MATEO 6
6
Jesosaa huohuipea-aicapoa dejjacuana queapame ba'ecapoquijji peaja oya ebajji, mahuisoneijo pojjeama
1Jesosaa huohuitiica-aniapoa cuana jama ba'a: —A'a Eyacuiñajjija echacojji ajji peacuanaja miquiana queapame poani ebajji. Mahuisoneijo pojjeama acajji. Miquianaya jama poanijo Eyacuiñajjiya miquianaja Chii-ai Eyajo nequiya miquiana queapame ba'epoquinaje sosejje quiajjima acaje Eyajo quijje.
2—Jamajjeya miquiaaya joya aema'nei ani bejjo o asahuajji quiasa-amajje, quehuajje quiacue peacuana huohuijjimaa. Joya ecua Eyacuiñajjija epeejjinishocuana ejeojjijje poquianiya aema'cuana asahuacani ojjañaja oya ebajji, a'a jama pea-aiya ajji. Judioja equi-ai ejjachichaquijjijo nequiya aema'cuana asahuacani ohuaya peacuana ojo queapame emimijji pea-ai. Eyaya quiana e'ejojonei huohuiaña Eyacuiñajjija quia o queapame ba'epoquinaje sosejje jjeshejjima poaje macuanajaya. Jiquio peacuana ojo queapame mimiani so'o jjeya, mahuisoyatii ojaya poaje. Quijje ca Eyacuiñajjija quia o queapame ba'epoquinaje sosejje jjeshejjima poaje. 3Jamajjeya miquiaaya peacuana aema'nei ani bejjo o asahuajji quiasa-amajje, a'a peacuana miquianaja epeejjineicuanaya nequi cojjaneijo bejjo ja'anei quiajji oja bajji. 4Quehuajje pea huohuijjimaa, aema'cuana bejjo o asahuajji quiacue. Eyacuiñajji miquianaja Chii-aiya cua miquiaaya quehuajje apoquiaña bacanitii. Quijje Eyacuiñajjija quia jjesheje miquiana queapame ba'epoquinaje sosejje.
Jesosaa huohuitiicapoa cuana achajja mimime pocajji Eyacuiñajjinijje
(Lc 11.2-4)
5—Miquianaya Eyacuiñajjinijje mimisapomajje, ¡a'a joya ecua Eyacuiñajjija epeejjinishocuana jama pojji! Ma dejjacuana mimiani Eyacuiñajjinijje judioja equi-ai ejjachichaquijji eyiyedojjojo ja'anei nequi queapame mimiani majo anicacuanaja oya ebajji. Ona ejjachichaqui anicajo oya mimipea-aisapoani Eyacuiñajjinijje majo anicaja oya queapame mimiani ebajji. Eyacuiñajjija quia o queapame ba'epoquinaje sosejje jjeshejjima poaje macuanajaya quijje. Jiquio oya queapame mimiani bacaje cuaa mahuisoyatii ojaya poaje. Quijje ca Eyacuiñajjija oya equiajji pojjeama poaje. 6A'a jama mimime Eyacuiñajjinijje popea-aijji. Miya onijje mimisapomajje ca nobiquicue mique equi equecuayijjiyasijje peacuaa miya ebaca poanijje. Majo aniya esecuejjani ca'amajje mique Chii-ainijje mimi-anicue jamatii miquea oya ecojjaja bajjimajo. Ohuaya miya bacapoquianitii. Cua miya peacuana chamajo aña pea-ai bacanitii. Mi queapame ba'epoquinaje sosejje ohuaya quiacaje quijje.
7—Miquianaya Eyacuiñajjinijje mimisapomajje ¡a'a oya esohuitiiya amajamajapoquiajji! Jamaya Eyacuiñajji bapojjima'cuana mimiani. ¡A'a oya jama mimime popea-aijji Eyacuiñajjinijje! Oya queaquehua jjashahuabaquiani Eyacuiñajjijo. Esohui queahuiso jeacuayacanijo Eyacuiñajjiya oja mimi eshajja-ajjaneineicaje poso jjabaquiani. 8A'a oya jayojja mimime pea-ai posapojji. Miquianaya mimijjimahuajotii miquianaja Chii-aija ebatii poani cua miquiaaya queapame eba'epoquijji sañajo. 9Jamajjeya quiana oe Eyacuiñajjinijje jama mimime pocajji ba'a:
“Ecuanaja Chii-ai Eyajo nequi,
queahuisocuaa miya queaca'aneetii nequipoquiani cabacahua.
10Miya ojjañacuana huoojeapoquiajjitii poani poecuajicue.
