KAJADIAN 6
6
Manusia nombaumo anu ma'idek
1Salatan manusia nompaka panjoo'mo, ka' sinongkomo i songko-songko na dunia, ka' to anak-anak boune i hampe'akonmo, 2to mala-malaekat nontoamo langkoyang haha aijo' to handa-handa. Lantas aha nongosoaimo langkoyang haha aijo' iya na anu nuka'ima'i nu aha. 3Sahingga notataemo na Tumpu, “Aku madi'mo situju manusia tumuu' sampe toka sidu-sidutu'; aha anu ko nyawanyo madi'mo tumuu' sampe toka sidu-sidutu', aha tionyo ahi' silaka. Otampu'uni uuka aiya umun nu aha madi'mo molabii 120 na taun.” 4#Bil. 13:33 Tempo'nyo aitu, ka' mule' ilapas na aijo' daagi' ko to mia-mian anu daka' hondo na butongnyo i dunia. Aha lee' nu to lalangkoyang nu manusia anu no'osoamo tiba to mala-malaekat. To mia-mian anu daka' hondo na butongnyo aijo' to babaani hondo ka' mian haha aijo' talasanggo hondo tempo'nyo naipuan mae.
5 #
Mat. 24:37, Luk. 17:26, 1Ptr. 3:20 Tinoa nu Tumpu ma'idek hondo na kalakuan nu to mia-mian i dunia; iwi-iwi' na pikilan nu aha aijo' saja' ma'idek. 6Ia nompele-pele'mo na nombau aha ka' nompojoong aha i dunia. Ia talalomo hondo nompele-pele', 7sahingga notataemo, “Ku silakaimo na manusia anu binaung-Kumo aijo', ka' suele iwi-iwi' na to tomo-tomonsi' ka' to bina-binatang sangga'at, kalana Aku nompele-pele'mo na nompotimbali aha.” 8Panyo i Nuh na nomposanang ahi' kinyonyoa nu Tumpu.
I Nuh
9-10 #
2Ptr. 2:5
Aiya na sisikon mongkona i Nuh. Ia kino anak mo'ane aha totolu', aitumo, i Sem, i Ham, ka i Yafet. I Nuh madi' nombau kasala'an ka' ola sa'a-sa'angu'nyomo ia na mian anu ma'ima' na kinyonyoanyo tempo'nyo aitu. Kantumuu'annyo mompaha kona hondo tiba Tumpu Allah. 11Panyo iwi-iwi' na mian sangga'at nutoa nu Tumpu Allah ma'idek na kinyonyoa nu aha, ka' ka uwesanan tinokamo iyaya mae. 12Tumpu Allah nontoa dunia aijo' me saja' nontoa anu toto ide-idek, kalana manusia iwi-iwi' na'idekmo na kantumuu'annyo.
13Lantas Tumpu Allah notataemo hi Nuh, “Aku nontantukanmo da omingkotimo na kantumuu'an nu iwi-iwi' apaa na anu ko nyawanyo. Aku mohopu'imo aha tiba dunia, kalana dunia nobuke'mo nu ka uwesanan nu aha. 14Pombaumo kapan sa'angu' na beleyum, kau' anu mokuut na obau; opaha baui salipi'nyo i unonyo, ka' olapisi nu ter na unonnyo ka' sambiha'nyo. 15Kapan aijo ko mantannyo 133 na meten, ko bolanyo 22 na meten, ka' ko tangkasnyo 13 na meten. 16Kapan aijo' o atopi, ka' olotnyo lengkat i pimpi'nyo mokiita' i atopnyo 44 na sentimeten. Bau na kapan aijo' tolu lundu na salonyo ka' osabatani i sohipi'nyo. 17Aku mompotokamo mae iyaba' bau posilakai toto sa'angu' na anu ko nyawanyo i dunia. Iwi-iwi' na apaa i dunia tionyo ahi' silakamo. 18Panyo Aku balajanji'mo hi beleyum. Pinsoopmo i uno nu kapan aijo' tiba bengkele' nu beleyum, ka' to anak-anak nu beleyum tiba to bengke-bengkele' nu aha. 19-20Posoop i uno nu kapan aijo', sa'angu' na lakinyo ka' sa'angu' na behenyo toto sangahan na tomonsi' ka' to bina-binatang sangga'at, da aha madi' suele osilakai hingga-hinggat. 21Oboa suele na ngangahan nu anu okaan miu, ka' bau bagi nu to bina-binatang haha aijo'.” 22#Ibr. 11:7 Binaumo i Nuh iwi-iwi' apaa na anu pinalentahkonmo nu Tumpu Allah hi ia.
