San Juan 9
9
Jnko nkexro tsíkokjíexíen tꞌikonhña kuito̱he jína
1A̱ndá ti ó kjuíji sin nti̱a la chꞌin Jesús kꞌuíkon ijnko nkexro tsíkokjíexíen tꞌikonhña. 2Ndá ti sin kꞌuájiko chꞌan la kjuanchankí sin ndáchro sin:
―Maestro, ¿nkekuènté tsíkokjíexíen ti nkexro i tꞌikonhña? ¿Á iji̱é ti itꞌé chꞌan o̱ ti ìñé chꞌan o̱ á iji̱é chꞌan?
3Ndá kjuáte̱he chꞌin Jesús, ndáchro:
―Jehya iji̱é ti nkexro i la ko jehya iji̱é ti itꞌé chꞌan la o̱ ti ìñé chꞌan. Náhí. Xi̱kaha tsíkóhen kixin Díos mé tsja̱ko̱xi̱n ti kjuachaxin kuènté tsito̱exín jína ti nkexro tꞌikonhña i. 4Ijie ti na̱xa̱ ncha̱kotjin la ticháxi̱n si̱tꞌa ti ixra̱ tjinkaon ti nkexro ichrꞌána kꞌuinka kixin ti ó tsꞌixin tie la ninkexró xrokjuahya ichꞌe ixra̱. 5#Mt. 5:14; Jn. 8:12.*Ti na̱xa̱ itjén ntihi chjasintajni mé janhan ti xrohi tꞌinkaséñaxín ti chjasintajni.
6Ndá ti ó kjuixin ndáchro chꞌan tíha, ndá kui̱ki̱te chꞌan nta̱té chꞌan intsí inche la kjuíchꞌéna chꞌan nche̱tꞌo̱, ndá kotèya chꞌan ikon ti nkexro tꞌikonhña, 7la kꞌue̱to̱an chꞌan ndáchro chꞌan:
―Sátjia ti pila tjiá ìnta̱ itꞌin Siloé la tꞌontia ti ikuan. (Siloé mé ngive̱e sin la tꞌaxrjexín kꞌuítuehen.)
Ndá sákjuí ti nkexro tꞌikonhña, la kꞌónti ti ikon, ndá ti ó ikjan la ó jína tꞌikon. 8Ndá ti sin tjejó chjinaxón ti ndo̱e chꞌan la ko ti sin kuékꞌikon kixin tꞌikonhña chꞌan mé ndáchro sin:
―¿Á jehya ti nkexro i, ti nkexro kuékꞌikonhña kꞌuékjanchakꞌá ní?
9Ndá iso sin ndáchro:
―Kjá jehe chꞌan.
La íso sin ndáchro:
―Náhí, jehya chꞌan. Ó tóyóhó ti nkexro a.
Kjánchó jehe chꞌan ndáchro chꞌan:
―Chaxín janhan.
10Ndá kjuanchankíhi sin chꞌan:
―¿Nkexrín kixin ijie la ó tꞌíkuan?
11Ndá kjuáte̱he chꞌan ndáchro chꞌan:
―Ijnko nkexro itꞌin Jesús mé kjuíchꞌéna nche̱tꞌo̱ kjuatematóxin ti ikua̱n la kꞌue̱to̱an kixin sátsjia ti pila tjiá ìnta̱ nchekꞌin sin Siloé la tsꞌontia ti ikua̱n, ichro chꞌan. Ndá sákjuia ntiha la kꞌontia, ndá xrína̱hña ó kꞌuíkua̱n jína.
12Ndá kjuanchankíhi sin chꞌan:
―¿Nketí itjen ti nkexro a?
Ndá ndáchro chꞌan:
―Nónahña.
