U̍ku̍rɔ̍ yī Alɛrɔ̄ 23
23
1Ipɔ̍ɔli ma̍ Ogrēeyī yī Alihiyo ɔla̍ā chi̍i̍ de wa̍ hīka, “Aɛ̍nɛ̍ yī u anāngrɔ̄ɔ! Ɔkpɛɛ ku i̍chɛ nūma̍, ɛri̍ya̍ yī ūkpɔ̄tū lɛ u bāa ɔcha̍ri̍cha̍ri̍ ma̍ la ɔhɔ̄leyī yī u nīi n ya̍ la eyī yī Ɔwɔ ma̍.” 2Ɔpɔ̄ɔpɛ̄, Anana̍yāasi nīi - A̍dā Aligbe ma̍ ka de āchɛ nīi rɛ bla̍a Ipɔ̍ɔli ma̍ ka ɛ̍lɛ ge̍ dra̍ ɔ̍lɔ abɔ̄ la oko̍o. 3Ipɔ̍ɔli da ɔ̍ hīka, “Ɔwɔ ge̍ē dra̍ awɔ ɔlɔjā abɔ̄! Awɔ - ɔ̄chɛ ɔfi̍yɛ̍rɛ̍ bāa ɔga̍ha̍ ɔngmi̍ya̍ri̍ ɔla̍ā! A hɔ̄ yɛ ē ka lɛpɔ̄ tāa ami lɔkɔ nīi Lihɔ yī Imo̍sīisi chikpo̍ ma̍, a chī chōo̍chē de Lihɔ ɔla̍ā ē bīya ka ɛ̍lɛ ge̍ dra̍ amɔ̍lɔ abɔ̄.”
4Āchɛ nīi rɛ bla̍a Ipɔ̍ɔli ma̍ ka ɔ̍lɔ ge̍ wo̍o̍! Ɔ̍lɔ cha̍ A̍dā Aligbe yī Ɔwɔ ɛcha̍?
5Ipɔ̍ɔli hīyɔkɔ hīka, “Aɛ̍nɛ̍ yī u! Ami i̍ jo̍ōkū hīka A̍dā Aligbe ni̍ oo! Īpū yī Ɔwɔ ka hīka ɔ̄chɛ ɔ̍lɔ ge̍ e̍e kɛlā abi̍ ku̍ ɔ̄chɛ nīi ɔ̍lɔ - ɔlɛhu̍ yī āchɛ ma̍ ni̍.”
6Ipɔ̍ɔli ma̍ hīka āchɛ ɛha̍ ɛ̍lɛ - Āchɛ yī Isa̍dusīi nɛ; ɛha̍ ɛ̍lɛ chī - Āchɛ yī Ifa̍rasīi nɛ ma̍, o̍ tɔ̍ɔna ka grāa aa̍ wa̍a̍ hīka, “Aɛ̍nɛ̍ yī u! Ami - ɔ̄chɛ yī Ifa̍rasīi nɛ ko̍ō! A̍dā yī u wa̍a̍ - Ifa̍rasīi nɛ. Wu̍chē lɔkɔ nīi n de ɔtū che hīka ɔ̄chɛ ge̍ē hye̍ēyī la okū ma̍ nīi e̍ yɛ ma̍ ē klɛpɔ̄ tāa ami a̍nɛ.”
