Yõaannẽ 14
14
Amammaayan Yeesu nuyyiook cĩgĩnnĩg
1Baa aduhaak Yeesu nuyyiook cĩgĩnnĩg anneek, “Ma haaꞌnyiku ꞌthinneeti hupuppudit, elemit Nyekuc nẽ ẽlẽmtaangu nganĩĩt buúk. 2Mẽẽlĩg ꞌcieethi õlõõ cĩ Baaba nẽ hõkõ hatĩ hakũmaneekuung naa ngagiit nĩngĩtĩ au aattiyyu. Má baa hiittiõõ hõllõngaa ĩĩn dĩdĩ, occa ꞌyioko hõllõngaa haduhaakuung thõõth icci. 3Nẽ má hũũk hũkũmaneeha nĩngĩtĩ cunuung ko, hõbõda hatĩ nẽ hikia huukuung hõõt hũrũmtĩ hõdẽĩ nẽ aauttu niig buúk ngaatĩ haayyi naana. 4Agayyu niig ꞌgõõl cĩ nĩngĩtĩ hõkõõĩ naa ho.”
Ĩĩn Yeesu ꞌgõõl ꞌcĩ õkõ hĩ Maaꞌnyĩ
5Ma ho, ẽdẽc Tomaaꞌthio ĩnõõnnõ ĩĩnnĩk, “Makayyioohit, erekeet ngagĩĩt nĩngĩtĩ ꞌcĩ hatĩ õkõõĩ nii ho, occa hagayya hatĩ naag ꞌgõõl tĩho hutuno?”
6Ẽdẽcĩ Yeesu ĩnõõnnõ anneek, “Hĩĩnĩ naa ꞌgõõl hĩ thõõth ꞌcĩ ĩĩn dĩdĩ hĩ rũgẽt. Aitiõõ ẽẽtĩ ꞌcĩ occa õkõ hĩ Baaba, hatĩ haitiõõ naa tõõ! 7Má baa agayyiaangu niig nganĩĩta, occa ꞌyioko baa agayyu Baaba buúk. Iꞌthianaanĩ kõr nicci, iita agayyu niig nẽ icittu ĩnõõnnõ.”
8Ẽdẽcĩ Pilippo Yeesu anneek, “Makayyioohit, teretheet Baangeet, thõõth ꞌcĩ hadiimma niccia diooni.”
9Ẽdẽcĩ Yeesu Pilippo anneek, “Pilippo, hũrũmtĩ naag hĩ ngagiit waathinniook ꞌcĩg mẽẽlĩg nẽ nga gawaa buúk? Má ĩcĩna ẽẽtĩ umwaa nganĩĩta, ĩcĩn nẽẽ Baaba buúk. Anneekaa gõõng ‘Teretheeheet Baaba inni?’ 10Hõllõngaa elemi nii thõõth ꞌcĩ haini naa, haaĩ naa hĩ Baaba nẽ aau Baaba hĩ nganĩĩta? Nẽ thõõth ꞌcĩ haduha naa ho, hõllõngaa aku õõa caannĩ ẽmmẽn, Baaba ꞌcĩ aaĩ hĩ nganĩĩt ꞌcĩ õthõõth thooꞌthiok iccig ko. 11Ẽlẽmtaangu nganĩĩt hatĩ hanneekuung, haaĩ naa hĩ Baaba nẽ aau Baaba hĩ nganĩĩta, hode elemit nuun thooꞌthiok ꞌcĩg hadticani naa ꞌcĩg ĩnaat eeta ho. 12Haduhaakuung dĩdĩ, ẽẽtĩ ꞌcĩ ẽlẽmma nganĩĩta, adĩman hatĩ nẽẽ thooꞌthiok baag hadĩmani naana. Adĩman hatĩ nẽẽ thooꞌthiok ꞌcĩg ĩllõõan iccig buúk, hĩnĩngĩtĩ hũũha naa hĩ Baaba. 13Ijittaangu nganĩĩta nẽ hatĩ hĩdĩmaneehuung naa thõõth ꞌcĩ adiimmu ho, hátĩ haaꞌnyĩk Ngeerĩnĩ Maaꞌnyĩ bulẽẽnĩt. 14Ijittaangu nganĩĩt ꞌgii vẽlẽk ꞌthaarĩĩ cĩgannĩg nẽ hatĩ hĩdĩmaneehuunga.”
Uduha Yeesu thõõth ꞌcĩ akuuni Lorii ꞌcĩ Ẽllẽẽmĩthĩ
15Baa aduhaak Yeesu nuyyiook cĩgĩnnĩg anneek, “Má ammĩnannaangu niig nganĩĩta, aꞌthuunnu hatĩ thõõth ꞌcĩ haduhaakuung naana. 16Nẽ haduhaahi hatĩ naa Baaba hĩꞌthõõahuung ngagiit Ellioohit, ꞌcĩ hatĩ gõõng arũmẽẽnnu hĩ ngagiit ooo. 17Eterꞌtheekuung hatĩ ngagiit Lorii ꞌcĩ Ẽllẽẽmĩth ko, thõõth ꞌcĩ ĩĩn dĩdĩ. Nẽ hõllõngaa ẽlẽmĩ eeta cĩg looc nicci ĩnõõnnõ, hĩnĩngĩtĩ hõllõngaa acĩn nẽẽg hode aga ĩnõõnnõ. Nẽẽthĩ, agayyu niig Lori ꞌcĩ Ẽllẽẽmĩth, hĩnĩngĩtĩ aalla hatĩ nẽẽ arũmeennu hĩ ngagiit ooo.
