Génesis 39
39
Joséwan Potifarpa warmin punuyta munanqan
1Ismaelita negociantikuna Egiptuman Joséta chaykatsiyaptinnam Potifar rantirqan. Potifarqa Faraónpa wardiankunapa capitanninmi karqan.
2 Tayta Dios paywan kaptinmi#Hech. 7.9. José ruranqankunaqa llapanpis alli karqan. Tsaynömi patronninpa wayinchö täkurqan. 3Tayta Dios yanapanqanta tantiyarmi 4patronnin pasaypa kuyar Joséta churarqan wayinchö mandaq kananpä y llapan imaykankunatapis cuidananpä. 5Tsay junaqpitam Potifarta Tayta Dios yanaparqan. Tsaymi imaykankunapis atskayarqan y mikuyninpis shumaq wayurqan. 6Josépa makinman llapan imaykantapis churaykur Potifarqa manam yarpachakurqannatsu.
Joséqa kuyayllapä buen mözum karqan. 7Tsaymi Potifarpa warminqa Joséwan kakuyta munar nirqan: <<¡Noqawan punushun!>>
8Tsaynö niptinmi José nirqan: <<Mamïta, tsaytaqa manam ruraykushwantsu. Patronnï yärakamarmi llapanta cuidanäpä churamashqa. Tsaymi llapantapis shumaq cuidaptï tranquïlu purikun. 9Patronnïqa manam pitapis noqatanöqa yärakuntsu. Qamllatam warmin kaptiki makïman churamushqatsu. Tsaynö yärakaykämaptinqa ¿imanöparä Tayta Diosta ajätsir jutsata rurayküman?>>
10José tsaynö niptinpis tsay warmiqa qoyay qoyaymi qatiraq. Tsaynö qatiraptinpis Joséqa mana cäsurmi paywan punuyta munarqantsu. 11Juk kutichönam Joséqa rurayninkunata rurananpä wayiman yaykurqan. Tsay höra manam pipis wayichö karqantsu. 12Tsaymi Joséta Potifarpa warmin röpanpita tsariskir nirqan: <<¡Kanan juklla punushun!>>
Tsaynö tsariskiptinmi röpanta lloqtipaskir qeshpir aywakurqan.
13Röpanta dëjaskir qeshpiskiptinmi 14Potifarpa warmin sirviqninkunata qayararnin nirqan: <<¡Runä apamunqan jövin manam respitamantsiktsu! Noqa kaykanqä kaqman yaykaykamur violamayta munaptinmi pasaypa qayararqü. 15Tsaymi röpanta dëjaskir qeshpishqa>>.
16Tsaynö willaskirmi Josépa röpanta runan kutimunqanyaq churarqan. 17Runan chaykuptinnam sirviqninkunata willanqannölla nirqan: <<Tsay rantimunqayki hebreo jövin cuartüman yaykaykamurmi violamayta munashqa. 18Llapan kallpäwan qayaraptïmi röpanta jaqiskir qeshpishqa. 19Llapan imaykaykita cuidananpä churanqayki sirviqnikim tsaynö ruramashqa>>.
Warmin tsaynö willaptinmi Potifarqa pasaypa ajarqan. 20Tsaymi Faraónpa sirviqninkuna wichqaräyanqan carcelman Joséta wichqatsirqan.
21Joséta Tayta Dios yanapaptinmi#Hech. 7.9. cárcel täpaqwanpis yachanänakuyarqan. 22Tsaymi llapan prësukunata Josépa makinman carcelchö mandaq churarqan. Josérämi prësukuna imata rurayänanpäpis mandaq. 23Tayta Dios yanapaptinmi José ruranqan llapanpis alli karqan. Tsaymi cárcel täpaq runaqa Josépa makinchö kaq prësukunapä yarpachakuqnatsu.
© 2002, 2008, Wycliffe Bible Translators, Inc. All rights reserved.