Lu̱ka̱ 23
23
Anyakttak ol Ye̱su̱ Pilato
(Ma̱te̱yo̱ 27:1-2,11-14; Marko 15:1-5; Jon 18:28-38)
1Itingazzo zin zu̱we̱ do̱o̱k kar ko̱o̱tte̱ Ye̱su̱ rok Pilato ddi̱ki̱ryo̱i̱t ci gaala cik Romi. 2Kar ka̱ka̱tte̱ kovolongte nonno, kizeto ne, “Karubanna e̱e̱t cu ming orong ki̱li̱b lo̱o̱c cinna. Adang enne zoz ci a̱ru̱we̱k ol mucuru alaan ci a̱ddi̱ki̱re̱ Romi, kar kize ne ke̱e̱ni̱ enne Ki̱ri̱sto̱, alaan.”
3I̱jji̱n zin Pilato Ye̱su̱, “E̱e̱ni̱ i̱nna̱ alaan wa Ya̱u̱do̱?”
O̱bo̱de̱k Ye̱su̱ nonno, “I̱i̱ny, ogon ki i̱yo̱ko̱ ming a̱du̱wa̱ i̱nna̱ ko̱.”
4Izek zin Pilato alaat cik olli wawaco ki koole do̱o̱k ne, “I̱llo̱i̱ gi̱i̱ ci gerze karuba anna ci u̱tu̱gu̱ e̱e̱ti̱ cu.”
5Ma̱i̱je̱ nege adang nonno dee, “Nonno ci ovolongek ol do̱o̱k lo̱o̱ce̱ ci Ju̱de̱ya̱ de̱mzi̱nte̱ cinne. Akane enne Ga̱li̱li̱ya̱ kar ki̱ki̱ya̱ mer nginati rok ngintu.”
6Baling izik Pilato zoz necu, i̱jji̱nno̱ zin enne ming een e̱e̱ti̱ cu ci Ga̱li̱li̱. 7Baling a̱gga̱ Pilato ming aave Ye̱su̱ lo̱o̱ce̱ ci abal alaani He̱ro̱di̱, i̱tto̱na̱k zin nonno rok He̱ro̱d, aave enne bu̱k eliya Jerusalema i̱i̱ neci.
8Baling icin He̱ro̱di̱ Ye̱su̱, atal da̱ enne oroot, eci enne ba̱li̱ye̱ gon ere nonno u̱u̱mu̱c orong kicin. Zo̱ze̱ ci azikne enne zoz cinne, orong da̱ gon enne nonno kar ku̱tu̱gu̱ kaal u̱gge̱ cik a̱vu̱la̱. 9U̱cu̱b zin He̱ro̱di̱ nonno ji̱ne̱nta̱ oroot, ma̱i̱je̱ Ye̱su̱ iróng abarizek nonno. 10Abile da̱ alaata cik olli wawaco ki de̱me̱zzo̱k cik lo̱ti̱nno̱u̱ nginati, o̱mo̱zze̱ nege kar kovolongte nonno. 11Kar He̱ro̱di̱ ki aciir ciginnek kadacit Ye̱su̱ kar katararte nonno. Uburuccek zin nonno ru̱u̱m ci alaano ataltali, kar ki̱tto̱nni̱t nonno ki̱mi̱re̱ kuk ngati Pilato. 12Imma wazin neci izeto Pilato ki He̱ro̱d gonen, imma ba̱li̱ye̱ amarno nege gerzet.
