Yọọn 9
9
Yisọs akọk awo keed a-akemanake nnan
1Nte anye akesʌkkọ asaña aka, anye amaakịt awo keed a-akedọñọke nnan tọọñọ ke emana. 2Mme mbed amọ emaebịp anye ete, “Andikpeeb, anie ikinam idiọọkñkpọ, awo ami me ete ye eka amọ, nọ anye adimana nnan?”
3Yisọs amaabọọrọ ate, “Idooho anye, inyʌññọ ido ete mme eka amọ ekenam idiọọkñkpọ; anye akemana nnan nọ ato do utom Abasi ayaara ke idem amọ. 4Adaña nte usen akaaha iso, ana ñnyịn inam utom andikindọñ miin. Akoneyo asʌk adi, a-awo ndomokeed mmiidiikanna inam utom. 5Ke adaña ini ami mbaaha ke ederimbod, ami ndo unwana ederimbod.”
6Ke anye amaaketañ ami ima, anye amaafiad etap ke isọñ, aben awaak mme ntan ado akappa mbad, aben mbad ado afiọññọ awo nnan ado ke anyen. 7Ndin anye abo anye, “Kaa ke yie idem ke Ñkpọdiọhọmmọọñ Sidọam” (anyịñ ado awuọ, “Edọdọñ”). Anye amaadakka aka akeyie, anyʌñ akịt usʌñ atịmme anyọñ ufọk amọ.
8Mme mbọhọidʌñ amọ mme mbon mfen e-ekekịtte anye nte abeeñe-ebeeñe emaebo ete, “Idooho awo a-akesitieeghe abeeñe-ebeeñe ado ami?” 9Ubaak ammọ ete, “Ih, kpa anye ke ado.”
Mbon mfen ete, “Iyo-o, anyʌñ abebit anye.”
Ado awo ado ke idem amọ amaasọọñọ ate, “Ih, ami ke ado.”
10Ammọ ebo anye ete, “Anyen mfo akenam die atara ndin?”
11Anye abọọrọ ate, “Ete a-akereke Yisọs do akenam mbad, adọppọ anyeed ke anyen. Anye amaambo yak ñka ñkeyie idem ke Sidọam. Ndin ami mmaaka, mmaakeyie mma, anyen amantara, ami mmọọnọ usʌñ.”
12Ammọ ebịp anye, “Anye awo ado-o?”
Anye abọọrọ, “Ndiọọñọke.”
Mme Farisi eduuñọ ukọk udọñọ ado
13Ammọ emaeben ete a-akedọñọke nnan do ebịne mme Farisi. 14Akedo ke usen Sabad ke Yisọs akenam mbad ado atat nnan ado anyen. 15Ke ntodo mme Farisi emaebịp anye naña anye akenam akịt usʌñ. Anye ate, “Anye akedọppọ mbad añyeed ke anyen, akema ami ñkeyie nsio, idahami mmekịt usʌñ.”
16Ubaak mme Farisi ete, “Awo ami itooho Abasi, sia anye inịmme ibed Sabad.”
Ado mbon mfen emaebo, “Die ke anam idiọọkñkpọ akeme adinañña mme utọ idiọọñọ ami?” Ndin ubakka amaaba ke ufọọd ammọ.
17Ammọ ndin emaana ese awo nnan ado ete, “Nso-o ke afo ke idem mfo anie aditañ mbaña anye? Anyen mfo ke anye aketat.”
Awo ado amaabọọrọ ate, “Anye ado brọfed.”
18Kpa ye ado, mme Yuu ikinịmme ibo ke awo ado akedo nnan tutu ekedọñ ekekood ete ye eka amọ. 19Ndin ebịp ammọ, “Nte awo ami ado ata ayịn ndufo ebooho ke akemana nnan? Anye anam die akịd usʌñ idahami?”
