Yõaannẽ 9
9
Aaꞌnyĩk Yeesu eet ꞌcĩ rubenĩ hũbũna
1Ma baa nga ovvooyyia Yeesu ꞌgõõla, ikia udtuuha eet umwa ꞌcĩ baa rubenĩ nganĩngĩtĩ arrittiaanĩ. 2Ma nĩngaata, ijinit nuyyiooha cĩgĩnnĩg ĩnõõnnõ ĩĩttĩk, “ꞌLimmannioohit, inni baa hittirria ẽẽtĩ ciee hĩĩ ruben ko? Ẽꞌthẽcan nẽẽnĩ, hode ẽꞌthẽcan maaꞌnyia hĩ aattĩnnĩ?”
3Ẽdẽcĩ Yeesu ĩhõõggõ anneek, “Aitiõõ hõllõngaa ẽꞌthẽcan ẽẽtĩ cieeni hode maaꞌnyia hĩ aattĩnnĩ! Adiim Nyekuci, hátĩ hedeeꞌnyia dtiici cĩnnĩ rũgẽtaa cĩ eet icci. 4Hĩcĩ nga ĩĩn lõõcĩ waathĩn ko, hidticanit thõõth cĩ eet baa ĩꞌthõõannaa nganĩĩta. Ma ikia baalini, iittiõõ eet ꞌcĩ adticanni tõõ. 5Nẽ hĩcĩ nga haaĩ naa loota nĩnga ho, hĩĩnĩ naa lanyit cĩ looc nicci.”
6Ma baa urutaa cĩ uduhaaĩ Yeesu thõõth icci ẽlẽk, ikia ũttũũrĩk ammũt looc nẽ õꞌngõnya doob ammũtĩ nẽ uudik hẽbẽrẽẽnnĩĩ cĩg eet ꞌcĩ rubenĩ ho. 7Nĩngĩtĩ aduhaakĩ rubenniaahit annẽẽkĩ, “Bĩĩt tũũnya doob nicci bõrrõõhaa cĩ ꞌThiloamĩ.” Nĩngĩtĩ õkõ ũũnyanĩ rubenniaahiti doob nẽ ĩcĩnĩ. Aĩ thõõth ꞌcĩ haĩ ꞌThiloam ko, eet ꞌcĩ ĩꞌthooyyia.
8Ma ho, ijitto eeta aagõõng aarõõ hĩ rubenniaahit hĩ eet gõõng adtuuha ngaatĩ alaĩ nẽẽ eet ĩĩtõ, “Eet nẽẽꞌthẽk gõõng iccioloongan nẽ ala eet cieeni?” 9Baa aĩ eeta ũgẽẽgĩ, “Ĩnõõnnõ ꞌthẽk!”
Nẽ ĩĩtõ ũgẽẽgĩ, “Aitiõõ, aaĩ nẽẽꞌthẽk kĩ nẽẽnĩ!”
Ma ho, uduha ẽẽtĩ nicciee ẽlẽ ẽmmẽn ĩĩ, “Nganĩĩt ꞌthẽk naana.”
10Nĩngĩtĩ ajini eeta ĩnõõnnõ annẽẽkĩ, “Nẽ ĩcĩnĩ hutuno?”
11Ẽdẽcĩ nẽẽ ĩhõõggõ anneek, “Õꞌngõnya eet umwaa ꞌcĩ anneek eeta Yeesu doob nẽ uudika hẽbẽrĩ cĩgannĩg. Ma ho, ĩnnĩhaa, ‘Bĩĩt tũũnya doob nicci bõrrõõhaa cĩ ꞌThiloamĩ.’ Nĩngĩtĩ hõkõ hũũnyanĩĩ nẽ ꞌyioko hĩcĩnĩ dĩdĩ.”
12Ma ho, ijinit nẽẽg ĩnõõnnõ ĩĩttĩk, “Aaĩ ꞌyioko Yeesu tĩho ngaana?”
Ẽdẽcĩ ẽẽtĩ nicciee aĩ, “Ẽrẽkaanĩ.”
