Lu̱ka̱ 24
24
Ngazi ci Ye̱su̱ daiza
(Ma̱te̱yo̱ 28:1-10; Marko 16:1-8; Jon 20:1-10)
1Imma i̱i̱te̱ne̱ wa een Dominika,#24:1 I̱i̱te̱n wa een Dominika: Eci ngati olli Ya̱u̱do̱ akane i̱i̱nya̱ cik biranocak ngatinne̱ng i̱i̱te̱ne̱ ci een oo kar kuṯurei i̱i̱te̱ne̱ ci een turgerem biranoca, nonno ci een I̱i̱te̱n wa Yu̱bze̱nto̱. Kovvo naga Tenneti kikeb i̱i̱nya̱ cigga̱c biranocak do̱ ngati olli Ya̱u̱do̱. Kazi naga ne I̱i̱te̱n wa Yu̱bze̱nto̱ ci een i̱i̱te̱n ci een torkonom kar i̱i̱te̱n ci annu I̱i̱te̱n wa Yu̱bze̱nto̱ ko̱ kawu naga kize i̱i̱te̱n turgerem. Kawu naga bo̱do̱k i̱i̱te̱n cinne̱ng oowu ko̱ kize Dominika icima I̱i̱te̱n ci Lawinto ming ka̱a̱da̱ naga i̱i̱te̱n bali ingane Ye̱su̱ daiza. ingani ri̱ri̱wo̱na̱, idimtta ngaai maal bali ongooli adiman nege ke̱ kar ko̱o̱tte̱ iloma. 2Urubta bee bali a̱bu̱nge̱ ol ilomi utug ke̱ aryai, 3ma̱i̱je̱ baling ovvo nege i̱i̱zo̱ ilomi ecito, iróng ngen amuda ele ci Manyi Ye̱su̱. 4Baling a̱ma̱li̱ltte̱ o̱o̱tti̱ cigge̱k zo̱ze̱ necu, i̱vi̱ta̱ zin ol cik e̱e̱ggi̱n rama aim ru̱u̱ma̱ni̱ cik voorik per ibilet abanyce cinne̱ng. 5Kar ngati o̱ngo̱o̱li̱nne̱ ngaai ne̱ke̱ u̱lu̱le̱t nege o̱o̱tti̱ icinnet lo̱o̱c, ma̱i̱je̱ ol ne̱k e̱e̱ggi̱n rama ko̱ izettek nogo ne, “Nya ming orongnyu e̱e̱t ci aruge orgene ci ol cik a̱da̱i̱to̱ ko̱? 6Iróng enne aave ngatu; itinga enne daiza! A̱a̱dda̱ zoz bali a̱du̱wa̱kku̱ng enne i̱ge̱t ke̱, baling ngen aavtiyyu ki nonno Ga̱li̱li̱kte̱ ke̱, azi ne, 7‘Anyonik atin Ngerrti E̱e̱to̱ azzin cik olli mu̱nye̱nu̱, kar kotodowe ta̱la̱ke̱ca̱, kar i̱i̱nya̱we̱ cik een i̱i̱yo̱ ingazi atin enne bo̱do̱k daiza.’” 8A̱a̱dda̱ zin ngaai ne̱ke̱ zoz cinne.
9Baling o̱bo̱dda̱ nege iloma, kar ku̱du̱kta̱k zoz do̱o̱k to̱ni̱a̱k omoto ki co̱de̱ ki bo̱do̱k ol u̱gge̱. 10Imma ngaane ne̱k a̱du̱wa̱k to̱ni̱a̱k zoz ko̱ ciko, Ma̱ri̱ya̱ Madalina, ki Joanna, ki Ma̱ri̱ya̱ wa een e̱e̱ti̱ Je̱mi̱si̱, ki ngaai u̱gge̱ cik aavtte ki nogo. 11Ma̱i̱je̱ nege iróng elemi zoz ci ngaai ne̱ke̱, eci zoz cinne̱ng ogon ki ci ozoz nege darace. 12Itinga zin abarik Peturu je̱e̱na̱ i̱vi̱r uk rok ilomi. U̱lu̱le̱ kar kicin ilomi ecito acin ru̱u̱ma̱ni̱ do̱ cik aavtte nginati, kar enne kuk, a̱ma̱li̱le̱ oo cinne gi̱i̱ye̱ ci ogone ko̱.
Go̱o̱le̱ ci Emmausi
(Marko 16:12-13)
13I̱yo̱ko̱, okko i̱i̱te̱ne̱ neci ele, itingazzo ol cik een rama ngatinne̱ng ovvo o̱rge̱ ci een zara Emmaus, okkoye mailnya#24:13 Mailnya: Owo e̱e̱ti̱ saa co̱de̱ mailnya i̱i̱yo̱. Odolta olli Ya̱u̱di̱ anyik e̱e̱t koto mail cidici I̱i̱te̱ne̱ wa Yu̱bze̱nto̱. turgerem ming a̱kku̱ e̱e̱ti̱ Jerusalema. 14Ozozit nege goola zoz ci obod ki kaal balik ogone Jerusalema ke̱. 15Baling ngen nege ozoz niko, i̱ki̱ya̱ Ye̱su̱ eliya kar korkorrit ki nogo; 16ma̱i̱je̱ nege iróng a̱gga̱ nonno.
