Zenesesi 5
5
Sa Tuti te Adama
1Hire sari na vivineidi ri na tie pu tuti gore mae koe Adama. Sipu taveti Tamasa sari na tinoni si va podaka gunini Sa na kinehana soti si arini.#Zen 1:27-28 2Meke va podaka ni koreo na vineki Sa meke mana ni Sa si arini, meke pozani tinoni Sa, sipu ta tavete si arini.#Mt 19:4; Mk 10:6 3Sipu kamoa keke gogoto toloṉavulu vuahenina se Adama, si podo mae si keke tuna koreo gugua puta tugo asa, ke poza nia Seti sa si asa. 4Pa mudina sa pinodo te Seti, si toa kamoa vesu gogoto vuahenina pule se Adama, meke koadia pule kaiqa tuna koreo na vineki si asa. 5Ego sa vinarigaraedi ri doduru vuaheni pu toai Adama, si ka sia gogoto toloṉavulu, meke tiqe mate si asa.
6Sipu keke gogoto lima vuahenina se Seti, si podo mae se Inosi. 7Pa mudina sa pinodo te Inosi, si toa kamoa vesu gogoto zuapa vuahenina pule se Seti, meke koadia pule sari kaiqa tuna koreo na vineki. 8Gua asa, ke sari doduru vuahenina pu toai Seti si ka sia gogoto manege rua, meke tiqe mate si asa.
9Sipu kamoa sia ṉavulu vuahenina se Inosi si podoa sa se Kenani. 10Pa mudina sa pinodo te Kenani si toa kamoa vesu gogoto manege lima vuahenina pule se Inosi, meke koa dia pule si kaiqa tuna koreo na vineki. 11Gua asa ke sari doduru vuahenina pu toai Inosi si ka sia gogoto lima, meke tiqe mate si asa.
12Sipu kamoa zuapa ṉavulu vuahenina se Kenani, si podoa sa se Mahalaleli. 13Pa mudina sa pinodo te Mahalaleli, si toa kamoa vesu gogoto made ṉavulu vuahenina pule se Kenani, meke koadia pule si kaiqa tuna koreo na vineki. 14Gua asa ke, sari doduru vuahenina e Kenani si ka sia gogoto manege puta, meke tiqe mate si asa.
15Sipu kamoa onomo ṉavulu lima vuahenina se Mahalaleli, si podoa sa se Zaredi. 16Pa mudina sa pinodo te Zaredi, si toa kamoa vesu gogoto toloṉavulu vuahenina pule se Mahalaleli, meke koadia pule si kaiqa tuna koreo na vineki. 17Gua asa ke, sari doduru vuahenina e Mahalaleli si ka vesu gogoto vesu ṉavulu lima, meke tiqe mate si asa.
18Sipu kamoa keke gogoto onomo ṉavulu rua vuahenina se Zaredi, si podoa sa se Inoke. 19Pa mudina sa pinodo te Inoke si toa kamoa ka vesu gogoto vuahenina pule se Zaredi, meke koadia pule si kaiqa tuna koreo na vineki. 20Gua asa ke, sari doduru vuahenina e Zaredi si ka sia gogoto onomo ṉavulu rua, meke tiqe mate si asa.
21Sipu ele kamoa onomo ṉavulu lima vuahenina se Inoke, si podo mae se Metusela. 22Koa baere koe Tamasa se Inoke meke nabulu nia ka ṉeta gogoto vuaheni pa mudina sa pinodo te Metusela, meke koadia pule si kaiqa tuna koreo na vineki. 23Gua asa ke, sari doduru vuahenina e Inoke si ka ṉeta gogoto onomo ṉavulu lima: 24Koa baere koe Tamasa se Inoke, ke lopu ta dogoro, sina ele vagia Tamasa si asa.#Hib 11:5; Zd 14
25Sipu ele kamoa keke gogoto vesu ṉavulu zuapa vuahenina se Metusela, si podoa sa se Lemeki. 26Meke pa mudina sa pinodo te Lemeki, si toa kamoa zuapa gogoto vesu ṉavulu rua vuahenina pule se Metusela, meke koadia pule si kaiqa tuna koreo na vineki. 27Gua asa ke sari doduru vuahenina e Metusela si ka 969, meke tiqe mate si asa.
28Sipu ele kamoa keke gogoto vesu ṉavulu rua vuahenina se Lemeki, si podo mae si keke tuna koreo. 29Meke zama si asa, “Sa koreo hie si kaqu va manoto gita pa nada tinavete koasa pepeso sapu ele leve nia Zihova, meke koasa tinupiti pa limada,” meke poza nia Noa sa si asa. 30Pa mudina sa pinodo te Noa, si toa kamoa lima gogoto sia ṉavulu lima vuahenina pule se Lemeki, meke koadia pule si kaiqa tuna koreo na vineki. 31Gua asa ke, sari doduru vuahenina e Lemeki, si ka zuapa gogoto zuapa ṉavulu zuapa, meke tiqe mate si asa.
32Sipu ele kamoa lima gogoto vuahenina se Noa, si podo sari Semi, e Hami, meke e Zapeti.
© 2016, Wycliffe Bible Translators, Inc. All rights reserved.