चुटे कियाना उन्दि रिवाच मतोर।) 18असके सबोय लोकुरा भीळ, “येन हव्काट, अनि मावा साटि बराब्बान चुटे किसिम!” इन्जोर पकाय लेंगदे केयतुरक। 19(अनि बराब्बाल सेहेरतिगा दंगा किसुन मानेयतुन होवक्स मतोर इन्जोर ओन जेहलतिगा केहच मन्तोर।)
20मति पिलातुस येसुन चुटे कियाना इच्चा मता, इन्जोर असा लोकुरा भीळतुन समजेहकितुर, 21मति लोकुरक असा वने लोकुरा भीळ कोलहार किसुन इतुरक, “येन कुरुसतिगा अन्जहिच हव्किट! कुरुसतिगा अन्जिहिच हव्किट।”
22असा पिलातुस तिसरो बेरा ओरकुन इतुर: “येर बाताल गलति किति? नना ओन हव्काना दन्ड हियानाता योग्य बाताले पोल्लो ओनिगा कलयोन। इन्जोर नना येन सोटाते हिस चुटेकिसीन्तोना।”
23मति सबोय लोकुरा भीळ केयस-केयसुन पिलातुसिन इतुरक, येन कुरुसतिगा अन्जहिच हव्कान साटि आग्या हिम। अनि लोकुरा भीळ बदाम कोल्हार किसोरिंग इतुरक अदामे आतु। 24असके लोकुरा भीळ इन्दाना अनुसार किम्ट इन्जोर पिलातुस आग्या हितुर। 25अनि सेहेरतिगा दंगा किसुन मानेयतुन होवक्स मन्तोर इन्जोर जेहलतिगा केहच मन्तोर बराब्बान पिलातुस चुटेकिसितुर, अनि येसुन ओरा इच्चा अनुसार सोपे किसितुर।
येसुन कुरुस पोरो अन्जहान्तोर
(मत्ति २७:३२-४४; मर १५:२१-३२; युह १९:१७-२७)
26अनि सेय्निक लोकुरक येसुन ओयिला आस मन्दुरक, असके कुरेनि सहेरतोर वरोर शिमोन पोरोयतोर मानेय डन्तिगाडाल वायिला आस मन्दुर। सेय्निक लोकुरक ओन पय्तुरक अनि येसुना कुरुसतुन ओना पोरो बोरसितुरक, शिमोन कुरुसतुन ताहचुन येसुना परके-परके ओयिर। 27अनि येसुन कुरुस पोरो अन्जहान साटि ओयिल आस मन्दुरक असके लोकुरा हजोर भीळ येसुना परके हन्दिला आस मन्दुरक लोकुरा अद भीळतिगा पकाय आसक वने मन्दुंग अव येसुना बारेते पकाय दुःख आसुन किलिला आस मन्दुंग। 28असके येसु परके मिळिंचुन किलन्दुंग अव आसकुन इतुर, “हे येरुसलेम सहेरतोर बायिहनिटा नावा साटि किलमाट; मति निमाट मिया अनि मियांग बालक साटि किलाट। 29बाक्याकि ‘तानांग बालक हिलेंग अनि बालक आय परोंग अनि बसकेय आपुना पाल उहो आतांग अव धन्य मन्तांग!’ इदाम लोकुरक इन्दाना उन्दि दियांग वायिला आता। 30अनि अद बेरा हजोर सन्कटताल पिसान साटि लोकुरक मटाकुन,
‘मावागा अराट अनि मावागा अरसुन माकुन आहचा#होशे १०:८; तोह ६:१६ !’
इदाम इन्दानुरक 31बाक्याकि नना ते बोदे पाप अनि गलतिगुना केवोन मति नाकुन इचोन पकाय दन्ड हिन्तोरक, मति बोर पाप, गलतिगुना कितोरक ओरकुन बचोर हजोर दन्ड हियानुरक#२३:३१ कचा मरातुन ओरक इदाम कियाकिट ते वतिता मरातुन बाताल आयार?” इन्जोर इतुर।
32अनि पकाय अपराद कितोरक इवुरक मानेयकुन वने येसुनासंग हव्कान साटि ओयिला आस मन्दुरक। 33अनि खोपळि पोरोयदा जागातिगा वातुरक, असके अगा येसुन अनि इवुर पकाय अपरादि लोकुरकुन, वरोन येसुना तिन्दान्तिके अनि दुसरोन येसुना डावान्तिके कुरुस पोरो अन्जितुरक। 34असके येसु इतुर, “हे बाबा, येरक बाताल किन्तोरोम इन्जोर येरक पुनोरक इन्जोर येरकुन मापि किम।” अनि पजा ओरक चिटिंग इरसुन ओनांग सन्दरांग तुहकसितुरक#भज २२:१८।
35अनि लोकुरा भीळ निचुन हुळिला आस मन्दुरक, “येर ते दुसरो लोकुरकुन पिसिहतोर अनि येर परमेस्वरनोर लोहतोर मसिहाल आस मन्दानुर ते आपुनतुन पिसहिर” इदाम यहुदि लोकुरा मुक्यालोक येसुना मजाक किसुन इतुरक#भज २२:७।
36अनि सेय्निक लोकुरक वने येसुना हेरे वासुन ओना मजाक किसुन कविला लाकतुरक, अनि येसुन होवियताल अंगुरता जोमातुन उन्डा हितुरक#भज ६९:२१। 37अनि इतुरक, “निमा यहुदि लोकुरा राजाल आसमन्दाकि ते निमा आपुनतुन पिसहा।”