Apahozik Ye̱su̱ daizi
(Ma̱te̱yo̱ 27:15-26; Marko 15:6-15; Jon 18:39-19:16)
13Utuwa zin Pilato alaat cik olli wawaco ki lo̱ddi̱ki̱re̱ ki ol, 14kar kizek nogo ne, “Anyahakang niga annit e̱e̱t cu a̱nnu̱ ne nonno ci aanyik ol kutuburret nong. Ki̱jji̱na̱ anna nonno ngati aavtiyyu niga to, ngen zin anna kuruba ba̱ci̱ cinne kar kettedek nonno lo̱ki̱ko̱. 15Rok He̱ro̱d bu̱k nu̱nu̱n, i̱llo̱i̱ gi̱i̱ ci amuda abaci enne, eci i̱tto̱na̱i̱t enne agita bo̱do̱k dee; ki ming acinnu niga ko̱, ngen enne ku̱tu̱gu̱ gi̱i̱ imma ci gerze kar kettedek nonno daiz. 16-17I̱yo̱ko̱ zin ke̱de̱zi̱ atin anna nonno kar koogu.”
18Egerenyit zin zu̱we̱ e̱co̱de̱, “U̱ru̱we̱t e̱e̱t necu ka̱da̱k! Oogaet agit Barabas!” 19E̱ce̱bje̱ da̱ abarik Barabasi zo̱ze̱ ci aanyik ol ku̱ru̱kto̱ kize nyi̱li̱ Jerusalema, ki bo̱do̱k zo̱ze̱ ci a̱ru̱we̱ e̱e̱t ka̱da̱k.
20Orong Pilato kaara Ye̱su̱, kar zin arrak ki̱jji̱n nogo dee. 21Ma̱i̱je̱ nege egerenyit niko, “Todowek nonno ta̱la̱ke̱c! Todowek nonno ta̱la̱ke̱c!”
22Eci Pilato ozozek nogo ize lak i̱i̱yo̱: “Nya? U̱tu̱gu̱ e̱e̱ti̱ cu nya ci gerze? Kuruba anna i̱llo̱i̱ zoz ci gerze kar kettedek nonno daiz. I̱yo̱ko̱ kanyike anna nonno kedeze arrak kar kooga.”
23Ma̱i̱je̱ nege egerenyit muluwanine cik a̱ppi̱nte̱k orong nonno kotodowe ta̱la̱ke̱ca̱, ommog zin gerenyi cinne̱ng nonno. 24Kar zin Pilato kelema zoz ci orong nege. 25Oogak zin enne nogo e̱e̱t bali a̱ju̱ke̱k ol lagam zo̱ze̱ ci anyahane nyi̱li̱ ki zoz ci a̱ru̱we̱ enne e̱e̱t ka̱da̱k ke̱, e̱e̱t bali a̱jji̱n nege ke̱, kar kaanyik Ye̱su̱ kotodowe ki baling u̱du̱kta̱ nege ke̱.
Todowinet ci Ye̱su̱ ta̱la̱ke̱ca̱
(Ma̱te̱yo̱ 27:31-44; Marko 15:21-32; Jon 19:17-27)
26Baling ovvo aciiri ovvoye nonno reena, a̱gga̱mi̱t zin nege Si̱mo̱ne̱ ci a̱kku̱ o̱rge̱ ci een Cyrene,#23:26 Cyrene: Aave orogi neci lo̱o̱ce̱ ci een zara i̱yo̱ko̱ Libiya. a̱kku̱nna̱k da̱ enne Jerusalem kar zin nege ka̱gga̱mi̱t nonno kaanycik kodong ta̱la̱ke̱c vu̱rrte̱ ci Ye̱su̱. 27Unuwet zin ol cik meelek nonno, ki bo̱do̱k ngaai cik a̱lu̱we̱k nonno. 28Ukce Ye̱su̱ kar kizek nogo ne, “Buuwecci cik Jerusalemo, ma a̱lu̱ya̱ng annita; u̱tu̱lu̱z e̱le̱tti̱ ciggo̱k ki dooli ciggo̱k. 29Eci a̱kku̱ atin i̱i̱ ci ovvo niga aniyyu ne, ‘U̱mu̱yu̱kte̱ ngaai cik abile, ki momuwet cik ngen ki̱ti̱rre̱t ki eezin cik ngen katarkuye!’ 30Kar zin
“‘a̱nne̱k atin nege jo̱o̱re̱t ne, “Muunyet agita!”
