Yọọn 2
2
Yisọs anam mmọọñ akappa ukọd
1Ke usen ita amaakefrọ eka Yisọs amaakaa usọrọ ndọ ke idʌñ Kena ke Kadidi. 2Emaenyʌñ ekood Yisọs ye mme mbed amọ. 3Ukọd se mme anam usọrọ ndọ ekenie enọ usọrọ ami amaakwueeñe, ndin eka Yisọs akebo anye, “Ammọ inieeghe ukọd aba.”
4Yisọs amaabọọrọ anye, “Mma, nso-o ido ndubehe mmi? Ini mmi ikemme diin.”
5Ado eka amọ amaabo mme nditọufọk ndọ ate, “Inam se anye abobo ndufo enam.”
6Abañ mmọọñ itiokeed emaediọghọ do, e-ekenịmme enọ adinam mme awo enam idem asana ke ido mme Yuu; abañ keed amaakeme idọñọ ñkpọ nte kadọn edịp awuọ edịp mme duop.
7Yisọs amaabo mme nditọufọk ndọ ate, “Edọñ mmọọñ ke mme abañ ami.” Ndin ammọ emaedọñ mmọọñ ke mme abañ ado eyọọhọ.
8Akem Yisọs abo ammọ, “Ikoi ubaak iben isọk ekamba akama usọrọ.”
Ammọ emaenam ntodo; 9ndin ekamba akama usọrọ amaatʌm mmọọñ a-amaakekappa ukọd. Anye ikidiọọñọke nte ato me edat mọọ, sʌk mme nditọufọk ekediọọñọ. Ekamba akama usọrọ ami amaatappa ebendọ awuọ, 10anyʌñ abo anye ate, “Afịd awo esieto edeeme ata inem ukọd ndin edideeme adiọọkinua ke mme isenawo emaekenwọnwọñ inem ado yak ayʌkkọ; ado afo atịmme anịm ata inem ukọd tutu idahami.”
11Utịbe ñkpọ a-Yisọs akenamma mi ke Kena ke Kadidi akedo akpa ke atu mme idiọọñọ a-anye akedatta ayaara ubọọñ amọ, ndin mme mbed amọ enyʌñ enie mbuọdidem ke anye.
12Usọrọ ndọ ami akekweeñe, anye amaakpọñ aka Kapanọm ye eka, nditọeka ideen ye mbed amọ. Ammọ ekeba do ke ibad-ibad usen.
Yisọs abịn mme awo asio ke tembịd
13Ke ini usọrọ Basofa mme Yuu amaakedikpere, Yisọs amaaka Yerusedem. 14Anye amaakịt naña nte mme awo enyaam enañ, edọñ ye ibiom, mbon ukpʌghọ akʌk enyʌñ etie do ke mme afe tembịd. 15Yisọs amaadat udʌk anam ikpa, abịne mme awo asiooño ke afe tembịd, abịne mme edọñ ye mme enañ ñko, asuan akʌk mme akpəho akʌk ke isọn, anyui mme akpokoro ammọ atọọñ. 16Anye amaabo mme anyam ibiom ate, “Itañ afịd mme ñkpọ ami isiooño mi! Itre adiben ufọk Ete mmi nnịm itie udua!” 17Ndin mme mbed amọ emaetoiyo brọfesi ami ke ñwed Abasi. “Akpọsọñ ima ufọk mfo iyakka mbọ emem.”
18Ndin mme Yuu emaebịp anye, “Nso-o idiọọñọ ke afo akpekan adiwọt ñnyịn edisọọñọ ke Afo amenie adudu adinam mme ñkpọ ami?”
19Yisọs amaabọọrọ ate, “Iwuud tembịd ami, ndin ami ñyaamaana mbọp anye ke usen ita.”
20Mme Yuu emaebọọrọ “Ekedat isua aba mme itiokeed adibọp tembịd ami, ndin afo ayaabọp anye ke usen ita?” 21Ado tembịd a-anye aketañña abaña akedo ikpọkidem amọ. 22Yisọs amaakeset ke ñkpa, mme mbed amọ emaetoiyo se anye aketañ ami. Ndin ammọ emaenịm ikọ Abasi ye se Yisọs aketañ ke akpanikọ.
23Ke ini anye akebaaha ke Yerusedem ke ntak Usọrọ Basofa, uwak awo emaenịm anye ke akpanikọ ke ini ammọ ekekịtte mme utịbe idiọọñọ se anye akenam. 24Ado Yisọs ikiyakka idem amọ inọ ammọ, sia anye amaadiọọñọ uduod afịd awo. 25Anye ikiyemme ntiense ito awo ndomokeed, sia anye amaadiọọñọ akikere esịd awo keed-e-keed.
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.