Miquea ejjashahuabaquijjicuana jayojja ca-acahua jiquio meshijo ba'ecacuaa
joya ecua Eyajo nequiya ajeyocani jama pea-aiya ca-acahua.
11Jiquio pojjajotii ecuana bobi quiacue queapame eba'ejji.
12Ecuanaja mimishicuana miyaya pajea'yocue
ecuana queamimishi ajji epo oja mimishi ecuaaya pajea'yañajojoya.
13Ecuana nahueneicue onaa queamimishi epomeeca poanijje.
Edosiquianajo pea-ai ecuana nahueneicue ohua ecuana queamimishi epomeeca poanijje.”
Jama mimimeya pocajji Eyacuiñajjinijje— Jesosa poa.
14-15Jesosaa huohuitiicapoa cuana jama ba'a: —Miquiaaya joya mi queamimishi ajji epocuana oja mimishi pajea'yañajo miquianaja Chii-aiya Eyajo nequiya miquianaja mimishi pea-ai cuijeajeyocaje'yo. Miquiana queamimishi ajji epocuana oja mimishi pajea'yoajja poajo, Eyacuiñajjija caca miquianaja mimishi pea-ai epajea'yojji pojjeama poaje.
Jesosaa huohuipea-aicapoa bobi ijjiajjima eajjijo Eyacuiñajjinijje emimijji
16—Miquianaya Eyacuiñajjinijje emimijji bobi ijjiapojjima' ani, a'a queacojjayenonee pojji. Eyacuiñajjija epeejjinishocuana jamaya queacojjayenonee poani oya Eyacuiñajjinijje emimijji bobi ijjiapojjima' aniani peacuanaja ebajji. ¡A'a oya jama popea-aijji! Eyaya quiana e'ejojonei huohuiaña ma dejjacuanaja Eyacuiñajjija quia o queapame ba'epoquinaje sosejje jjeshejjima poaje. Jiquio onijje ba'ecacuaa oya bobi ijjiapojjima' aniani bacaje mahuisotiiya ojaya poaje. 17-18Miya Eyacuiñajjinijje emimijji bobi ijjiapojjima' aniani ecojja shacuacue, queapame jjajabequicue peacuaa miya bobi ijjiapojjima' aniani ebaca poanijje. Mique Chii-aiya jamatii jjabameequiajjaa bacapoquianitii, cua miya peacuana chamajo aña pea-ai bacanitii. Mi queapame ba'epoquinaje sosejje ohuaya quiacaje quijje.—
Jesosaa huohuipea-aicapoa aquiana queahuiso Eyajo echichapoquiajjijo
(Lc 12.33-34)
19Jesosaa huohuitiica-aniapoa cuana jama ba'a: —A'a aquianacuana queahuiso jiquio meshijo ba'eya chichasa-ajji. Jiquio meshijo ani aquianacuana ojjañatii chiichii'yani, huiña'yani, see'yani pea-ai. Siipojjicuaa nobiquimajje siipea-aicani jiquio meshijo ani aquianacuana. 20Eyajo ani aquiana queapame caca oe queahuiso chichacajji.#6.20 Nota: Dejjacuaa, eponacuaa pea-ai Eyacuiñajjija echacojji queahuiso acapoquiani jiquio meshijo ba'eya joya ecua dejja, epona pea-ai quea-aquianahuiso poani Eyahuasijje jamaya. Majo ani aquiana ca chiichiiajja, huiña'yoajja, see'yoajja pea-ai. Siipojjicuana pea-ai ca cuama chama'nei Eyahuasijje. 21Jamajjeya aquianacuana jiquio meshijotii eanijji chichapoquiamajje jiquio meshijotii ani aquianajo jjashahuabaquipoquijetii. Aquianacuana Eyajo eanijji chichapoquiamajje ca Eyajo eba'epoqui'yojji jjashahuabaquipoquije.—
Jesosaa huohuipea-aicapoa cuana ecojjajo, oya eyami queaja'a pomeejji poani
(Lc 11.34-36)
22Jesosaa huohuitiicapoa cuana jama ba'a: —Miquianajaya ecojjacuana eyami queaja'a pomeejji poani jiquio ecua cuaquijijiya jeaja'acani jama. Jamajjeya ecojjacuana queapame poanijo miquianaya queaja'a ba'epoquije. 23Miquianajaya ecojjacuana queapame pojjeama poanijo ca quea-aapo jayojja quiana ba'epoquije. Jamajjeya jiquio miquianaja yami queaja'a pomeejji chamajo quea-aaponee jayojjatii ba'epoquije.—
Beca echacomeejji poani etiijo ba'eca-ajja
