Maatteeo 23
23
Accĩĩn Yeesu makayyiook cĩg ꞌJudeei
(Tigiil Maarko 12:38-40; ꞌLuuka 11:37-52; 20:45-47)
1Baa aduhaak Yeesu lothippit hĩ nuyyiook cĩgĩnnĩg anneek, 2“Ĩĩn Variꞌtheei hĩ ꞌlimmanniook cĩg nyattal cĩ Mũũꞌtha, eet ꞌcĩg arigith makaaꞌthĩt cĩ Mũũꞌtha. 3Ĩthĩhĩt ĩhõõggõ nẽ ĩdĩmattu thooꞌthiok vẽlẽk ꞌcĩg aduhaakuung nẽẽgĩ. Ma thĩ hinnia hadĩmannu thooꞌthiok ꞌcĩg adtican nẽẽgĩ, hĩnĩngĩtĩ hõllõngaa adtican nẽẽg thooꞌthiok ꞌcĩg alliman nẽẽgĩ. 4Ẽcẽbẽẽkĩ nẽẽg eet ijjio ꞌcĩg adĩddĩngĩĩ ꞌgaaũꞌnyaannĩĩ cĩggĩĩng nẽ hõllõngaa ẽẽl ĩhõõggõ hĩdĩĩc haaga buúk.
5“Adĩman nẽẽg thooꞌthiok vẽlẽk, aĩ hátĩ hĩcĩtteet eeta. Ecebeek nẽẽg õlẽẽt ꞌcĩg eheedothoothĩk thooꞌthioha cĩg Nyekuci nẽ itihimit ceremwa ꞌcĩg uuttik ꞌcĩg eceboothĩk ꞌlõõrõngĩta ꞌcĩg ẽllẽẽmĩthĩ. 6Accamana nẽẽg ꞌgoolliok ꞌcĩg itieelini eeta ĩhõõggõ korrioohĩĩ ꞌcĩg obbitig, hĩ ngaatĩ iccioloonganĩ dtaabĩtĩĩ ꞌcĩg tiirik ꞌCieethinii cĩg Laiittak. 7Accamana nẽẽg ngaatĩ ĩꞌthaaĩ eeta ĩhõõggõ ꞌcuuha annẽẽkĩ, ‘ꞌLimmanniook.’
8“Occa hõllõngaa anneekuung eeta, ‘ꞌLimmannioohit,’ hĩnĩngĩtĩ aꞌnyaku niig ꞌlimmannioohit hõdẽẽthõng nẽ aduhoonnu niig vẽlẽk iiginnu ꞌgõtõn hĩ ngõnat. 9Nẽ ma hauyyu eet umwa loota nĩnga hanneeku, ‘Nyakangaan,’ hĩnĩngĩtĩ Nyekuc dioo hẽẽtahujjieen ꞌcĩ ĩĩn Maaꞌnyu cĩ loriẽẽt cugguung. 10Hode ma hauyyu eet umwa hanneeku, ‘ꞌlimmannioohit,’ hĩnĩngĩtĩ aaĩ ẽẽtĩ hõdẽẽthõng ꞌcĩ ĩĩn ꞌlimmannioohit, ĩnõõnnõ Krĩstõ. 11Aanytĩk eet cobbi hõrggẽẽnaa cunuung hĩĩ dticciannioohit cunuung. 12Hĩnĩngĩtĩ ẽẽtĩ ꞌcĩ õdõng ẽlẽ cĩnnĩ hĩllõõan ꞌgõõnõgĩ, aaꞌnyĩhoothĩk hatĩ hĩĩ hĩdĩca nẽ ẽẽtĩ ꞌcĩ aaꞌnyĩk ẽlẽ cĩnnĩ hĩĩ hĩdĩca, odoꞌngi hatĩ nẽẽ hĩĩ maka.
13“Pĩĩrnanĩt hĩ ngagiit ꞌlimmanniook cĩg nyattal cĩ Mũũꞌtha hĩ Variꞌtheei, niig oloꞌngiaaha cieegi! Aꞌnyuuggu niig habuccieet cĩ hẽẽtkujjieen hẽbẽrẽẽnnĩĩ cĩg eetuk. Nẽ aitiõõ niig hõllõngaa occa aduhunnu habuccieet cĩ hẽẽtkujjieen hode ẽlẽmaaku eet ꞌcĩg adiim aduhuni. 14Pĩĩrnanĩt hĩ ngagiit ꞌlimmanniook cĩg nyattal cĩ Mũũꞌtha hĩ ngagiit Variꞌtheei. Oloꞌngiaaha cieegi! Arratanaannu ngaatĩbõyyĩꞌnya ijjio olooyyiohĩĩ cĩggĩĩng nẽ alayyioou lothippita hũnũũk, hátĩ hicittuung eeta. Uukuung hatĩ Nyekuci ngagiit gẽrrẽẽt ũdũt.
