GENESIS 7
7
Say Delap a Baleg
1Inkuan na Katawan ed kinen Noe, Loob kad biong, sika tan amin a kabyangay pamilyam, ta nalmoan ko a diad intiron mundo sika labat so matonung ed arap ko. 2Mangawit kay pitoran kaparis ed amin a klasiy ayep a malinis, balet sankaparis labat ed amin a klasiy ayep a marotak. 3Mangawit ka met na pitoran kaparis na balang klasiy manok. Gawam ya, pian amin a klasiy ayep tan manok et nabilay ira tan walay napanmonatan ed intiron tapew na dalin. 4Pitoy agew ni, manlapud natan, paoranen ko ed loob na apataploy agew tan apataploy labi, pian naderal ya amin iray mabilay a pinalsak ed tapew na dalin. 5Sinumpal nen Noe ya amin iray ingganggan na Katawan.
6Anem a lasus so taon nen Noe nen adelap so mundo. 7Sikato tan say asawa to, saray anak ton lalaki tan saray kaasawaan da et linmoob irad biong, pian ag ira ompatey ed delap. 8-9Onung na ingganggan na Dios ed Noe, akilad kinen Noe diad dalem na biong iray sankaparis ed amin a klasiy ayep tan manok, malinis man o marotak onung ed ganggan. 10Kalabas na pitoy agew, sinmabiy delap.
11Nen mantaon si Noe na anem a lasus taon, diad kumalabimpiton agew na kumadwan bulan, sinmasangi ray dalin tan pinmapaway iray ankakabaleg a sobul ed dalem na dalin tan linmokas ya amin iray puirtay tawen, 12tan inmoran ed dalin na apataploy agew tan apataploy labi. 13Diad saman ya agew, si Noe tan say asawa to et linmoob irad biong a kaiba da ray anak dan lalaki a di Sem, Ham, Jafet, tan saray kaasawaan da. 14Kaiba ra met ya amin iray klasiy ayep, atap man o amo, baleg man o melag, tan amin a klasiy manok. 15Onung na ingganggan na Dios, sankaparis ed amin a klasiy mabilay a pinalsa 16iray kaiba nen Noe a linmoob ed biong. Insan kinaputan na Katawan si Noe ed dalem na biong.
17Ag tinmondan inmaralem so delap ed loob na apataploy agew, ya anggad linmetaw imay biong. 18Inmaralem niy danum, tan manletletaw imay biong. 19Inmaralem lan inmaralem tan asalinap ton amin iray sankaatageyan a palandey; 20siansian inmaralem ya anggad pitoran mitroy kaatagey tod toktok na saray palandey. 21Inatey ya amin iray pinalsan mabilay ed tapew na dalinamin a manok, amin ya ayep, tan amin a too. 22Inatey ira yan amin sirin. 23Dineral na Katawan ya amin iray mabilay ed tapew na dalinsaray totoo, saray ayayep, tan saray manok. Si Noe tan saray kaiba tod dalem na biong so mabilay labat. 24Ag inmabebay danum ya anggad kalabas na sanlasus tan limamplon agew.
Philippine Bible Society New Testament © 1977, Bible © 1983