(Lc 16.13)
24Jesosaa huohuitiicapoa cuana jama ba'a: —Oe dejja beca o chacomeejji poani dejjajo oya pojjajotii chacochacoca-ajja. Ojaya oe o chacomeejji dejja queabotinee poaje, pea ca botiama poaje. Oe dejjajo chacochaconeineije ojaya esohui jayojjaya, peajo ca chacochacoajja poaje. Jamajjeya Eyacuiñajjijo, bejjo queahuiso yajjijo pea-ai ojee chacochacoca-ajja.—
Eyacuiñajjiya oja bacuacuana jaahuanacapoquianitii
(Lc 12.22-31)
25Jesosaa huohuitiica-aniapoa cuana jama ba'a: —Jamajojoya aje quiana queaja'a esohui eyaya huohuije. A'a queayeno jjashahuabaquipoquijjitii bobijo, eishijji enajo, daquijo pea-ai jiquio meshijo eba'epoquijji. Miquianaya bobi eijjiajjijo daqui ehuoshojjijo mahuisojotii pojjeama eshe ba'epoquiani. 26Bacue cuichojjicuana. Oya eyajje cuabesapoquiani. Oya que bana-ajja, sejjasejja'yoajja pea-ai. Equi iya'yoajja aquiana huanajji. Jamatiiya miquianaja Chii-aiya Eyajo nequiya oya bobi queapame quiacapoquiani. ¿A'a ojaya cuichojjicuana oeneiya queajea poani? Chojja de, miquianaya caca oe ojaya queajeaneenee poani cuichojjicuana jama pojjeama. 27Miquianaya queayeno jjashahuabaquipoquianitii mi mano'yojjijo, ¿a'a ma epojja shonoshonomeeje? ¿a'a poemeejjima aje? Chojja, che una hora shonoshonomeejjima aje mi mano'yojji epojji.
28—Oya jayojja, ¿apiojji acuae quiana queayeno jjashahuabaquipoquianitii ehuoshojji daquijo? Bacue, shashacuana ebiojo nequi queapame tiiani. Oya caca chacochacoajja, socosocoajja pea-ai. 29Jamatii shashacuana queabamenee nequiani pea pea huo'ome poani. Eyaya quiana huohuiaña ma yahuajonei emeshimese Salomonya daqui queanahue, queasiyonee huoshocapoa jiquio ecua shashacuana jama pojjeama poani. Shashacuana ca queabamenee pea pea huo'ome poani, oja daqui jama pojjeama poa. 30Eyacuiñajjiya shashacuana queapame pohuameecapoquiani meshijo enequijji so'o, jamatii quijje oya eyaacuaji'yo dahuajeacani cuaa. Eyacuiñajjiya shashacuana queapamenee pohuameecapoquiani bamajje, ¿a'a ohuaya miquiana daquicuana quiacaje ehuoshojji ojaya queajeaneenee poanijojoya? E'e, quiacaje. Jamatii miquiana oepojjinei ojo jjashahuabaquiani, Eyacuiñajjija miquianaya ejaahuanajji pojjeama poso jjabaquiani. 31Jamajjeya a'a oe queayeno jjashahuabaquipoquijjitii quiana jama ba'a: “¿A'ya cuae seya jjeya che ijjiaje, ishije pea-ai? ¿Ache daqui seya che huoshoje?” ¡A'a jama jjashahuabaquime popoquijji! 32Eyacuiñajjija esohui bapojjima'cuana jama queayeno jjashahuabaquimeya popoquianitii aquianacuanajo. Miquianajaya Chii-ai Eyajo nequija ca ebatii ache queapame miquiana ba'emeesahuajji ojaya equiajji. 33Jamajjeya ebionei queaja'a jjashahuabaneiquicue Eyacuiñajjijo oya ojjañacuana huoojeapoquiajjitii poani. Oja esohui jayojjanei miquianaya ba'esaneipoanijo ohuaya ojjaña miquiana queapame ba'emeesahuajji jiquio meshijo ani quiacapoquije. 34Jamajjeya a'a oe queayeno jjashahuabapoquiquijjitii yajja se mecahuajje poaje. Mecahuajje jjapojjaquiajo jjashahuabaquije ae se poaje jjeya jiquio pojjajo. Quijje pea pojjajo yajja se poaje, ae seya ijjiaje, a'a majo pea-aiya queayeno jjashahuabaquijji. Mahuiso cuanajotiiya oe jjeyanei jiquio pojjajotii jjashahuabaquicue quiana.—
Copyright Mision Nuevas Tribus, 2006