Lu̱ka̱ 21
21
Ngaa ci boye amuc Ta̱mu̱ta̱dde̱n
(Marko 12:41-44)
1Baling okko enne acin ta̱dde̱n, icin Ye̱su̱ ol cik een i̱tto̱k arike muci cigge̱k o̱bo̱n ci Ce̱e̱z wa Ta̱mu̱ta̱dde̱no̱. 2Icin bo̱do̱k enne ngaa ci boye ming a̱ju̱ke̱k o̱ro̱bi̱ya̱ cikidik een ziik rama o̱bo̱n neci. 3Ize zin enne ne, “Ka̱du̱wa̱kku̱ng zoz ci een de̱de̱, aarik ngaa ci boye ko̱ o̱ro̱bi̱ya̱ cik meelek kommog ol do̱o̱k. 4Aarik ol ne̱ko̱ do̱o̱k muci cigge̱k o̱ro̱bi̱ya̱ cik anyak nege ngati e̱e̱ggi̱nne̱ i̱tto̱k; ma̱i̱je̱ ngaa ci amati ko̱ aanyik o̱ro̱bi̱ya̱ cik anyak enne do̱o̱k.”
Baayen cik i̱ye̱la̱i̱ okko looci aṯurneke
(Ma̱te̱yo̱ 24:1-2; Marko 13:1-2)
5Ozoz nuyaha ciginnek uggak zoz ci adimane Ce̱e̱z wa Ta̱mu̱ta̱dde̱no̱ biyene cik a̱zi̱ze̱ ki muci cik aanyik ol Ta̱mu̱ta̱dde̱n. Ma̱i̱je̱ zin Ye̱su̱ ize ne, 6“Eci kaale cik icinntu niga ngatu ko̱, a̱kku̱ atin i̱i̱te̱ni̱ ci iróng biyena ngen atadonik gooni; a̱ju̱ko̱ni̱k biyena ne̱ko̱ atin do̱o̱k lo̱o̱c.”
U̱zu̱tte̱ piryanzet ci a̱kku̱ ke̱
(Ma̱te̱yo̱ 24:3-14; Marko 13:3-13)
7I̱jji̱nne̱t nuyaha Ye̱su̱ izektek ne, “De̱me̱zo̱i̱t, akane atin kaala ne̱ko̱ atinga? Nya ci i̱ye̱la̱ ize ojontte kaala ne̱ko̱ kar ku̱tu̱gu̱zze̱?”
8O̱bo̱de̱k zin enne nogo, “Icinnet ju̱rru̱m, gerza ming alabanung e̱e̱ti̱ imma. Eci a̱vvu̱ atin ol cik meelek zare cigannik, a̱du̱wa̱kku̱ng wo̱ye̱ e̱e̱ti̱ imma, azi ne, ‘Ke̱e̱ni̱ anna nonno,’ ki, ‘Ize ojon i̱i̱te̱ni̱.’ Ma annuyyu zoz cinne̱ng. 9Ming iziktu niga illanya ki nyi̱le̱n lo̱o̱cco̱k do̱o̱k, ma o̱ngo̱o̱li̱nnu̱ gi̱i̱ imma. I̱i̱na̱ kaala ne̱ko̱ arrak oowa, ma̱i̱je̱ ṯurnenet ci lo̱o̱tu̱ iróng a̱kku̱ ataman.”
10Izek zin enne nogo ne: “Ooro atin o̱ro̱gjo̱wa̱ ki o̱ro̱gjo̱k, ooro atin alaanzet imma ki alaanzet imma. 11Anyak atin ki̱ri̱ki̱ri̱k ci a̱ddi̱ki̱re̱ oroot, anyak atin magizzok cik a̱ddi̱ki̱re̱ ki zerenin lo̱o̱co̱we̱ do̱ do̱; ki zo̱zzo̱k cik anyike ol ko̱to̱ngo̱o̱ltte̱ lo̱o̱c ki baayen cik a̱ddi̱ki̱re̱ ta̱mu̱-kenga.
12“Ma̱i̱je̱ ming ngen kaala ne̱ko̱ ka̱ka̱tte̱, a̱gga̱mnyu̱ng ol azzine kar ki̱gi̱ddu̱ng. Ovvoyyung lo̱ki̱ka̱ kar ku̱ju̱kte̱u̱ng lagam, ovvoyyung alaate Ce̱e̱zi̱nne̱ wak Lawinto zo̱ze̱ cinanni. 13I̱ye̱la̱ atin zoz necu ming a̱du̱wa̱kku̱ niga nogo zoz ci Ta̱mu̱ta̱dde̱no̱. 14Abarik odolta zi̱nze̱tti̱nne̱, ma o̱ngo̱o̱li̱nnu̱ zoz ci ovvo niga eelannu e̱le̱tti̱ ciggo̱k lo̱ki̱ka̱. 15Eci ka̱a̱nyu̱ng atin anna i̱ge̱ta̱ zoz ki genyiz kar zin ol ne̱k amarinnung ko̱, iróng amuda gool ci aburne zoz cunno̱ng. 16Ovvo atin ol rok be̱e̱ti̱ggo̱k ki gotonoggu ki boor ki gonoggu ovolongnyung i̱ge̱ta̱, ovvo atin bo̱do̱k a̱ru̱k ol u̱gge̱ ngatinno̱ng ka̱da̱i̱to̱. 17Amarinnung atin ol i̱ge̱t do̱o̱k zo̱ze̱ cinanni. 18Abarik i̱llo̱i̱ atin rok imacoc co̱de̱ ci a̱da̱i̱ oowa. 19Okko zo̱ze̱ ci abilnnu niga ju̱rru̱m, amudannu atin niga ruget.”
