Matius 19
19
O Yesus Awi dodoto ma ngale o ngongolu
(Markus 10:1-12)
1Dangodu magena o Yesus wodoto daboloka, de o Galilea ma tonaka de Una wotagi wakahika o Yudea ma daeraka o Yordan ma Selera ma sonongaka. 2O bi nyawa yadadala Una iwimote, de kagena ibipopanyake gena Una wasiloha.
3O Farisika ma nyawa yamuruo naga yahino kali, de manga edekati Una Awi sala yasari so itemo, “Mote nanga agama ma bobita, aku o nyawa manga pedeka yaholu, ngaroko ma sababu ka ma cunu?”
4De Una wasitemo onaka, “Bilasu niabacaka o Gikimoi Awi Jaji ma Buku ma rabaka, ma solano ma orasi Una o nyawa waaka gena itemo, ‘O Gikimoi o nyawa waaka yanau de o ngopedeka.’ 5Dabolo de wotemoli, ‘Ma sababu magegena yanau moi bilasu ma baba de ma awa wadongosa la una de awi pedekaka, so ona asa idadi ka ka moi, 6so ona magena yasinoto kawa, duma ka ka moi.’ Ma ngale magegena so o kia igogou o Gikimoi wasirimoika, upa lo o nyawa pasiritinga.”
7De ona yosano, “Nako komagena, dadoohaso o Musa womisimaha ngomi aku to ngomi mia pedeka miaholu, hitilahi ngomi o ngongolu ma surati migaka kasi.”
8De Una wasitemo onaka, “Sababu to ngini nia sininga datogoi sidago o Musa winisimaha nia pedeka niaholu. Duma igogou, ma nonoma kasi de isidadi maro komagenawa. 9Naguuna ma pedeka womiholuka de wokawi de o ngopedeka ma somoali, una magena he wosundali ma ngale ma pedeka ma nonomaka. Ka cawali muna gena mosundali modomaka, gena aku idadi una muna womiholu.”
10Kagena de o Yesus Awi muri-muri yotemo Unaka, “Nako komagena, o kawi ma adati isusa poli, so ifoloi daloha, ngaroko, ngone upa pokawi.”
11So Una wotemo, “O bi nyawa kanaga yangoduwa la yaaku o demo magena yadehe. Duma kanaga o nyawa kiaka o Gikimoi wasitatapuka la ona upa ikawi. 12Komagena kanaga o nyawa la yaakuwa ikawi, sababu ona yasibuo kusi de ona idadi komagena. Kanaga lo ona la yaakuwa ikawi, sababu o nyawa ma somoa isidadi komagena. De lo kanagali ona la ikawiwa, sababu to ona manga dupa masirete ma ngale yaaku o Gikimoi Awi manara yaaka. O nyawa nagoona la aku o dodoto manena yamote, ka daloha la yamote bato.”
O Yesus wogolo tanu o Gikimoi Awi laha wasidumu o ngopaka
(Markus 10:13-16, Lukas 18:15-17)
13So o bi nyawa manga ngopa o Yesuska yaaho la wapada de wogolo tanu o Gikimoi Awi laha wasicatu onaka, duma Awi muri-muri yatoosa so yadogore ona magenaka, “Upa niahika!” 14Kagena de o Yesus wotemo onaka, “Niadohaka, la o bi ngopa ona magena yahino Ngohino. Upa lo niafati de lo niasimahawa. Sababu o bi nyawa imatero maro o ngopa ona manena asa yaaku iwosa o Gikimoi Awi paretaka.” 15So Una de Awi gia o bi ngopa magena wasipada manga sabiku, so wogolo tanu o Gikimoi Awi laha wasicatu onaka. Dabolo de Una kagena de wotagi so womajoboka.
O nyawa ikakaya gena isusa manga arata yopalako de o Gikimoi wimote
(Markus 10:17-31, Lukas 18:18-30)
16O wange moiku o nyawa moi wahino o Yesusno, de womasano wotemo, “Baba Guru, ngohi bilasu o loha o kia taaka la tamake o oho ikokakali.”
17“Dadoohaso ngona noisano Ngohino o gogoho o kia gena daloha. Kanena moiwa manga sininga daloloha, cawali o Gikimoi masirete. Nakoso nomode o oho ikokakali la namake, de o Gikimoi Awi bobita gena bilasu naaka.”
18De o nyawa magena wosano kali, “O bobita maro o kia gena.”
Una wotemo, “Upa ngona notooma, upa ngona nosundali, upa ngona notosi, upa de o galaki ani dodiaoka gena ikokulai, 19de nahoromati ani baba de ani awa de lo nadodara ani dodiao maro ka to ngona ani rohe masirete.”
20De o nyawa una magena wosango wotemo, “Baba Guru, o bobita dangodu magena tamoteka. So o kiasi bilasu taaka.”
21O Yesus witemo unaka, “Nakoso nomode la o Gikimoi Awi dodara ma manara gena naaka itiai, de ngona gena notagi kasi la ani kia bato nosiija de ma pipi o nyawa isususaka nasitoku, la ngona asa namake o arata ma duhutu o sorogaka. Daboloka, de nahino la noimote Ngohi.”
22Woise o Yesus wotemo komagena, so kagena de o nyawa una magena wotagi o riho magena wodongosa de awi sininga ipeleso, sababu una magena foloi wokaya. 23La o Yesus Awi muri-murika wotemo, “Ngini tinisingangasu igogou! Isusa icarawa o nyawa ikakaya o Gikimoi iwisigise la iwosa Awi pareta ma rabaka. 24Ngohi tosidadu totemo nginika, lebelaha o unta moi asa iwosa o yaiti ma kupeka, nako positero de o nyawa wokakaya moi wowosa o Gikimoi Awi pareta ma rabaka.”
25Una Awi demo magena Awi muri-muri yoise, de ona foloi yohairani sidago itemo, “We! Nako igogou komagena, done nagoona asa aku isalamati la yamake o oho ka sidutu ikakali.”
26Kagena de Una wakeri-keri de wotemo, “Nakoso maha de o nyawa manga manara o duniaka, gena idadiwa. Duma nakoso maha de o Gikimoi Awi manara, de dangodu magena aku Una waaka.”
27De o Petrus wotemo, “He! Ngomi manena mia moi-moi lo dangodu miodongosaka so Ngona minimoteka, so o kia asa miamake.”
28O Yesus wotemo, “Nginika tinisingangasu igogou, o orasi ma simaka o bi moi-moi dangodu o Gikimoi wamuaneka, de Ngohi o Nyawa ma Duhutu manena asa tomatamiye Ai pareta ikokuasa ma kursika. O orasi magenaka de ngini Ngohi nimomoteka, ngini lo asa nimatamiye o bi pareta ma kursika ma ngale o Israelka manga soa mogiowo de sinoto gena niapareta. 29De o nyawa nagoona manga tahu yodongosaka, eko manga gianongoru de manga awabira, eko manga awa de manga baba, eko manga ngopa-ngopa eko lo manga doro sababu ma ngale Ngohi, ona magena asa yamake ma giliho sidago ma para o ratu moi de lo yamake o oho daloloha de ikokakali. 30Igogou, done o nyawa yadala o orasi manena idodoma gena done asa ka itotuuru, so o orasi manena o nyawa yadala ibitototuuru gena done asa idodoma kali.”
@ LAI 2002