KAJADIAN 10
10
Lee' nu to ana-anak i Nuh
(1Taw. 1:5-23)
1Aiya na lee' nu to ana-anak i Nuh, aijo'mo i Sem, i Ham, ka'i Yafet. Ilapas na iyaba', aha toto-totolu' nohumpakmo to ana-anak mo'ane.
2To ana-anak i Yafet aijo'mo i Gomer, i Magog, i Madai, i Yawan, i Tubal, i Mesekh ka' i Tiras. 3Lee' i Gomer aijo'mo anu jojoong i Askenas, Rifat ka' Togarma. 4Lee' i Yawan aijo' mo anu jojoong i Elisa, Spanyol, Siprus ka' Rodes. 5Aha mompolee' nu to bansa-bansa anu jojoong i biwi nu ambai ka' i to togo-togong.
Aijo'mo iwi-iwi' na lee' i Yafet. Batu-batu bansa ka' tulunan nu bansa jojoong i posi-posi lipu'nyo ka' ko posi basa'nyo.
6To ana-anak i Ham aijo'mo i Kus, i Mesir, i Libia ka' i Kana'an. 7Lee' i Kus aijo'mo anu jojoong i Seba, Hawila, Sabta, Raema ka' Sabtekha. Lee' i Raema aijo'mo anu jojoong i Seba ka' Dedan. 8I Kus kino anak mo'ane sanggonyo i Nimrod anu momona binaani i dunia aiya. 9Ia tinulunganmo nu Tumpu sahingga tinimbalimo topo bebas anu mahoson. Kalana aitu mian bisa montaloakon, “O amalakon da Tumpu mompotimbali beleyum mian topo bebas anu mahoson sumo i Nimrod.” 10Momona kalaja'annyo monsongkohi Babel, Erekh ka' Akad, toto-totolu' aijo' i tano' Babilonia. 11Lengkat kiijo' mae ia nambamo nokiijo' i Asyur, lantas nompotinjomo kota Niniwe, Rehobot-Ir, Kalah, 12ka' Resen anu kiijo' i olot nu Niniwe ka' Kalah. Iwi-iwi' aijo' kaho to kota-kota daka'.
13Lee' i Mesir aijo'mo anu jojoong i Lidia, Anamim, Lehabim, Naftuhim, 14Patrusim, Kasluhim, ka' Kaftorim. Bansa Kasluhim aijo'mo na mompolee' mae nu bansa Filistin.
15To ana-anak i Kana'an, aijo'mo i Sidon na tumpenyo lantas mule' i Het. 16I Kana'an suele mompolee' nu bansa Yebusi, Amori, Girgasi, 17mian nu Hewi, Arki, Sini, 18Arwadi, Semari ka' Hamati. Tulunan nu bansa Kana'an haha aijo' sinongkomo namba jo'o-jo'on, 19sahingga potempasan nu lipu' nu aha ingewamo lengkat i Sidon namba i Selatan lau-laus nokiijo' i Gerar, tinoka-toka koko Gaza, ka' namba sasu i kabete'an lau-laus nokiijo' i Sodom, Gomora, Adma ka' Zeboim, tinoka-toka koko Lasa.
20Aijo'mo iwi-iwi' na lee' i Ham. Batu-batu bansa ka' tulunan nu bansa jojoong i posi-posi lipu'nyo ka' ko posi basa'nyo.
21I Sem utus tu'a i Yafet, mompolee' nu aha iwi-iwi' bansa Ibrani. 22To ana-anak i Sem aijo'mo i Elam, i Asyur, i Arpakhsad, i Lud ka' i Aram. 23Lee' i Aram aijo'mo mian anu jojoong i lipu' Us, i Hul, i Geter ka' i Mas. 24I Arpakhsad tuuma i Selah. Ka' i Selah tuuma i Eber. 25I Eber kino anak ua'aha na mo'ane; tumpenyo sanggonyo i Peleg, kalana tempo'nyo aitu to bansa-bansa i dunia noga'a-ga'atmo; tuenyo sanggonyo i Yoktan. 26Lee' i Yoktan aijo'mo mian anu jojoong i lipu' Almodad, i Selef, i Hazar-Mawet ka' i Yerah, 27i Hadoram, i Uzal, i Dikla, 28i Obal, i Abimael, i Seba, 29i Ofir, i Hawila, ka' i Yobab. Iwi-iwi' aijo' lee' i Yoktan. 30Daerah kajojoongan nu aha ingewamo lengkat mae i Mesa nokiijo' i Sefar, aijo'mo da'erah nu bungkutnyo sasu kabete'an.
31Aijo'mo iwi-iwi' na lee' i Sem. Batu-batu bansa ka' tulunan nu bansa jojoong i posi-posi lipu'nyo ka' ko posi basa'nyo.
32Iwi-iwi' aijo' lee' i Nuh, bansa toka sa'angu' na bansa ko posi-posi lee' nu aha. Ahamo na nolee'akon to bansa-bansa i dunia aiya noko lapas na iyaba' daka' aijo'.