7O̍ ka i̍ngɔ̍ɔ ɔpɔ̄ɔpɛ̄ ma̍, Āchɛ yī Ifa̍rasīi ba̍la Āchɛ yī Isa̍dusīi kū la apɔ̄ la ogbōgbō tāa iyī wā. Āchɛ ɛla̍ā wa̍a̍ nīi gblāa abɔ̍ɔ la ɛbɛ yī lɛpɔ̄ ma̍ de iyī wā yi̍ya. 8Wu̍chē oji̍ nɛ, Āchɛ yī Isa̍dusīi ka hīka ɔ̄chɛ ɔ̍lɔ i̍ ge̍ē hye̍ēyī la okū gɛ ni̍. E̍ i̍ chɛ̄ hīka ayɛ̍ɛ̄chɛ̄rɔ̄ kɛ̄ɛ uhu ɔha̍lɔha̍ ɔ̍lɔ hɔ̄ ni̍. Āchɛ yī Ifa̍rasīi ma̍ chɛ̄ lɛlā ɛtɛ̍ɛta̍ nūma̍. 9E̍ gblāa abɔ̍ɔ ē ya̍ ojiya ɔlamu ɔlamu ē gāa iyɔ̄bū iyɔ̄bū. Āchɛ ongū Lihɔ yī Iju̍u ɛha̍ nīi - Āchɛ yī Ifa̍rasīi ma̍ nīichō yarɛ hi̍hi̍yo̍ wɔhu̍ wɔhu̍ hīka aɛ̍lɛ i̍ ma̍ lɛlɛ̄lā nīi ɔngrɔ̄ɔ nūma̍ ɔ̍lɔ ya̍ abi̍ ni̍. Ɔha̍ni̍, ɔyɛ̍ɛ̄chɛ̄rɔ̄ yī Ɔwɔ kɛ̄ɛ uhu ɔha̍ ɔ̍lɔ kɛlā de ɔ̍lɔ i̍ngɔ̍ɔ ichɛ̄ɛhi bɛ̍ɛ!
10Ahu̍ yī lɛlā ɔla̍ā de ɛbɛ ti̍yatū kpɛ̍ɛ lēchi̍ lēchi̍. A̍dā icho̍ojiya ɔla̍ā de tūuhwi hīka ɛ̍lɛ ge̍ē de Ipɔ̍ɔli hwō mi̍ni̍mi̍ni̍ mɛ̍. O̍ ka de āchɛ ɛkplɛ̍wu̍ yī nū ka ɛ̍lɛ ge̍ chɛ̄ ga lipu̍ yī ogrēeyī ɔla̍ā ge̍ de Ipɔ̍ɔli bī pīya ga u̍nu̍ ɔla̍ā nīi āchɛ ɔkplɛ̍wu̍ gbō ɔ̄ ogbōgbō ma̍.
11La otu̍ yī nū, Ādā wā dikpo̍ba̍ Ipɔ̍ɔli ge̍ ka de ɔ̍ hīka, “Tū ūkpɔ̄tū kpɔ̍ɔ̍ ji, Ipɔ̍ɔli! Ma̍a a koko̍o yī lɛlā yī u amu la Ijɛru̍sālɛm mɛ̍. A ge̍ē de ē ka i̍ngi̍ngɔ̍ɔ abɔ̍ɔ la Iro̍om.”
Āchɛ ɛha̍ miya ge̍ē de Ipɔ̍ɔli ē ngmo̍
12La eyī ɔnyɔ̄nyā yī nū, Iju̍u ɛha̍ tu̍ grēeyī ya̍ ɔmɔ̄miya ɔha̍. E̍ gwi̍yɛka hīka aɛ̍lɛ i̍ ge̍ de Ipɔ̍ɔli ngmo̍ o̍bū ni̍, aɛ̍lɛ i̍ ge̍ē de oko̍o ē tū ojōre̍ kɛ̄ɛ yenyi ɔbɔbɔ ni̍. 13E̍ gbajɛ la āchɛ ohu ɛpa nīi gblāa miya lɛlā nūma̍ ma̍. 14E̍ wā ge̍ pīya dikpo̍ba̍ alɛhu̍ aligbe ba̍la ɛgabɔ̄ ge̍ koko̍o de wa̍ hīka, “Ala̍ ma̍ gɛ ko̍ō! Alɔ nūma̍ wa̍a̍ gwi̍yɛka choko̍o mɛ̍ hīka alɔ i̍ ge̍ē de oko̍o ē tū ɔjɔ̄jā ni̍, ɔ̍chi̍kpa̍kpa̍ alɔ de Ipɔ̍ɔli ngmo̍ o̍bū. 15O̍ lɛ i̍ngɔ̍ɔ ma̍, ala̍ ba̍la Ogrēeyī yī Alihiyo wa̍a̍, ala̍ ā tɛ̄rɔ̄ hu a̍dā icho̍ojiya ɔla̍ā gɛ hīka o̍ ge̍ de Ipɔ̍ɔli tɛ̄rɔ̄ wā. Ala̍ ā gla̍ anu̍ hīka ala̍ chikpo̍ ge̍ē plɛ̍ɛ̄lā yī oko̍o yī Ipɔ̍ɔli yɛ̍yɛ̍. Alɔ ma̍ ge̍ē kū inya ē de ɔ̍ ngmo̍ o̍bū nīi o̍ gbajɛ ē wā abɔ̍ɔ.”