Ti sin fariseo la ko ti nkexro kuékꞌikonhña
13Ndá ti sin ikjo chꞌan senó la sákjuíko sin ti jehe chꞌan, sákjuichréhe̱ sin ti sin fariseo. 14Mé ti ña̱o a, la ti ña̱o to̱kꞌéhe sin mé tsíkjichꞌéna chꞌin Jesús ti nche̱tꞌo̱ la tsíkjinchekito̱exín jína ti nkexro kuékꞌikonhña. 15Ndá ti sin fariseo kjuanchankíhi sin ti nkexro a nkexrín kuito̱he jína. Ndá kjuáte̱he chꞌan, ndáchro chꞌan:
―Ti nkexro a la kjuatematóxin nche̱tꞌo̱ ti ikua̱n, ndá kꞌontia la ijie la ó tꞌíkua̱n jína ―ichro chꞌan.
16Ndá iso ti sin fariseo ndáchro:
―Ti chꞌin kjuíchꞌe tíha la jehya kuènté Díos kixin chóntahya kjuasàya ti ña̱o to̱kꞌéheni.
Kjánchó íso sin ndáchro:
―¿Xá nkexrín kixin ijnko nkexro chónta ijie̱ chrókjuasin ijnko kjuaxroan ijié xi̱kaha?
Mé xi̱kaha nkokónhña kjuénka̱yáxin sin. 17Ndá xíkjanchankíhi sin ti chꞌin kuékꞌikonhña ínaá:
―¿Ndá jaha nkechrua, nkexro ti chꞌin kjuínchekito̱he jína ti ikuan?
Ndá kjuáte̱he chꞌan, ndáchro chꞌan:
―Janhan ndáxrja̱n kixin jehe chꞌan mé ijnko nkexro chronka itén Díos.
18Kjánchó ti sin judío la kuítekakonhña sin kixin chaxín kuékꞌikonhña ti nkexro a. Ndá kꞌuéye̱he̱ sin ti itꞌé la ko ti ìñé chꞌan kixin tsochronka sin 19la kjuanchankí sin, ndáchro sin:
―¿Á tíhi ti xja̱anra ndáchrora kixin tsíkokjíexín tꞌikonhña ní? ¿Ndá nkexrín kixin ijie la ó tꞌikon chꞌan?
20Ndá kjuáte̱he ti itꞌé la ko ti ìñé chꞌan, ndáchro:
―Chaxín tíhi mé ti xje̱eni la ko chaxín noheni kixin ti kokjíexin chꞌan la tꞌikonhña chꞌan, 21kjánchó noehñani nkexrín kixin ó tꞌikon chꞌan ijie la ko noehñani nkexro kjuínchekito̱he jína ti jehe chꞌan. Tjánchánkíhíra chꞌan, ó ijié chꞌan, ndá jehe chꞌan tsochronka chꞌan nkexrín kuíto̱he chꞌan jína.
22Mé xi̱kaha kjuáte̱he sin kixin chráko̱nhe̱n sin ti sin judío kixin ó kuíhin sin kixin ti nkexro tsitekaon ti chꞌin Jesús, ti Cristo, mé tsakítsjexín sin ti ni̱nkué sin. 23Méxra̱ ndáchro ti itꞌé la ko ti ìñé ti nkexro kuékꞌikonhña kixin jehe sin chrókjuanchankíhi sin ti nkexro kuito̱he jína kixin ó ijié chꞌan la ó nohe chꞌan tsochronka chꞌan.
24Ndá ó yaáxin kꞌuéye̱he̱ ti sin judío ti nkexro kuékꞌikonhña, la kjuanchankíhi sin:
―Chro̱nka ndoá kixin Díos tjetsjehe kixin ó noheni kixin ti chꞌin a la chónta ijie̱ ―ichro sin.
25Ndá ti nkexro kuékꞌikonhña la kjuáte̱he ndáchro:
―Nónahña á chónta chꞌan ijie̱ o̱ náhí. Jehó nona kixin senó la kuékꞌíko̱nhña, a̱ndá ijie la ó tꞌíkua̱n.
26Ndá xíkjanchankí sin ínaá:
―¿Nkexrín kjuíchꞌe ti nkexro a kixin ó jína tꞌíkuan?
