Luk 20
20
Yesu ina rewapana imapatana iviiya?
(Mat 21:23-27; Mak 11:27-33)
1Mara sago Yesu Taparoro Numana garina kamonai wawaya ivivi beyebeyesi ma God varana biibiina idimadimei. Ma taparoro babadisi i babada, vonaviyoyovana vibeyebeyena wawayisi ma Jiu damsi i babada ipisi kurina, 2da ivi tarakiiyanei bo, “Kevonekai, am rewapana imapatana kuviiya da weni berasi keberaberai? Iyai weni rewapanina iverem?”
3Ma ivonapotesi bo, “Taku bade ani tarakiiyanemi. Kovoneku, 4Jon ina rewapana imapatana iviiya da ibabataito? God gwabinai bo wawaya gwabisiyai?”
5Ma wawayisi ivi karei da ti mani kamosiyai ivivi sisiya bo, “Ikikava tavonapotei? Mikeda tavona bo, ‘God gwabinai,’ na ina voneta bo, ‘Ma avi kubiine da Jon ke koti tumaghanei?’ 6Ma mikeda tavona bo, ‘Wawaya gwabisiyai,’ na weni korotona kudubina wakimiyai ina ravita da ini rabobota, iyamna ti namada ivi tumaghana da Jon na God ina peroveta.” 7Tuna kubiine wawayisi ivonapotei bo, “Ke katakovi da imapatana iviiya.”
8Ma Yesu ivonesi bo, “Nakanani na bade ke ana vonemi da imapatana aku rewapana aviiya da weni berasi aberaberai.”
Vao kana koyakoyagha miibiina.
(Mat 21:33-46; Mak 12:1-12)
9Yesu miibiiyai ivi sisiya wawaya kurisi. Ivona bo, “Mara sago tomowa sago greipi ivoni ina vao kamonai ma vao na wawaya ku imasi iterei da ita koyaghi. Ma tuna inumataya ku dobu sago da imakii kirakai. 10Greipi imenai da pura kana mara na vao badana ina bigabiga ivonatawei da kana reregha ita viiya. Ma koyakoyagha wawayisi ivomiiri da bigabigana iravi ma imana kwebuna kava ivonatawei ivovira. 11Muriyai bigabiga kana viruwa ivonatawei. Ma bade tuna iravi ma iyeghaberoberoi ma imana kwebuna kava ivonatawei ivovira. 12Ma bigabiga kana viaroba ivonatawei ma koyakoyagha wawayisi tuna bade iravi da ivi sidari ma gari ku kupuna itawanakiibuwei. 13Vaghina ma, vao badana ivona bo, ‘Aviyavisina ana berai? Natuku, tuna nuwanuwaku ana vonatawei na mikeda ina vokaravei.’ 14Koyakoyagha wawayisi natuna ikitai na ivi ogatara. Ivona bo, ‘Wena vao badana natuna. Takiivunui ma tano buderina tirapenei.’ 15Vaghina ma, vao kamonai itawanakiibuwei da kupunai ikiivunui.”
Ma Yesu ivi tarakiiyanesi bo, “Vao badana na aviyavisina ina berai koyakoyagha wawayisi kurisi? 16Ina pisi da nani wawayisi ini kiivunuwana ma vao na dam viruwa ina veresi da ina koyaghi.”
Koroto ghamana weni sisiyina ivi yanei na ivona bo, “Kara ke kovokovoghina da nakanani ina tupuwa!”
17Ma Yesu ikitatupesi ma ivi tarakiiyanesi bo, “Giruma katamana weni nakanani evonavona na iyamna koakovi bo kegha? Ivona bo,
‘Vonura damsi wakima ibarei,
Ma Bada nani wakimina iviiya ma iterei
da tepanai numa vuna ivowai.’#Psa 118:22
18Meni wawayina ina peku wakimina ku tepana na ini kiigiigiiyei. Bo wakimina meni wawayina ku tepana ina peku na wawayina ina kiigudagudai.”
Teks ini miiyei Sisa kurina bo kegha?
(Mat 22:15-22; Mak 12:13-17)
19Vonaviyoyovana vibeyebeyena wawayisi ma taparoro babadisi i babada iakovi da Yesu miibiiyai ivivi avaberowesi. Tuna kubiine i kayowana da yaghiyaghinai ita patumi ma koroto ghamana iyabumanesi da ke kovokovoghina. 20Tuna kubiine taraboga iekwai na wawaya viya ivonatawesi kurina, iti bero da nakanani ma wawaya maninisi. Iti kaetina da maranai Yesu iti sisiya bero na iti wavui ma Pailat ku imana ita terei, tuna tomowina Rome damsi ivinei da Judiya dobuna ivivi badei. 21Ma vibero wawayisi ipisi Yesu kurina ma ivona bo, “Bada, kakovi da tam ke kuta vivimiiriruwaruwa ma am sisiya na maninina. Ke wawaya sago ku murina kuta miimiiri ma sago na kegha, tuna kubiine vonavaghata kava kibeyebeyena da God ina keta kidebei. 22Ma, kivaghinei da teks kani miiyei Kiivavo Sisa kurina bo kegha?”