16Ɔyi̍ ɔnɔ̄ngrɔ̄ɔ ɔha̍ nīi - ɔyi̍ yī ɔɔ̍nɛ̍ ɔnɔ̄nyā yī Ipɔ̍ɔli ma̍ de lɛlā ɔla̍ā po̍ cha̍cha̍. O̍ pīya ga u̍nu̍ ɔla̍ā nīi e̍ de Ipɔ̍ɔli tū ma̍ ge̍ koko̍o de ɔ̍. 17Ipɔ̍ɔli de ɔlɛhu̍ icho̍ojiya ɔha̍ hɛ̄ra̍. O̍ ka de ɔlɛhu̍ ɔla̍ā ka ɔ̍lɔ ge̍ bī ɔyi̍ ɔla̍ā ga ɛbɛ yī A̍dā icho̍ojiya; ma̍a ɔ̍lɔ lɛ lɛlā ɔha̍ ge̍ē ka ē de a̍dā icho̍ojiya. 18Ɔlɛhu̍ yī icho̍ojiya ɔla̍ā de abɔ̄ ku ɔɔ̍pɛ̄ ɔnɔ̄ngrɔ̄ɔ ɔla̍ā, bī ɔ̄ ge̍ de a̍dā icho̍ojiya. O̍ koko̍o de ɔ̍ hīka, “Ādā, oligbakɔbɔ ɔla̍ā nīi re̍ka Ipɔ̍ɔli ma̍ hī um ɛra̍, koko̍o de u hīka amɔ̍lɔ ge̍ bī ɔɔ̍pɛ̄ ɔnɔ̄ngrɔ̄ɔ nūma̍ ge̍ de aɔ̍lɔ; ɔyi̍ nūma̍ ɔ̍lɔ lɛ lɛlā ɔha̍ ge̍ē ka ē de aɔ̍lɔ.”
19A̍dā icho̍ojiya ɔla̍ā de abɔ̄ ku̍ ɔyi̍ ɔla̍ā bɛ̍ɛ̄nɛ̄, bī ɔ̄ ga ɛkū, aa̍ lōri̍īwā. O̍ che ɔ̍ ikpo̍ ka lɛlā iyi̍ nīi ɔ̍lɔ chikpo̍ ge̍ē ka ē de anu̍ ma̍?
