San Juan 10
10
Éxi ti tꞌinkachjina kolélo
1Ndá ndáchro chꞌin Jesús:
―Chaxín ndáxrja̱n kixin ti nkexro tsꞌixehen ti tꞌinkachjina kolélo, ndá jehya ti puerta kuènté korra tsꞌixexín, la ókjé nketí tsꞌixexín, mé xíche̱e tíha. 2A̱ndá ti nkexro tꞌixenxín ti puerta la mé ti nkexro tꞌayakohen ti kolélo. 3A̱ndá ti nkexro tjenta ti puerta la tsakitje̱he̱ ndá tsꞌixehen ti nkexro tꞌayakohen ti kolélo. A̱ndá ti nkexro a mé tsꞌéye̱xi̱n ti kolélo a nkojnko ti ihni̱é va, a̱ndá ti kolélo mé tsjatso̱an va itén ti nkexro a, ndá tꞌaxrjexín va ti korré va. 4Ndá ti ó tsjixin tsꞌaxrje va kaín va, ndá tjetaón chꞌan nti̱a la tsinkáchréhe̱ va kixin ó tjatso̱an va ti itén chꞌan. 5Kjánchó chrèhya va ókjé chojni chóxinhña va, jehó tinkéhe va ti jehe sin kixin tjatso̱anhña va ti itén sin.
6Mé xi̱kaha kjuíncheyóe̱xin chꞌin Jesús, kjánchó kienxínhña sin nkehe tꞌaxrjexín tíha.
Chꞌin Jesús mé ti pastor jína
7Ndá ínaá chrónka chꞌan:
―Ijnko nkehe chaxín tso̱tjo̱nkara, janhan mé ti puerta tꞌixenxín ti kolélo. 8Kaín ti sin kuitónxin nti̱a ikui mé xíche̱e sin. A̱ndá ti kolélo la ándo̱sén va, kuitekakuenhña va ti jehe sin. 9Janhan mé ti puerta, a̱ndá ti nkexro tꞌixenxín ti puerta i la tsaá la tsꞌóna éxi ti kolélo tsꞌixehen ti korré la ko tsꞌaxrje la tsꞌitja kayoa náxrjón sinie.
10’Ti xíche̱e mé jehó itji kixin tjinkaon tseé, tsꞌóñá la ko sinchekꞌitjáña. A̱ndá janhan kꞌuinka kixin tsochontara kjuachón, la kjuachón nkochríxín. 11Janhan mé ti pastor jína, ti pastor jína tsꞌenyákohe̱n ti kolélo kuènté. 12A̱ndá ti nkexro xenkehe kixin tsꞌayakohen ti kolélo mé ti ó tsꞌikon itsi ijnko konda̱níxra la tsíto̱he ti kolélo la tsinká sátsji kixin jehya kuènté ti kolélo la ko jehya ti nkexro chaxín tꞌayakohen va. Ndá ti konda̱níxra mé tsotsé va ti kolélo, ndá kaín ti íso va la tsinká va la sátsjichroe va. 13Mé xi̱kaha ti nkexro i la tsinká kixin jehó tjinkaon tsjacha kixin ti ixra̱ kjuíchꞌe la ti̱konoéhña ti kolélo.
14-15 #
Mt. 11:27; Lc. 10:22. *’Janhan mé ti pastor jína. Éxi Tꞌaná chóxin ti janhan mé xi̱kaha choxián ti jehe chꞌan. La xi̱kaha choxián ti kolélo kuénta̱na la ko jehe va mé chóxin va ti janhan la tsꞌenyakoha̱n ti jehe va. 16Kja̱xin chonta íso kolélo na̱xa̱ jehya ntihi korré va, la kja̱xin ticháxi̱n sátsjikakjián va. Ndá tsitekakoan va ti janhan ndá tso̱nkojié va la tsꞌóna nkoko̱a korré va la ko nkoko̱a ti nkexro tsꞌayakohen va.
17’Tꞌaná la tjue̱he ti janhan kixin kjónté itsꞌén la tsoxéchuan ínaá. 18Ninkexró tsjachahya tsakitsjena ti kjuachón chonta kixin janhan tsjájua tíha. Chonta kjuachaxin tsjájua tíha kixin itsꞌen, la ko chonta kjuachaxin tsoxéchuan ínaá. Tíhi mé kꞌue̱to̱an Tꞌaná ―ichro chꞌin Jesús.
19Ndá ti ó kuíhin ti sin judío ti nkehe ndáchro chꞌin Jesús, ndá kjuankíxin nkoko̱ahya kjuénka̱yáxin sin. 20Ndá itsjé ti sin a ndáchro:
―¿Nkekuènté tihínra ti nkehe ndáchro chꞌan? Jehe chꞌan la chónta chꞌan ncha̱kuén jínahña la ko loco chꞌan.