38अनि “येर यहुदि लोकुरा राजाल मन्तोर” इदाम कुरुसतिगा येसुन तला पोरोडिके उन्दि बलातिगा ओना दोष लावेकिस कोटस कोहकसितुरक।
आपुना गुनातुन पस्तेमायवाल दोषि
39अनि इवुरक पकाय अपरादि लोकुरकुन कुरुस पोरो वळिच मन्दुरक ओरा पयकि वरोर येसुना निन्दा किसुन इतुर, “निमा मसिहाल आस मनकि ते निकुन अनि माकुन वने निमा पिसहा!” 40मति दुसरो मानेय ओना इन्दाना पोल्लोतुन केन्जुन ओन रांगसुन इतुर, “निमा वने अदे दन्ड भोगे मान्तोन ते वने निमा परमेस्वरदुन वने वरियवि बहे? 41अनि माक ते न्यायता अनुसार दन्ड भोगे मान्तोराट, बाक्याकि माक बदाम गुना कितोराट अदेना अनुसार दन्ड भोगे मान्तोराट; मति येर बोदे गुना केवोर।” 42असके ओर इतुर, “हे येसु निमा राजाल आस राज कियाला वायकि असके निमा नावागा दया कियाकि।” 43अनि येसु ओर मानेयतुन इतुर, “नेन्डे निमा नावासंग स्वरगलोकतिगा मनकि इन्जोर नना निकुन खरोय वेहान्तोना।”
येसुना हायाना
(मत्ति २७:४५-५६; मर १५:३३-४१; युह १९:२८-३०)
44अनि लगभग दुपाडा बारा नेक्सुन ते पोळद चमकेमायो आन्द, मून्ड नेकनावनाह सबोय देशतिगा आन्दार आस मता, 45अनि प्रार्थना लोता पळदा#निर २६:३१-३३#२३:४५ यहुदि लोकुरा मन्डिलितिगा रन्ड मुक्य जागा मता पवित्र जागा अनि पकाय पवित्र जागा। उन्दि लाटि पळदा ओद जागातुन रन्ड भाग किस मता पोरोडाल ते अडियवनाह नडुमताल हरतु#निर २६:३१-३३#२३:४५ बाक्याकि इदेक सबोय लोकुरक परमेस्वरना हजोर पवित्र जागातिगा हन्दापरकिट इन्जोर। । 46अनि येसु हजोर लेंगदे, “हे बाबा, नना आपुना आत्मातुन निया कयतिगा सोपेकिन्तोना इदाम जोरदे इतुर” इदाम इन्जुन येसु जिवा तासितुर#भज ३१:५। 47असके रोमि देशतोर सयनिक अदिकारि अगा आता सबोय पोल्लोतुन हुळसुन परमेस्वरना महिमा किसुन, “खरोय येर मानेय परमेस्वरना मुने बोदे गलत केवोर मन्तोर” इदाम इतुर। 48अनि येसुन हुळान साटि अगा डगि आस मन्तोरक लोकुरा भीळ इद सबोय पोल्लोतुन हुळसुन पकाय जिवा नोयत नाटेनिके मलस हतुरक। 49मति येसुनसंग मतोरक ओना सबोय गोतियालोरक अनि गलीलताल ओनासंग वास मतांग येरक सबोय आसक येसुनिगा आयाना पोल्लोतुन लक निचुन हुळिला आस मन्दुरक#लूका ८:२,३ ।
येसुन मिसान्तोर
(मत्ति २७:५७-६१; मर १५:४२-४७; युह १९:३८-४२)
50-51अनि यहुदि प्रदेशता अरिमत्या सहेरतोर यूसुफ अगा मतोर। ओर परमेस्वरना राज्य साटि हर हुळस मतोर वरोर सोबाय मानेय अनि परमेस्वरना मुने येताना योग्य मतोर। ओर यहुदिलोरा हजोर सभाता सदस्य मतोर ते वने येसुन हव्काना ओरा योजनांग अनि बुतोतुंग यूसुफ ओरा संग हेवोर आतुर। 52अनि ओर पिलातुसना हेरे हन्जुन येसुना मुरदातुन तलिकतुर। 53अनि पिलातुसनिकेडाल आग्या पुटतु असके ओर येसुना मुरदातुन कुरूसतिगाडाल रेहचुन अनि चमके मायाना चादेरते हुरितुर, अनि उन्दि कलदिगा काच मन्तोरक पान्जातिगा येसुना मुरदातुन अगा ओसुन इरतुरक। अनि अगा बोनाय मुरदातुन बसकेय इरोर आस मन्तोरक, 54अनि अदेदिया पोळद मुळन्दीता पजा यहुदि लोकुरा पवित्र दिया सुरु आयाना मता। अनि पवित्र दिया यहुदि लोकुरक बोदे बुतो केवेरक आन्दुरक इन्जोर ओरक अद पवित्र दियाता तयारि किन्दुरक।
55अनि येसुनसंग गलील सहेरताल वास मतांग अव आसक परके-परके हन्जुन येसुना मुरदातुन इरस मतोरक अद पान्जातुन अनि येसुना मुरदातुन बदाम इरतोरक इन्जोर हुळतुंग। 56अनि अव आसक मल्सुन वातुंग अनि येसुना मुरदातिगा लावेकियान साटि सुगंद चिजकने निय बानेकितुंग। अनि मूसाना नियमता अनुसार अव पवित्र दिया रोमतुंग#निर २०:१०; व्यव ५:१४।
© (Active) Wycliffe Bible Translators, Inc. All rights reserved.