23Ma Yesu iakovi da wawayisi ivivi kaetina na ivona bo, 24“Mane sago kovereku ana kitai.” Ikitai ma ivona bo, “Wena iyi maghighina, ma iyi kana vava?”
Ma ivonapotei bo, “Kiivavo Sisa.”
25Ma Yesu ivona bo, “Vaghina. Aviyavisina Sisa rapenai na Sisa kona verei. Ma aviyavisina God rapenai na God kona verei.”
26Koroto ghamana maghinosiyai ma nakanani ivivi sisiya na vibero wawayisi ivi yanei na ivi deyei da kawasi ipota. Ma ke kovokovoghina da iti wavui.
Raborabobosi ina vomiiri bo kegha?
(Mat 22:23-33; Mak 12:18-27)
27Sadusi damsi inotanotai da wawaya ina rabobo na muriyai ke ina vomiiri. Ma viya ipisi Yesu kurina ma ivona bo,#Apos 23:8 28“Bada, Moses ita vonaviyoyovana kamonai weni nakanani igirumi. ‘Tomowa ina rabobo da kawana ina verukuyowei ma natunatusi kegha na varesina sago kwapurina ina ravaghi da ini tuwa. Ma nani ededisi na tomowina raborabobona natunatuna.’ ”#Deut 25:5
29“Vaghina, mara sago rakaraka sago kamonai na tomotomowa miikovimaruwa. Iyarokona itavine ma irabobo ma natunatuna kegha. 30Ma kana kiitana kwapurina iravaghi da bade ke iti tuwa ma irabobo. 31Ma kana viaroba bade nakanani. Vaghina, nakanani miikovimaruwa peyarisi kwapurina sago iravaghi ma ke sago iyai iti tuwa, ma peyarisi irabobomakai ma natunatusi kegha. 32Turina vaghata na kwapurina irabobo. 33Ma mara damonai wawaya ina vomiiri na wavinena na iyi kawana? Nani tomotomowisi peyarisi miikovimaruwa iravaghi.”
34Ma Yesu ivonapotesi bo, “Karako dobuwai na tomowa ma wavine etatavine. 35Ma mara damonai iyavo kava God ivinesi da ina wawaya kiikiimatanisi na rabobowai ina vomiiri. Mara vuna ini karei ma nani kamonai wawaya ke meyani ina tavine. 36Ti na God ina aneya nakanani, ke meyani da ina rabobome. Ma rabobowai ivomiiri kubiine, ti na God natunatuna. 37Ma Moses kiikiirukuna ikarakarai na ivi varagutugutui. Ma kamonai God ivona bo, ‘Abraham, Aisiki, ma Jeikap i God na Taku.’ Ivi beyebeyeta da raborabobosi ina vomiiri. #Exod 3:6 38Tuna wawaya yawayawasisi i God, ke raborabobosi i God. Wawaya kudubisi na yawayawasisi God ku matana.”
39Ma vonaviyoyovana vibeyebeyena wawayisi viya ivonapotei bo, “Bada, kuvona bubuna.” 40Ma nani murinai na ke sago wawaya iti tepatora da iti tarakiiyanei.
God ina Vivinevine Wawayina na iyi tupurereghina?
(Mat 22:41-46; Mak 12:35-37)
41Ma Yesu ivonesi bo, “Ikikava na wawaya evonavona da God ina Vivinevine Wawayina na David tupurereghina? 42Ma David, Psalms kamonai igiruma bo,
‘Bada God aku Bada kurina ivona bo,
Katagheyakuwai kuna makamakai
43da kam ghavighaviya kudubina ku kae gaburim ana teresi.’#Psa 110:1
44David evonavona da God ina Vivinevine Wawayina na ina Bada. Ma ikikava da God ina Vivinevine Wawayina na bade David tupurereghina?”
Vonaviyoyovana vibeyebeyena wawayisi na miiriruwaruwasi.
(Mat 23:1-36; Mak 12:38-40)
45Wawaya peyarisi ivivi yana ma Yesu, kana kivikivina ivonesi bo, 46“Kokitaruvimi! Ke kona berai da vonaviyoyovana vibeyebeyena wawayisi nakanani. I kayowana da ini wawayaghama. Tuna kubiine gara rurukarukaruwesi ikote ma ebababa, ekayokayogesiro. Ma i kayowana da vigimagimara gawarisiyai wawaya ina vokaravesi ma ini kiikiiwesi. Ma bade i kayowana da kiki numasiyai ma kamporaghai babada kii gawariyai ina makai. 47Kwapukwapura iberoberowesi da i numa ma i sawara irapenei, ma ekayokayotata da eniponipowana guriguri. Wawaya nakanani na kovogha bero kirakiina ina viiya.”
© 2009, Wycliffe Bible Translators, Inc. All rights reserved.