THRÜNTAN 29
29
Jakob Laban Yam Khiungkhi
1Jumonü Jakobnü hantsahde yü tüsho aniakhiuklim mihtsürü lomi ching arü. 2Apinü kheah, tüsho thulu ching kekhip khülang ngü; tüsho ju mükamde namfimihnu boto mahsam yapa lakheah; tümüde ju ke chingnü arünü namfimihnu boto ke duhde alakheah. Kekhip mün kheak lung ato khülang lakheah. 3Küyimki namfimihnu boto alala ju ching rukhüh mukhungbanü, namfimihnu neakrünü lung ju kekhip mün kheaknü thülah-a tsoshih tüsho namfimihnubo ke duh. Jushu arünü lung ju kekhip mün kheak hanlode arünü zo.
4Jakobnü namfimihnu neakrübo ki keokhi, “I keoniorübo, nüsa küchingnü a?” Arünü alo, “Isa Haran chingnü ah.” 5Apinü arü ki tha, “Nüsanü Nahor tsührü Laban mükheahnah?” Arünü alo, “Am, isanü api mükheahlah.” 6Jakobnü arü ki keo, “Api tsüde lashi?” Arünü alo, “Am, api tsüde lah,” tüsho arünü tha, “Ha ching atsührübe Rachel namfimihnubo lung arüchoh.” 7Apinü tha, “Kheahang, kheaküshe ani achang kihlah; ha namfimihnu boto bemukhungpü kim yung. Namfimihnubo ke duhang tüsho arübo rimlopung ching belode yüang.” 8Arünü alo, “Namfimihnu boto alala kitmukhungbah kekhip mün kheaknü lung thülah-a mübahyi khiungde isanü müthsükhuk. Jushu lang isanü namfimihnubo ke duhbah.”
9Apinü arü ki thade alachoki, Rachel ju abuh namfimihnubo bebah arü; tümüde alibe namfimihnu neakrü lakheah. 10Küyimki Jakobnü Laban tsührübe Rachel, tüsho abe akhiung Laban namfimihnubo ngükhea, apinü yü tüsho lung ju kekhip mün kheaknü lah-a bah tüsho akü namfimihnubo ke duh. 11Jushu Jakobnü Rachel müthsüp tüsho achangnü trip. 12Apinü anihbuh ju alibe abuh betsührü tüsho Rebeka tsührü ah de Rachel ki tha, jumonü alibenü yübah abuh ki tha.
13Labannü aniurü tsührü Jakob dünkheak thiyusheak soakede apinü anihbuh shorupü niokheamde yü. Apinü api kap tüsho müthsüp tüsho api yam ching bede arü, tüsho alala dünjikhi Jakobnü api ki thaa huh. 14Judüki Labannü api ki tha, “Nü I shih tüsho thiyih ah.” Tüsho apinü anihbuh lung khinu khülang bin.
Jakobnü Rachel le Lea dünkheak Laban Tankihkhi
15Judüki Labannü Jakob ki tha, “Nü isa betsührü thsümonü nünü akeangnü I tankihba shi? I ki thaang, nü mihkhah dün tümü laba?” 16Kheakü Laban tsührübe 2 lakheah: adüjibe mung Lea, tüsho akheambe mung Rachel. 17Lea mük atsü, tüshe Rachel trungdung atsü tüsho akheahakham lakheah. 18Kheakü Jakobnü Rachel muzho; tüsho apinü tha, “Inü nü tsührü akheambe Rachel dünkheak nü kam thüne tankihbah.” 19Tüsho Labannü tha, “Alibe ju athrürü püpürü jihpü düna inü anihbe nü jihkhi atsübe ah. I lung laang.” 20Jumonü Jakobnü Rachel dünkheak kam thüne tankih, tüshe apinü alibe muzhokhinü jurü nimung anükhüh nangde alakheah.
21Judüki Jakobnü Laban ki tha, “I kilim I niube jihang, tümüde I nimungbo khiungdo, junangde inü alibe lung müyamanü.” 22Labannü ju dangpung lakhi mihtsürü alala bemukhung tüsho thünio la. 23Tüshe arelim, apinü atsührübe Lea bea lu tüsho Jakob kilim bedarü jih; tüsho apinü alibe lung müyam. 24Tüsho Labannü ayamlabe Zilpa atsührübe Lea yamlaberü thsüpü jih. 25Küyimki ayinkhikheanü, ju Lea lakheah! Tüsho apinü Laban ki tha, “Nünü I ki rhimokhi ha tümü a? Rachel dünkheak inü nü tankihkhi yung de? Dale tümüde nünü I mülapyukkhea?” 26Labannü alo, “Isa lomi ching adüjirü müngühnü akheamrü rhangshihpü yakzan müla. 27Arhangrü beyukkhi thünio bankhitshang; tüsho nünü kheaküshe kam thüne I tankihpü thsüsho akheambe she ajihbah.” 28Jakobnü jude thsü tüsho anihbe thünio bankhit. Jumonü apinü anihbuh kilim atsührübe Rachel aniube thsüpü jih. 29Tüsho Labannü api yamlabe Bilha atsührübe Rachel yamlaberü thsüpü jih. 30Jakobnü Rachel kheak she müyam, tüsho apinü Lea kheaknü Rachel alü muzho. Tüsho apinü kam thüne Laban tankihlo.
Jakob kilim Zübejihkhi Tsührübo
31Küyimki Lea mümuzhokhi Atungpuhnü angükhea, apinü anihbe nuyam khimshuhjih; tüshe Rachel a bünkeangberü lakheah. 32Jumonü Lea mübünkeangde kambah tsührü khülang zübe, tüsho anihbenü api mung Reuben#Kheahang, tsührü athrürü khülang. de ji; tümüde alibenü tha, “Atungpuhnü tsükjide I küpkhuk ngüdo. Jumonü kheakü I niubuhnü I muzhobah.” 33Jushu she alibe mübünkeangde kambah tsührü khülang zübe, tüsho tha, “Tümütüsho I mümuzhokhi Atungpuhnü sodo, apinü I kilim tsührü ha she jihdo.” Tüsho anihbenü api mung Simeon#Sodo de ji. 34Kheaküshe alibe mübünkeangde kambah tsührü khülang zübe, tüsho tha, “Kheakü ha kim ching I niubuhnü I kheak dakkihbah, tümütüsho inü api kilim tsührü 3 zübejihdo.” Jumonü api mung Levi#Dakkihdo de ji. 35Tüsho kheaküshe alibe mübünkeangde kambah tsührü khülang zübejih, tüsho tha, “Kheakü inü Atungpuh shibah.” Jumonü alibenü api mung Juda#Ashikhi de ji. Jushu a anihbe tsührü dapabah.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.