20Ɔɔ̍pɛ̄ ɔnɔ̄ngrɔ̄ɔ ɔla̍ā koko̍o de ɔ̍ bɛ̍ɛ̄nɛ̄ hīka, “Alɛhu̍ yī Iju̍u ya̍ ɔmɔ̄miya hīka aɛ̍lɛ ge̍ē ka nīi aɔ̍lɔ de Ipɔ̍ɔli ē tɛ̄rɔ̄ hu Ogrēeyī yī Alihiyo i̍chi̍chi̍. E̍ yɛ ē gla̍ awɔ nīi a ge̍ē gbɛri̍ya̍ ka ochi̍chi̍ yī lɛlā nīi ɛ̍lɛ yɛ ē chikpo̍ ge̍ē po̍ yɛ̍yɛ̍ a̍nɛ. 21A ā chɛ̄ i̍ngɔ̍ɔ ni̍. Wu̍chē oji̍ nɛ, āchɛ ɛha̍ gla āchɛ ohu ɛpa ta̍ nīi kū inya abɔ̍ɔ tīgbē yī Ipɔ̍ɔli ma̍. Āchɛ ɛla̍ā gwi̍yɛka choko̍o mɛ̍ hīka, aɛ̍lɛ i̍ ge̍ē de oko̍o ē tū ojōre̍ kɛ̄ɛ yenyi ɔbɔbɔ ni̍, ɔ̍chi̍kpa̍kpa̍ aɛ̍lɛ de Ipɔ̍ɔli ngmo̍ o̍bū. E̍ tībi̍īyē gblāa abɔ̍ɔ ge̍ē ya̍ i̍ngɔ̍ɔ mɛ̍. E̍ yɛ ē gbēyī lɔkɔ nīi a ge̍ē hīyɔkɔ ma̍ bɛ̍ɛ̄nɛ̄.”
22A̍dā icho̍ojiya wā ge̍ koko̍o de ɔyi̍ ɔla̍ā bɛ̍ɛ̄nɛ̄ hīka, ɔ̍lɔ ge̍ e̍e koko̍o yī lɛlā ɔla̍ā de ɔ̄chɔ̄chɛ hīka ɔ̍lɔ ka de anu̍ ni̍ ko̍ō. O̍ wā ge̍ de ɔyi̍ ɔla̍ā tɛ̄rɔ̄ pīya bɛ̍ɛ̄nɛ̄.
E̍ de Ipɔ̍ɔli tɛ̄rɔ̄ hu Ifi̍līisi ipwɔ̍lɛ̍
23A̍dā icho̍ojiya ɔla̍ā de alɛhu̍ icho̍ojiya yī nū āchɛ ɛpa hɛ̄ra̍. O̍ koko̍o de wa̍ hīka, “Ala̍ ā ka nīi icho̍ojiya āchɛ ohu igwo̍ ge̍ tībi̍īyē, hɛ̄ɛbɛ nīi ala̍ ge̍ ga Isi̍sari̍ya i̍chɛ la oje arāanɛ yī otu̍. Alwɔnya āchɛ ohu ɛta̍ che igwo̍ ba̍la alɔ̍kpa̍chi̍ āchɛ ohu igwo̍ ge̍ yɛ abɔ̍ɔ tāa aa̍. 24Ala̍ ā de wɔnya ɛha̍ kwɔbɔ̄ de Ipɔ̍ɔli hɛ̄ɛbɛ nīi o̍ ge̍ che. Ala̍ ā bī ɔ̄ ke̍e̍ ge̍ de Ifi̍līisi nīi - ɔ̄chɛ odeyīrɛ ajɛ ɔla̍ā ma̍.” 25A̍dā icho̍ojiya ɔla̍ā wā ge̍ ta̍ īpū tɛ̄rɔ̄ hu Ifi̍līisi bɛ̍ɛ̄nɛ̄. I̍ngɛ̍ɛ̄nɛ̄ nīi o̍ ka a̍nɛ:
