Markusna Enjil 1
1
Bag. 1
1Yesu komisbul artina todna enjilna koyal teran.
2Ishaya nebir bajbun nawite: „Ahan ai enna koin owollo aïshindin anna malaikagi. Ter enna darubki enn owollo biallen. 3Hisi wer aüwen halar: ‚Artina darubki allewe. Ter anoginn agarki sewagirwe.“ 4Ikke Hana halar bine teddo akidirgongessu, wide ahediyeirgongessu: „Tubew an zenbichina gafradna joro.“
5Yahudiyen eshei male wide Urushalimna zol male tekk abidi abodsan. Wide akidirtakkisan tekked essi Urdunir, tinna zenbichigi giros.
6Hana unduredasum kamlin sirna kade wekki. Tenna kululdogorgon ajin wekki amajedasum. Magagon akalsum wide halana aselgon.
7Tenna hedayar awesum: „Ann aharro bitan wer, andogor kogor wer. Ai annewertir werminim suriye tenna taragana digrichigi kusarki. Ai irgi essiged kidirirsim. 8Ama ter irgi newerti gadisebulged bikidiririn.“
9Man ugrosir teran Yesu tasum Nasira Jelildirton. Wide Hanaged kidirtakkisan Urdunin tur. 10Mani wattigi essirton kujbungon uru nalsum simechi kustakkisangi, wide newerti mine nawite tendogor shugurbungi. 11Wide hisi wer simerton wesum: „Er anna tod dolida teran. Tekked ai guresim.“
12Wide newerti mani wattigi tekki halagir ossum. 13Wide mando ugros erbeingi kewidbungon shetan tekki jeribesum. Wide urtichina barer engon malaikari tekki ahadmesan.
14Hana artakkossinn aharro Yesu Jelilgir tasum. Wide teddo enjil artindigi ahutbesum: „Wattichi kemilossan. 15Artina mulki awtanossum. Tubewe wide bisharaged amnewe.“
16Jeliln essin garked talebungon ter nalsum Simangi wide timbes Andrawuski, tinna tilichigi aluferangon essin tur. Mine tiri karegi aarilirton esan. 17Yesu wetidirsum: „Aigi tebaewe. Wide ai irgi karen agarro zoligi barwandin.“ 18Tenna wattir tinna tilichigi mugos tekki tebaesan.
19Mandoton gelil wekki nogarsingodon uru nalsum Yagub Zabadina todton wide Hana timbeskongi, kubtur tinna tilichigi arejierangon. 20Ta tebsingodon uweirsum. Wide ingu tinna timbab Zabadigi kubtur marakbichigodon mugos tekki tebaesan.
21Taleburangon Kafrinahumir tosan. Wide samten tur jamar toros akurkidirsum. 22Ajibesan tenna kurkidarroton. Mine gudrakol wer nawite akurkidisum, wala abajili nawremnum.
23Wide tinna jamargon ogij newerti nijiskol wer dasum. 24Biybiyagi kados wesum: „Ah, argon ekkonna barer min dan, Yesu Nasirandi? Er tama argi dabrirri an? Ar iyirburun er ni ter engi: Artina gadisebul teran.“ 25Yesu mani wattigi jezmetirsum: „Enn agilgi kobos. Ter idirtongon bolos.“ 26Newerti nijis maaski tekkodon ared wide hisi dul wekked uwos teddeton bolossum. 27Male hayirtakkos ittiwrigi isig wide wesan: „In mine? Wide in kurkidar ēr minde? Mine gudraged akurkidin. Newertichi nijisigon tekki agijirtirran.“ Tenna habar gowan belligi nejachi Jelilna 28kello dareli malegi eyegrosirsum.
29Jamarton belsangodon Simangon Andrawuskonna kar jurgi tosum, Yagub wide Hana tekkodon darangon. 30Simanna tinogo huma wekked busum. Yesugi nalsangodon wetirsan ter odingi. 31Ter tale torgi irton morogred agsossum. Huma tekki gowan talgossum. Wide tirgi hadmadir tosum.
32Gu shareyaningad masilgon torosingad tekki attatirsan odili malegon wide doshigongi. 33Medinena zoli malegon babnai kuri jamebusan. 34Digrichi werigi odilirton gengirirsum odar digrirton. Widegon shetani digrichi werigi osirsum. Wala shetanigi mugirkomnum bainw an. Mine tekki iyirbusanged.
35Fejir bedrir imbolossinn aharro agar hala wekkir jurgi asalisum. 36Simangon tekkodon daligon tekki kash tebaedasan. 37Tekki eledirgi wetirsan: „Jema male ekki abirgin.“ 38Tirgi wetidirsum: „Talewe nejachi awtindichir. Teddogon bibeshirerin. Mine inin joro teran beltasim.“
39Ter jurgi tinna jamachir abeshiresum Jelil maler. Widegon shetanigi aturirsum.
40Barasked odil wer tennai targi kurtichin dogor ungos tekki wetirsum: „Er on birigkin, eskergi aigi bigengirin.“ 41Yesu tendogor shefege tenna igi owolgir tekki kumos wetirsum: „Abirigrin. Genan.“ 42Tenna baras tenna saayen teddeton dabsum. Ter ogijkon genanossum. 43Yesu tekki hede tenna watten ishinos wide wetirsum: 44„Ennewertigi harse, zolgi wetirmen. Ama jurgi fegirki ennewertigi amintiru. Wide enna genkanen joro Muse amresinna gojirki goj, tinna shahadana joro.“ 45Ama ter belsingodon uwarki ugudisum desen digrigir. Wide habarked agar malegi eyegrosingad Yesu owittiged eske medine werro bayingir tokomnum. Agari halachir kewidbusum. Teddogon atatirsan agar malerton.
Published by the British and Foreign Bible Society in 1912.