Mat 9
9
Jesus chuk wel nɛ ɛybee əbghun ɛlee nè kuonmen
(Mak 2.1-12; Luk 5.17-26)
1Jesus nɛy lii se kenək è se kase diaŋe se wen ə ntɛk. 2Ka əb diaŋen ɛ leghɛ, ɛ́ gwiy nɛ̀ wel se wen nɛ əb nyiŋ ɛ wen ə əbkun, nɛ ɛybee əbghun nə wen ɛylee kuomen. Jesus yɛn jii yɛ ghene foon ɛytem se Feyine ɛ ten, è suuy se wel əbkɛblen vi ge: Wan ə wom, ghal ɛyteme! Mɛ lɛysemen mbee ə shiɛ.
3Ghɛ́ ɛydinte tesak ɛlee yio, è me se vəke se ghene ngeŋse ge: Wel vine tɛyle Feyin.
4Jesus ko me keele kenəə kɛ ghene kwaaten, è bif se ghene ge: Ghɛn ki tekwaate tebee ɛ ghɛne tetem bek ghɛ? 5Kɛ Ke bonen se suuy lu kine? Ɛ́ lɛysemen mbee ə shiɛ moo, se suuy ge: Loole è yɛ jɛl-a? 6Dî nɛ mɛ din se ghɛn ge, Wanwel ki əbtaawe ɛ ketuu ntiɛ se lɛyse mbeese. Əb suuy dì, è me suuy se wel əbkɛblen vi ge: Loole è liɛ əbkun ə viɛ, è yɛ kfəəy.
7Wel vi me loole è se kfəəye. 8Ghele yɛn kenəə ten, è se fane, kokse Feyin bek əbtaawe ka vine wɛ əb foon se ghele.
Jesus jaŋ Matio
(Mak 2.13-17; Luk 5.27-32)
9Jesus nɛy lòò se fô è loo ndu, è yɛn wel ɛyfii shile ka əb diom ɛ wene kelik ɛyfɛl, nɛ ɛ́ toŋte ge Matio, è suuy se wen ge: Gwiy ɛ́ loo. Əb me loole, è se jumte ɛybam ə Jesus.
10Jesus nɛy se yiɛ ɛ Matio ə ndaa. Ghel ɛyfii shile ghene ghele mbeese se ɛydio gwiy è diom ghene ghe Jesus nɛ̀ ghon-ɛyfɛl nə wene se yiɛ. 11Ghele kenone Falisee yɛn è bif se ghon-ɛyfɛle ge: Lu bek ghɛ wɛ ndinte ə yɛne yiɛn ghene ghɛ́ ɛyfii shile gese nɛ̀ ghele mbee?
12Jesus yio ka ghene bifen dî è fise se ghene ge: Ghel ghɛ ɛ́ luun əbghun əbtaa shii wiy wel əbchuken. Shii kɛn ghel ɛyafkene wel əbchuken. 13Ghɛn ndu è yiɛke è keele kelike ŋwaale-Feyin kɛ ke suuyen ge: “Mɛ koŋe ge wel yɛ chame wel əblee, chia nyam sɛ yɛ taŋle mɛ so.” Mɛ báà gwiy se tiyse ghel ɛjuŋe, mɛ gwiy se tiyse nɛ lu ghel ɛbee.
Ɛybif kum ɛybam əbfua-əbyíɛ́ne
(Mak 2.18-22; Luk 5.33-39)
14Ghon-ɛyfɛl nə Joon Nfoo Moo gwiy se Jesus è bif se wen ge: Lu bek ghɛ wɛ ghɛse ghele kenone Falisee lóó ɛ́ yɛ bam əbfua-əbyíɛ́ne, dî nɛ ghon-ɛyfɛl nə wɛ̀ bame wiy se nkan?
15Jesus fise ge: Lɛ lòó ghele ndu əbjen è yɛ toŋnen toŋnen nɛ lum əbvii lu ghene ghene-a? Dî nɛ əbliye gwiye wɛ ɛ́ nɛ̂y fii lum ə əbvii se ghene é ghene me yɛ bam əbfua-əbyíɛ́ne.
16Lòó wel jia bal ndəy seməə nɛ̀ kensase ndəy sefɛɛ bek ge kensase ndəy sefɛɛ nɛɛy é ndəy seməə shii bef kɛn befen. 17Ghɛɛ ghɛɛ ka lòó ɛ́ jia kuune əmnduk əmbol ɛ kefaa əmnduk keməə, bek ge ɛ́ nɛɛy dì é kefaa tene bvəs, é əmndukme ten səyte, é kefaa əmnduk nɛ̂ kii bef. Ɛ́ lu se vii əmnduk əmfɛɛ nɛ lu ɛ kefaa əmnduk kefɛɛ, ka əmndukme ghene kefaa əmnduke jia bef.
