Mphattuwelo 8
8
Umala wo naphuvu
1Vano, Nluku ahomuupuwela Nowee wamoca ni inama cothene co ntakhwani ni coohuwiya caarinawe nkalawani, ni ahowaana iphyoo yuulupale mwiilaponi ni maasi yahopacera uwukuwa. 2Miliwi co vathi ni mikhora co wirimu cahottiyannyaa ni ipula yahohiya urupa. 3Maasi yahopacera uwukuwa vakani vakani mwiilaponi. Wiimaleloni wo mahuku iminya wo hansini (150), maasi ale yahowukuwa, 4ni nihuku nonakhumi na saapa no mweeri wonasaapa, ikalawa ile yaheemela umyaakoni co Ararati. 5Maasi nanlelo yeera awukuwaka, mpaka mweeri wonakhumi. Vano nihuku noopacera no mweeri wonakhumi cahopacera woonnya myaako.
6Anavinre mahuku arupayini (40), Nowee ahohula icanela yaapankilyawe nkalawani. 7Vano ahonkumiha nakhuku mmoca, aamakenle urukureryaca paahi, awehereryaka maasi ale wuuma vathi. 8Wahoolo ahotthukulela ikhuntta wiira oone yakhala wiira maasi ayo yahowukuwa mwiilaponi. 9Nanso ikhuntta khayaaphwanyile nipuro nookotela kontha maasi yahokhuneela itthaya yothene. Phimaana ikhuntta ile yahoturuwela nkalawani mwaaryawe Nowee. Ule ahotaphulela moono awe vate ni ahovara ikhuntta ile awaanaka nkalawani mmwe.
10Vaavale Nowee ahowehererya tho mahuku saapa ni ahoruma tho ikhuntta ile. 11Utthekuwa waya ncuwa, ukati waturuwilyaya ikhuntta ile, yahowa inapapile umalakuni nwo ntaakhuru no mwiri. Nowee ahokhala oocuwela wiira maasi ayo ahowukuwa mwiilaponi mmo. 12Ahowehererya tho mahuku saapa ni ahoruma tho ikhuntta, nanso ila ikwaha ila ikhuntta khayaaturuwile tho.
13Nihuku noopacera no mweeri woopacera wo mwakha iminya siita na mmoca (601), maasi ale yahowelela mwiilaponi mmo. Nowee ahopattakula nivatho no'kalawa ni aheera: Mwiilaponi mmo itthaya iyo ihooma. 14Khweli, nihuku nonasirini na saapa (27) no mweeri wonayeeli, itthaya yahomalela wuuma.
Upacera makhalelo onaanano mwiilaponi
15Vano Nluku ahomwiirela Nowee: 16Ukhume nkalawani mmo, we na amwaaraa, wamoca na asaanaa ni asaaraya asaanaa ayo. 17Ni ukumihace inama cothene cirinaa nnyo: asaanuni, inama cuulupale ni cikani cineetta ciipurulaka. Ukumihe wiira cimwareele mwiilaponi, cikhale cocaayira ni citotholane.
18Phimaana, Nowee na amwaarawe, wamoca na asaanawe na asaaraya yahokhumaca nkalawani. 19Inama cothene cuulupale ni cikani cineetta wowiipurula, ni asaanuni othene, cothene coweetta mwiilaponi caari nkalawani, cahokhuma.
20Wahoolo Nowee ahopanka ikhilompi yoonlapelela Mwanene Nluku, ni ahokusa inama cikina ni asaanuni o'halali, ni ahaaveleelihera isataka yoopahiya. 21Mwanene Nluku ahoona unukhela ni aheera: Akinhala tho ulapha itthaya mwa nlattu wa pinatamu, kontha wuupuwela wa pinatamu uri woonanara ikhumelo. Ni akinhala wiivakaca tho citthu cikumi cothene toko cipankilyaka ula nkwaha ula.
22Paahi, ilapo ela yapicaru n'umala,
waala n'uhepha,
uririya ni nttukuttha,
ilimwe ni iyiita,
uhiyu n'uthana
khunhala umala.
© 2021, Wycliffe Bible Translators, Inc. All rights reserved.