Ijinit Variꞌtheei Yeesu
13Ma nĩngaata, aꞌnyaktaak eeta niccieeg eet ꞌcĩ rubenĩ ho, Variꞌtheei. 14Baa ĩĩn kõrra ꞌcĩ õꞌngõnyaanĩ Yeesu doob nẽ aaꞌnyĩk rubenniaahit hĩcĩnĩ ho, Kõr cĩ ꞌYiommaanõ. 15Ma ho, ijinit Variꞌtheei rubenniaahit ꞌgõõl ꞌcĩ baa acĩnẽẽnĩ nẽẽ ho. Baa ẽdẽcĩ nẽẽ ĩhõõggõ anneek, “Õꞌngõnya Yeesu doob umwa ammũtĩĩ cĩgĩnnĩg nẽ uudika hẽbẽrĩ, ma baa hũũk hũtũũnya doob nicci, hikia hĩcĩnĩ.”
16Nĩngĩtĩ aĩnnĩ Variꞌtheei ũgẽẽgĩ, “Aitiõõ ẽẽtĩ ciee hõllõngaa aku hĩ Nyekuc, hĩnĩngĩtĩ hõllõngaa aꞌthũũnnĩ nẽẽ Kõr cĩ ꞌYiommaanõ.”
Baa hinnia õthõõth Variꞌtheei ũgẽẽgĩ aĩ, “Aga gõõng ẽẽtĩ ꞌcĩ ĩĩn ꞌthẽccannioohit ngaatĩ adĩmanĩ thooꞌthiok ꞌcĩg ĩnaat eeta hutuno?” Nĩngĩtĩ eꞌngeriini lothippiti cĩ Variꞌtheei.
17Ma ho, utuhuyyioothĩk nẽẽg rubenniaahit tarĩ nẽ ĩĩttĩk, “Aini ꞌyioko nii thõõth cĩ eet tĩho ne? Baa hẽbẽrĩ cugunnig ꞌcĩg aaꞌnyĩk nẽẽ hũbũttaathõ ho.”
Ẽdẽcĩ ẽẽtĩ nicciee anneek, “Ĩĩn nẽẽ põrõvẽtaac.”
18Baa aalla hõllõngaa ẽlẽmĩ makayyiooha cĩg ꞌJudeei ngaatĩ ĩĩnnĩ baa ẽẽtĩ nicciee ruben, nĩngĩtĩ avvaanĩ maaꞌnyĩ hĩ aattĩ eet nicci, 19nẽ ijinit ĩhõõggõ ĩĩttĩk, “Loholeec cunuung cieeni? Ĩnõõnnõ baa ainnu niig arrittiaa ruben? Nẽ ꞌyioko ikia ĩcĩnĩ hutuno?”
20Baa ẽdẽcĩ maaꞌnyia hĩ aattĩnnĩ anneek, “Hagayya ngaatĩ ĩĩnnĩ loholeec cĩnaang nẽ hagayya baa arrittiaa ruben. 21Nẽẽthĩ, hõllõngaa hagayya aku acĩnĩ nẽẽ hutuno, hode eet iina ꞌcĩ aaꞌnyĩk ĩnõõnnõ hĩcĩnĩ ho. Ijinit ĩnõõnnõ. Ĩĩ nẽẽ maka, aꞌnyĩĩk huduhaahuung nẽẽnĩ.” 22Baa õthõõth maaꞌnyia hĩ aattĩnnĩ hoti, hĩnĩngĩtĩ baa iꞌngolli nẽẽg eet cĩg ꞌJudeei, hĩnĩngĩtĩ baa aarrik nẽẽg thõõth ꞌcĩ iiggiaẽẽkĩ eet ꞌcĩ ẽlẽmĩ aĩ ĩĩn Yeesu Krĩstõ ho, ꞌCieethaa cĩ Laiitto battaala. 23Ĩnõõ ꞌcĩ õthõõthĩ maaꞌnyia hĩ aattĩnnĩ aĩnnĩ, “Ĩĩ nẽẽ maka, ijinit ĩnõõnnõ ho.”
24Ma nĩngaata, utuvuyyia makayyiooha cĩg ꞌJudeei eet nicci tarĩ nẽ ĩĩttĩk, “Bũtan Nyekuc duha thõõth ꞌcĩ ĩĩn dĩdĩ! Hagayya naag ngaatĩ ĩĩnnĩ Yeesu ꞌthẽccannioohit.”
25Ẽdẽcĩ nẽẽ aĩ, “Hõllõngaa haga naa ngaatĩ ĩĩnĩ Yeesu ꞌthẽccannioohit hode aitiõõ. Thõõth hõdẽẽthõng ꞌcĩ haga naana, baa hĩĩnĩ ruben nẽ ꞌyioko hĩcĩnĩ!”