Kar zi̱i̱ryo̱k, “Bunget agita!”’#Hoseyya 10:8
31Eci ming ogon ol kaal ne̱ke̱ ming ngen keet culak,#23:31 Keet ci culai ki ci odoi: Keng ci zoz cu icu, ming ogone kaala ne̱ko̱ ngati e̱e̱t ci abunna, nya atin ci i̱i̱na̱k e̱e̱t ci gerze? ogon atin nya ming odowa?”
32Ovvoye nege wazin neci ol cik e̱e̱ggi̱n ogoryak rama ki Ye̱su̱ koot ku̱ru̱kte̱ ka̱da̱i̱to̱. 33Baling i̱vi̱tta̱k nginti a̱nne̱k ol ne Emmen ci o̱o̱wu̱, otodoyyek zin nonno ngin neci, ki ogoryak ne̱ke̱ e̱e̱ggi̱n rama ke̱ bu̱k, co̱de̱ o̱to̱ne̱ ci a̱zzo̱ okko co̱de̱ o̱to̱ne̱ ci angeto. 34Kar zin Ye̱su̱ kalawo kize ne, “Baba, lalek nogo, eci iróng nege a̱gga̱ gi̱i̱ ci ogon ko̱.” Kar zin kengerit ru̱u̱ma̱ni̱ ciginnek ngati ovoce bibi.
35Abile ol acine kar lo̱ddi̱ki̱re̱ kadacit nonno. Azi nege ne, “Eela enne ol u̱gge̱; anyik nonno keela ele cinne ming een enne de̱de̱ Ki̱ri̱sto̱ ci Ta̱mu̱ta̱dde̱no̱, wa bali atahalai.”
36Atararte zin bo̱do̱k aciiri nonno. Aanycik zin nege nonno merte ci akaka een zara vinegar 37kar kizettek ne, “Ming e̱e̱ni̱ i̱nna̱ alaan ci Ya̱u̱do̱, eela ele cunne.”
38Anyak ba̱li̱ye̱ zoz ci e̱he̱rye̱ oowe cinne ta̱la̱ke̱ca̱, azi ne, EEN NECU ALAAN CI YA̱U̱DO̱.
39Okko mu̱ju̱li̱ co̱de̱ mu̱ju̱lnya̱i ne̱k odode ki Ye̱su̱ ke̱ odom nonno: “Iróng i̱nna̱ e̱e̱ni̱ Ki̱ri̱sto̱? Eela ele cunne ki agit bu̱k!”
40Ma̱i̱je̱ mu̱ju̱li̱ co̱de̱ itizik gooni, “Iróng i̱nna̱ o̱ngo̱o̱le̱ Ta̱mu̱ta̱dde̱n ming ettediket ol agita ki nonno lo̱ki̱ko̱ co̱de̱? 41Edezet zin Ta̱mu̱ta̱dde̱n de̱de̱, eci kamuda naga de̱zi̱ne̱t go̱o̱le̱ ci kogonne naga kaal. Ma̱i̱je̱ e̱e̱ti̱ cu ngen ku̱tu̱gu̱ gi̱i̱ imma ci gerze.”
42Kar zin enne kizek Ye̱su̱ ne, “Ye̱su̱, aadawa annit bu̱k, ming okko i̱nna̱ obodak alaanzet cunne.”
43Abarizek zin Ye̱su̱ nonno, “Ka̱du̱wa̱ki̱ anna i̱nne̱t zoz ci een de̱de̱, wazin necu eliya, kaavtte anna ki i̱nne̱ta̱ ta̱mu̱-kenga.”
