MATHAIIN 15
15
Anthiang le Annim rui Eimanchu
(Mk 7.1-13)
1Hava han Jerusalem ata Pharisi le minchu ngai Isua kom ahonga ei ti u. 2“Na zolai ngai ichangmo tiana ulian ngai riti ei khel u? Asik chu sak asak u le akut rasu u mak.”
3Aman a masanga hangai rang, “Nang nim na riti u nei manlian u sika Pathian chongpek ichangmo nei khel u? 4Asik chu Pathianin ei ti, ‘Na pa le na nu lalchi tho u ro,’ hatuka ‘A pa mo a nu mo antir tak chu athi anang.’ #Ant 20.12; 21.17; Dan 5.16; Lev 20.9 5Tenchu nei ti u nu le pa ka koma nei sabei u na tak ha, ‘Pathian kom anpek ani zei,’ atei nu le pa lalchi tho nang lai mak. 6Hantin han tiana na riti u sika Pathian chong akorong nei manchang u. 7Phuazekam ngai Isai han nangni ei na ril u!
8Hiva mi ngai amura ana lalchi u a malunga #Isa 29.13 (LXX)
ka kom ata ala na ankhai.
9Hatuka hava ngai han ana biak papei u
miring chongpek ngai dikna tia a manchu!”
Imo Anannim
(Mk 7.14-23)
10Hanuk aman mi ngai akom akuia rangai u ro re u ro ati. 11“Baikuana alutin miring man nim mak tenchu bai ata asuak ha ke mi anan nim.”
12Hanke zolai ngaiin ahong dep u na ama rang ha, “Na riat mo Pharisi ngaiin hava chong ei riata malung ei ni nok,” ati pe u na. 13Aman a masanga, “Vana ka Pan ei ling nok kung chu phoia anpei inti,” ati pe. 14“Hangai ha om rase hangai ha acho ngai acho lam anruai acho ha achon lam a manmun aninin khura chul unti,” #Lk 6.39 15Pitorin a masang ama ha ati pe, “Hiva ankhina hi na manthei ro.”
16Aman, “Nang nim atun ten re luia nei la om u mo? ati. 17Hiva hi la re u mak che mo na baia alut tak na vona ase asuak reta anpei. 18Tenchu na mur ata asuak tak pei chu na malung ata ahong hatuka mi a mannim. #Mt 12.34 19Asik chu malung sung ata mandon asiat, mi that, uiare, annim, noti lam, milak chong antir rua ei hong. 20Hiva ngai doran mi a mannim tenchu, kut suk luia saka mi hava han mannim mak.”
Nupang Khat Iamna
(Mk 7.24-30)
21Hava suale Isua havan ata asena Tura le Sidon rama ase. 22Hatuka enta, sova rama Kanana nupang khat a honga ankheka ei ti, “O Puma, David Naipasal koi hi lungkham na mu ro! Ka nainupang sanai kachai ei o a duk ana sabak.”
23Tenchu aman ite masang mak. Hanke azolai ngaiin a kom ahonga ei hong mathem u na ei ti u, “Ama hi mathan ta ro asik chu hiva mi hi koini nunuka ankhek.” 24Aman a masanga, “Israel chi bera anpei ngai baka tute koma antir making,” ati.
25Tenchu nupang ha a honga ahonga moka, “Puma na san ro a hong ti.”
26Aman a masanga, “Nai ngai ranga sak ui ngai koma apei sa mak,” ati pe.
27Hava han aman ei ti, “Ani, Puma asik chu ui ngaiin um a puma kheng ata adi anoi asuan ha asak,” 28Hava han Isuan, “O nupang achan nei iam alian nei zot anga na tak chunga ni rase,” ati.Hatuka hava lai tak ata a nainupang adam.
Isuan Mitampa Mandam
29Hanuk havan ata ase na Galili tindil kola a honga suak hatuka muala a kala hava muna ansut. 30Hatuka a tampa mi a honga amanin abil u na akhor, acho, chongkului, aset hanuk atei atam mi atuanga a ke kunga ava buk u na aman alei mandam. 31Hantin han chongkului achonga, akhor kal achoi, acho ngai a mutheia, hava amu u na mi ngai achang ei mandong hatuka Israel a Pathian a manpak u na.
Mi Asang Manli a Mannek
(Mk 8.1-10)
32Hanke Isuan a zolai ngai apaia ei ti, “Hi mi ngai hi achan lungkham ka mu u asik chu hi ngai hi avian ninthum pei ka bila aleng u zei akom u na sak ite om mak hanuk angoia anse u rang zot making lampuia anvuai tham u rang keng.” 33Zolai ngaiin a kom, “Mi buina na hontinmo hidor vaipol man ma ni min ei khopna rang dor pei,” ati u. 34Isuan hangai ha, “Na kom u na itukmo vaipol a om, ?” ati na. Amanin “Sari, ngate alak te,” ati u na.
35Hanke aman mi ha, phila mansut u ro, ati na. 36Hava suale aman ha vaipol sari le ngate ituk lek mo a laka apham chunga akhiaka hatuka a zolai ngai apeka zolai ngaiin mi ngai apek u. 37Hava ha alom u na asaka akhop u hanuk anek anoi anniang hava han kok sari arut u. 38Asak ngai ha nupang le naipang anchel luia pasal asang manli ani. 39Hava suale mi ngai a mathana rakuanga a chuanga Magdala rikunga ava suak u.
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.