1 Johannes 5
5
Nirindam pa i luma
1Sako kaj pačal pe ke o Jesus si o Kristus, kerdjilas katar o Del. Taj savo kamel le Devles, kamel vi so kerdjilas lestar. 2O prindžarimos ke kamas le Devleske šavoren si te kamasa le Devles taj te inkras leski vorba. 3Te kamas le Devles, si te inkras leski vorba. Taj leski vorba na'i phari. 4Ke sa so kerdjilas katar o Del, nirila pa i luma. Taj so nirindas pa i luma, si amaro pačamos.
I vorba pa o Šav
5Save avera nirina pa luma? Ferdik kodo kaj pačal pe ke o Jesus si o Šav le Devlesko. 6Vo si kodo kaj avilas pajesa taj ratesa, o Jesus Kristus, na ferdik le pajesa, me le pajesa taj le ratesa. Taj o Duxo dikhlas taj phenel, ke o Duxo si o čačimos. 7Ke si trin kaj dikhle taj phenen: 8O Duxo taj o paj taj o rat, taj le trin phenen sa kode. 9Ame las opre i vorba katar le manuš, me i vorba katar o Del maj zurali si. Ke kadi si i vorba katar o Del: Vo phendas pa pesko Šav. 10Kodo kaj pačal pe and'o Šav le Devlesko, si les i vorba anda peste. Me kodo kaj či pačal pe le Devleske, kerelas les xoxamneske, ke či pačandas pe so phendas o Del pa pesko Šav. 11Taj kadi si i vorba: O Del das amen o trajo trajostar, taj kodo trajo si ande lesko Šav. 12Kodo kaj si les o Šav, si les o trajo, me kodo kaj na'i les o Šav le Devlesko, na'i les o trajo.
O trajo trajostar
13Kado ramondem tumenge te šaj žanen ke si tumen o trajo trajostar, tume kaj pačan tume and'o anav le Devleske Šavesko. 14Taj kado pačamos si amen anda leste, ke vo ašundel amen kana rudžinas anda varesos kaj les plačal. 15Taj kana žanas ke vo ašunel amen kana rudžinas les anda varesos, atunči šaj žanas ke aba dino si kodo kaj rudžinam. 16Te dikhela varekon peske phrales te kerel jekh bezex kaj či inkrel and'o merimos, atunči trubul te rudžil anda leste, taj o Del dela les o trajo — ferdik te na avela vo anda kodolende kaj keren o bezex kaj inkrel and'o merimos. Ke si bezex kaj inkrel and'o merimos, me či phenav pa o rudžimos anda kodo bezex. 17Sako nasulimos si bezex, me na'i sako bezex kaj inkrel and'o merimos. 18Ame žanas ke kodo kaj kerdjilas katar o Del, či kerel bezex, me te kerdilas katar o Del, atunči o Del lel sama lestar taj o Nasul či azbal les. 19Ame žanas ke ame sam katar o Del taj ke i intrego luma si and'o nasulimos. 20Ame žanas ke o Šav le Devlesko avilas, taj ke vo sičardas amen te prindžaras le Čačes. Taj ame sam ande leste, o Čačo, ame kaj sam ande lesko Šav, o Jesus Kristus. Vo si o čačo Del taj o trajo trajostar. 21Mure šavora, len tume sama katar le xoxamne dela!
© Det Norske Bibelselskap (Norwegain Bible Society) 1984