Mateo 6
6
Cʌntesa cha'añ coltaya
1Chʌcʌ q'uele la' bʌ cha'añ mi la' mel chuqui toj, pero mach cojic jach ti' wut la' pi'ʌlob cha'añ mi' q'ueletla, come che' jiñi ma'añic mi yʌq'ueñetla la' chobejtʌbal la' Tat am bʌ ti panchan. 2Che' mi la' wʌq'uen la' chu'bʌañ p'ump'uño' bʌ, mach mi la' wʌc' ti wustʌl majlel trompeta ti' tojel la' wut che' bajche' mi' melob ti sinagoga tac yic'ot ti calle tac jiñi mu' bʌ i poj pʌsob i bʌ ti uts'at cha'añ mi' q'uejlelob ti ñuc ti' wut wiñicob x'ixicob. Isujm mic su'beñetla añobix i chobejtʌbal. 3Che' ma' wʌq'uen a chu'bʌañ p'ump'uño' bʌ, mach ma' wʌc' ti q'uejlel jiñi woli bʌ a wʌc'. 4Ti mucul yom ma' wʌc' a chu'bʌañ. Jiñi a Tat woli bʌ i q'uel pejtelel mucul tac bʌ mi caj i yʌq'ueñet a chobejtʌbal [ti jamʌl.]#6.4 Ti yan tac bʌ Biblia ma'añic ili t'añ: Ti jamʌl.
Cʌntesa cha'añ oración
(Lc 11.2-4)
5Che' ma' cha'len oración, mach a cha'len che' bajche' jiñi cha'chajp jax bʌ i pusic'al mu' bʌ i mulan i cha'leñob oración che' wa'alob ti sinagoga tac yic'ot ti' xujc calle cha'añ mi' q'uejlelob. Isujm mic su'beñetla tsa'ix i tajayob i chobejtʌbal. 6Pero jatet, che' ma' cha'len oración, ochen ti' mal a wotot, mʌcʌ i ti' a wotot, pejcan a Tat am bʌ ti mucul. Jiñi a Tat woli bʌ i q'uel pejtelel mucul tac bʌ mi caj i yʌq'ueñet a chobejtʌbal [ti jamʌl.]#6.6 Ti yan tac bʌ Biblia, ma'añic ili t'añ: Ti jamʌl.
7Che' mi la' cha'len oración, mach mi la' chʌn taj lajal bʌ t'añ cha'añ ma' tam-esan a woración che' bajche' mi' cha'leñob gentilob. Mi' lon ña'tañob mi' yu'bintel i yoración cha'añ ca'bʌl i t'añ. 8Mach mi la' cha'len lajal bajche' jiñi gentilob, come yujil la' Tat chuqui añ to yom la' cha'añ che' maxto añic tsa' la' c'ajtibe. 9Cha'lenla oración che' bajche' iliyi:#6.9-13 Cha'lenla oración che' bajche' iliyi: Jiñʌch jump'ejl oración lajal bʌ bajche' mi' cha'leñob oración ti Oñiyi bʌ Wen T'añ yic'ot che' bajche' mi' cha'leñob oración pejtelel judíojob. Ti ili oración añ wucchajp chuqui mi' c'ajtintel. Jiñi ñaxan bʌ uxchajp, woli i taj ti t'añ chuqui la com bʌ ti' tojlel Dios: A c'aba', a yumʌntel, chuqui awom. Jiñi yam bʌ chʌnchajp, woli i taj ti t'añ che' bajche' yom mi la cajñel ti uts'at yic'ot ti junmojt ti' tojlel wiñicob x'ixicob (Lc 11.2-4).
C Tat lojon añet bʌ ti panchan,
la' ch'ujutesʌntic a c'aba'.
10La' tilic a yumʌntel.
La' mejlic chuqui awom ti pañimil che' bajche' ti panchan.
11Aq'ueñon lojon c waj cha'añ ili q'uiñ.
12Ñusʌbeñon lojon c mul
che' bajche' mic ñusʌbeñob i mul c pi'ʌlob lojon.