Daiz wa Ye̱su̱
(Ma̱te̱yo̱ 27:45-56; Marko 15:33-41; Jon 19:28-30)
44Imma ngati okko ki wazin keng, ize looci do̱o̱k mu̱hu̱r ne, gilihinyik, zee tu̱p kize yo̱mo̱n, 45eci bali koor ibil iróng ngen alanyiti. Kar zin ru̱u̱m ci enger Ce̱e̱z wa Ta̱mu̱ta̱dde̱no̱#23:45 Ru̱u̱m ci enger Ce̱e̱z wa Ta̱mu̱ta̱dde̱no̱: Enger ru̱u̱m necu Nginti A̱li̱le̱ oroot ngati aave Ta̱mu̱ta̱dde̱n di̱ngdi̱ngo̱nta̱. I̱i̱zo̱ alaani ci a̱ddi̱ki̱re̱ wawaco ngin neci do̱ lak co̱de̱ e̱rki̱ta̱, kar kanyik wawac Ta̱mu̱ta̱dde̱n abunna unya mu̱nye̱n cik ollu do̱o̱k. IkebLeviticus 16; Ma̱te̱yo̱ 27:51; Marko 15:38; I̱bu̱ru̱ 6:19-20; 9:1-7. ko̱ erece lak rama. 46Utuwe zin Ye̱su̱ egereny muluwe ci a̱ppwe̱, “Baba! Karike anna a̱zzi̱t cunne vongiz cinanni.” Baling u̱du̱wa̱ enne zoz necu, etteda zin zinin.
47Ma̱i̱je̱ ddi̱ki̱ryo̱i̱ti̱ ci aciiru da̱ aave nginati, icin kaal ne̱ko̱ do̱o̱k zee, kar zin kinnat Ta̱mu̱ta̱dde̱n kar kize ne, “De̱de̱ zin, een da̱ e̱e̱ti̱ necu e̱e̱t ci abunna.” 48Baling icinnet ol balik alute ke̱ kaal cik ogone, a̱gga̱mi̱t o̱o̱tti̱ li̱i̱m kar koot. 49Ma̱i̱je̱ ol wak a̱gga̱ nonno, ki ngaai balik anuwa nonno Ga̱li̱li̱kte̱ ke̱, ibilet reena, acin kaal ne̱ko̱.
Dawinet wa Ye̱su̱
(Ma̱te̱yo̱ 27:57-61; Marko 15:42-47; Jon 19:38-42)
50I̱yo̱ko̱ zin anyak da̱ gon e̱e̱t imma ci een zara Yosevo, een enne e̱e̱t ci abunna oroot, a̱li̱ngli̱ng lo̱ki̱ka̱, 51iróng bali enne elemi zoz ci ettedik gonoggja Ye̱su̱ lo̱ki̱ka̱. A̱kku̱ enne lo̱o̱ce̱ ci een Ju̱de̱ya̱, o̱rge̱ ci een Arimatiya, ere enne ba̱a̱li̱ne̱t ci Ta̱mu̱ta̱dde̱no̱. 52Uk enne ngati Pilato kar zin ki̱jji̱n zoz ci ele ci Ye̱su̱. 53Kar zin enne kidima ele cinne kaarik lo̱o̱c, kar zin ku̱lu̱c ru̱u̱me̱ ci een milaya kar zin kabahek ilomi ci aave ngi̱lo̱ma̱, ci da̱ ngen e̱e̱ti̱ imma karozik ngin neci. 54Een bali i̱i̱te̱ni̱ neci ci adimane nege kaal, eci ize ojon I̱i̱te̱ni̱ wa Yu̱bze̱nto̱ kar kakate.
55Unuwet ngaai balik orkora ki Ye̱su̱ Ga̱li̱li̱kte̱ ke̱ Yosevo kar kicinnet ilomi ki gool ci abahonik ele cinne. 56I̱mi̱rtte̱ zin nege oot ce̱e̱za̱ kar u̱tu̱gu̱zzo̱ keer cinne̱ng ngati adimane maal ci ongooli. Ma̱i̱je̱ zin nege omonit I̱i̱te̱ne̱ wa Yu̱bze̱nto̱ eci nege o̱ngo̱o̱le̱ lo̱ti̱nno̱k.
© 2018, Wycliffe Bible Translators, Inc. All rights reserved.