27Ndá ndáchro chꞌan:
―Ó kjuixin tjo̱nka̱ra, kjánchó titekákonhñara. ¿Ndá nkekuènté tjinkáonra tso̱xrja̱nka ínaá? ¿Á kja̱xinra tjinkáonra tsochrehéra chꞌan ní?
28Ndá kónínkaon sin la kꞌuándaxíhi̱n sin chꞌan la ndáchro sin:
―Jaha la chréhé ti nkexro a. A̱ndá jeheni la jehó chréhe̱ni ti nkehe kꞌue̱to̱an Moisés. 29Ó noheni kixin Díos kꞌuénixje̱he̱ Moisés. A̱ndá ti nkexro a la noehñani nketí tsíkji̱xi̱n chꞌan.
30Ndá kjuáte̱he ti nkexro kuékꞌikonhña la ndáchro:
―Chaxín ijnko kjuaxikaon tíha. Ti nkexro a mé kjuínchekito̱he jína ti jeheni, a̱ndá jahara ndáchrora kixin noahñara nketí tsíkji̱xi̱n chꞌan. 31Ó noheni kixin Díos la tienhña chꞌan ti nkehe tjanchia ti chojni chónta ijie̱. Jehó tihin chꞌan ti nkehe tjanchia ti nkexro titekaon la ko nchexiteyá ti nkehe tjinkaon chꞌan. 32Nunca kienhñani kixin ijnko nkexro chrókjuínchekꞌikon ijnko chojni tsíkokjíexíen tꞌikonhña. 33A̱ndá ti nkexro a ti chrókui̱xi̱nhña ti itjen Díos la ninkehó kjuaxroan chrókjuasinhña.
34Ndá kjuáte̱he ti sin fariseo, ndáchro:
―Jaha la ndesi ti tsíkokjíha la chonta ijie̱. A̱ndá ijie, ¿á jaha tjinkaoan chrókjuákohéni ní?
Ndá kótéka sin ti nkexro kuito̱he jína kuakitsjexín sin ti ni̱nkué sin, sákjuí chꞌan.
Ti sin chaxín tꞌikonhña
35Ndá kuíhin chꞌin Jesús kixin xi̱kaha tsíkjichꞌe ti sin judío, tsíkakítsjexín sin ni̱nkué sin ti nkexro kuékꞌikonhña. Ndá ti ó xéta chꞌin Jesús ti nkexro a la kjuanchankíhi chꞌan:
―¿Á titekaoan ti Xje̱en Díos kꞌóna chojni ní?
36Ndá kjuáte̱he ti nkexro a, ndáchro:
―Tjákohéni nkexro tíha ndá tsitekaoni ti jehe chꞌan.
37Ndá kjuáte̱he chꞌin Jesús ndáchro:
―Ó kꞌuikuan jaha. Janhan mé ti nkexro tétjuá.
38Ndá ti nkexro a la kjuákꞌexín tochꞌin ti itjen chꞌin Jesús, la ndáchro:
―Ijie titekaoni ti jaha, Ìnchéni ―ichro chꞌan la kjuikosáyehe chꞌan.
39Ndá ndáchro chꞌin Jesús:
―Kꞌuinka chjasintajni kixin si̱ntaki̱to̱axian iji̱é chojni kixin ti sin tꞌikonhña la tsꞌikon, a̱ndá ti sin tꞌikon la tsokjan sin ntakótán#9:39 ntakótán tꞌikohña sin ciego.
40A̱ndá iso ti sin fariseo kꞌuejóntaxín kuíhin kixin xi̱kaha ndáchro chꞌin Jesús, ndá kjuanchankíhi sin chꞌan:
―¿Xá kja̱xini tꞌikonhñani ní?
41Ndá kjuáte̱he chꞌin Jesús, ndáchro:
―Ti jahara chaxín chrókꞌuíkonhñara la chróchontahyara ijie̱, kjánchó ndáchrora kixin tꞌikonra, méxra̱ chontara ijie̱.
© 2016, Wycliffe Bible Translators, Inc. All rights reserved.