13Mach ma' wʌc'on lojon ba' mic pʌjyel lojon ti mulil.
Cʌntañon lojon ame yajlicon lojon ti jontolil.
[Come a cha'añʌch a yumʌntel
yic'ot a p'ʌtʌlel yic'ot a ñuclel, ti pejtelel ora. Amén.]#6.13 Come a cha'añʌch a yumʌntel… ti pejtelel ora. Amén: Jiñʌch jump'ejl c'ay ba' mi' ñuq'uesʌntel i c'aba' Dios tsa' bʌ i c'ʌñʌyob ti' culto jiñi ñaxan bʌ xñopt'añob. Che'ʌch tsi' cha'le oración David ja'el ya' ti 1 Cr 29.10-13. Ili c'ay ma'añic mi lac taj ti yan tac bʌ Biblia.
14Come mi woli la' ñusʌben i mul la' pi'ʌlob, la' Tat ti panchan mi' ñusʌbeñetla la' mul. 15Pero mi ma'añic mi la' ñusʌbeñob i mul la' pi'ʌlob, ma'añic mi' ñusʌbeñetla la' mul la' Tat ja'el.#Mt 18.35; Mc 11.25-26; Ef 4.32; Col 3.13
Cʌntesa cha'añ ch'ajb
(Is 58.5)
16Che' ja'el che' woliyetla ti ch'ajb,#6.16 Che' mi' cha'leñob ch'ajb c'ʌlʌl ti wajali, ma'añic mi c'uxob i waj cha'añ ti' caj woli i sʌclañob Dios (2 Cr 20.3; Jl 2.12-15). mach yomic ch'ijiyem la' wut che' bajche' jiñi cha'chajpob jax bʌ i pusic'al. Leco mi' melob i wut cha'añ mi' q'uejlelob woliyob ti ch'ajb. Isujm mic su'beñetla, tsa'ix i tajayob i chobejtʌbal. 17Pero jatet, che' woliyet ti ch'ajb boño a jol yic'ot wajyun a wut. 18Che' jiñi ma'añic mi' tsictiyel ti' wut wiñicob x'ixicob mi woliyet ti ch'ajb. Pero mi' tsictiyel ti' wut a Tat am bʌ ti mucul. Jiñi a Tat, mu' bʌ i q'uel pejtelel mucul tac bʌ, mi caj i yʌq'ueñet a chobejtʌbal [ti jamʌl.]#6.18 Ti yan tac bʌ Biblia ma'añic ili t'añ: ti jamʌl.
Chu'bʌañʌl ti panchan
(Lc 12.32-34)
19Mach mi la' tempan la' chu'bʌañ ti pañimil ba' mi' jisan i chʌñil, ba' mi' cajel ti ta',#Stg 5.2-3 ba' mi' yochelob xujch' i xujch'iñob loq'uel, 20tempan la' chu'bʌañ ti panchan ba' ma'añic mi yochel i chʌñil, ba' ma'añic mi' cajel ti ta', ba' ma'añic mi yochelob xujch' i xujch'iñob loq'uel. 21Baqui jach tempʌbil la' chu'bʌañ, ya' mi la' teñe ac' la' pusic'al.
I c'ʌjñibal lac wut ti lac bʌc'tal
(Lc 11.33-36)
22Jiñi lac wut i c'ʌc'alʌch lac bʌc'tal.#6.22 Lac wut i c'ʌc'alʌch lac bʌc'tal: Mi' ña'tʌntel jiñi mach bʌ weñic i wut jiñʌch jiñi am bʌ i tsʌytsʌyñʌyel i pusic'al o mu' bʌ i wen mulan chu'bʌañʌl (che'ʌch isujmlel ti hebreo ti Dt 15.9; Pr 23.6; 28.22, yic'ot ti griego ti Mt 20.15; Mc 7.22). Jiñi wen bʌ i wut (v. 22), jiñʌch yu'bil jiñi am bʌ i yutslel cha'añ mi' p'ew i chu'bʌañ che' bajche' mi' yʌl ti versículo tac ti 19-34 6.19-21, che' ja'el añ yam bʌ isujmlel cha'añ jiñi c'oc' bʌ i wut yic'ot jiñi mach bʌ c'oq'uic i wut i yejtalʌch che' bajche' mi' ch'ʌmbeñob isujm jiñi wen t'añ. Mi weñʌch la' wut, mi la' wen q'uel i sʌclel pañimil. 23Mi jontol la' wut, añet jach la ti ac'ʌlel yilal. Mi i'ic' jax mi la' q'uel i sʌclel pañimil, añetla ti ic'yoch'an bʌ pañimil.