Ozoz Ye̱su̱ li̱be̱ne̱t ci Jerusalemi
(Ma̱te̱yo̱ 24:15-21; Marko 13:14-19)
20Izek zin bo̱do̱k Ye̱su̱ nogo ne, “Ming icinntu aciir ilikta Jerusalem, ovvo atin niga a̱gga̱yyu̱ ize ojon li̱be̱ne̱t cinne. 21Anycik zin ol wak abak Ju̱de̱ya̱ ki̱vi̱re̱t koot biyene ta̱dde̱na̱, anycik ol wak abak Jerusalema kiyokta re̱e̱nu̱n, kar aanycik ol wak abak Jerusalema abanyca, gerza ming i̱i̱zo̱ orog. 22Eci e̱e̱ggi̱n ne̱ko̱ i̱i̱nya̱ cik edeze Ta̱mu̱ta̱dde̱n ol zo̱ze̱ bali e̱he̱rye̱ la̱du̱n. 23O̱lle̱ atin nonga oroot ngati ngaai wak anyakce ki wak orokte. Anyak atin pirnanet ci a̱ppwe̱ oroot lo̱o̱ta̱ ki olle. 24A̱ru̱we̱ atin uggak nya̱tu̱ba̱ta̱, a̱gga̱mnye̱ uggak koot kecebte lo̱o̱co̱we̱ do̱o̱k. A̱gga̱m atin ol wak iróng een Ya̱u̱d Jerusalem zee kakat zoz cinne̱ng mo̱o̱le̱t.
Ming okko Ngerrti E̱e̱to̱ i̱ye̱la̱i̱
(Ma̱te̱yo̱ 24:29-31; Marko 13:24-27)
25“Anyak atin baayen cik i̱ye̱la̱i̱ koora, nye̱lo̱wa̱ ki munyunye. Kar lo̱o̱ta̱, ovvo atin ol lo̱o̱co̱we̱ do̱o̱k apirna kar ka̱bba̱ri̱te̱t ngati a̱ju̱le̱ maama nyatapare ci a̱ddi̱ki̱re̱. 26Aval atin ol ngati o̱ngo̱o̱li̱nne̱ gi̱i̱ ci i̱i̱na̱k lo̱o̱c, eci kaala cik aavtte ta̱mu̱-kenga ovvo omoti. 27Imma i̱i̱te̱ne̱ neci ovvo atin nege acin Ngerrti E̱e̱to̱ a̱kku̱ di̱i̱za̱ ta̱mu̱-kenga komiza ki di̱ngdi̱ngo̱nte̱ ci a̱ddi̱ki̱re̱. 28Ming ovvo kaala ne̱ko̱ akane, ibilet zin niga je̱e̱na̱ kar odongtek o̱o̱tti̱ cuggo̱k ta̱dde̱n, eci i̱ki̱ya̱ ti̱ri̱ze̱ne̱t ize ojon.”
De̱mzi̱ne̱t ci atubzek Ye̱su̱ keet ci een munec
(Ma̱te̱yo̱ 24:32-35; Marko 13:28-31)
29U̱du̱wa̱k zin enne nogo tubzenet cu: “Icinnet keet ci een munec ko̱ ki keen do̱o̱k. 30Ming ovvo varanya alize, acinnu niga eberene ciggo̱k e̱le̱tti̱ne̱ kar a̱gga̱c ize ojon ngararoni. 31Ogon zin niko, ming icinntu niga kaal ne̱ko̱ ming ogone, a̱gga̱c ize ojon ba̱a̱li̱ne̱t ci Ta̱mu̱ta̱dde̱no̱.
32“Ka̱du̱wa̱kku̱ng anna i̱ge̱t zoz ci een de̱de̱, iróng atin bu̱u̱l cu aditai ming ngen kaala ne̱ko̱ ku̱tu̱gu̱zze̱. 33Aditai atin ta̱mu̱-kengi ki lo̱o̱c, ma̱i̱je̱ zoz cinanne iróng atin aditai udut.
U̱zu̱tte̱ e̱le̱tti̱
34“U̱zu̱tte̱ e̱le̱tti̱, icima ovvo atin zi̱nze̱tti̱ cuggo̱k egerzanne zo̱ze̱ ci gerze, ki udenet merten ki ngo̱li̱ne̱t lo̱o̱c zo̱ze̱ ci baizo, okko atin i̱i̱te̱ni̱ neci a̱kku̱na̱kku̱ng kiwagon tarabai. 35Eci a̱kku̱na̱k zoz neci ol cik abak lo̱o̱ta̱ ngatu do̱o̱k. 36Abunna ming azunnu niga e̱le̱tti̱ ju̱rru̱m, kar alac Ta̱mu̱ta̱dde̱n kar ka̱a̱nyu̱ng gool ci alittu kaal cik atin a̱vvu̱na̱k lo̱o̱c ko̱, kar atin ibilet ngu̱me̱ ci Ngerrti E̱e̱to̱.”
37Edemze gon Ye̱su̱ i̱i̱nya̱ do̱o̱k Ce̱e̱ze̱ wa Ta̱mu̱ta̱dde̱no̱, kar gon enne okko adunge Biye ci I̱ngi̱ro̱u̱, 38kar ol do̱o̱k ki̱vi̱ta̱ nge̱rre̱t ri̱ri̱wo̱na̱ kiziyet zoz cinne Ce̱e̱ze̱ wa Ta̱mu̱ta̱dde̱no̱.
© 2018, Wycliffe Bible Translators, Inc. All rights reserved.