21Ndá íso sin ndáchro:
―Xi̱kahya chrónixja ijnko chojni chónta ncha̱kuén jínahña. Ijnko ncha̱kuén jínahña la, ¿á jína chrókjuínchekꞌikon ijnko chojni tꞌikonhña ní?
Ti sin judío kuitekakuenhña sin chꞌin Jesús
22A̱ndá ti nitjó imá ikin la ti chjasin Jerusalén kꞌuíxin ti kia xraxinkakonxín sin ti ña̱o tsíkjixin tsíkꞌóna ti ni̱nkué sin. 23Ndá chꞌin Jesús kjuákꞌe ti ni̱nko, ti nda̱sin kuènté Salomón 24la ti sin judío kuántatjen sin chꞌan la kjuanchankí sin:
―¿Hasta nkesá tsꞌejóchóheni tsihini jína? Ijie chro̱nka á chaxín jaha ti Cristo ―ichro sin.
25Ndá kjuáte̱he chꞌin Jesús:
―Ó tjo̱nka̱ra, ndá na̱xa̱ titekákonhñara. Kaín ti ixra̱ tjétꞌa̱ la kjuachaxin kuènté Tꞌaná, la tíhi tja̱ko̱xi̱n nkexro ti janhan. 26Kjánchó jahara la titekákonhñara, kixin jehya kolélo kuénta̱na éxi tjo̱nka̱ra senó. 27Ti kolélo kuénta̱na la tjatso̱an va ti taná la ko kja̱xin janhan tjátso̱an ti jehe va, la ko jehe va mé chréhe̱ va ti janhan. 28Janhan mé tja̱ha̱ va ti kjuachón nkochríxín la í tsꞌitjáñahña va la ko ninkexró tsjachahya tsakítsjexín va ti tjaná. 29Tꞌaná, ti nkexro kjuajon ti jehe va, mé a̱ntsí tꞌe̱to̱an chꞌan, la ninkexró tsjachahya tsakítsjexín va ti itja chꞌan. 30Janhan la ko Tꞌaná mé nkoko̱a nkexro.
31Ndá ti sin judío kónínkaon sin la kuákja sin ixro̱ chrókjuatexin sin chꞌan ínaá. 32A̱ndá chꞌin Jesús ndáchro:
―Itsjé nkehe jína kꞌuíkonra kjuáko̱xián kjuachaxíen Tꞌaná. ¿Ndá nkehe nduáhya kjuàkua kixin chrókꞌo̱ka̱xinra ixro̱?
33 #
Lv. 24:16. *Ndá kjuáte̱he ti sin judío, ndáchro:
―Jehya kixin ti kjuaxroan jína kjuásian ndá chrókꞌoka̱xini ixro̱. Náhí. Jaha ijnko chojni ó ndá chꞌéna a̱sán Díos, mé xi̱kaha chrókꞌoka̱xini ixro̱.
34 #
Sal. 82:6. *Ndá ndáchro chꞌin Jesús:
―Ndáchro xroon itén Díos tsíkjin sin ósé: “Kja̱xinra jahara éxi Díos xi̱kaha.” 35Ó nohara nkehe ndáchro xroon itén Díos, la xitjahya tsitekákonhñara. Mé xi̱kaha ndáchro Díos kixin nkojnko nkexro kꞌuáyéhe̱ itén chꞌan mé tsꞌóna sin éxi Díos. 36A̱ndá Díos mé kjueyá ti janhan la ichrꞌána chjasintajni, ¿ndá nkekuènté ndáchrora kixin janhan kꞌuándaxíha̱n Díos kixin ndáxrja̱n kixin janhan mé ti Xje̱en Díos? 37Ti chrókjui̱tꞌahya ti ixra̱ ichꞌe Tꞌaná la chrókuitekákonhñara. 38A̱ndá ti chaxín tjétꞌa̱ ti ixra̱ a, a̱ndá kjónté titekákonhñara ti janhan, kjánchó chrókuitekáonra ti ixra̱ tjétꞌa̱ la chrókiénxinra kixin Tꞌaná la ko janhan mé nkoko̱a nkexro.
39Ndá ínaá chrótsé sin ti chꞌin Jesús kixin chrókjuakꞌechjina chꞌan, kjánchó jehe chꞌan la sákjuí chꞌan.
40 #
Jn. 1:28. *Ndá chꞌin Jesús xíkjan ti tóhe nda̱río Jordán ti kjuákꞌe chꞌin Juan kꞌuéki̱ki̱te chojni senó. 41Ndá itsjé chojni sákjuichréhe̱ sin chꞌan kjuitsjehe sin la ndáchro sin:
―Chaxín chꞌin Juan kjónté kjuasinhña kjuaxroan ijié, la ti nkehe chronka chꞌan kuènté ti nkexro i la chaxín ndoá ―ichro sin.
42Ndá itsjé ti sin tjejó ntiha la kuitekaon sin ti chꞌin Jesús.
© 2016, Wycliffe Bible Translators, Inc. All rights reserved.