Luka 20
20
Abagabisi nibabu:sya Yesu ku managa gae (Mt. 21:23-27; Mk. 11:27-33)
1Mbe ku rusiku rumwi kwijo, ariga ne:igisya aba:nu mu yekaru, nasimura Ebigambo byo bwana, abagabisi abakuru na bandiki nibamutako aamwi na bakaruka. 2Nibamubu:sya ati, ?Cibwire, oukora jinu ku managa ki? ?Amwi niga unu akuyae amanaga ago? 3Naindura nababwira ati, Anye one siga nibabu:sye musango gumwi, mumbwire. 4?Okubatija kwa Yoana kwaso:kere mu rwire, tere mu ba:nu? 5Nibe:rwaja abe:ne:ra ati, araba ca:ika ati, kwaso:kere mu rwire, kajo:kwaika ati, ?Niki cinu cabaingiriye okumwikirisya? 6Nawe araba ca:ika ati, kwaso:kere mu ba:nu, aba:nu bo:ne abajo:cirasira amabui, okuba abe:kirisya kata ati, Yoana ariga:ri muragi. 7Nibaindura ati, Citakumenya enu kwaso:kere. 8Yesu nababwira ati, Mbe anye one nitakubabwira emwe enikora jinu ku managa ki.
Abarimi be mijabibu
(Isa. 5:1-7; Mt. 21:33-46; Mk. 12:1-12)
9Namba okubwira aba:nu ecijekekanyo cinu ati, Omu:nu umwi ayambire risambu rye mijabibu, naritamo abarimi, nagenda mu:si indi nako:rayo. 10Mbe mu siku jo mwaka nabatumira abarimi omugaya wae, korereki bamuyaneko amatwasyo ga mwisambu rye mijabibu. Nawe abarimi nibamubuma, nibamusindika ci:nu uri. 11Nongesya okutuma omugaya oundi. Oyo one nibamubuma, nibamuswasya, nibamusindika ci:nu uri. 12Nongesya okutuma owa kasatu. Oyo one nibamuutasya nibamuirisya. 13Omwene esambu rye mijabibu na:ika ati, ?Nje nikore kutiki? Siga nitume Omwana wani omwendwa. Aryao oyo barimuyana ecibao. 14Nawe abarimi wejire bamurora, nibe:rwaja abe:ne:ra, niba:ika ati, Unu niwe omuri wo mwandu. Cimwite omwandu gube gweswe. 15Nibamuirisya mwisambu rye mijabibu, nibamwita. ?Mbe omwene esambu rye mijabibu aribakora kutiki? 16Ari:ja nabasimagisya abarimi abo, na risambu rye mijabibu aririyana bandi. Wejire bongwa ejo, niba:ika ati, Ago gabe kura! 17Nawe omwene nabarore:rera na:ika ati, ?Mbe ka niki cinu candikirwe ati, Ribui rinu abombasi baremere, eryo niryo ryabee ebui enene rya ku sonde. 18Unu wo:ne kagwa kwibui eryo aributukabutuka nawe oyo ririgwira ririmufwonyorafwonyora.
Ebyo kutoba rigoti
(Mt. 22:15-22; Mk. 12:13-17)
19Mbe abandiki na bagabisi abakuru nibenda okumugwata mu mwanya ogwo, okuba bamenyere ati, abe:ne nibo a:ikiriye ecijekekanyo eco, nibo:baya aba:nu. 20Nibamwiteganira, nibatuma jitari, nibe:kora barenge:resi korereki bamutege ku misango jae, korereki bamute ku ŋoma na ku managa go musi:ba. 21Nibamubu:sya ati, Omwiigisya, cimenyere ati owaika no kwiigisya eje cimari, amwi utakusoro:ra mu ba:nu, nawe owiigisya injira ya Nyamuanga cimari. 22?Ci:kirisibwe eswe okutoberaga Kaisari rigoti, tere uri? 23Nawe omwene namenya oburigerige bwebwe, nababwira ati, 24Munyeresye isiringi. ?Ina rususo rwaga no rwandiko rwaga? Niba:ika ati, Ni bya Kaisari. 25Nababwira ati, Mbe muyanega Kaisari ebya Kaisari, na Nyamuanga mumuyanega ebya Nyamuanga. 26Nibatamibwa okuso:syako insurye ku misango jae imbere ya ba:mu. Nibarugu:ra okuindura kwae, nibajibira.
Abasadukayo mbasaka okutega Yesu
(Mt. 22:23-33; Mk. 12:18-27)
27Abasadukayo abandi nibamutako, banu aba:ika ati, kusu:ka kutario. 28Nibamubu:sya ati, Omwiigisya, Musa acandikiye ati, Omu:nu akafwirwa omumura wa:bo unu ari no mugasi nawe nafwa atari na mwana, omumura wa:bo engirire omugasi uyo, amwiburireko mumura wa:bo aba:na. 29Mbe bariga bario ba inda imwi bata:nu na babiri. Owo kwamba natwara omugasi, nafwa atari na mwana. 30No wa kabiri namwingirira omugasi uyo, nafwa one atari na mwana. 31No wa kasatu namwingirira. Mbe nikwo kutyo bo:ne bata:nu na babiri nibafwa batasigireko ba:na. 32Okumara omugasi one nafwa. 33?Mbe mu kusu:ruka ariba mugasi waga kwabo? Okuba bo:ne bata:nu na babiri bamutwaeko.
34Yesu nababwira ati, Aba:na ba i:si inu abatwara, nibagaburwa. 35Nawe banu babonekere ati be:ire okukinga mu:si iyo na mu kusu:ka kwa bafu:ye, abo batakutwara amwi batarigaburwa. 36Okuba no kufwa batakutura kufwa rindi, okuba bari rwa bamaraika. Na ka ni ba:na ba Nyamuanga okuba ni ba:na bo busu:ko. 37Nawe ebyo kusu:ka kwa bafu:ye Musa one e:resisye kwisaka anu namutoga Ratabugenyi ati, Nyamuanga wa Iburaimu, na Nyamuanga wa Isaka, na Nyamuanga wa Yakobo. 38Omwene atari Nyamuanga wa bafu:ye, nawe ni wa baanga, okuba ku mwene bo:ne ni baanga.
Yesu nabu:sya abandiki
(Mt. 22:41-46; Mk. 12:35-37)
39Abandi ku bandiki nibaindura ati, Mwiigisya, wabarira. 40Mbe batasubire kutumbirira kumubu:sya musango gwone rindi. 41Nababu:sya ati, ?Aba:ika atiki ati, Kristo ni mwana wa Daudi? 42Okuba Daudi omwene ka:ika mu citabu ca Jaburi ati, Ratabugenyi amubwiriye Ratabugenyi wani ati, Inyanja ku kuboko kwani okwe buryo, 43okukinga anu ndikora abaremo bao kuba citebe ce bigere byao. 44Daudi amutogere Ratabugenyi, ?kambe ni mwana wae kutiki? 45Mbe aba:nu bo:ne anu bariga nibamutegeresya, nabwira abe:igisibwa bae ati, 46Mwikenge abandiki, banu abenda okuribatira mu myenda emire:ra, banu abenda okuke:sibwa mu sokoni, nibenda ne bitebe bye cibaro mu mekofyanyisyo nibenda awe cibaro mu maregesi. 47Nibo abarya jinyumba ja batumba, nibe:sabya nibarandirisya. Abo nibo baribona intambara inene kukirao.
Kijita New Testament © The British and Foreign Bible Society and The Bible Society of Tanzania, 1960.