20Ete ye eka amọ emaebọọrọ, “Ñnyịn imidiọọñọ ke anye ado ayịn ñnyịn, iminyʌñ idiọọñọ ke anye akemana nnan. 21Ado naña anye anam akịd usʌñ, me awo a-aketatta anye anyen, ñnyịn idiọọñọke. Ibịp anye. Anye akpon akem: anye ayaatañ ikọ idem amọ.” 22Ete ye eka amọ eketañ ntom sia ammọ emaebaak ikpọawo mme Yuu, e-emaekebiire adibịn awo ndomokeed a-abooho ke Yisọs ado Mesaya nsio ke itie sinakọk. 23Ntak ado akenam ete ye eka amọ ebo, “Anye akpon akem; Ibịp anye.”
24Anam mme Yuu emaemaana edọñ ekekood ete a-akedooho nnan enyʌñ ebo anye ete, “Nọ Abasi itooro ke aditañ akpanikọ. Ñnyịn imidiọọñọ ibo ke awo ami ado anam idiọọkñkpọ.”
25Awo ado amaabọọrọ ate, “Me anye ado anam idiọọkñkpọ, miidooho, ami ndiọọñọke. Ukweeñe se ami ndiọọñọ ado ke ñkedo nnan ado idahami mmekịt usʌñ.”
26Ammọ emaana ebịp anye ete, “Nso-o ke anye akunam fiin? Anye akenam die utat fiin anyen?”
27Anye abọọrọ, “Ami mmidọdọkkọ ndufo, ado ndufo ikikpañña utọñ. Ntaha a-ndufo eyemme adikop akañ mfen-e? Ndufo ke idem ndufo eyem idikappa ido mme mbed amọ ñko?”
28Ammọ ndin emaesueeñ anye, ete “Afo ado mbed amọ, ñnyịn ido mme mbed Moses! 29Ñnyịn imidiọọñọ ke Abasi amaatañ ikọ anọ Moses, ado amaado awo ami, ñnyịn idiọọñọke kpak nte anye ato.”
30Awo ado abọọrọ ate, “Ata ñkpọ ñkpaidem adodo! Ndufo idiọọñọke nte anye ato, ado anye antat miin anyen! 31Ñnyịn imidiọọñọ ke Abasi isikpañña utọñ inọ mme anam idiọọkñkpọ. Abasi akpañ utọñ anọ mbon etʌmmọ ekpono anye enyʌñ enam uduak amọ. 32Tọọñọ ederimbod aketọọñọ awo ikoppo nte ebo ke awo atat awo a-akemanake nnan anyen. 33Akpedo awo ami ikitooho Abasi, anye ikpikanna inam ñkpọ ndomokeed.”
34Ammọ ekekop ami, emaebo anye ete, “Afo ayem adikpeeb ñnyịn, afo a-adooho a-anyeenyịne ke idiọọkñkpọ tọọñọ ke emana!” Ndin ammọ emaebịne anye esio.
Nnan ke sịbidịd
35Yisọs amaakop ke ammọ emaebịne anye esio, ndin ke ini anye amaakedikịt anye, Yisọs abo anye ate, “Afo amenịm Ayịn Awo ke akpanikọ?”
36Awo ado abịp, “Ete, ndọkkọ mme anye ado anie awo, ma nnịm anye ke akpanikọ.”
37Yisọs ate, “Afo amekịt anye idahami; ke akpanikọ, anye ado anditañ ikọ ye afo.”
38Awo ado ate, “Abọọñ, mmenịm,” anyʌñ akpono anye.
39Yisọs ate: “Ado ke ntak ukpe ikpe ke ami ndi ederimbod ami, nọ atoodo mbon e-mmiikịtte ñkpọ ekịt ñkpọ, mbon e-ekịtte ñkpọ eforo nnan.”
40Ke adikop ñkpọ ami, ubaak mme Farisi e-ekebaaha do ebo anye, “Kọm abo die! Awuọ ñnyịn ñko idoñño nnan?”
41Yisọs abo amọ: “Akpedo ekedo nnan, ikpe ikpitịppe ndufo; ado sia ndufo ebooho ke ndufo, ‘emekịt ñkpọ,’ ikpe itịp ndufo.”
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.