26Ẽdẽcĩ makayyiooha ĩnõõnnõ anneek, “Adĩmaneeki baa ꞌthẽk nẽẽ nganiit ne? Aaꞌnyi baa nẽẽ nganiit cĩnĩ hutuno?”
27Ẽdẽcĩ rubenniaahiti aĩ, “Iyyia huduhaahuung ẽlẽk. Ne ꞌcĩ nga adiimmu niig athiknu hĩ nganĩĩt tarĩ ho? Idiimtu niig buúk iittu nuyyiook cĩgĩnnĩg?”
28Nĩngĩtĩ õdõõmĩ makayyiooha ĩnõõnnõ annẽẽkĩ, “Nganiit ꞌcĩ ĩĩnĩ nuyyioohit cĩ Yeesu! Hĩĩgĩnna naag nuyyiook cĩg Mũũꞌtha. 29Hagayya naag baa othoothĩk Nyekuci Mũũꞌtha nẽ erekeet ngagĩĩt aku Yeesu ĩĩna?”
30Ẽdẽcĩ ẽẽtĩ ĩhõõggõ anneek, “Thõõth ꞌcĩ abulanneet niccia! Erekuung ngagiit nĩngĩtĩ akuuni nẽẽnĩ. Nẽẽthĩ, aaꞌnyĩk nẽẽ hẽbẽrĩ cĩgannĩg hĩcĩttĩ. 31Hagayya naag hõllõngaa athĩhĩ Nyekuci ꞌthẽccanniook. Athĩhĩ nẽẽ eet ꞌcĩ aꞌthũũnnĩ thõõth cĩnnĩ nẽ ĩdĩman tabiinit cĩnnĩ. 32Nganĩngĩtĩ ẽhẽnytaanĩ lõõcĩ, nga hĩthĩhĩt eeta eet ꞌcĩ aaꞌnyĩk eet ꞌcĩ arrittiaa ruben hĩcĩnĩ. 33Má baa hiittiõõ ẽẽtĩ ciee hõllõngaa aku hĩ Nyekuc, occa baa hõllõngaa aaꞌnya hĩcĩnĩ.”
34Ẽdẽcĩ makayyiooha anneek, “Ĩĩnĩ baa nii ꞌthẽccannioohit nganĩngĩtĩ arrittiaanĩ! Occa ꞌyioko allimanneet nii ngagĩĩta?” Nĩngĩtĩ iiggiaẽẽkĩ ĩnõõnnõ battaala.
Rubeꞌthẽẽt cĩ loriio
35Ma ho, ikia ĩthĩk Yeesu ngaatĩ iiggiaẽẽkĩ Variꞌtheei rubenniaahit battaala, ma baa ikia ũmmũda Yeesu ĩnõõnnõ, ijin ĩnõõnnõ ĩĩnnĩk, “Elemi nii Ngeertĩ Eeto?”
36Ẽdẽcĩ rubenniaahiti nicciee anneek, “Makayyioohit, duhaahaa eet tĩho, hátĩ hẽlẽm ĩnõõnnõ.”
37Nĩngĩtĩ aĩnnĩ Yeesu, “Icinu nii kõr icci eet tĩho ẽlẽk. Ĩnõõnnõ ꞌcĩ othoothonnu ho.”
38Ma ho, ĩĩnnĩk rubenniaahiti Yeesu, “Makayyioohit, helemmii naa nganiita!” Nĩngĩtĩ alaĩ nẽẽ Yeesu nĩngaata.
39Nẽ ĩĩnnĩk Yeesu ĩnõõnnõ, “Baa hakuu hetteedi naa thooꞌthiok cĩg looc nicci, hátĩ hĩcĩttĩ eeta ꞌcĩg rubettĩg nẽ ĩĩtõ rubettĩg eeta ꞌcĩg acĩnĩ.”
40Ma baa athĩhĩ Variꞌtheei ꞌcĩg baag abĩlĩ nĩngaata thõõth icci ho, iita ijinit nẽẽg Yeesu ĩĩttĩk, “Ma naag, hĩĩgĩnna naag buúk rubettĩg?”
41Ẽdẽcĩ Yeesu ĩhõõggõ anneek, “Má baa ĩĩtõ rubettĩg, occa ꞌyioko baa hõllõngaa iiginnu ꞌthẽccanniook. Nẽẽthĩ ꞌyioko, ma ainnu acĩneennu ho, aalla iiginnu ꞌthẽccanniook noho.”
© 2017, Wycliffe Bible Translators, Inc., All rights reserved.