Dios yic'ot chu'bʌañʌl
(Lc 16.13)
24Ma'añic juntiquil x'e'tel mu' bʌ i yuman cha'tiquil yumʌl, come mi' ts'a'len juntiquil, mi' c'uxbin yam bʌ. Mi' q'uel ti ñuc juntiquil, mi' q'uel ti lolom jiñi yam bʌ. Mach mejlic la' yuman Dios che' woli la' yuman chu'bʌañʌl.
Añonla ti' wenta Dios
(Lc 12.22-31)
25Jiñi cha'añ mic su'beñetla mach mi la' mel la' pusic'al cha'añ la' cuxtʌlel wʌ' ti pañimil, mi cha'añ chuqui mi la' c'ux, mi cha'añ chuqui mi la' jap, mi cha'añ chuqui mi la' xoj cha'añ la' bʌc'tal. ¿Mach ba ñumeñic i c'ʌjñibal la' cuxtʌlel bajche' i bʌl la' ñʌc'? ¿Mach ba ñumeñic i c'ʌjñibal la' bʌc'tal bajche' la' pislel? 26Q'uelela jiñi te'lemut, ma'añic mi' cha'len pac' mi c'ajbal, ma'añic mi' tempan i buc'bal ti yotlel. La' Tat am bʌ ti panchan mi' yʌq'ueñ i buc'bal te'lemut. ¿Mach ba ñumeñic la' c'ʌjñibal bajche' te'lemut? 27¿Majqui mi' mejlel ti colel junxujc'ubʌyel cha'añ ti ca'bʌl mel pusic'al? 28¿Chucoch mi la' mel la' pusic'al cha'añ la' pislel? Ña'tanla bajche' mi' colel jiñi sʌsʌc bʌ i ñich pimel am bʌ ti jamil, ma'añic mi' cha'len e'tel mi jalbal. 29Pero mic su'beñetla, mach wen i t'ojolic i pislel Salomón ti pejtelel i ñuclel bajche' jiñi sʌsʌc bʌ i ñich pimel. 30Dios mi' mel i t'ojol jax bʌ pimel, jiñi poj cuxul bʌ wʌle mu' bʌ i chojquel ti c'ajc ti yijc'ʌlal, ¿mach ba muq'uic i yʌq'ueñetla ja'el chuqui mi la' xoj jatetla mach bʌ añic mi la' ñop ti pejtelel la' pusic'al? 31Jiñi cha'añ mach mi la' mel la' pusic'al. Mach mi la' wʌl: ¿Chuqui mi caj laj c'ux? ¿Chuqui mi caj lac jap? ¿Chuqui mi caj lac xoj? 32Come ti' pejtelel iliyi jiñʌch mu' bʌ i sʌclan gentilob; pero jiñi la' Tat am bʌ ti panchan laj yujilix pejtelel chuqui tac añ to yom la' cha'añ. 33Ñaxan sajcanla i yumʌntel Dios yic'ot i tojel. Che' jiñi ti wi'il mi caj la' wʌq'uentel pejtelel chuqui tac añ to yom la' cha'añ.
34Mach mi la' mel la' pusic'al cha'añ jiñi mu' bʌ caj i yujtel ijc'ʌl, come ijc'ʌl añʌch i bajñel wocol mu' bʌ i ch'ʌm tilel. Jasʌlʌch jiñi wocol mu' bʌ i ñumel ti jujump'ejl q'uiñ.
Biblia de Estudio en Ch´ol de Tumbalá, Chiapas, México © Sociedad Bíblica de México A.C.