Jesus chuk wán wel əbghaken ghene əbvii əbyafen
(Mak 5.21-43; Luk 8.40-56)
18Se lu nɛ Jesus bo suŋnen se ghene, wel əbghaken əblee gwiy è təm ɛləy ɛ Jesus ɛyshiɛ è suuy ge: Wan ə wom əbvii kuo kɛn ɛ leenen. Gwiye è lɛm keghoo ə kiɛ ɛ wen əbghun é əb loole se ɛykuo.
19Jesus me loole, ghene wel vi se nduu. Ghon-ɛyfɛl nə Jesus se nduu ɛ wen ɛybam.
20Ghene lóó ndu, əbvii əblee nyiake gwiy ɛ Jesus ɛybam è kum ɛyghaŋ ə ndəyse nə wen. Nè shi nguk njio-sebaa ɛyvəm ka əbvii vin nè yɛ́nen əbliy, əb yɛ gwiy naa se ŋaŋ, bo tenen wiy. 21Əb nè kume dì nɛ əb suuy se ngeŋ ə wen ge: Mɛ chèmè kum kɛn ɛyghaŋ ə ndəyse nə Jesus é mɛ kô bonen.
22Jesus benle è yɛn wen, è suuy ge: Wan ə wom, ghal ɛyteme. Ɛytem yɛ wɛ foon se Feyine nɛɛymen wɛ̀ bónen. Əbvii vi me bonen kɛn se əbliy.
23Jesus ghene wel əbghaken vi ndu è chin ɛ wen ə ndaa è yɛn ngose wel ka ɛy toŋen ɛykuo. Ɛlee nè toŋe ndoŋse, nɛ ɛlee toŋnene. 24Jesus suuy se ghene ge: Ghɛn fəy, wel əbjim! Wan vine báà kuo. Əb buune buunen.
Ghene sɛ̂y me se buu wen buun. 25Ghel ghii ɛjim fəy se bɛy, ɛ leghɛ Jesus lii è ghal əbkoy ə wan vi, əb loole. 26Sakghɛ wɛ kum kenəə kin me saanken ɛ ɛybee ketum fo naa ɛyjim.
Jesus chuk əbnfef əbbua
27Jesus nɛy lòò se fô è loo ndu, əbnfef əblee əbbua me se nduu ɛ wen ɛybam jaŋe ketaan ge: Wan əbfon wɛ David, koosen ɛysen se ghɛs.
28Jesus ndu è lii se ndaa, əbnfef vii lii è baksen wen, əb bif se ghene ge: Ghɛn lɛ lu nɛ ɛ́ bééme ge lòó mɛ nɛɛy kenəə kin se ghɛn-a? Ghene fise ge: Ɛɛne Báàba!
29Jesus me kum ɛshiɛ ə ghen è suuy ge: Ke gan yi kɛn ka ghɛn foon ɛytem se mɛ! 30Ghene me kase se yɛne əblik. Jesus chiise se ghene ge: Ghɛn yɛ ke se fiɛl se wel!
31Ghene lòò, è ndu, è sɛ́y saŋse saŋsen sakghɛ wɛ kum wen ɛ ɛybee ketum fo ɛyjim.
Jesus chuk kechichi
32Ghene loo lòò ɛ leghɛ, ghele gwiy nɛ̀ kechichi se Jesus nɛ nɛɛy ɛyfim ge ghàà əb yɛ suŋnen. 33Jesus jum ɛyfim se əbghun gho ɛ leghɛ, kechichi ki me se suŋnene. Ngose wel se lu nɛ̀ əbchíò əbyúméné, suuye ge: Ɛynkii kenəə ghan nè bɛɛy ghàà yi gan ɛ Islael.
34Ghele kenone Falisee se suuy nɛ lu ge: Fo əbfon ɛyfim əbtaawe se wen ge əb yɛ jum ɛyfim so.
Jesus koosen ɛysen se ghele
35Jesus me lòò è se ghane ntɛk se ghakene ghene se tɛle dinte əbnəə se ghele ɛ ghene ngayse ɛyjem, fekte sakghɛ əbjuŋ kum ɛysak ə Feyin, gese chuke tenkii teyaf tejim tɛ ghele nè kiin nɛ̀ ɛynkii əbnəə wɛ əb foon ngɛk se əbghune. 36Əb nè yɛne ngose wel, ketuu lum wen bek ge ɛ́ nè nəkse ghene, nɛ ngiamten wiy, nɛ ghene me lu ka bvəyse njiɛ sɛ ghàà nchiy. 37Əb me suuy se ghon-ɛyfɛl nə wene ge: Ɛsaŋe biymen se ɛydio, ghel ɛdənene se laaye. 38Ghɛn lon se Bay wɛ ba ɛylem ge əb tinse ghel ɛydən ɛsaŋ nə wen.
©CABTAL, 2012