Nikamowina 8
8
okistēyihtākosiwin kisē-manitow
onikamon David
1hāw, kā‑tipēyihcikēyan, nitipēyihcikēminān,
kikistēyihtākosiwin wāpahcikātēw misiwē askīhk!
kimamihcimikowin pēhcikātēw kihci-kīsikohk;
2oskawāsisak mīna apiscawāsisak ē‑isi-nikamocik.
kikī-kanawēyimikon ē‑sōhkisihtāyan
ita ohci kinōtinākanak,
kita-nakinacik ē‑wī-āpēhocik.
3ispīhk ē‑kitāpahtamān kīsik kā‑kī-osīhtāyan,
tipiskāwi-pīsim mīna acāhkosak itē ē‑kī-apīhacik,
4kīkway ana ayisiyiniw kā‑nākatohkātat?
mīna ana mosci ayisiyiniw kā‑kitēyimat?
5ēkosi apisīs kikī-nīhtakimāw ispīhci kiya,
mīna kikihci-okimāwīhāw sōhkisiwinihk
mīna kistēyihtākosiwinihk.
6kikī-tipēyihtamōhāw kahkiyaw kīkway kā‑kī-osīhtāyan;
kita-pimipayihtāt kahkiyaw kitōsīhcikana:
7māyatihkwa mīna mostoswa,
asici pakwaci-pisiskiwa;
8piyēsīsa mīna kinosēwa
mīna pisiskīsa kihcikamīhk.
9kā‑tipēyihcikēyan, nitipēyihcikēminān,
kikistēyihtākosiwin wāpahcikātēw misiwē askīhk!
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society