17I̱jji̱n zin enne nogo, “Nya ci ozozu niga ngati owoyyu goola ko̱?”
Ibilet nege li̱i̱m, ngati angurunyane ngu̱mti̱. 18I̱jji̱nno̱ zin e̱e̱ti̱ co̱de̱ ngatinne̱ng ci een zara Kiliyopaz, “E̱e̱ni̱ i̱nna̱ e̱re̱nno̱i̱t Jerusalema ngatu ci iróng a̱gga̱ kaal cik ogone i̱i̱nya̱we̱ ciko?”
19I̱jji̱n zin Ye̱su̱ nogo iizek ne, “Kaal jang?”
O̱bo̱dde̱k zin nege, “Kaal cik obod ki Ye̱su̱ wa Nazereti, een bali enne a̱ri̱to̱i̱t ci zoz ci Ta̱mu̱ta̱dde̱no̱, anyak komiz ci a̱ppwe̱ oroot zoza ki kaale wak u̱tu̱gu̱ enne ngati Ta̱mu̱ta̱dde̱no̱ ki olle do̱o̱k. 20A̱gga̱mi̱t zin alaata cik olli wawaco ko̱ nonno kar kaanycik kuk ku̱ru̱we̱ ka̱da̱k, kar kotodoyyek nonno keet ci een ta̱la̱ke̱c; 21ma̱i̱je̱ naga la̱du̱n karikka zi̱nze̱tti̱ nonno ele ci okko a̱ti̱ri̱z olli Israilo. Kar nya ci a̱ppwe̱ atin wo̱ye̱ a̱kku̱, ize gwo̱o̱nya̱ i̱i̱yo̱ baling u̱tu̱gu̱we̱ zoz necu. 22Kar bo̱do̱k ngaai uggak ngatinna̱ng aanyyet ku̱ku̱lte̱ya̱ je̱e̱n. Oot zin iloma nge̱rre̱ti̱n cu ele 23ma̱i̱je̱ ngatu ngen kurubta ele cinne. I̱vi̱ta̱ nege kar ku̱du̱kta̱i̱ta̱ azi ne kicinnta ri̱ri̱to̱n ci anjilonyau wak azi ne aruge enne. 24Oot zin ol uggak ngatinna̱ng rok ilomi, oot u̱mu̱dda̱ ming ogon zoz ki wanai ming a̱du̱wa̱kke̱t ngaai ke̱, ma̱i̱je̱ nonno ele ngen nege kicinnet.”
25Izek zin Ye̱su̱ nogo ne, “E̱e̱ggi̱nnu̱ niga tarbale de̱de̱, kar odoi i̱ge̱t zi̱nze̱tti̱ ngati a̱tu̱yyu̱ zo̱zzo̱k cik u̱du̱kta̱ a̱ri̱tto̱wa̱! 26Iróng een Ki̱ri̱sto̱ ci apirna zo̱ze̱ ci kaal ne̱ko̱ kar ki̱tto̱ di̱ngdi̱ngo̱n cinne?” 27Akane ngati Musesi ki a̱ri̱tto̱k do̱o̱k, oobek zin enne nogo zoz bali obod ki nonno u̱du̱ya̱i̱ e̱he̱rye̱ Waraganyai cik Ta̱mu̱ta̱dde̱no̱ ko̱ do̱o̱k.
28Baling ovvo nege ojongoz orog bali ovvoye nege ke̱, u̱tu̱gu̱ Ye̱su̱ ele ki e̱e̱ti̱ ci okko oowa. 29Ma̱i̱je̱ nege u̱du̱kta̱k nonno, “A̱vvu̱ ki agit ngatu, eci ize looci ba̱a̱li̱n.” Uk zin enne a̱vvu̱ ki nogo.
30Baling okko enne aave ki nogo ngati da̱i̱nto̱, idima enne umune, aanyik Ta̱mu̱ta̱dde̱n zany, engera kar kaanyik nogo. 31O̱o̱ye̱ zin ebere cigge̱k kar ka̱gga̱c nonno, kar enne ki̱zzi̱ niko dakdak orgene cinne̱ng. 32I̱jji̱nto̱ zin nege e̱le̱tti̱ne̱, “Atalne ba̱li̱ye̱ agit zi̱nze̱tti̱ baling ozoz enne ki agit goola kar koowet Waraganya cik zoz ci Ta̱mu̱ta̱dde̱no̱.”