15“Pĩĩrnanĩt hĩ ngagiit ꞌlimmanniook cĩg nyattaalak hĩ Variꞌtheei, oloꞌngiaaha cieegi! Ovvooyyu loonyin hĩ bũlũccwa vẽlẽk, hátĩ aanytĩk eet hõdẽẽthõng hĩĩ nuyyioohit cunuung nẽ má ammũdaannu ho, aaꞌnyiku habath gẽrrẽẽt hĩĩ ngeertĩ ꞌgwoo ꞌcĩ aalla ooo haau hĩ niiga.
16“Pĩĩrnanĩt hĩ ngagiit tiꞌthittiook ꞌcĩg eet ꞌcĩg rubettĩg! Hĩnĩngĩtĩ allimannu niig eet anneeku, hõllõngaa tiir ngaatĩ abũtanĩ ẽẽtĩ ꞌCieethaa cĩ Nyekuci. Nẽ iittihu tiir ngaatĩ abũtanĩ eet umwaa, ‘ꞌDaab ꞌcĩ aaĩ ꞌCieethaa cĩ Nyekuci.’ 17Niig ꞌgiiꞌthiaha ꞌcĩg iiginnu rubettĩg ko! Iina ꞌcĩ ĩllõõan, ꞌdaab hode ꞌCieeth cĩ Nyekuci, ꞌcĩ aaꞌnyĩk ꞌdaab hẽllẽẽm ko? 18Nẽ tarĩ ainnu niig, ‘Má abũtan ẽẽtĩ umwaa ꞌthaarĩĩ cĩg altaarĩ ꞌcĩ ĩbboorini ꞌgaarrieeniti, aitiõõ lõbũtĩ tĩho hõllõngaa aggam eet nẽ má abũtan ẽẽtĩ ꞌthaarĩĩ cĩg ꞌbaaninit ꞌcĩ aaĩ altaarĩa, lõbũtĩ thĩ dẽẽdẽ niccia!’ 19Niig eeta ꞌcĩg iiginnu rubettĩg ko! Iina ꞌcĩ ĩllõõan, ꞌbaaninit hode altaarĩ ꞌcĩ aaꞌnyĩk ꞌbaaninit hiꞌngiranĩ ho? 20Nẽẽthĩ hoti ho, ẽẽtĩ ꞌcĩ abũtan, hĩnĩngĩtĩ nĩngĩtĩ ĩbboorini ꞌgaarrieeniti, abũtan altaarĩaa ꞌcĩ ĩbboorini ꞌgaarrieeniti hĩ hẽlẽggĩ vẽlẽk ꞌcĩg aattĩg nĩngaata. 21Nẽ ẽẽtĩ ꞌcĩ abũtan ꞌCieeth cĩ Nyekuci, abũtan ꞌCieeth cĩ Nyekuci hĩ eet ꞌcĩ aaĩ ꞌCieetõõ cĩ Nyekuci. 22Nẽ ẽẽtĩ ꞌcĩ abũtan ꞌthaarĩĩ cĩg hẽẽtkujjieen, abũtan nẽẽ dtaaba cĩ Nyekuci nẽ tarĩ ũbũtan ꞌthaarĩĩ cĩg eet ꞌcĩ aayyi dtaaba ho.
23“Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei, oloꞌngiaaha cieegi! Aaꞌnyiku niig Nyekuc ꞌbaaninit ꞌcĩ abadtẽc#23:23 ꞌBaaninit ꞌcĩ abadtẽc: Nyattaalaa cĩ Mũũꞌtha, baa aduhaak Nyekuci eet heꞌngerriaak ĩnõõnnõ ꞌbaaninit ꞌcĩ abadtẽc. Má ajana ẽẽtĩ lohoddwa õmmõtõ, attiha hõdẽĩ nẽ ẽꞌngẽraak Nyekuc. Tigiil ꞌBuuk cĩ Levitiko 27:30-33; cĩ Tigiilẽttõõ 18:21-24; Ditoronomi 12:5-19; 14:22-29. ꞌcĩ aaĩ hĩ hẽẽt ꞌcĩ hidici ꞌcĩ aarĩhoothĩk ꞌdiaatatõõ nẽ ataarrioꞌthu thooꞌthiok ꞌcĩg õkõmĩ cĩg nyattaalak ꞌcĩg aattĩg hĩ, bũnnai hĩ tamaati hĩ ngaatĩ hathĩknĩ Nyekuc. Abũnnaa ngaatĩ aaꞌnyiku Nyekuc ꞌbaaninit ꞌcĩ abadtẽc nẽ abathĩ ngaatĩ ataarroꞌthu thooꞌthiok cĩg Nyekuci ꞌcĩg aaddi. 24Niig tiꞌthittiooha ꞌcĩg rubettĩg ko! Acĩccĩĩhannu niig maam ꞌcĩg aꞌnyak ꞌthũũlũl, hátĩ hiittiõõ hõllõngaa akuuyyu ĩhõõggõ nẽ ukuuyyu nyaakaal.
