Mattheos 2
2
1Unkan Herod wicaśtayatapi taanpetu kin he ehan, Bethlehem Juda makoce kin en Jesus tonpi, hehan iho, wiyohiyanpatanhan wicaśta ksapa Jerusalem en hipi qa heyapi;
2Tuwe Juda oyate kin en wicaśtayatapi kta tonpi kin he tukten un he; wicanḣpi tawa kin he wiyohiyanpata wanunyakapi qa ohoundapi kta on unhipi ce.
3Herod wicaśtayatapi kin he naḣon, unkan nina yuśinyaya, Jerusalem ocowasin nakun.
4Unkan wośnapi kagapi owasin qa oyate kin en wowapi kagapi kin hena wicayuwitaya, hehan Messiya tukten tonpi kta hecinhan, he iwicawanga.
5Unkan heciyapi; Juda makoce kin en Bethlehem otonwe kin hetu ce; wicaśta wokcan kin en kaken owapi;
6Qa niś Bethlehem, Juda makoce kin en, Juda itancanpi kin ehna iyotan nicistinna śni; enitanhan wicaśtayatapi wan u kta, he Israel mitaoyate kin wonwicaye kta.
7Hehan Herod wicaśta ksapapi qon naḣmana wicakico, qa wicanḣpi kin tohanhan tanin ece, he atayedan iwicawanga.
8Hehan Bethlehem ekta ye wicaśi qa heya; Ya po, qa hokśiyoqopa kin nina ode po; qa iyeyayapi kinhan hośimakahdi po; miś eya wau qa ohowada kta, eya.
9Wicaśtayatapi ia naḣonpi hehan tankan iyayapi; unkan iho, wicanḣpi, wiyohiyanpata wanyakapi qon he wicitokam iyaye c̣a hokśiyoqopa wanke cin he iwankam inajin.
10Unkan wicanḣpi kin wanyakapi qehan wowiyuśkin tanka on iyuśkinpi.
11Unkan ti mahen ipi hehan hokśiyoqopa kin wanyakapi, hunku Mary nakun, qa itokam makata ehpeic̣iyapi qa ohodapi: unkan wopiye hduḣdokapi hehan taku qupi, mazaskazi, qa canśin pejihuta waśtemna koya.
12Unkan wowihanmde on Wakantanka wahowicaya, Herod ekta hdapi kte śni, hehan canku tokeca ohna iye tamakoce ekta hdapi.
13Hena wanna kihdapi hehan, iho, Itancan taohnihde wan wowihanmde on Joseph en ihdutanin qa heya; Najin qa hokiśyoqopa hunku kici iwicacu qa Egupta ekta najica wo, qa tohan ociciyake kte cin hehanyan hen un wo: Herod hokśyoqopa kin kte wacin on etanhan ode kta ce.
14Hecen hanyen najin hiyaye, c̣a hokśiyoqopa hunku kici ewicahdaku, qa Egupta ekta iyaya:
15Qa hen un, Herod ṭe cin hehanyan: Hecen Itancan wicaśta wokcan on taku eye ciqon he yuecetupi kta; Egupta etanhan micinkśi weco ce.
16Wicaśta ksapapi qon Herod hnayanpi wanhdake c̣ehan nina śihda; qa akicita ekta yewicaśi, qa Bethlehem qa makoce ihdukśan koya en, hokśiyopa owasin wicakte, tona waniyetu nonpa qa ihukuya, wicaśta ksapapi wiwicawange ciqon he iyacinyan.
17Unkan hehan Jeremiya wicaśta wokcan oie qon yuecetupi, he kaken eya;
18Rama en wicaho wan naḣonpi, ic̣idowanpi, wicaceya qa waśihdapi tanka; Racel cinca awicakiceya qa wacintonknakapi kta cin śni, cinca en unpi śni nakaeś.
19Tuka Herod wanna ṭa hehan, iho, Itancan taohnihde wan Egupta ekta Joseph en taniniciya;
20Qa heya; Najin qa hokśiyoqopa hunku kici ewicahdaku, qa Israel makoce tawa kin ekta hda wo; tona hokśiyoqopa ṭa cinpi qon hena wanna ṭapi.
21Unkan najin hiyaye c̣a hokśiyoqopa hunku kici ewicahdaku qa Israel tamakoce kin en hdi.
22Qa Arcelaos, Juda makoce kin en, atkuku Herod tohe kin en wicaśtayatapi yanka he naḣon hehan ekta hde kta kokipa; tuka wowihanmde on Wakantanka wahoye cin on, Galile makoce kin ekta iyaya:
23Qa otonwe wan Nazareth eciyapi kin he en hi qa hen yanka; hecen, Nazareth wicaśta eciyapi kta ce, wicaśta wokcan eye ciqon he yuecetupi.
© Copyright 2015 American Bible Society. All Rights Reserved.