26“Ādā Ifi̍līisi, Ɔgāmode! Ami Ikla̍dīyusi Ili̍sīyasi tɛ̄rɔ̄ nūma̍ hu wɔ a̍nɛ. No̍be ādā! 27Ɔngrɔ̄ɔ nūma̍, Iju̍u ku̍ ɔ̄ yɛ ge̍ē de ɔ̍ ngmo̍. N po̍ hīka ɔ̍lɔ - ɔ̄chɛ yī Iro̍om nɛ ma̍, n bī āchɛ ɛkplɛ̍wu̍ yī u gāa ge̍ hɛ̍ ɔ̄ ta̍ hī wā abɔ̄. 28N yɛ ē chikpo̍ ge̍ē jyɛ̍ɛ̄lā nīi e̍ ka ɔ̍lɔ ya̍ ma̍; wu̍chē yī ɔla̍ā, n bī ɔ̄ ga ɛbɛ yī Ogrēeyī yī Alihiyo. 29Lɛlā nīi n po̍ ka̍ta̍ nīi e̍ ka ku̍ ɔ̄ ma̍ - lɛlā yī lihɔ yī Iju̍u ji nɛ. N i̍ ma̍ lɛlā abi̍ ɔha̍lɔha̍ nīi o̍ ya̍ nīi ngma̍ la ode ɔ̍ ngmo̍ kɛ̄ɛ de ɔ̍ tū igbakɔbɔ abɔ̍ɔ ni̍. 30E̍ de koko̍o de u hīka Iju̍u ɛha̍ ɛ̍lɛ yɛ amu ē miya tū ɔ̍lɔ ma̍, anu̍ nīi n de ɔ̍ tɛ̄rɔ̄ hu wɔ ɔpɔ̄ɔpɛ̄ a̍nɛ. N koko̍o de āchɛ ɛla̍ā nīi bī lɛlā tū anu̍ ma̍ hīka e̍ ge̍ wā abɔ̍ɔ dikpo̍ba̍ wɔ bɛ̍ɛ̄nɛ̄.”
31Icho̍ojiya ɛla̍ā ya̍ lɔkɔ nīi o̍ ka de wa̍ ma̍, bī Ipɔ̍ɔli la oto̍tu̍ ɔla̍ā ge̍ chɛ̄ la A̍nti̍pātrisi. 32La eyī ɔnyɔ̄nyā yī nū, icho̍ojiya ehēhī nīi yɛ la ikpo̍ ma̍ ku̍chē hī wā pīya yī u̍nu̍ ɔla̍ā nīi e̍ ē gbō ɔ̄ ogbōgbō ma̍. Enīi yɛ la wɔnya ma̍ yɛ ba̍la Ipɔ̍ɔli bɛ̍ɛ̄nɛ̄ a̍nɛ. 33E̍ bī Ipɔ̍ɔli gbajɛ ga Isi̍sari̍ya ma̍, e̍ bī ɔ̄ ge̍ de ɔ̄chɛ odeyīrɛ ajɛ ɔla̍ā ɔpɔ̄ɔpɛ̄, de īpū ɔla̍ā de de ɔ̍. 34Ɔlɛhu̍ yī ajɛ ɔla̍ā de īpū ma̍ kwɛ̍ɛjī ma̍, o̍ che Ipɔ̍ɔli ikpo̍ ka ɔ̍lɔ wɛ ɔyi̍ la ajɛ yī oe̍ ɔna̍? O̍ de po̍ bɛ̍ɛ̄nɛ̄ hīka ɔ̍lɔ bū la Isili̍siya. 35O̍ koko̍o de Ipɔ̍ɔli hīka āchɛ nīi - ɛ̍lɛ bī lɛlā tū ɔ̍lɔ ma̍ ɛ̍lɛ ge̍ē wā ma̍ nīi anɔ̍lɔ ge̍ē plɛ̍ɛ̄lā nīi ɛ̍lɛ ka ku̍ ɔ̍lɔ ma̍ a̍nɛ. O̍ ka hīka ɛ̍lɛ ge̍ bī ɔ̍lɔ ge̍ hɔ̄ la wɔlɛ̍ nīi re̍ka Ipwɔ̍ɔ̄nū yī Ihɛ̍rɔ̄ɔdi ma̍ nīi ɛ̍lɛ ge̍ deyīrɛ ɔ̍lɔ.
© 2020 Bible Society of Nigeria (second edition)