Akisy. ŊUNA EGEUNETE
ŊUNA EGEUNETE
Apolou a ekiro ebe Akisyakinet iŋes atemar, “Ageun.” Irworo ekitaabo lo epite ŋolo kesubunere akwap, neni kebunio ituŋanan, epite ŋolo kisyakinia asecit ka ŋican ŋulu eya nakwap ka epite ŋolo etiŋitor Akuj ŋituŋa. Etyakak ekitaabo ŋolo a Akisyakinet ŋarwa ŋaarei.
1. Ŋikekya 1-11: Igiritae epite ŋolo kesubunere akwap ka eemut ŋolo a ŋituŋa a ŋulu esyaunak nakwap. Eya nen ŋakiro ka Adam ka Epa, Kain ka Abel, Noa ka akalele ka ŋuna ka aduketait a ŋina aoyan nooi alo Babilon.
2. Ŋikekya 12-50: Igiritae ŋiemuto ŋulu atapapaa a ŋulukoloŋ a ŋulu a Ŋisirael. Ŋolo esyaunan iŋes Aburam ŋolo ayenen aŋuna ka anupit keŋ ka akitopoloorit keŋ Akuj, totupakis nai ŋiemuto a Isaka alokoku keŋ ka Yakob lopapait keŋ (anyaritae Yakob a ekiro ece ebe, Isirael) ta ŋiemuto a ŋidwe a Yakob a ŋulutomon ka ŋiarei a ŋulu arae ikes esyakinete ŋatekerin ŋunatomon ka ŋaarei ŋuna a Ŋisirael. Irworitae nooi ŋakiro alokoku a Yakob a epei, iŋes Yosepu ka ŋakiro ŋuna kepotu kitowuoto Yakob ka ŋikalya a ŋidwe keŋ akiboi alo Ijipit.
Tari kirworo ekitaabo lo ŋiemuto ŋulu ikamunito ŋituŋa, erae nooi ŋuna etiyat Akuj ikes elimoritae. Isyakinit anakitogogoŋ atemar abu Akuj tosub akwap ka eŋetakinit a ŋakiro a ŋuna kiikinit Akuj ebe erubakini iyoki ŋituŋa keŋ. Alotooma ekitaabo lo daadaŋ, erae ŋakiro ŋuna ka Akuj irworitae nooi: Ŋakiro ŋuna etubonokinia ka isicanenea ŋulu itiyaete aronis, ŋakiro ŋuna iyokitor ka iŋaranakinia ŋituŋa keŋ torik ekiboiye kec. Ekitaabo lo ŋoloŋorot, aponi kigirae akirica ŋiemuto ŋulu ka anupit a ŋituŋa ka akiturubakin anupit ŋin eyai.
Ngakarimojong Interconfessional Bible © Bible Society of Uganda, 2008.