33Itingazzo je̱e̱na̱ kar ki̱mi̱rte̱ koot Jerusalema lak co̱de̱. Urubta zin to̱ni̱a̱k wak e̱e̱ggi̱n omoto ki co̱de̱ ki ol wak aavtte ki nogo ko̱ ming arume nga̱to̱de̱ 34kar kizeto ne, “Een de̱de̱! Itinga Manyi daiza kar ki̱ye̱le̱k ele Si̱mo̱ne̱.” 35U̱du̱kta̱ zin ol ne̱k e̱e̱ggi̱n rama ko̱ zoz ci ogone goola, ki gool ci a̱gga̱we̱ nege Ye̱su̱ baling u̱bu̱nya̱n enne umune.
I̱ye̱le̱k Ye̱su̱ ele to̱ni̱a̱k
(Ma̱te̱yo̱ 28:16-20; Marko 16:14-18; Jon 20:19-23; Buk wa To̱ni̱a̱u̱ 1:6-8)
36Baling ngen nege ozoz zoz neci, ibil zin Ye̱su̱ enne eliya orgene cinne̱ng kar kizek nogo ne, “Kizzayung, abunnanu.”
37U̱ku̱lte̱k je̱e̱n kar ko̱to̱ngo̱o̱ltte̱ lo̱o̱c oroot, i̱no̱ni̱t azi ne kicinnta miningit. 38Izek enne nogo ne, “Nya ming o̱ngo̱o̱li̱nnu̱ lo̱o̱c ko̱, nya ming odoi i̱ge̱t zi̱nze̱tti̱ ko̱? 39Icinnet azzin cigannik ki zo̱o̱ cigannik. Annit ele icu. Umtang annit kar icinnet; iróng miningiti anyak ele ki emme, ki ming acinnu niga kanyai anna ko̱.”
40Baling u̱du̱wa̱ enne zoz necu, i̱ye̱le̱k zin enne nogo azzin ciginnek ki zo̱o̱. 41Baling ngen odoi nogo zi̱nze̱tti̱ zo̱ze̱ ci talninto ki ngo̱o̱li̱ne̱t, i̱jji̱n enne nogo, “Anyakku niga ngatu gi̱i̱ imma ci een da̱i̱ne̱t?” 42Aanycik zin nege nonno u̱lu̱gi̱t ci aahe, 43a̱gga̱ma̱ enne kar kadak, kicinnet nege do̱o̱k niko.
44Izek enne nogo ne, “Een necu zoz bali ku̱du̱wa̱u̱ng anna i̱ge̱ta̱ baling ngen kaavtte bu̱k ke̱: Akati atin kaala do̱o̱k mo̱o̱le̱t cik obod ki annit ki ming e̱he̱rye̱ lo̱ti̱nno̱we̱ cik Musesi, ki a̱ri̱tto̱k ki Caliwon.”
45Oo zin enne o̱o̱tti̱ cigge̱k kar ka̱gga̱c zo̱zzo̱k wak a̱du̱wa̱ Waraga ci Ta̱mu̱ta̱dde̱no̱. 46U̱du̱wa̱k enne nogo, “Icu zoz ci e̱he̱rye̱: Okko atin Ki̱ri̱sto̱ apirna kar kitinga daiza i̱i̱te̱ne̱ ci een i̱i̱yo̱, 47kar zoz ci uurtane ol mu̱nye̱n ki zoz ci alalneke Ta̱mu̱ta̱dde̱n nogo mu̱nye̱n kuwaktozik ol ciginnek lo̱o̱cco̱k do̱o̱k, akane Jerusalema. 48E̱e̱ggi̱nnu̱ niga bbacak cik kaal ne̱ko̱. 49Kokko atin anna ki̱tto̱na̱kku̱ng muci wa bali u̱du̱wa̱ Baba ke̱;#24:49 Muci wa bali u̱du̱wa̱ Baba ke̱: Een muci necu Vongiz ci A̱li̱le̱ bali u̱du̱wa̱ Baba. Ikeb buk ci To̱ni̱a̱u̱ 2:1-4. abarik a̱vvu̱t Jerusalema zee ka̱a̱nyu̱ng Ta̱mu̱ta̱dde̱n komiz ci a̱kku̱ ta̱dde̱na̱.”
Odongnye Ye̱su̱ okko ta̱mu̱-kenga
(Marko 16:19-20; Buk wa To̱ni̱a̱u̱ 1:9-11)
50Baling i̱nya̱ma̱n enne nogo kize ojon orogi ci een Bethany, odong azzin ciginnek kar ka̱mu̱yu̱k nogo. 51Baling ngen enne a̱mu̱yu̱k nogo niko, utungek nogo lo̱o̱c, odonge enne uk ta̱mu̱-kenga. 52I̱di̱ngdi̱nga̱nni̱t zin nege nonno kar kobodda Jerusalem talninte ci a̱ppwe̱ oroot. 53Kar zin nege ka̱vvu̱to̱ odohize Ce̱e̱ze̱ wa Ta̱mu̱ta̱dde̱no̱, innat Ta̱mu̱ta̱dde̱n.
© 2018, Wycliffe Bible Translators, Inc. All rights reserved.