25“Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei. Oloꞌngiaaha cieegi! Ĩĩgĩnnu niig eet ꞌcĩg uuꞌnyu hooppoꞌnya hĩ hẽddẽmĩ battaali hĩĩtõ tẽllĩg nẽ ũtũngteehu ĩĩttõõ hĩĩtõ ꞌriiring, haauto hĩ ꞌthinneeti cugguung ꞌcĩg abbĩꞌthĩĩ lõbõlõbẽẽꞌthĩt hĩ muruꞌthẽẽt ko! 26Nii Variꞌtheeniti ꞌcĩ ĩĩnĩ ruben ko! Tũũny nõõ hooppo hĩ hẽddẽm ĩĩttõõ nẽẽthĩ hatĩ ĩĩ tẽlla battaali buúk.
27“Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei. Oloꞌngiaaha cieegi! Aattiyyu niig hĩ ꞌlõõhĩta ꞌcĩg adaiini eeta ꞌcĩg arrũũbĩ helleemito battaala nẽ ĩttõõ, ĩko nẽẽ abbĩꞌthĩĩ ẽmmẽ cĩg eet ꞌcĩg adaahito hĩ ꞌgii vẽlẽk ꞌcĩ ĩĩn ꞌriiring. 28Nẽẽthĩ ꞌgõõla hõdẽẽthõng, acĩnnuung eeta battaala iiginnu eet ꞌcĩg abũnnayyu nẽ ꞌthinneetinitõõ cugguung, ĩko nẽẽ iiginnu oloꞌngiaak hĩ ꞌthẽccanniook.
29“Pĩĩrnanĩt hĩ ngagiit ꞌlimmanniook cĩg nyattaalak hĩ ngagiit Variꞌtheei. Oloꞌngiaaha cieegi! Ehenyittu niig nẽ ũkũmattu ꞌlõõhĩt cĩg põrõvẽtaaꞌnyanu hĩ cĩg eet ꞌcĩg abũnnaa. 30Nẽẽthĩ iittu, ‘Má baa hũrũmteea hõdẽĩ hĩ hĩbaangĩ, occa baa hõllõngaa haruka põrõvẽtaaꞌnya hõdẽĩ hĩ ĩhõõggõ.’ 31Má othooꞌthu noho, õhõppõõcannu niig eleeti cugguung ẽmmẽn, ainnu iiginnu lõhõlĩ cĩg eet baag aruk põrõvẽtaaꞌnya. 32Ĩdĩmanit noho, edecciaak dtiic baa iꞌthiattaaĩ maajihu!
33“Niig lohollia cĩg hũkaaꞌnyanu ho! Alĩĩtannu hatĩ niig ukẽẽnĩt cĩ ꞌgwoo ꞌcĩ aalla ũdũt hutuno? 34Hĩꞌthõõwakuung naa põrõvẽtaaꞌnya hĩ eet ꞌcĩg ẽggẽẽnyĩth hĩ eet ꞌcĩg alliman nyattal cĩ Nyekuci. Aruku hatĩ ũgĩ, nẽ otoddoyyieehu ũgĩ hurucciẽẽtĩ nẽ uuktu ũgĩ ꞌCieethinii cugguung ĩcĩg Laiittak nẽ itiggiayyu ĩhõõggõ ꞌtaaũnnioohĩ. 35Nẽẽthĩ hoti ho, eheellu hatĩ niig daahĩꞌthiook cĩg eet vẽlẽk cĩg Nyekuci, iꞌthianaanĩ hĩ eet ꞌcĩ abũnnaa, Abeele hõdõlan ꞌThakaria ngeertĩ Berekia, baa aruku hõrggẽẽnaa cĩ ꞌCieeth cĩ Nyekuci hĩ altaarĩ ꞌcĩ ĩbboorini ꞌgaarriẽẽna. 36Haduhaakuung dĩdĩ, uukennu hatĩ niig eeta cĩg irkiꞌnyia iccig ko, hĩnĩngĩtĩ thooꞌthiok iccig vẽlẽk!
Ammĩnan Yeesu ꞌJeruꞌthalẽm
(Tigiil ꞌLuuka 13:34-35)
37“Niig eeta cĩg ꞌJeruꞌthalẽmĩ! Uruktu niig põrõvẽtaaꞌnya nẽ ohoddiaau eet ꞌcĩg ĩꞌthooyyiakuung ngagiit biyyiẽẽnĩ. Baa hatabi tabattĩ hiriiri halũtaannuung ngagiit hĩ tũhũlũc aagõõng alũtaak lõhõlĩ cĩgĩnnĩg havvuutõnĩĩ cĩgĩnnĩg. Hõllõngaa hinnia ẽlẽmaakaangu buúk. 38Ĩcĩnĩt nõõ, ũtũngoothĩk ꞌcieeth cunuung cĩ Nyekuci aau haaga. 39Nẽ haduhaakuung dĩdĩ, iittiõõ hatĩ hõllõngaa acĩnnaangu niig nganĩĩt tarĩ ĩꞌthõng othoothit ĩĩtõ, ‘Aꞌnyĩĩk Nyekuc haggatan eet ꞌcĩ aku ꞌthaarĩĩ cĩg Makayyiookto!’ ”#Tigiil ꞌBuuk cĩ Tegellwaanu 118:26
© 2017, Wycliffe Bible Translators, Inc., All rights reserved.