18“Aitiõõ hatĩ naa hõllõngaa huunnikuung ngagiit aaut hĩ booyyioha. Hõbõdaakuung hatĩ naa ngagiita. 19Waathinnioohĩĩ ꞌcĩg abadtẽc, hõllõngaa hatĩ acĩnna eeta cĩg looc nicci nganĩĩta, nẽẽthĩ, acĩnnaangu hatĩ niiga. Arũgnu niig, hĩnĩngĩtĩ harugi naana. 20Nẽ kõr niccia, au hatĩ agayyu niig ainnu, haaĩ naa hĩ Baaba nẽ aauttu niig hĩ nganĩĩta nẽ haau naa hĩ ngagiita. 21Ẽẽtĩ ꞌcĩ aꞌthũũnnĩ tilooinit caannĩ, ĩnõõnnõ ꞌcĩ ammĩnannaa nganĩĩta. Nẽ ẽẽtĩ ꞌcĩ ammĩnannaa nganĩĩt ko, ammĩnan hatĩ Baaba buúk ĩnõõnnõ, hammĩnani hatĩ naa buúk eet tĩho nẽ heteretheeha ẽlẽ caannĩ ĩnõõnnõ.”
22Baa aaĩ nuyyioohiti umwaa ꞌcĩ haĩ ꞌJuuda nẽ hõllõngaa ĩĩn ꞌJuuda Ithkarioote. Nĩngĩtĩ ajini nẽẽ Yeesu annẽẽkĩ, “Makayyioohit, inni nii teretheeheet ngagĩĩt ẽlẽ cunni nẽ hõllõngaa eterꞌtheehi eet cĩg looc nicci buúk ko?”
23Ẽdẽcĩ Yeesu ꞌJuuda anneek, “Má ammĩnannaa eet umwaa nganĩĩta, aꞌthũũnnĩ hatĩ nẽẽ ꞌlimman caannĩ. Ammĩnan hatĩ Baaba ĩnõõnnõ buúk nẽ hatĩ hiitaawa naag hĩ Baaba hẽtẽhẽnytaawa õlõ cĩnaang hĩ ĩnõõnnõ. 24Ẽẽtĩ ꞌcĩ hõllõngaa ammĩnannaa nganĩĩta, hõllõngaa aꞌthũũnnĩ nẽẽ ꞌlimman caannĩ. Thooꞌthioha ꞌcĩg athiknu hĩ nganĩĩt ko, hõllõngaa ĩĩn cĩgannĩg, ĩĩn thooꞌthiok ꞌcĩg Baaba baa ĩꞌthõõannaa nganĩĩta.
25“Haduhaakuung naa ngagiit thooꞌthiok iccig, nga harũmĩ hĩ ngagiita. 26Nẽẽthĩ, aku hatĩ Ellioohiti, Lorii ꞌcĩ Ẽllẽẽmĩth, ꞌcĩ hatĩ ĩꞌthõõa Baaba ꞌthaarĩĩ cĩgannĩg, hátĩ hikia hillimaneehuung thooꞌthiok vẽlẽk nẽ ummuhaahuung thooꞌthiok baag haduhaakuung naana. 27Haaꞌnyuung naa ngagiit ganõn, nganĩĩt dioo ꞌcĩ occa haaꞌnyuung ganõn icci. Aitiõõ ganõnĩ ciee hõllõngaa aduhõõ hĩ ganõn ꞌcĩ occa aaꞌnyuung eeta cĩg looc nicci. Nẽẽthĩ, ma haaꞌnyiku ꞌthinneeti hupuppudit hode ma hiteelinnu.
28“Baa ĩthĩktaangu niig nganĩĩt ngaatĩ haĩnnĩ, ‘Hõkõ naa ĩĩmwaanĩ nẽ hatĩ hõbõda tarĩ hĩ ngagiita.’ Má ammĩnannaangu niig nganĩĩt dĩdĩ, accamanoothiku hatĩ ngaatĩ hõbõdõõꞌthĩ naa hĩ Baaba, hĩnĩngĩtĩ maka nẽẽ hĩ nganĩĩta. 29Huduhaahuung thĩ ꞌyioko naa ngagiit thooꞌthiok iccig nga hẽdẽẽnyta nẽ ma ẽdẽẽnyta, iita thĩ hatĩ ẽlẽmtaangu nganĩĩta. 30Iittiõõ hatĩ ꞌyioko hõllõngaa hõthõõthõõ naag hĩ ngagiit ĩꞌthõng, hĩnĩngĩtĩ ikia habuui cĩ looc nicci. Nẽẽthĩ, hõllõngaa aꞌnyak nẽẽ ꞌtirrian ꞌcĩ ĩllõõanna nganĩĩta. 31Nẽẽthĩ, abũnnaa aga eeta cĩg looc nicci ngaatĩ hammĩnanĩĩ naa Baaba, nẽ hĩdĩmana thõõth ꞌcĩ aduhaaka nẽẽ nganĩĩt dĩdĩ. Hiita hõõtõ.”
© 2017, Wycliffe Bible Translators, Inc., All rights reserved.