Ягья 3
3
Исани Никъадим
1Никъадим лугьудай са фарисей хьана, ам чувудрин вилик-кьилик квайбурукай сад тир. 2Ам йифиз Исадин патав атана.
– Муаллим! – лагьана ада. – Чаз Вун Аллагьдин патавай атанвай Муаллим яз чида. Аллагьди гуз хьаначиртӀа, садавайни Вуна ийизвай хьтин керемат-ишараяр къалуриз жедачир.
3– За ваз лап рикӀивай лугьузва, – жаваб гана Исади, – Аллагьдин Пачагьлугъ анжах цӀийи кьилелай дуьньядал хтайдаз аквада.
4– Кьуьзуь хьанвай инсан цӀийи кьилелай дуьньядал гьикӀ хтурай? – жузуна Никъадима. – Дидедин руфуниз гьахь хъувуна анай экъечӀиз хъжедани?
5Исади жаваб гана:
– Лап рикӀивай лугьузва За ваз: анжах ци ва Руьгьди цӀийи кьилелай дуьньядиз хкайдавай Аллагьдин Пачагьлугъдиз гьахьиз жеда. 6Инсандилай инсан жеда, Руьгьдилай – руьгь. 7Гьавиляй За ваз «куьн дуьньядал цӀийи кьилелай хтун лазим я» лагьайла, вун мягьтел жемир. 8Гар вичиз кӀандайвал къекъведа. Ваз адан ван къведа, амма ам гьинай гьиниз физватӀа, чир жедач. Руьгьдилай хьана дуьньядиз атайбурни гьа икӀ жеда.
9– Ам гьикӀ жедай кар я? – лагьана хабар кьуна Никъадима.
10– Исраилдиз тарсар гузватӀани, ваз ихьтин затӀар чизвачни? – жаваб гана Исади. – 11За ваз лап рикӀивай лугьузва: чун чаз чидайдакай рахада, шагьидвални чаз акурдакай ийида, ятӀани куьне чи шагьидвилер кьабулзавач. 12За квез чилин крарикай лугьузва – куьн чӀалахъ жезвач. Цаварин крарикай рахаз хьайитӀа, куьн чӀалахъ жедани кьван?
13Гьич са касни цаварал хкаж хьайиди туш, ана хьайиди анжах цаварай эвичӀай Инсандин Хва я. 14Мусади кьурумда чиле гул акӀурна анал буьруьнждин гъуьлягъ хкажайла, вири Исраилдиз и гъуьлягъ акваз хьанай. Гьа саягъда Инсандин Хвани хкаж жеда ва виридаз Ам аквада. 15Адахъ иман ийизвай гьар садахъ эбеди уьмуьр жеда. 16Аллагьдиз и дуьнья акьван кӀан хьана хьи, Вичин авайни-авачир са Хва къурбанд авуна, Адахъ иман ийизвайбур садни рекьин тийидайвал, абуруз эбеди уьмуьр жедайвал авуна. 17Аллагьди Вичин Хва и дуьньядин гьахъ-дуван авун патал ваъ, Адан куьмекдалди и дуьнья хилас авун патал ракъурнавайди я. 18Адахъ иман ийизвайдан дуван ийидач, амма Аллагьдин авай-авачир са Хцихъ иман тийизвайдан дуван, ада иман авунвач лугьуз, авуна алатнава. 19Абурун дуван и саягъда кьиле фида: дуьньядиз Экв атанва, амма инсанри чӀуру крар ийизвайвиляй абуруз экуьнилай гзаф мичӀивал кӀандай. 20Гьар ни пис кар ийизватӀа, адаз экв акунани кӀан туш. Вичин алчах крар дуьздал акъат тавун патал, ам экуьнал экъечӀдач. 21Амма дуьз крар ийизвайди, вичин крар виридаз акун патал, экуьнал экъечӀзава. Адаз а крар ийиз куьмек гузвайди Аллагь я эхир.
Исадини Ягьяди цик акахьун къачуз тун
22Идалай кьулухъ Иса Вичин тилмизарни галаз Ягьудатдиз фена ва гьана, инсанрив цик акахьун къачуз таз са кьадар вахт хьана. 23Ягьядини, Салимдивай яргъа тушир Энунда, ана яд гзаф авайвиляй, инсанрив цик акахьун къачуз тазвай. Инсанри, къвез, цик акахьун къачузвай. 24Ягья а чӀавуз гьеле къазаматда тунвачир.
25Гьа чӀавуз Ягьядин тилмизринни са чувуддин арада михьивилиз акъудуникай гьуьжет гьатна; 26абуру, Ягьядин патав атана, лагьана:
– Муаллим, ви рикӀел аламани, вун Ярдан вацӀун муькуь пата авайла, ана са Кас авай, вуна адан патахъай шагьидвални авунай. Гила а Касдин патав вири инсанар физва, Ада абурув цик акахьун къачуз тазва.
27– Инсандихъ авай гьар са затӀ Аллагьди ганвайди я, – жаваб яз лагьана Ягьяди. – 28Куьн чеб за лагьай гафарин шагьидар я. За квез лагьанай: зун Месигь туш, зун Адакай хабар гуз Аллагьди ракъурнавай чархачи я. 29Свас авайди чам я. Чамран дуст лагьайтӀа, чамран патав акъвазда ва адан ван къвез шад жеда. Зунни гьахьтин шадвилив ацӀанва. 30А Кас къвез-къвез виниз хьун, зун къвез-къвез агъуз хьун лазим я.
31Виняй къведайди виридалайни вине жеда, дуьньяда авайди чилел жеда ва чилел алайди хьиз раханни ийида. Цаварилай Къведайди виридалайни вине жеда. 32Цаварилай Къведайда Вичиз акурдакай ва ван хьайидакай шагьидвал ийизватӀани, садани Адан шагьидвал кьабулзавач. 33Ада ийизвай шагьидвал кьабулзавайда, Аллагьди авайвал лугьузвайди тестикьарзава. 34Аллагьди Вичи Ракъурайдаз кьадар авачир кьван Руьгь ганва, Ракъурайда лугьузвай гафарни Аллагьдин гафар я. 35Бубадиз Вичин Хва кӀан я, гьавиляй Бубади вири Хцин ихтиярда тунва. 36Аллагьдин Хцихъ иман ийизвайдаз эбеди уьмуьр жеда, амма Аллагьдин Хцихъ иман тийизвайдаз эбеди уьмуьр аквадач ва ам Аллагьдин хъилек кваз амукьда.
© Институт перевода Библии, 2010-2024