Mphattuwelo 11
11
Inupa yoorekama yoophiya wirimu
1Mwiilaponi mothene nariwo paahi nuulumo nimoca ni moolumeliyo mamoca. 2Vano atthu akhumaka mphantte unkhuma ncuwa, yahophwanyaca nikuwa uSinari ni vaavale yahokhalaca. 3Yaheerelana ayaayoru coo: Nrwee nuupe incirwa ni nipaheehe sana sana. Yatthuminri incirwa nnyo nipuro no maluku, ni alikatarawu nipuro no mattope. 4Wahoolo yaheerelana tho: Nrwee niteke iparasa ni inupa yoorekama yoophiya wirimu. Commo ncina nihu ninkoruma ni khaninhala umwaruseliya mwiilaponi.
5Vano Mwanene Nluku ahokhuruwa wiira oone iparasa ile ni inupa yaatekaya atthu ale. 6Ni Mwanene Nluku aheera coo: Nkoonani, atthu ala ari nloko nimoca paahi, anoolumaca nuulumo nimoca paahi, ni ahopacera nteko ule. Woohipica khiiwo inhala waahiha uvara yuupuwenlyaya. 7Nrwee, nikhuruwe ni naavirikanihe nuulumo naya, wiira ahiiwanane ntthu ni nkhwawe. 8Vaavale, Mwanene Nluku ahaamwarusela atthu ale ilapo yothene, ni yahohiyaca uteka iparasa ile. 9Phimaana waheehaninya uPapeli, kontha vaavale Mwanene Nluku ahovirikaniha moolumelo ottuniya yothene. Ukhuma vaavale Mwanene Nluku ahaamwaruselaca atthu ale mwiilaponi mothene.
Mayaranacelo o nrukulu na Seemu
10Ala phi mayaranacelo o nloko na Seemu.
Uvira wawe naphuvu mwiilaponi, cahovira myakha miili, ni Seemu ahopiihera myakha iminya (100) ceyarelo ni ahonnyara Arifacate. 11Nannyanrene Arifacate, Seemu ahokhala nkumi mpaka myakha iminya thanu (500) ceyarelo ni ahaayara asaana akina asilopwana na asithiyana. 12Arifacate wapiihenryawe myakha talathini nuwa mithanu (35) ceyarelo, ahonnyara Selah. 13Nannyarene Selah, Arifacate ahokhala nkumi mpaka myakha iminya cese nuwa miraru (403) ceyarelo ni ahaayara asaana akina, asilopwana na asithiyana.
14Upiihera wawe myakha talathini (30) ceyarelo, Selaa ahonnyara Heperi. 15Nannyarene Heperi, Selaa ahokhala nkumi myakha iminya cese nuwa miraru (403) ceyarelo ni ahaayara asaana akina, asilopwana na asithiyana.
16Upiihera wawe Heperi myakha talathini nuwa micese (34) ceyarelo, ahonnyara Peleki. 17Heperi unnyara wawe Peleki, ahokhala nkumi mpaka myakha iminya cese nuwa talathini (430) ceyarelo ni ahaayara asaana akina, asilopwana na asithiyana.
18Peleki upiihera wawe myakha talathini (30), ahonnyara Rewu. 19Peleki unnyara wawe Rewu, ahokhala nkumi mpaka myakha iminya piili na khentta (209) ni ahaayaraca asaana akina, asilopwana na asithiyana.
20Rewu upiihera wawe myakha talathini na miili (32) ceyarelo, ahonnyara Siruke. 21Rewu ahokhala nkumi mpaka myakha iminya piili na saapa (207) ni ahaayaraca asaana akina, asilopwana na asithiyana.
22Siruke upiihera wawe myakha talathini (30) ceyarelo, ahonnyara Nahori. 23Siruke nannyarene Nahori, ahokhala nkumi mpaka myakha iminya piili (200) ceyarelo ni ahaayaraca asaana akina, asilopwana na asithiyana.
24Nahori upiihera wawe myakha sirini na khentta (29) ceyarelo, ahonnyara Tera. 25Unnyara wawe Tera, Nahori ahokhala nkumi mpaka myakha iminya imoca nuwa khumi na khentta (119) ceyarelo ni ahaayaraca asaana akina, asilopwana na asithiyana.
26Tera upiihera wawe myakha sapini (70) ceyarelo, ahonnyara Aparamu, Nahori ni Harani.
Mayaranacelo o nrukulu na Tera
27Ala phi mayaranacelo o nloko na Tera: Tera ahonnyara Aparamu, Nahori ni Harani, ni Harani ahonnyara Loti. 28Harani aakhwenle wUri yo'Kasiti wayareenlyawe, ukati waryaya athumwane akumi.
29Aparamu ni Nahori yahothelaca. Ncina na amwaarawe Aparamu naari Sarayi, ni ncina na amwaarawe Nahori naari Milka. Ula aari mwana a Harani, athumwane Milka ni Isikaa. 30Vano Sarayi aari mwali eekupa, khaarina asaana.
31Tera ahonkusa Aparamu mwanawe, wamoca ni Loti mwanculawe, mwana a Harani, ni Sarayi mwaara a mwanawe ni othene yahorwaa ikwaha yookhuma wUri yo'Kasiti arwaaka uKanaa. Nanso uphiyaca waya yahokhalaca wonwo. 32Tera ahokhala nkumi mpaka myakha iminya piili na thanu (205) ceyarelo ni ahokhwela uHarani.
© 2021, Wycliffe Bible Translators, Inc. All rights reserved.