Génesis 8
8
Yai Bada tänö bä nofi
lä jaducubono wei tä a̦
1Inaja u cuaaö nö ma dedeano wei ma cui, canawä a jamö Noewänö bä ca̦i yalo lä didiono wei, Yai Bada tänö bä nofi bluca jaducubou showaoma. Mau u nia fa yalämanö, wadoli a bada shömölema. Ö̦jö däjä, u fa yalänö, u yanöcöwä laöafälöma. 2Mau u bada bläshäshou lä cuaano wei jamö, tä ulifi comablou co̦layoma. Judu mösö lä cacablaliyono wei mösö ca̦i shomablou mö fedua co̦layoma. Maa a quei mladou showadalayoma.
3Mashita jamö, mau u bada yanöcöwä wejeafälöma. Belibo 5 bä fa lublalunö, mau u bajadedeaö fa co̦imadunö, tä ulifi jaba wejediaö jödödou co̦fälöma. 4Belibo 7 a lublou lä bäshäcuaimi a jamö, 17 tä mö didi fa cublalunö, Alala cäcö ösöwä ja, canawä a bada maquealedayoma. 5Ö̦jö däjä, u fa wejeaimadunö, belibo 10 a oshe modoleo co̦jolayou däjä, bei mabä feyaca bololo jaba wawäaö co̦oma.
Mau u lä wejeafälöno wei tä a̦
6Ö̦jö däjä, 40 tä mö didi cublou fa co̦lonö, canawä a lä tano wei a u̦eshi jamö culanö, Noewänö täca caloblalema. 7Täca fa caloblalönö, u wejeaö möbä, je̦lamö a famalema. U bajadedeaö nö bäshäcuaaö däjä, a lelaaö shoqueama. 8Ö̦jö däjä, mau u nia bajadedewä möö fa co̦onö, joya a shömöa nomöjölema. 9Ö̦jö ma cui, a nö loobimi ja, Noewä nija a joya yäa co̦layofälöma. Mashita a shododowä showawä yalo, canawä a jamö a co̦a co̦bema. Täca lä jolale jamö, Noewä boco fa dodoicunö, joya e loa fa co̦icunö, a lucäa co̦malema.
10Noewänö ulifi a nö wejediwä dabou co̦o däjä, 7 tä mö didi tablamaö co̦layoma. Inaja tä mö didi cublou fa co̦lonö, joya a faa co̦malema. 11Ö̦jö däjä, joyanö Noewä a nofi weyade waloa fa co̦icunö, oliba jena ducu fa weibanö, Noewä a shi jaliblalou mö baoma. Naa oshediwä jena fa dalalönö, “Fei däjä, u badedaö nö culai”, a bufi cudaliyoma.
12Noewä a nö dadia fa balöicunö, 7 tä mö didi tablamaö fa co̦lonö, joya a shömöa co̦lema ma cui, a joya co̦blou co̦daanomi.
Yai Bada tänö bä faa lä co̦maleno wei tä a̦
13Ya̦cumö u wejeo jödödöolaliyoma. Noewä a befi ca̦i caläö showao däjä, belibo 12 bä falayoma. Dude a faö lä co̦le, a oshe modoleo co̦jolayoma. Ö̦jö däjä showawä, moli tä mö didi lä cublaliyono wei däjä, Noewänö feyaca comi tä fa caloblalönö, tä ulifi möö cuaama. Tä ulifi möö fa cuaanö, “¡Joo! ¡Fei däjä, jödödöwä tä ulifi wejediblou co̦a dodijilayoma!”, a bufi cudaliyoma. 14Ai a belibo faö co̦o däjä, ö̦jö a lublou ajedou däjä, 27 tä mö didi cublou fa co̦lonö, tä ulifi wejediblou jödödöa co̦layoma. 15Tä wejedio fa jödödöolalunö, abinaja Yai Bada tänö Noewä a nowa tama.
16—Bei. Canawä a jamö wamacö lä didile, bä fao da co̦lalu. Cafä sho, suwäböfä sho, ijilufä bä sho, tatäfä bä sho, bä bluca da itotolalu. 17Canawä a jamö, yalo wa bä ca̦i bluca lä didile, bä ca̦i bluca fao da showadaolalu. Bä lä yäö wei bä ma cui, ulifi jamö bä lä juu wei bä ma cui, wajaquemi bä wai lä joleaö wei bä ma cui, bä bluca ca̦i da faolalu. Bä balao fa co̦lalunö, jödödöwä tä ulifi jamö bä jublou shedecou cuaaö co̦obä —a nowa tama.
18Inaja Yai Bada tänö a nowa fa tanö, Noewä a faa showalayoma. Bei ijilubö ebä sho, bei suwäbö e sho, bä tatä ebä sho, bä ca̦i bluca faa showalayoma. 19Yalo bä bluca ma cui, inaja showawä. Wajaquemi bä wai lä joleaö wei bä ma cui, bä lä yäö wei bä ma cui, bä bluca fao showadaolaliyoma. Mashita jamö bä bluca lä cule, canawä a jamö bä ca̦i mashi didio fa showaonö, cama bä lä cui bä faö cololo cololomou showaoma.
Jeobaa nija, yalo a ö̦shö
lä dodobono wei tä a̦
20Abinaja Noewä a cuaaö nomöjöoma. Jeobaa nija, yalo a nia ö̦shö lä dodobono wei a yalo maqueabä, maa mabä yododomaquema. Ö̦jö däjä, bä lä juu wei bä ma cui, bä lä yäö wei bä ma cui, bä shami lä mlai ai bä yalo fa yaialalönö, bä shäalalema. Bä fa shäalalönö, Jeobaa nija tä waqueshi waloamadayobä, bä yalo lä dodoblamou wei bä maqueblamobä täcö ja, bä ö̦shömalema.
21Jeobaa nija, yalo bä nö ö̦shö lä̦shamou fa liyäjäonö, abinaja a bufi cuma. “Fei däjä, yanowamö täbä nowa ja, ya tä nia ulifi wa̦liaö co̦daaimi. Bä bluca demi lä juu wei, ya bä nia ca̦i waicaö co̦daaimi, ya tä ulifi lä tablamalöfenaja. Bä ma osheo däjä ma cui, bä dobloimi malä showadai. Wa̦lidiwä tä ja, showadi bä bufi shino dayäodii. 22Tä ulifi cuo showao däjä, ya tä nia dodijidamabou. Nii bä döamou fa balöonö, bä nii taö nomöjöobeje. Tä si ulifi ajio fa balöonö, tä ulifi yoblao nomöjöobä. Maa a bluca quei fa balöonö, motoca shi̦i fe döcäblou nomöjöobä. Tä mö jalua fa balölönö, tä mö ca̦i weyaö co̦obä. Einaja ya tä fe nia bluca usucuwä tamabou”, Jeobaa a bufi cuma.
©2012, All Rights Reserved